Gálatas 3:1-29

  • Gadxé nga guni binni ni ná Ley ne gadxé nga gapa fe (1-14)

    • «Zabani binni nachaʼhuiʼ pur fe stiʼ» (11)

  • Cadi pur Ley gucuaa Abrahán promesa (15-18)

    • Xiiñiʼ Abrahán: Cristu (16)

  • Tu bidii Ley ne xi para guʼtaʼ ni (19-25)

  • Xiiñiʼ Dios ca binni napa fe (26-29)

    • Xiiñiʼ Abrahán: ca ni nuu tobi si né Cristu (29)

3  ¡Aque nahuátitu xa binni de Galacia ca’! ¿Tu gudxite laatu pue? Maca ndaʼ biene chaahuitu guti Jesucristu lu ti yaga.*  Ndiʼ si nga ni racalaʼdxeʼ guinabadiidxaʼ* laatu: ¿ñee gucuaatu espíritu pur bíʼnitu ni ná ley la? o pur fe ni nápatu lu ni binadiágatu?  ¿Ñee dede racá ridxíñatu né guendahuati stitu la? Despué de bizulutu lu ti neza stiʼ espíritu,* ¿maʼ calúxetu lu ti neza stiʼ binni la?*  ¿Ñee pur gana si guiráʼ sufrimientu ni gudíʼditu la? Nuaaʼ seguru cadi pur gana si.  Yanna, ni rudii laatu espíritu ne runi milagru ládetu, ¿ñee rúnibe ni purtiʼ zinándatu ni ná ley la? o purtiʼ nápatu fe lu ni binadiágatu?  Nga peʼ nga ni guca né Abrahán: «gúpabe fe Jehová,* ne laa biiyaʼ laabe casi ti binni nachaʼhuiʼ».*  Laatu nanna dxíchitu ndiʼ: ca ni qué rixeleʼ de fe stiʼ la? xiiñiʼ Abrahán laacaʼ.  Lu ti relatu ni zeeda lu Stiidxaʼ Dios maca biete zaca binni de guiráʼ nación nachaʼhuiʼ pur fe stiʼ, ngue runi maca dede ante gúdxibe Abrahán ca noticia galán riʼ: «Pur lii zacaa guiráʼ nación ndaayaʼ».  Nga runi, ca ni qué rixeleʼ de fe stiʼ la? ricaa ndaayaʼ cásica gucuaa Abrahán, purtiʼ gupa fe. 10  Nuu ti maldición luguiáʼ guiráʼ ca ni riguixhe confianza stiʼ lu ni rinabaʼ ley gaca, purtiʼ cá lu Stiidxaʼ Dios: «Nuu maldición luguiáʼ ca ni qué guni guiráʼ ni zeeda lu rollo ra cá Ley». 11  Rihuinni dxíchica qué zaníʼ Dios naca tuuxa binni nachaʼhuiʼ* purtiʼ si cayuni ni ná ley, purtiʼ cá lu Stiidxaʼ Dios «zabani binni nachaʼhuiʼ* pur fe stiʼ». 12  Cadi fe diʼ nga base stiʼ Ley, purtiʼ sicaríʼ cá lu Stiidxaʼ Dios: «Guiráʼ tu guni ni ná Ley la? zabani pur laani». 13  Guzíʼ Cristu laanu ne gulee laanu lu maldición stiʼ Ley ne maʼ laa gucuaa maldición que lugar stinu, purtiʼ cá lu Stiidxaʼ Dios: «Nuu maldición luguiáʼ guiráʼ ca ni gatiʼ lu yaga».* 14  Guca ni zacá para chindá ndaayaʼ ni gucuaa Abrahán ra nuu guiráʼ nación pur ni biʼniʼ Cristu Jesús, ne pur fe stinu zanda guicaanu espíritu ni biʼniʼ prometer Dios. 15  Hermanu caʼ, chitixheʼ ti ejemplu ni runi binni: ora gaca ti acuerdu,* neca ti binni si guni ni, guirutiʼ zanda guchiá ni ne cuʼ xiixa lu ni. 16  Abrahán ne xiiñiʼ* nga biʼniné Dios ti promesa. Cadi gudxi diʼ Dios laabe «ca xiiñiluʼ»,* casi ñaca stálecaʼ, sínuque guniʼbe «xiiñiluʼ»,* raríʼ caniʼbe de tobi si: Cristu. 17  Laaca cayabeʼ ndiʼ laatu: 430 iza despué guʼtaʼ Ley, peru qué nuchiani pactu* ni maca biʼniʼ Dios que ne qué nixiá promesa ni bi’ni’ que. 18  Pa ñaca rudii Dios herencia purtiʼ si cayúninu ni ná ley la? nihuinni maʼ cadi cudiibe ni pur ti promesa. Peru guca Dios nachaʼhuiʼ né Abrahán ne bidii laabe herencia pur ti promesa. 19  Yanna, ¿xi para guʼtaʼ Ley yaʼ? Guʼtaʼ ni para guihuinni paraa cuchee binni laga si gueeda xiiñiʼ Abrahán, binni bidii Dios promesa que, ne biquiiñebe ángel para bidiibe Ley que ti mediador.* 20  Cadi caquiiñeʼ diʼ ti mediador ora ti binni si cayuni ti pactu, ne ngaca nga biʼniʼ Dios, laasi biʼniʼ promesa que. 21  Yanna, ¿ñee cucaalú Ley ca promesa stiʼ Dios la? ¡Coʼ, qué ziuu dxi! Purtiʼ pa nicaa binni ti ley ni nudii laa guendanabani la? ñanda ñaca binni nachaʼhuiʼ* ra ñuni ni ná ley. 22  Bisihuinni Stiidxaʼ Dios naaze pecadu guiráʼ binni, ti ganda guicaa ca ni gapa fe Jesucristu promesa ni biʼniʼ Dios. 23  Ante gápanu fe la? cayapa ley que laanu ne naazeni laanu laga cabézanu fe ni chigusihuinni Dios. 24  Nga runi beeda gaca Ley que ti tutor* ni yené laanu ra nuu Cristu, ti ganda gácanu binni nachaʼhuiʼ* pur fe. 25  Peru yanna ra maʼ nápanu fe, maʼ cadi caquiiñenu ti tutor. 26  Yanna, maʼ guiratu nácatu xiiñiʼ Dios pur fe ni nápatu Cristu Jesús. 27  Laatu, ca ni maʼ guyuunisa casi xpinni Cristu, maʼ beeda gácatu casi Cristu.* 28  Maʼ gastiʼ judíu nin griegu, maʼ gastiʼ esclavu nin libre, maʼ gastiʼ hombre nin gunaa, purtiʼ maʼ tobi si laatu ra maʼ nuutu tobi si* né Cristu Jesús. 29  Ne pa maʼ xpinni Cristu laatu la? dxandíʼ xiiñiʼ* Abrahán laatu, ne zanda guicaatu herencia ni biʼniʼ prometer Dios Abrahán.

Nota

O «madero». Biiyaʼ Glosario.
O «nuaaʼ gannaʼ de».
Lit. «ti neza espiritual».
Lit. «ti neza carnal».
Biiyaʼ Glosario.
O «justo».
O «justo».
O «justo».
O «madero». Biiyaʼ Glosario.
O «gaca legalizar ti pactu». Biiyaʼ Glosario, pactu.
O «descendencia stiʼ».
O «ca descendencia stiluʼ».
O «descendencia stilu».
Biiyaʼ Glosario.
Diidxaʼ griegu ni guca traducir casi mediador la? riquiiñeʼ ni para guiníʼcabe de tuuxa ni racané para ganda chuʼ ti acuerdu entre chupa binni. Biiyaʼ Glosario, mediador.
O «justo».
Ti tutor nga tuuxa ni runi guiar ne rapa ti baʼduhuiiniʼ.
O «justo».
Lit. «maʼ guca vestirtu de Cristu».
O «ra nuutu unidu».
O «descendencia stiʼ».