1 Corintios 11:1-34

  • «Lachinanda ejemplu stinneʼ» (1)

  • Xaíque stiʼ cada tobi ne guchii binni ique (2-16)

  • Modo gaca Guendaroxhi stiʼ Señor (17-34)

11  Lachinanda ejemplu stinneʼ, casi zinandaʼ ejemplu stiʼ Cristu.  Riecheniaʼ laatu purtiʼ rietenaláʼdxitu naa lu guiráʼ cosa, ne dede yanna zinándatu guiráʼ ni bisiideʼ laatu, casi peʼ modo bisiideʼ ni laatu.  Peru racalaʼdxeʼ gánnatu Cristu nga xaíque stiʼ guiráʼ hombre, ne hombre nga xaíque stiʼ gunaa ne Dios nga xaíque stiʼ Cristu.  Guiráʼ hombre ni guni orar o guni profetizar ne nuchii ique la? ti vergüenza ni para ique.  Ne guiráʼ gunaa ni guni orar o guni profetizar ne cadi nuchii ique la? ti vergüenza ni para ique, purtiʼ casi ñaca napiiruʼ ique.  Purtiʼ pa qué guchii gunaa ique la? naquiiñeʼ ugá guicha ique nachucu peʼ. Peru pa rituí lú gunaa igá guicha ique nachucu peʼ o ipiiruʼ ique la? entonce guchii ique.  Cadi naquiiñeʼ guchii hombre ique, purtiʼ bizáʼ Dios laabe casi laa ne rusihuínnibe pabiáʼ risaca Dios,* ne gunaa la? rusihuinni pabiáʼ risaca hombre.*  Purtiʼ cadi de lu xcuerpu gunaa nga biree hombre, sínuque de lu xcuerpu hombre nga biree gunaa.  Ne cadi guyáʼ diʼ hombre pur gunaa, sínuque gunaa nga guyáʼ pur hombre. 10  Ne naquiiñeʼ guchii ca gunaa ique casi ti señal de autoridad* pur ca ángel. 11  Peru ndaaniʼ congregación stiʼ Señor, caquiiñeʼ hombre de gunaa ne gunaa caquiiñeʼ de hombre. 12  Purtiʼ beeda gunaa de hombre, peru yanna rale hombre de gunaa. Peru guiráʼ xixé cosa zeeda de Dios. 13  Yanna, xi rábitu, ¿ñee jneza nga guni orar ti gunaa Dios pa cadi nuchii ique la? 14  Pur modo bizáʼ Dios laanu la? guiráʼ binni nanna nituí lú hombre pa nudii lugar nigaa guicha ique. 15  Peru risaca ti gunaa pa ziuulaʼ guicha ique purtiʼ napa gunaa guicha ique para guchiini ique. 16  Peru pa nuu tu racalaʼdxiʼ guni defender sti costumbre la? naquiiñeʼ ganna qué gápanu sti costumbre ne nin ca congregación stiʼ Dios. 17  Peru cadi cayecheniaʼ laatu pur ni chitidxeʼ laatu riʼ, purtiʼ ora raca reunirtu, lugar de ñacaneni laatu laga runinani laatu. 18  Primé la? maʼ gunnaʼ riuu división ládetu ora raca reunirtu casi congregación, ne runeʼ cré caadxi de ni caníʼcabe de laatu ca. 19  Purtiʼ napa xidé chuʼ secta* ládetu, para ganda guihuinni tuu nga ca binni runi ca cosa ni riuulaʼdxiʼ Dios. 20  Ora raca reunirtu ti lugar, qué rúnitu ni para goto Guendaroxhí stiʼ Señor. 21  Purtiʼ ora roto ni la? nuu tu laa maca gudoxhí, ngue runi nuu tu laa maʼ candaana ne nuu tu laa maʼ naxudxi. 22  ¿Ñee cadi nápatu lídxitu para goto ne guetu la? ¿O runi despreciartu congregación stiʼ Dios ne rusituitu lú ca ni qué gapa gastiʼ la? ¿Xi gabeʼ laatu yaʼ? ¿Ziecheniaʼ laatu la? Qué ziuu dxi guiecheniaʼ laatu. 23  Purtiʼ cusiideʼ laatu ni bisiidiʼ Señor naa: gueelaʼ chiguni traicionárcabe Señor Jesús, gucuaa ti pan 24  ne bidii si xquixe peʼ Dios, gundaa ni ne guníʼ: «Ndiʼ nga runi representar cuerpu stinneʼ, ni chigacané laatu. Cadi gusaana de gúnitu ndiʼ para guietenaláʼdxitu naa». 25  Ne ngaca bíʼnibe né copa que, despué de gudoxhícabe, guniʼbe: «Copa riʼ nga runi representar pactu* nacubi, ni chiguzulú ora guxhieeʼ rini stinneʼ. Cadi gusaana de gúnitu ndiʼ para guietenaláʼdxitu naa cada biaje guetu ruaa copa riʼ». 26  Purtiʼ cada biaje goto pan riʼ ne guetu ruaa copa riʼ, cayábitu binni guti Señor, hasta dxi gueedabe. 27  Nga runi, tutiica gó pan riʼ o gueʼ ruaa copa stiʼ Señor neca qué runi merecer guni ni la? zaguiʼbaʼ donda ique purtiʼ qué ñuni respetar cuerpu ne rini stiʼ Señor. 28  Primeru naquiiñeʼ guʼyaʼ chaahuiʼ ximodo nuu, oracaruʼ maʼ zanda gó pan ne gueʼ ruaa copa. 29  Purtiʼ tu gó ne gueʼ sin guiníʼ ique pabiáʼ risaca cuerpu stiʼ Señor la? cayuni condenar laca laa pa gó ne pa gueʼ. 30  Ne pur nga stale de laatu nuu débil ne huará ne stale tu maʼ guti.* 31  Peru pa niníʼ ique chaahuinu ximodo nuunu la? qué ñaca juzgarnu. 32  Peru ora raca juzgarnu la? Jehová* nga cayuni disciplinar laanu, ti cadi gaca condenarnu ora gaca condenar guidxilayú. 33  Nga runi hermanu stinneʼ caʼ, ora gaca reunirtu para guendaroxhí que, lacueza guedandá guiráʼ para góxhitu. 34  Pa nuu tu candaana la? gó ra lidxi, ti cadi guni juzgárcabe laatu ora maʼ nuutu reunidu. Peru xcaadxi cosa ni cayaca racá la? biaʼsi ora maʼ chaaʼ gune’ chaahueʼ ni.

Nota

Lit. «laabe nga gloria stiʼ Dios».
Lit. «laa nga gloria stiʼ hombre».
O «ti señal de sujeción».
Biiyaʼ Glosario.
Biiyaʼ Glosario.
Lit. «nisiaasiʼ lu guendaguti». Zándaca ni caniʼbe raríʼ nga ti guendaguti en sentidu espiritual.
Biiyaʼ Glosario.