2 Timoteo 4:1-22

  • «Biʼniʼ guiráʼ dxiiñaʼ stiʼ Dios ni maʼ gucuaaluʼ» (1-5)

    • Naquiiñeʼ guni predicarnu stiidxaʼ Dios né gana (2)

  • «Maʼ bineʼ xhiiñaʼ Dios dede biaʼ gúndatiʼ» (6-8)

  • Ra guníʼ Pablo de laa (9-18)

  • Guca despedir Pablo (19-22)

4  Zuni juzgar Cristu Jesús ca ni nabani ne ca ni maʼ guti dxi gueeda ne ora maʼ cayuni mandar lu Reinu stiʼ. Nezalube ne nezalú Dios cayuneʼ mandar lii:  biʼniʼ predicar stiidxaʼ Dios, biʼniʼ ni né stale gana* ora galán nuu tiempu ne ora nuu guendanagana; biluíʼ laacabe paraa cucheecabe,* gudixhená* laacabe ne bidii conseju laacabe né seriedad. Ne ora gúniluʼ ni la? biʼniʼ ni né paciencia, ne bi’ni’ ni casi runi ti maestru ni nanna gusiidiʼ.  Purtiʼ ziuu ti tiempu ra maʼ qué zanácabe guiziidicabe* ni jneza, sínuque zúnicabe ni ná ca deseu stícabe, ne zuyúbicabe binni gusiidiʼ laacabe ca cosa si ni riuuláʼdxicabe gánnacabe.  Zucaadiágacabe cuentu falsu ne maʼ qué zanácabe gucaadiágacabe ni dxandíʼ.  Peru lii la? guca ti binni nuu xpiaaniʼ lu guiráʼ cosa, biʼniʼ huantar guiráʼ guendanagana guidxaagaluluʼ, biʼniʼ predicar ca noticia galán ne biʼniʼ guiráʼ dxiiñaʼ stiʼ Dios ni maʼ gucuaaluʼ.*  Zeeda gacaʼ casi ti ofrenda de vinu ni rixii lu sacrificiu, ne maʼ zedadxiña dxi gateʼ.*  Maʼ bineʼ xhiiñaʼ Dios dede biaʼ gúndatiʼ,* ne qué nixeleʼ de ni runi cré ca xpinni Cristu,* maʼ bixooñeʼ lu ti carrera ne yanna maʼ yendayaʼ lu meta.  Yanna maʼ chiguicaaʼ ti premiu,* ne Señor ni runi juzgar jneza nga chigudii ni naa. Premiu riʼ nga chiguicaa ca ni runi ni jneza.* Ne zudiibe ni naa dxi ganda dxi guicaaʼ ni. Ne cadi naa siaʼ chiguicaaʼ ni, sínuque laaca zacaa guiráʼ ca ni maʼ nuu guiuba gueedabe.  Biiyaʼ gueeduʼ ra nuaaʼ nagueendaca. 10  Purtiʼ maʼ bisaana Demas naa, jma cá ique ca cosa ni nuu ndaaniʼ guidxilayú riʼ,* ne maʼ zeʼ Tesalónica; Crescente zeʼ Galacia, ne Tito zeʼ Dalmacia. 11  Maʼ Lucas si nuuné naa raríʼ. Dané Marcos ora gueeduʼ, purtiʼ zanda gacanebe naa lu xhiiñaʼ Dios. 12  Maʼ zeʼ Tíquico Éfeso, naa biseendaʼ laabe raqué. 13  Ora gueeduʼ la? dané capa ni bisaanaʼ Troas, ra lidxi Carpo, ne dané ca rollo que, peru especialmente dané ca pergaminu.* 14  Nabé bininá Alejandro naa, xa artesanu ni runi dxiiñaʼ de cobre que. Zuquixe Jehová* laabe guiráʼ ni maʼ bíʼnibe naa. 15  Guyuu cuidadu lii né hombre ca, purtiʼ nabé bicaalube ni rusíʼdinu. 16  Primé biaje yenécabe naa nezalú justicia guirutiʼ ñeeda para ñuni defender naa, guiracaʼ bisaanacaʼ naa. Rinabaʼ Dios cadi uquixe ni laacabe. 17  Peru qué nixeleʼ Señor de naa, sínuque bidii naa poder para ganda gabeʼ binni guiráʼ ni cá lu Stiidxaʼ Dios, ne gunadiaga binni de guiráʼ guidxi xi ná ni, ne bilá naa de ruaa lión. 18  Zulá Señor naa de guiráʼ cosa malu, zapa naa ne ziné naa lu Reinu stiʼ ni nuu guibáʼ. Cadi guiaanadxí de guisácabe. Amén. 19  Bidii diuxi stinneʼ Prisca ne Áquila ne xfamilia Onesíforo. 20  Biaana Erasto guidxi Corinto, peru Trófimo la? bisaanaʼ laa Mileto purtiʼ huará. 21  Biiyaʼ gueeduʼ ante ganda tiempu nanda.* Cuseendaʼ Eubulo diuxi stiluʼ, ngueca Pudente ne Lino ne Claudia ne guiráʼ ca hermanu. 22  Rinabaʼ Señor cuʼ ndaayaʼ lii pur modo riníʼ íqueluʼ.* Ne laaca rinabaʼ laa gaca nachaʼhuiʼ né guiratu.*

Nota

O «biʼniʼ ni nagueendaca».
O «biʼniʼ censurar laacabe».
O «biʼniʼ corregir».
O «gucaadiágacabe».
O «biʼniʼ cumplir ministeriu stiluʼ».
Lit. «gacaʼ libre».
O «Maʼ gudindeʼ para guneʼ xhiiñaʼ Dios».
O «ne qué nixeleʼ de fe».
O «ti corona».
O «ca justo».
O «lu era riʼ», «lu sistema riʼ». Biiyaʼ Glosario, sistema.
Ti pergaminu nga ti rollo de cueru. Biiyaʼ Glosario, pergaminu.
Biiyaʼ Glosario.
O «invierno».
Lit. «Chuʼ Señor né espíritu ni rusihuínniluʼ».
Lit. «chuʼ bondad inmerecida stiʼ né laatu». Biiyaʼ Glosario, bondad inmerecida.