Biiyaʼ guiraʼ ni nuu lu sitiu riʼ

¿GUYUU TU BIZÁʼ CANI LA? O MÁLASI GUYUU CANI

Modo naca guidi ladi calderón o ballena piloto

Modo naca guidi ladi calderón o ballena piloto

Ca percebe ne xcaadxi manihuiiniʼ ni riniisi xaʼnaʼ barcu nácacame ti problema para ca empresa runi negocio lu nisadóʼ. Pur laacame jma nanene ruxooñeʼ barcu ne jma riguíteni gasolina ne laaca naquiiñeʼ cueecabe ni ra nabidxi biaʼ cada chupa iza para gusiácabe ni. Cuyubi ca científicu ximodo zanda chinándacaʼ ni runi naturaleza para guni chaahuicaʼ guendanagana riʼ.

Guníʼ ique ndiʼ: Ca estudiu ni huayúnicabe de guidiladi calderón o ballena piloto rusihuínnicani stubi guidiládime riá. Daapa ládime de cresta ni rihuinni né microscopio si ne pur nga qué riguiidiʼ ca percebe ládime. Ca espaciu ni nuu lade ca cresta ca dxácani de gel ni ruuti ca bacteria ne ca guixi ni rigaa ndaaniʼ nisadóʼ. Ne ribee ládime gel ca laga cayuni mudar ládime.

Nuu ca científicu chinándacaʼ modo riá ládime ca stubi para gúnicaʼ zaqueca né ca barcu. Yanna riʼ huaquiiñecabe pintura ni qué rudii lugar iguiidiʼ manihuiiniʼ xaʼnaʼ barcu. Peru pintura ni jma huaquiiñecabe maʼ guca prohibir purtiʼ nabé runinani ca manihuiiniʼ nuu ndaaniʼ nisadóʼ. Ca investigador ca nacaʼ, para gacachaahuiʼ guendanagana riʼ la? caquiiñeʼ iguiidiʼ ti mallahuiiniʼ de guiibaʼ guidubi xaʼnaʼ barcu ca, ne xhagueteʼ de laani chuʼ caadxi huecuhuiiniʼ ra guiree ti líquidu ni qué zuniná ca manihuiiniʼ. Ora guilá nisa ni la? rinánani dede ra gácani ti gel naroonde ne rácani ti capa de biaʼ 0.7 milímetru guidubi xaʼnaʼ barcu ca. Ridiʼdiʼ ti tiempu riaba capa ca ne ca ni riguiidiʼ cueʼni. Despué, riree líquidu ca sti biaje para chaʼ sti capa de gel ni guchii guidubi xaʼnaʼ barcu ca.

Nanene ruxooñe ca barcu pur ca percebe ni riguiidiʼ xáʼnacani ne rudii dxiiñaʼ gáxhacabe laacaʼ.

Ca ensayu ni huayúnicabe ndaaniʼ ca laboratorio ca rusihuínnicani zacá ca manihuiiniʼ ca xaʼnaʼ barcu peru 100 biaje menu. Ndiʼ zacané ca empresa runi negocio lu nisadóʼ ti cadi cueecaʼ barcu ra nabidxi para guiá purtiʼ nabé caru riguíxecabe para gaca ni.

¿Xi rábiluʼ yaʼ? Pur modo naca guidiladi calderón ca, beeda gaca ni pur evolución la? o guyuu tu bizáʼ guidiládime zacá.