1 Juan 3:1-24

  • «Xiiñiʼ Dios laanu» (1-3)

  • Ca xiiñiʼ Dios ne ca xiiñiʼ Binidxabaʼ (4-12)

    • Zunitilú Jesús guiráʼ ni cayuni Binidxabaʼ (8)

  • Lagannaxhiisaa (13-18)

  • «Jma nandxóʼ Dios que ladxidoʼno» (19-24)

3  ¡Laguuyaʼ pabiáʼ nadxii Bixhózenu laanu, dede rábicabe laanu xiiñiʼ Dios! Ne nga peʼ nga laanu. Nga runi qué runibiáʼ binni guidxilayú laanu purtiʼ caʼruʼ gunibiaʼcaʼ laabe.  Hermanu ni nadxieeʼ caʼ, maʼ xiiñiʼ Dios laanu, peru caʼruʼ diʼ guihuinni ximodo chigácanu. Nánnanu zácanu casi laabe ora guihuínnibe, purtiʼ zadúʼyanu ximodo peʼ laabe.  Ne guiráʼ ni napa esperanza riʼ la? naquiiñeʼ gaca xpida nayá,* purtiʼ zacá nga laabe.  Guiráʼ tu cayuni practicar pecadu la? cucheené ley, purtiʼ ti pecadu nga gucheené binni ley.  Laatu nánnatu beeda* Jesús para cuee pecadu stinu, purtiʼ qué gapa pecadu.  Guiráʼ tu nuuné laabe tobi si,* qué runi practicar pecadu; guiráʼ tu runi practicar pecadu qué huayuuyaʼ laabe ne qué runibiáʼ laabe.  Xiiñehuiineʼ caʼ, cadi gudiitu lugar chuʼ tu quiteʼ laatu. Ni nabani jneza naca ti binni nachaʼhuiʼ cásica nachaʼhuiʼ Jesús.*  Ni runi practicar pecadu, zeeda de Binidxabaʼ,* purtiʼ dede dxi bizulú Binidxabaʼ cayuni pecar.* Nga runi beeda* Xiiñiʼ Dios para gunitilú guiráʼ ni cayuni Binidxabaʼ.*  Qué runi practicar ca xiiñiʼ Dios pecadu, purtiʼ nuu espíritu santu* stiʼ Dios luguiacaʼ, ne qué runi practicarcaʼ pecadu purtiʼ xiiñiʼ Dios laacaʼ. 10  Sicaríʼ nga zahuinni tuu nga ca xiiñiʼ Dios ne tuu nga ca xiiñiʼ Binidxabaʼ:* ni qué runi ni jneza* ne ni cadi nadxii hermanu stiʼ la? cadi zeeda de Dios. 11  Purtiʼ ndiʼ nga ni biziiditu dede dxi bizulutu: naquiiñeʼ gannaxhiisaanu; 12  cadi gácanu casi guca Caín, purtiʼ laa zeeda de Binidxabaʼ* ngue runi biiti biʼchiʼ. ¿Xiñee biitibe bíʼchibe yaʼ? Purtiʼ puru cosa malu bíʼnibe, peru bíʼchibe biʼniʼ puru cosa jneza. 13  Hermanu caʼ, cadi guidxagayaatu xiñee nanalaʼdxiʼ binni guidxilayú laatu. 14  Purtiʼ maʼ bireʼnu lu náʼ guendaguti ne maʼ biuʼnu lu guendanabani, purtiʼ nadxiinu ca hermanu stinu. Ni cadi nadxii stobi la? nuuruʼ lu náʼ guendaguti. 15  Tuuxa ni nanalaʼdxiʼ hermanu stiʼ la? naca tobi ni ruuti, ne laatu nánnatu nin ti binni ni ruuti qué zacaa guendanabani ni qué zaluxe. 16  Dxi bidii Cristu xpida* pur laanu binibiaʼnu xii nga guendarannaxhii, ne laanu laaca nuunu obligadu gudiʼnu xpídanu* pur ca hermanu stinu. 17  Pa nuu tuuxa napa ni guibaniné, ne guʼyaʼ caquiiñeʼ hermanu stiʼ xiixa ne qué guiá laabe, ¿ximodo ndiʼ guininu nadxii binni ca Dios yaʼ? 18  Xiiñehuiineʼ caʼ, cadi guinísinu nadxiinu stobi, sínuque gannaxhiinu de dxandíʼ ne gusihuínninu ni ra gacanenu. 19  Zacá zánnanu ziúpanu de ni dxandíʼ ne zacanenu ladxidoʼno guni sentir seguru* nezalú Dios, 20  dede né ora guni condenar ladxidoʼno laanu, purtiʼ jma nandxóʼ Dios que ladxidoʼno ne nánnabe guiráʼ cosa. 21  Hermanu ni nadxieeʼ caʼ, pa cadi cayuni condenar ladxidoʼno laanu la? zanda guinínenu Dios né confianza. 22  Ne intiica cosa ni guinábanu laabe zudiibe ni laanu purtiʼ zinándanu ca mandamientu stibe ne cayúninu ni riuuláʼdxibe. 23  Ne ndiʼ nga mandamientu stibe: gápanu fe Xiiñibe,* Jesucristu, ne gannaxhiisaanu casi biʼniʼ mandar Cristu laanu. 24  Nga runi, tu chinanda ca mandamientu stibe la? nuu tobi si né laabe ne laabe nuube tobi si né laa.* Ne pur espíritu ni bidiibe laanu nánnanu nuube tobi si né laanu.

Nota

O «naquiiñeʼ gaca purificar».
Lit. «guca manifestar».
O «Guiráʼ tu nuu unidu né laabe».
O «Ni runi practicar justicia naca ti binni justo cásica justo Jesús».
Lit. «Diablu». Biiyaʼ Glosario.
O «purtiʼ cayuni pecar Binidxabaʼ dede principiu que». Lit. «Diablu». Biiyaʼ Glosario.
Lit. «Nga runi guca manifestar».
Lit. «Diablu». Biiyaʼ Glosario.
Lit. «biidxiʼ».
Lit. «Diablu». Biiyaʼ Glosario.
O «ni qué runi practicar justicia».
Lit. «Maligno». Biiyaʼ Glosario.
O «alma stiʼ». Biiyaʼ Glosario, alma.
O «alma stinu». Biiyaʼ Glosario, alma.
O «zuni convencernu ladxidoʼno».
Lit. «gápanu fe lu nombre stiʼ Xiiñibe».
O «nuu unidu né laabe ne laabe nuube unidu né laa».