Hebreos 2:1-18

  • «Guiníʼ íquenu ca cosa ni maʼ bizíʼdinu jma que biaʼ huayúninu ni» (1-4)

  • Bisaana Dios guiráʼ cosa lu náʼ Jesús (5-9)

  • Jesús ne ca biʼchiʼ (10-18)

    • «Laabe nga binni ni gulí Dios para gulabe ca xiiñiʼ» (10)

    • «Ti sumo sacerdote ni riá» (17)

2  Nga runi naquiiñeʼ guiníʼ íquenu ca cosa ni maʼ bizíʼdinu* jma que biaʼ huayúninu ni, para cadi guixélenu de laacani.  Dxiqué la? ca ángel que nga gúdxicaʼ binni xi ná Dios* ne guca cumplir ni guniʼcaʼ, peru ca binni ni qué nulabi ne qué nuzuubaʼ stiidxaʼ Dios la? gucuaacaʼ castigu ni runi merecercaʼ.  Yanna, ¿ñee natu qué zaca castigarnu pa qué gulábinu stiidxaʼ Señor ni beeda gulá laanu la? Purtiʼ primeru Señor nga guníʼ ximodo guilá binni, ne ca ni binadiaga ni guniʼbe que la? gúdxicaʼ ni laanu casi peʼ modo binadiágacaʼ ni.  Laaca bisihuinni Dios dxandíʼ ni guníʼcabe* ora bidii señal, ora biʼniʼ cosa ni ridxagayaa binni ne ora biʼniʼ gadxé gadxé clase milagru. Ne laaca bidii Dios laacabe espíritu santu para ganda gápacabe gadxé gadxé gracia* casi modo racalaʼdxiʼ.  Purtiʼ cadi ca ángel ca nga gudixhe Dios guni mandar guidxilayú ni rábinu binni chigueeda.  Sicaríʼ guníʼ ti xpinni Dios:* «¿Tuu nga binni para guietenaláʼdxiluʼ laa yaʼ? ¿O tuu nga xiiñiʼ binni guidxilayú para gápaluʼ laa yaʼ?  Bíʼniluʼ laabe casi tuuxa jma huaxiéʼ risaca que ca ángel; bíʼniluʼ laabe nandxóʼ* ne bisisácaluʼ laabe, ne gudíxheluʼ guni mandarbe guiráʼ ni bizaʼluʼ.  Ne maʼ gudíxheluʼ guiráʼ xixé ni nuu xañeebe». Ne dxandíʼ bisaana Dios guiráʼ ni lu nabe para guni mandarbe.* Neca caʼruʼ guidúʼyanu guni mandarbe guiráʼ cosa, peru maʼ bisaana Dios guiráʼ ni lu nabe.*  Laanu maʼ bidúʼyanu Jesús, ni biʼniʼ Dios laa casi tuuxa jma huaxiéʼ risaca que ca ángel, biʼniʼ laabe nandxóʼ* ne bisisaca laabe purtiʼ biʼniʼ sufrirbe dede ra gútibe. Ne gútibe pur guiráʼ xixé binni, ne zaqué bisihuinni Dios pabiáʼ nachaʼhuiʼ né binni.* 10  Bizáʼ Dios guiráʼ xixé cosa, ne bizáʼ guiráʼ ni para laa. Nga runi, para gusisaca Dios guiráʼ ca xiiñiʼ la? jneza nga biʼniʼ ra bidii lugar guni sufrir Jesús, ne zacá bihuinni biaʼsi peʼ laabe nga binni ni gulí Dios para gulabe ca xiiñiʼ.* 11  Cásica Jesús ne ca binni ni maʼ gulí la?* tobi si Bixhózecaʼ, nga runi qué rituí lú guiníʼ biʼchiʼ laacabe. 12  Casi guniʼbe: «Zanieeʼ laluʼ* nezalú ca bicheʼ, zuundaʼ canción para gusisacaʼ lii ndaaniʼ congregación». 13  Ne laaca guniʼbe: «Zapaʼ confianza laabe». Ne guniʼbe sti biaje: «¡Laguuyaʼ! Raríʼ nuaaniaʼ ca xiiñiʼ Jehová,* ca ni bidiibe naa». 14  Nga runi, cumu binni guidxilayú* nga ca «xiiñiʼ» Dios la? beeda gaca Jesús binni guidxilayú, para ganda gatiʼ. Ne pur gútibe la? zanda gunitilube Binidxabaʼ,* ni napa poder para guuti. 15  Ne bíʼnibe zacá ti maʼ cadi chuʼ tu guidxibi guendaguti, purtiʼ nuu binni de tantu ridxibi gatiʼ dede ruluíʼ maʼ naaze guendaguti laa neca nabani. 16  Cadi beeda diʼ Jesús para gacané ca ángel, sínuque beeda para gacané ca xiiñiʼ Abrahán.* 17  Ne gupa xidé gúcabe casi peʼ ca bíʼchibe para gácabe ti sumo sacerdote ni riá ne tobi ni qué rusaana de guni xhiiñaʼ Dios.* Ne zacá bidiibe xpídabe pur ca pecadu stiʼ binni ti ganda chúʼnecaʼ Dios tobi si.* 18  Cumu biʼniʼ sufrirbe ora bitiidicabe laabe lu prueba la? maʼ nánnabe ximodo gacanebe ca ni cadiʼdiʼ lu prueba.

Nota

Lit. «quíxhenu atención ca cosa ni maʼ binadiáganu».
Raríʼ caniʼbe de ley stiʼ Moisés.
O «Laaca bidii Dios testimonio».
Lit. «don».
Lit. «ti testigu».
Lit. «bidiiluʼ laabe gloria».
O «biʼniʼ sujetar Dios guiráʼ ni lu nabe».
O «biʼniʼ sujetar Dios guiráʼ ni lu nabe».
Lit. «bidii laabe gloria».
O «zacá bihuinni bondad inmerecida stiʼ Dios». Biiyaʼ Glosario, bondad inmerecida.
O «laabe nga Agente Principal para gulá ca xiiñiʼ».
O «ca ni cayaca santificar».
O «xlaloʼ».
Biiyaʼ Glosario.
Lit. «de rini ne de beela».
Lit. «Diablu». Biiyaʼ Glosario.
O «descendencia stiʼ Abrahán».
O «ti sumo sacerdote ni napa misericordia ne fiel laa». Biiyaʼ Glosario, sumo sacerdote.
O «casi ti sacrificiu propiciatorio», «casi ti sacrificiu de expiación». Biiyaʼ Glosario, expiación.