1 Corintios 3:1-23

  • Nabániruʼ ca xpinni Cristu de Corinto casi ná cuerpu sticaʼ (1-4)

  • Dios rusiniisi ni (5-9)

    • «Runinedu Dios dxiiñaʼ» (9)

  • Gucuinu yoo né material ni qué zacá guí (10-15)

  • «Laatu nga templu stiʼ Dios» (16, 17)

  • Para Dios qué iquiiñeʼ ni riníʼ ique binni guidxilayú (18-23)

3  Nga runi, hermanu caʼ, qué ñanda ninieniaʼ laatu casi riniʼnécabe binni nabani modo ná espíritu stiʼ Dios,* sínuque casi riniʼnécabe binni ni nabani para guni ni ná cuerpu stiʼ,* casi riniʼnécabe binni ni deruʼ caniisi* lu neza stiʼ Cristu.  Bidieeʼ laatu leche, qué nudieeʼ laatu guendaró, purtiʼ caʼruʼ chuʼtu para goto. Ne nin yanna caʼruʼ chuʼtu para goto,  purtiʼ de yanna nabánitu para gúnitu ni ná cuerpu stitu. Nuu envidia* ládetu ne ridíndetu, ¿ñee cadi zacá nga ca binni ni nabani para guni ni ná cuerpu stiʼ la? ¿Ñee cadi canazatu casi rizá binni guidxilayú la?  Purtiʼ ora guiníʼ tobi de laatu «Xpinni Pablo naa», ne stobi naʼ «Xpinni Apolos naa», ¿ñee cadi zacá nga runi tutiica binni la?  ¿Tuu nga Apolos? ¿Tuu nga Pablo? Caquiiñeʼ si Señor laadu para gúnidu xhiiñaʼ, gucanésidu laatu para biʼniʼ cretu.* Cada tobi biʼniʼ dxiiñaʼ ni bidii Señor laa.  Naa bidxiibaʼ, Apolos bizee, peru Dios bisiniisi ni,  nga runi, nin ni rudxiibaʼ ne nin ni ruzee guirutiʼ naca, sínuque Dios nga naquiiñeʼ guisaca purtiʼ laa nga rusiniisi ni.  Ni rudxiibaʼ ne ni ruzee la? tobi si laacaʼ, peru cada binni zacaa premiu stiʼ pur modo biʼniʼ dxiiñaʼ.  Purtiʼ rúninedu Dios dxiiñaʼ. Laatu nga layú ra cayuni Dios dxiiñaʼ, ti edificiu stiʼ Dios. 10  Cumu nabé guca Dios nachaʼhuiʼ né naa la?* gudixheʼ ti base casi runi ti maestru de obra ni nanna guni dxiiñaʼ, peru gadxé tu cucuí yoo luni. Peru cada tobi naquiiñeʼ guʼyaʼ ximodo cucuí yoo lu base que. 11  Maca nexheʼ ti base ne guirutiʼ zanda quixhe stobi, purtiʼ base que nga Jesucristu. 12  Yanna, ziuu tu gucuí yoo lu base que, yoo de oro, de plata, de guié sicarú, de yaga, de guixi bidxi* ne de bagazu.* 13  Peru zahuinni xi clase dxiiñaʼ biʼniʼ cada tobi dxi tidiʼ ni prueba, dxi que nga guihuinni ximodo nuu ni purtiʼ zadiʼdiʼ ni lu guí. Ne guí que nga gusihuinni xi clase dxiiñaʼ biʼniʼ cada tobi. 14  Pa guni huantar yoo ni bicuí tuuxa lu base que la? zacaa ti premiu. 15  Peru pa guicá guí yoo ni bicuí tuuxa la? zaree guniti, peru zalá; neca casi rilá tuuxa ni biree guxooñeʼ de ra cacá guí. 16  ¿Ñee qué gánnatu pa laatu nga templu stiʼ Dios ne luguiatu nga nuu espíritu stiʼ Dios la? 17  Pa gunitilú tuuxa templu stiʼ Dios, laca zunitilú Dios laa, purtiʼ maʼ guleechú Dios templu ca para laa* ne laatu nga templu ca. 18  Cadi quítetu laca laatu: pa nuu tuuxa riníʼ ique naca sabiu tiempu riʼ la?* gaca casi tobi ni qué ganna gastiʼ, ti zacá gaca sabiu. 19  Purtiʼ qué iquiiñeʼ guendabiaaniʼ stiʼ binni guidxilayú para Dios, casi cá lu Stiidxaʼ Dios: «Rinaazebe ca sabiu lu endanexhená sticaʼ». 20  Ne laaca cá lu Stiidxaʼ Dios: «Nanna Jehová* qué iquiiñeʼ ni riníʼ ique ca sabiu». 21  Nga runi, guirutiʼ cadi naquiiñeʼ guchá bi yanni pur ni runi binni, purtiʼ stitu guiráʼ cosa: 22  naca ni Pablo, Apolos, Cefas,* guidxilayú, guendanabani, guendaguti, ca cosa nuu yanna ne ca cosa ni gueedaruʼ. Stitu guiráʼ ni. 23  Ne stiʼ Cristu laatu, ne stiʼ Dios Cristu.

Nota

O «ti hombre espiritual».
O «ti hombre carnal».
O «casi xcuidi».
O «celo».
O «gúcatu creyente».
O «gupa Dios bondad inmerecida naa la?».
Lit. «heno».
O «rastrojo». Laani nga guixi ni riaana lu layu ora maʼ biasa cosecha.
Lit. «purtiʼ santo templu stiʼ Dios».
O «lu era riʼ», «lu sistema riʼ». Biiyaʼ Glosario, sistema.
Biiyaʼ Glosario.
Sti nombre stibe nga Pedro.