1 Timoteo 2:1-15

  • Oración para guirá’ clase binni (1-7)

    • «Ti Dios si nuu, ne ti mediador si» (5)

    • Bidii Cristu xpida ti ganda quixe para guilá guiráʼ binni (6)

  • Ni naquiiñeʼ guni ca hombre ne ca gunaa (8-15)

    • Naquiiñeʼ gacu binni lari jneza (9, 10)

2  Yanna canabaʼ laatu guni rogartu Dios ne guni orartu, guinábatu ne gudiitu xquixe peʼ laa pur guiráʼ xixé binni,  pur ca rey ne pur guiráʼ ca ni napa ti puestu risaca, ti ganda guibáninu sin guchiiñaʼ xiixa laanu ne cadi chuʼnu xizaa, ne guibáninu modo racalaʼdxiʼ Dios* ti cadi guiníʼ binni laanu.  Zacá nga riuulaʼdxiʼ Dios ne jneza ni, laa nga bilá laanu,*  ne racalaʼdxiʼ* gulá guiráʼ xixé binni ne guiziidiʼ chaahuicaʼ ni dxandíʼ.*  Purtiʼ ti Dios si nuu, ne ti mediador* si nuu entre Dios né binni: ti hombre, laa nga Cristu Jesús,  ni bidii xpida ti ganda quixe para guilá guiráʼ xixé binni.* Ne ziuu tu zudii testimonio de laani ora maʼ caquiiñeʼ gaca ni.  Nga runi gulí Dios naa para guneʼ predicar, para gacaʼ apóstol ne maestru para gusiideʼ xcaadxi guidxi ti gápacaʼ fe ne guiziidicaʼ ni dxandíʼ. Canieeʼ ni dxandíʼ, cadi cusiguieeʼ diaʼ.  Nga runi racalaʼdxeʼ cadi gusaana de guni orar ca hombre de guiráʼ ladu, ne ora guindisanacaʼ guibáʼ para guni orarcaʼ naquiiñeʼ chuʼ ladxidoʼcaʼ nayá, ne gúʼyacaʼ pa cadi cadxiichicaʼ ne pa cadi nuudindenecaʼ sti binni.  Ne ca gunaa la? naquiiñeʼ gácucaʼ lari jneza,* cadi tidisucaʼ ora guzuchaahuicaʼ* ne gúnicaʼ ni né guendabiaaniʼ,* cadi tidisucaʼ né ca peinadu de trenza sticaʼ nin ora gándacaʼ oro o perla nin ora gácucaʼ lari caru, 10  sínuque jma naquiiñeʼ gucaa íquecaʼ gúnicaʼ ni jneza, casi runi ca gunaa ni riníʼ dxandíʼ runi adorar Dios. 11  Naquiiñeʼ cuidxí ca gunaa ora maʼ cusiidicabe laacaʼ,* ne guzuubacaʼ diidxaʼ de guidubi ladxidoʼcaʼ. 12  Qué racalaʼdxeʼ diaʼ gusiidiʼ gunaa, nin gapa autoridad luguiáʼ ca hombre, sínuque naquiiñeʼ gucaadiaga ne cadi guiníʼ. 13  Purtiʼ primé guyáʼ Adán, oracaruʼ guyáʼ Eva. 14  Ne cadi Adán diʼ nga bisiguii Binidxabaʼ, sínuque Eva, ne laa nga biʼniʼ pecar. 15  Pa gapa ti gunaa xiiñiʼ la? zápani laa,* peru pa napa fe, pa nadxii binni, pa nabani nayá nezalú Dios ne pa riníʼ ique ante guni xiixa.*

Nota

O «guibáninu né devoción piadosa». Biiyaʼ Glosario, devoción piadosa.
O «Salvador stinu».
O «voluntad stiʼ nga».
O «gápacaʼ ti conocimientu exactu de ni dxandíʼ».
Biiyaʼ nota stiʼ Hebreos 8:6.
Lit. «para ti rescate correspondiente». Raríʼ caniʼbe guiaxa biaʼca ni biniti que.
O «lari apropiadu».
O «guzuchaahuicaʼ né decencia», «né modestia».
O «buen juiciu».
Raríʼ caniʼbe naquiiñeʼ cuidxí ca gunaa ndaaniʼ congregación.
Conseju ni gucuaa ca gunaa que de gápacaʼ ra lidxicaʼ ne gusiidicaʼ xiiñicaʼ la? zacaneni laacaʼ chuʼ xhiiñacaʼ, zápani laacaʼ para cadi gápacaʼ ti mala conducta.
O «pa napa buen juiciu».