2 Corintios 7:1-16

  • Gusianu laanu de guiráʼ ni runi biidiʼ laanu (1)

  • Biechené Pablo ca binni de Corinto (2-4)

  • Galán informe bedané Tito (5-7)

  • Ora riuu tuuxa triste modo ná Dios ne ora raca arrepentir (8-16)

7  Nga runi, hermanu ni nadxieeʼ caʼ, yáquexa maʼ nápanu ca promesa riʼ la? gusianu laanu de guiráʼ ni runi biidiʼ* cuerpu stinu ne espíritu stinu, ti gácanu jmaruʼ si nayá* casi ca xpínnibe ni ridxibi laabe.  Lagapa ti lugar para laadu ndaaniʼ ladxidoʼto. Qué huayúnidu xiixa cosa malu guirutiʼ ne qué huayuninadu guirutiʼ ne qué huaguítedu guirutiʼ.  Cadi canieeʼ ndiʼ para ugaaneʼ donda íquetu, purtiʼ dede ante maca gudxeʼ laatu nuutu ndaaniʼ ladxidoʼdo. Pa gátinu o pa nabáninu peru nuunu juntu.  Qué zusiguieeʼ ora guinieniaʼ laatu ne napaʼ stale razón para guiecheniaʼ laatu. Nuudxí ladxiduáʼ ne dxaʼ tipa ladxiduáʼ de guendanayecheʼ, neca cadídidu lu guiráʼ yuubaʼ riʼ.  Qué ganda gatadxí ladxidoʼdo* dede dxi bedandadu Macedonia, sínuque cadídidu guiráʼ clase yuubaʼ: cucaalúcabe laadu fuera ne ridxíbidu ora maʼ nuudu dentru.  Peru Dios, ni rusiecheʼ* ca ni cayacaná ladxidóʼ, bisiecheʼ laadu ora bedandá Tito.  Peru cadi nga si, sínuque laaca biéchedu purtiʼ gúdxibe laadu bisiéchetu laabe. Gúdxibe laadu pabiáʼ nápatu gana gúʼyatu naa, ne pabiáʼ nuutu triste ne nabé nuutu xizaa* pur naa, ne jmaruʼ si biecheʼ ora gunnaʼ ni.  Nga runi, qué riuubaʼ ladxiduáʼ pa guyuutu triste pur carta ni bicaaʼ ra nuutu que. Neca nacubi que rabeʼ pa ñannaʼ qué nucaaʼ carta que (purtiʼ biiyaʼ guluu carta que laatu triste, peru guca ni ti tiempuhuiiniʼ si),  yanna maʼ nuaaʼ nayecheʼ, peru cadi purtiʼ guyuutu triste, sínuque purtiʼ bicaani laatu gaca arrepentirtu. Guyuutu triste, peru modo ná Dios, nga runi qué ñuni sentirtu mal pur ni gúdxidu laatu. 10  Peru ora riuu tuuxa triste modo ná Dios la? rucaani laa gaca arrepentir ne rilá, ne qué rusiuubani ladxidóʼ, peru ora riuu tuuxa triste modo riuu binni guidxilayú la? rineni laa lu guendaguti. 11  Rihuínnica guyuutu triste modo riuulaʼdxiʼ Dios, nga runi bíʼnitu stipa pur gúnitu ni jneza. Maʼ bisihuínnitu qué gápatu donda, biʼniʼ sentirtu mal pur ca cosa malu ni bíʼnitu, bidxíbitu Dios, guca arrepentirtu, bíʼnitu ni ná Dios de guidubi ladxidoʼto ne biʼniʼ chaahuitu ni qué ñaca jneza. Bisihuínnitu nabánitu jneza para guca chaahuiʼ guendanagana riʼ. 12  Cadi biseendaʼ diaʼ carta ra nuutu pur binni ni biʼniʼ cometer pecadu que, ninca pur binni ni guyuu lu problema pur pecadu que, sínuque biseendaʼ ni para guuyaʼ pa rusihuínnitu nezalú Dios racaláʼdxitu gucaadiágatu laadu. 13  Nga runi yanna maʼ nexhedxí ladxidoʼdo. Peru cadi nexhedxí si ladxidoʼdo, sínuque cayéchedu purtiʼ nabé nayecheʼ nuu Tito, purtiʼ guiratu guluutu gana laabe. 14  Pa gunieeʼ bien de laatu nezalube la? cadi catuí luaʼ pur bineʼ ni. Purtiʼ cásica dxandíʼ guiráʼ ni huayábidu laatu la? zaqueca maʼ bihuinni dxandíʼ guiráʼ ca cosa galán ni gunidu de laatu nezalú Tito. 15  Ne jmaruʼ si rannaxhiibe laatu ora rietenaláʼdxibe ruzuubatu diidxaʼ, ne bidxaagalutu laabe né stale respetu. 16  Cayecheʼ purtiʼ napaʼ confianza zúnitu ni jneza lu guiráʼ cosa.

Nota

O «contaminar».
O «santo».
O «Qué ganda guidxela cuerpu stidu aliviu».
O «ni runi consolar».
O «preocupadu».