Hebreos 3:1-19

  • Jma risaca Jesús que Moisés (1-6)

    • Dios nga bizáʼ guiráʼ xixé cosa (4)

  • Chuʼnu cuidadu cadi guirá fe stinu (7-19)

    • «Pa guiníʼnebe laatu yannadxí» (7, 15)

3  Hermanu caʼ, maʼ guleechú Dios laatu, maʼ gulí laatu* para chetu guibáʼ. Nga runi laguiníʼ ique ejemplu stiʼ Jesús, hombre ni nápanu casi ti apóstol ne sumo sacerdote.*  Gúcabe fiel né Dios ni biʼniʼ nombrar laabe, cásica guca Moisés ndaaniʼ lidxi Dios.*  Peru laabe la?* jma risácabe que Moisés, purtiʼ jma risaca binni ni rucuí ti yoo que yoo ni rucuí binni ca.  Guiráʼ yoo nuu tu bicuí laa, peru ni bizáʼ guiráʼ xixé cosa nga Dios.  Guca Moisés fiel dxi biʼniʼ dxiiñaʼ ndaaniʼ lidxi Dios* ne biquiiñeʼ ni bíʼnibe riʼ para ganna binni xi chigusihuinni Dios despué,  peru Cristu la? Xiiñiʼ peʼ Dios laa ne guca fiel casi encargadu ra lidxi Bixhoze. Pa guininu sin guidxíbinu ne pa guinaaze dxiichinu esperanza ni rusiecheʼ laanu dede dxi gueeda fin la? zeeda gácanu lidxi Dios.  Nga runi, casi ná espíritu santu: «Pa guiníʼnebe laatu yannadxí,  cadi gácatu tercu casi guca ca bixhozebiidatu dxi bichiichicaʼ naa ora bitiidicaʼ naa prueba lu desiertu que.  Raqué bitiidiʼ ca bixhozebiidatu* naa prueba ne bicaalucaʼ naa, neca biiyacaʼ xi guiráʼ bineʼ 40 iza que. 10  Nga runi, bidxiicheniaʼ laacabe* ne gunieeʼ: “Siempre rúnicaʼ ni ná ladxidoʼcaʼ ne rireechucaʼ ne caʼruʼ gunibiaʼcaʼ ca neza stinneʼ”. 11  Nga runi bidxiicheʼ ne bineʼ jurar: “Qué ziuucabe lu descansu stinneʼ”». 12  Lachuu cuidadu hermanu caʼ, purtiʼ pa guixéletu de Dios ni nabani la? zaca ladxidoʼto nadxabaʼ ne zará fe stitu. 13  Naquiiñeʼ uguutu gana stobi guiráʼ dxi, ne naquiiñeʼ gúnitu ni laga nuuruʼ tiempu «yannadxí»,* ti cadi quiteʼ poder sti pecadu nin tobi de laatu ne iguidxi ladxidoʼto. 14  Purtiʼ laaca zacaanu ni maʼ gucuaa Cristu ora gueeda fin pa qué guirá confianza ni nápanu dede dxi biʼniʼ crenu laa. 15  Ne casi ná Stiidxaʼ Dios: «Pa guiníʼnebe laatu yannadxí, cadi gácatu tercu casi guca ca bixhozebiidatu* dxi bichiichicaʼ naa». 16  ¿Tuu nga ca binni guniʼné Dios peru bichiichicaʼ laabe yaʼ? ¿Ñee cadi laacabe nga guiráʼ ca binni gulee Moisés de Egipto la? 17  ¿Tuu nga ca binni bidxiichiné Dios guidubi 40 iza que yaʼ? ¿Ñee cadi laacabe nga ca binni biʼniʼ pecar ne gutiʼ lu desiertu que la? 18  ¿Tuu nga ca binni ni bi’ni’ jurarbe qué ziuu lu descansu stibe yaʼ? ¿Ñee cadi laacabe nga ca binni ni qué nuzuubaʼ diidxaʼ la? 19  Zacá ridúʼyanu qué ñanda diʼ ñuucabe lu descansu stibe purtiʼ huaxiéʼ gúpacabe fe.

Nota

O «Hermanu santo caʼ, maʼ guca invitartu».
Biiyaʼ Glosario.
Raríʼ caniʼbe de guidxi Israel.
Binni ni cayete raríʼ nga Jesús.
Raríʼ caniʼbe de guidxi Israel.
O «ca antepasadu stitu».
O «generación riʼ».
Raríʼ caniʼbe de dxi caziilaʼdxiʼ Dios.
O «ca antepasadu stitu».