Filipenses 2:1-30

  • Gaca ca xpinni Cristu humilde (1-4)

  • Guca Cristu humilde ne gucuaa ti puestu ni jma risaca (5-11)

  • Naquiiñeʼ gúninu stipa para guilanu (12-18)

    • «Zeeda gácatu casi biaaniʼ ndaaniʼ guidxilayú» (15)

  • Guníʼ Pablo zuseendaʼ Timoteo ne Epafrodito (19-30)

2  Nga runi, pa caquiiñeʼ cuʼtu gana ti xpinni Cristu, pa caquiiñeʼ quixhedxitu ladxidóʼ né guendarannaxhii, pa chigusihuínnitu rizaaláʼdxitu laa, pa chigusihuínnitu nadxiitu ne riatu laa la?  laguni ni para gusiéchetu naa. Lagusihuinni nuutu tobi si ora quixhe íquetu gúnitu xiixa,* lagannaxhiisaa, cadi chuʼtu divididu, lachuu tobi si lu ni riníʼ íquetu.  Cadi gúnitu xiixa para si chuʼ pleitu o para guchatu bi yánnitu,* sínuque lagusihuinni humilde laatu ora guiníʼ íquetu jma risaca xcaadxi que laatu,  siempre laguizaalaʼdxiʼ binni, ne cadi guicá íquetu puru si ni caquiiñetu.  Laguiníʼ ique casi guníʼ ique Cristu Jesús.*  Neca de espíritu laabe casi Dios, qué niníʼ íquebe ñuube lugar stiʼ, ne ñácabe biaʼca laa,  sínuque bisaanabe guiráʼ ni nápabe ne gúcabe casi ti esclavu ne beeda gácabe binni guidxilayú.  Ne cadi ngasi, dxi maʼ nácabe binni, gúcabe humilde ne bizuubabe diidxaʼ dede bidiibe lugar biiticabe laabe, zacá nga guca ni, gútibe lu ti yaga.*  Ne pur nga bidii Dios laabe ti puestu ni jma risaca ne guca nachaʼhuiʼ né laabe ra bidii laabe ti nombre jma risaca lade guiráʼ nombre, 10  ti guzuxibi guiráʼ ni nuu guibáʼ ora gunadiágacaʼ labe,* zaqueca guni ca ni nuu lu guidxilayú ne ca ni nuu ndaaniʼ yu. 11  Ne ganna guiráʼ binni Jesús nga Señor, ti gusisácacaʼ Dios, Bixhózebe. 12  Hermanu ni nadxieeʼ caʼ, siempre bizuubatu diidxaʼ dxi nuaaʼ ra nuutu, ne neca maʼ qué guinneʼ ra nuutu, jmaruʼ si cuzuubatu diidxaʼ, nga runi, laguni stipa para gápatu respetu ne guidxíbitu ti ganda guilatu. 13  Purtiʼ Dios nga cudii stipa laatu, ne cayacané laatu para gápatu deseu ne poder para gúnitu guiráʼ ni riuuláʼdxibe. 14  Laguni guiráʼ cosa sin guni criticartu* ne sin tinde diidxatu, 15  zacá qué ziuu razón para guiníʼcabe mal de laatu ne qué zápatu donda, ti guihuinni maʼ xiiñiʼ Dios laatu neca nabánitu lade binni malu ni qué runi ni jneza. Zeeda gácatu casi biaaniʼ ndaaniʼ guidxilayú. 16  Laguinaaze dxiichiʼ diidxaʼ ni rudii guendanabani. Pa gúnitu zacá la? maʼ zapaʼ razón para chuaaʼ nayecheʼ dxi gueeda Cristu, purtiʼ cadi pur gana si bixooñeʼ, ne cadi pur gana si bineʼ dxiiñaʼ nadipaʼ. 17  Zeeda gacaʼ casi ti ofrenda de vinu ni rixii lu sacrificiu ne lu dxiiñaʼ ni maʼ bíʼnitu para Dios* pur fe ni nápatu, nga runi riecheʼ ne riecheniaʼ guiratu. 18  Laaca naquiiñeʼ chuʼtu nayecheʼ ne guiechenetu naa. 19  Ribezaʼ gacané Señor Jesús naa ti guseendaʼ Timoteo ra nuutu nagueendaca ne chiguuya laatu ti gatadxí ladxiduáʼ ora gabi naa ximodo nuutu. 20  Purtiʼ qué gapaʼ stobi casi Timoteo, tobi ni dxandíʼ zazaalaʼdxiʼ laatu de guidubi ladxidóʼ. 21  Purtiʼ xcaadxi la? jma ruyúbicaʼ ni galán para laacaʼ, ne qué ricá íquecaʼ gúnicaʼ ni racalaʼdxiʼ Jesucristu. 22  Peru laatu nánnatu pabiáʼ galán ejemplu ni maʼ bisaana Timoteo, purtiʼ bíʼninebe naa dxiiñaʼ casi esclavu ra biʼniʼ predicardu ca noticia galán, casi ñaca xiiñeʼ laabe. 23  Nga runi, laabe nga cá iqueʼ guseendaʼ ra nuutu casi peʼ gannaʼ xi cabeza naa. 24  Pa ná Señor la? laaca qué zandaa ziaaʼ ra nuutu. 25  Peru yanna rabeʼ caquiiñeʼ guseendaʼ hermanu Epafrodito ra nuutu, ni runeniaʼ dxiiñaʼ, ni naca soldadu stiʼ Cristu casi naa, hombre biseendatu para gacané naa ne gudii ni caquiiñeʼ; 26  racaláʼdxibe gúʼyabe guiratu ne nabé nuube xizaa* purtiʼ gúnnatu guca huarabe. 27  Zacá guca ni, guca huarabe biaʼ qué ñátisibe peru biá Dios laabe,* ne cadi laasibe biá Dios, sínuque né naa, ti cadi chuaaʼ jma triste de biaʼ nuaaʼ riʼ. 28  Nga runi nagueendaca chiguseendaʼ laabe ra nuutu, ti guiéchetu ora gúʼyatu laabe sti biaje, ne maʼ cadi chuaaʼ xizaa. 29  Laguidxaagalú laabe né stale guendanayecheʼ casi ridxaagalutu ca xpinni Señor. Ne siempre lagannaxhii binni casi laabe, 30  purtiʼ dede biaʼ qué ñátisibe ra cayúnibe xhiiñaʼ Cristu, dede guyuu xpídabe lu peligru para gucanebe naa xcuéntatu purtiʼ qué guínnitu ra nuaaʼ.

Nota

Lit. «Lagapa ti guendabiaaniʼ si».
O «ni gusihuinni egoísta laatu».
O «Lagapa actitud mental ni gupa Cristu Jesús».
O «madero de tormento». Biiyaʼ Glosario.
O «xlabe».
O «guni murmurartu».
O «serviciu santu ni maʼ bíʼnitu».
O «nuube deprimidu».
O «gupa Dios misericordia laabe».