1 Tesalonicenses 1:1-10

  • Ca diuxi biseendaʼ Pablo (1)

  • Bidiicabe xquixe peʼ Dios pur fe stiʼ ca hermanu de Tesalónica (2-10)

1  Naa nga Pablo. Naa ne Silvano* ne Timoteo cuséʼndadu carta riʼ ra nuutu, congregación de Tesalónica, ca ni nuu tobi si né Dios Bixhózenu ne Señor Jesucristu: Gaca Dios nacha’hui’ né laatu ne quixhedxí ladxidoʼto.*  Siempre rudiʼdu xquixe peʼ Dios pur guiratu ora ruzéʼtedu laatu lu ca oración stidu.  Qué riaandaʼ laadu dxiiñaʼ ni rúnitu pur fe ni nápatu Dios ne dxiiñaʼ ni rúnitu purtiʼ nadxiitu laa, ne rietenaláʼdxidu pabiáʼ maʼ biʼniʼ huantartu guendanagana purtiʼ nápatu esperanza Jesucristu Señor stinu. Guiráʼ nga ruzéʼtedu nezalú Dios Bixhózenu ora maʼ cayuni orardu.  Hermanu caʼ, nadxii Dios laatu ne nánnadu laabe nga gulibe laatu,  purtiʼ dxi biʼniʼ predicardu ca noticia galán ra nuutu, qué ñúnidu ni né diidxaʼ ni zeeda si de laadu, sínuque né poder stiʼ Dios né espíritu santu stiʼ ne nuudu seguru dxandíʼ ngue ni biʼniʼ predicardu ra nuutu. Laatu nánnatu pabiáʼ gucané mensaje stidu laatu.  Ne yenándatu ejemplu stidu ne ejemplu stiʼ Señor, purtiʼ gucuaatu stiidxaʼ Dios né stale guendanayecheʼ* ni rudii espíritu santu neca bidxaagalutu stale guendanagana.  Zacá maʼ beeda gácatu ti ejemplu para guiráʼ ca xpinni Cristu* de Macedonia ne de Acaya.  Cadi ndaaniʼ guidxi Macedonia ne Acaya si biʼniʼ predicartu stiidxaʼ Jehová,* sínuque guiráʼ ladu. Nga runi maʼ cadi caquiiñeruʼ gábidu binni pabiáʼ nápatu fe Dios, purtiʼ maʼ nánnacabe ni.  Purtiʼ laapecabe caníʼcabe ximodo binibiaʼdu laatu ne ximodo bisaanatu ca bidóʼ stitu para beeda gácatu esclavu stiʼ Dios ni dxandíʼ ne ni nabani, 10  ne cabézatu gueeda Xiiñibe de guibáʼ, ni gundísabe de lade gueʼtuʼ, laa nga Jesús, ni chigulá laanu ora gueeda xiana stiʼ Dios.

Nota

Sti nombre stibe nga Silas.
Lit. «Gápatu bondad inmerecida ne paz». Biiyaʼ Glosario, bondad inmerecida.
O «gozo».
O «ca creyente».
Biiyaʼ Glosario.