Apocalipsis 12:1-17

  • Gunaa, hombrehuiiniʼ ne dragón (1-6)

  • Bicaalú Miguel dragón que (7-12)

    • Bilaacabe dragón que lu guidxilayú (9)

    • Nanna Binidxabaʼ maʼ huaxiéʼ tiempu napa (12)

  • Guzananda dragón que gunaa que (13-17)

12  Óraque bihuinni ti señal naroʼbaʼ guibáʼ: bihuinni ti gunaa renda gubidxa casi xhaba;* nexheʼ beeu xañee ne nuu ti corona de 12 beleguí* ique.  Nacaxiiñiʼ gunaa que, ne cumu mayaca gale xiiñiʼ la? cucaa ridxi purtiʼ guizáʼ naná ca yuubaʼ cudii laa.  Ne bihuinni sti señal guibáʼ: bihuinni ti dragón naroʼbaʼ color bele, napa gadxe ique ne chii cachu, ne nuu ti corona* lu cada íqueme.  Guxubiyú xcólame tercera parte de ca beleguí ni nuu guibáʼ, ne bisábame laacaʼ lu guidxilayú. Ne bizuhuaa dragón que nezalú gunaa ni chigapa xiiñiʼ que ne nuume listu para gábime xiiñiʼ gunaa que casi peʼ gale.  Ne gule xiiñiʼ gunaa que, ti hombrehuiiniʼ, laa nga chigapa* guiráʼ xixé guidxi né ti vara de guiibaʼ. Ne yenécabe xiiñibe ra nuu Dios ne ra nuu trono stiʼ.  Ne guyé gunaa que lu desiertu, purtiʼ raqué nuu ti lugar ni maʼ biʼniʼ preparar Dios para laa ne raqué zudiicabe ni gó 1,260 dxi.  Bizulú ti guerra guibáʼ. Bicaalú Miguel* ne ca ángel stiʼ dragón que. Ne dragón que ne ca ángel stiʼ laaca bicaalucaʼ,  peru qué ñanda ñuni ganarcaʼ, ne maʼ qué ñuuruʼ lugar para laacaʼ guibáʼ.  Ne bilaacabe dragón naroʼbaʼ que lu guidxilayú, beendaʼ yooxhoʼ ni láʼ Diablu* ne Binidxabaʼ, ni caguite guiráʼ binni guidxilayú. Bilaacabe laa lu guidxilayú, laa ne ca ángel stiʼ. 10  Ne binadiaʼgaʼ ti voz nadipaʼ de guibáʼ ne ná: «¡Maʼ bilá Dios stinu xquidxi, maʼ bihuinni poder stiʼ ne maʼ cayuni mandar Reinu stiʼ, maʼ caquiiñeʼ Cristu stibe autoridad stiʼ! Purtiʼ maʼ bilaacabe lu guidxilayú xa ni riguu xqueja* ca hermanu stinu ridxíʼ ne huaxhinni nezalú Dios stinu. 11  Biʼniʼ ganarcaʼ laabe pur rini stiʼ Dendxuhuiiniʼ que ne pur mensaje ni biʼniʼ predicarcaʼ, ne qué ñacaʼ xpídacaʼ* nin ora bidxaagalucaʼ guendaguti. 12  Nga runi, ¡guiecheʼ guibáʼ ne ca ni nabeza racá! Peru ¡gapagá si guidxilayú ne nisadóʼ laa! Purtiʼ maʼ biete Binidxabaʼ* ra nuutu ne guizáʼ cadxiichi, purtiʼ nanna maʼ huaxiéʼ tiempu napa». 13  Ora biʼyaʼ dragón que maʼ biaba lu guidxilayú la? guzananda gunaa ni gupa hombrehuiiniʼ que. 14  Peru bidiicabe gunaa que chupa xhiaa stiʼ ti bisiá naroʼbaʼ* para guipapa ne cheʼ lugar ni maʼ guca preparar para laa lu desiertu, zitu de ra nuu beendaʼ que, raqué nga chigudiicabe ni gó ti tiempu, chupa tiempu ne galaa tiempu. 15  Óraque bixheleʼ ruaa beendaʼ que ne biree casi ti guiiguʼ ndaaniʼ ruaa ne nanda ni gunaa que para guni ahogar ni laa. 16  Peru beeda guidxilayú para gacané gunaa que. Ne bixheleʼ ruaa guidxilayú ne gubi guiiguʼ ni biree ndaaniʼ ruaa dragón que. 17  Ngue runi jmaruʼ si bidxiichiné dragón que gunaa que ne biree zigucaalú ca ni biaana de lade ca xiiñibe.* Laacaʼ nga ca ni runi ni ná ca mandamientu stiʼ Dios ne biaananecaʼ dxiiñaʼ de gudiicaʼ testimonio de Jesús.

Nota

O «nacu gubidxa».
O «estrella».
Lit. «diadema».
O «laa nga chiguni pastorear».
Ni raca significar, “¿tuu nga casi Dios?”.
Biiyaʼ Glosario.
O «xa ni runi acusar».
O «qué ñannaxhiicaʼ alma sticaʼ». Biiyaʼ Glosario, alma.
Lit. «Diablu». Biiyaʼ Glosario.
O «águila naroʼbaʼ».
O «descendencia stibe».