1 Timoteo 4:1-16

  • Gudixhená Pablo laacabe de ni rusiidi’ ca demonio (1-5)

  • Ximodo gúninu xhiiñaʼ Cristu jneza (6-10)

    • Caadxi si racané ejerciciu, ni jma racané nga guibáninu modo ná Dios (8)

  • «Biiyaʼ chaahuiʼ ximodo cusiidiluʼ» (11-16)

4  Ndiʼ nga ni caníʼ espíritu stiʼ Dios: ra tidiʼ tiempu ziuu tu zaxeleʼ de fe stiʼ, purtiʼ zucaadiágacaʼ mensaje ni ruluíʼ zeeda de Dios ne ni rusiidiʼ ca demonio,  ne zunadiágacabe ni de ruaa ca hombre hipócrita ni nabé rusiguii. Ne maʼ qué racaná conciencia* stiʼ ca hombre ca, purtiʼ casi ñaca maʼ gucuá ni fierru.  Riníʼ ca hombre ca cadi guichaganáʼ binni ne rábicabe laacaʼ cadi gocaʼ guendaró ni bizáʼ Dios para ca ni napa fe ne para ca ni runibiáʼ chaahuiʼ ni dxandíʼ, ti gudiicaʼ xquixe peʼ Dios.  Galán guiráʼ ni bizáʼ Dios, ne zanda guidoʼno intiisi, ne cadi gucáʼnanu xiixa guendaró pa maʼ bidiʼnu xquixe peʼ pur laani.  Zanda guidoʼno ni purtiʼ maʼ guníʼ Dios nayá ni* ne purtiʼ maʼ guca ti oración pur laani.  Ora gudiiluʼ conseju riʼ ca hermanu, zahuinni cayúniluʼ xhiiñaʼ Cristu Jesús jneza, ne dxaʼ ladxidoʼloʼ* de guiráʼ ni runi crenu ne de guiráʼ diidxaʼ sicarú ni maʼ biziidiluʼ ne ni siempre zinándaluʼ.  Cadi gucaadiágaluʼ ca cuentu ra riníʼcabe mal de Dios casi ni riníʼ ca gunaa ni maʼ nagola, sínuque bicaa ique guibániluʼ modo ná Dios.*  Purtiʼ caadxi si nga racané ejerciciu cuerpu stinu, peru ni zacané laanu lu guiráʼ cosa nga guibáninu modo ná Dios,* purtiʼ zacaanu ndaayaʼ nagasi ne lu ca dxi ni gueedaruʼ.  Dxandíʼ ni, ne guiráʼ binni zanda guni cré ni de guidubi ladxidóʼ. 10  Nga runi cayúninu dxiiñaʼ nadipaʼ ne rúninu stipa purtiʼ maʼ gudíxhenu esperanza stinu lu náʼ Dios ni nabani, ni rulá guiráʼ clase binni ne jmaruʼ si rulá ca ni naca fiel. 11  Gudxi laacabe gúnicabe guiráʼ ni ne bisiidiʼ ni laacabe. 12  Cadi gudiiluʼ lugar gúnicabe menu lii purtiʼ si nahuiiniluʼ,* sínuque biyubi modo guiniʼluʼ, gupa ti conducta galán, gunnaxhii binni, bisihuinni nápaluʼ fe, bibani jneza* ti gácaluʼ ti ejemplu para ca hermanu fiel. 13  Laga cabézaluʼ guedandayaʼ la? bicaa ique gúʼndaluʼ Stiidxaʼ Dios nezalú binni, guluu gana* laacaʼ ne bisiidiʼ laacaʼ. 14  Biquiiñeʼ gracia* ni nápaluʼ, ni maca guníʼ Dios zacaalu,* ne gucuaaluʼ ni dxi gudixhenáʼ grupu de ancianu que luguialuʼ. 15  Guníʼ ique* ca cosa riʼ; bicaa ique guiráʼ ni de guidubi ladxidoʼloʼ, ti guihuinni zeʼ dxi jma ziziidiluʼ.* 16  Guyuu cuidadu lii ne biiyaʼ chaahuiʼ ximodo cusiidiluʼ. Cadi gusaana de gúniluʼ ca cosa riʼ, purtiʼ ra gúniluʼ ni zalaluʼ ne zulaluʼ ca ni gucaadiaga lii.

Nota

Biiyaʼ Glosario.
O «maʼ guca santificar ni».
O «nuuluʼ nutridu».
Lit. «biʼniʼ entrenar para ugaandaluʼ devoción piadosa». Biiyaʼ Glosario, devoción piadosa.
O «guibáninu né devoción piadosa».
O «guni despreciárcabe lii purtiʼ si joven lii».
O «bibani né castidad».
O «bidii conseju».
Lit. «don».
O «ni maca guca profetizar zacaaluʼ».
O «Biʼniʼ meditar».
O «ziyuni progresarluʼ».