Ir al contenido

Ir al índice

LECCIÓN 4

¿Tú ná Jesucrist?

¿Tú ná Jesucrist?

1. ¿Tú beinché Jesús?

¿Xhi de cualidades bein guk Jesús tuby bniety zák? (MATEO 11:29; MARCOS 10:13-16)

Jesús kɨt guktini zik tuby bniety guixliú, nadoote gukni tuby spirít guibá ants niedni lo Guixliú (Juan 8:23). Jehová bein laani ne gukneni gukché irate ni nuʼ guibá ne lo Guixliú. Xhtidx Dios rní dek nani Hijo «unigénito» xhte Dios pur ni laani guk ní nadoote bein Dios sin kɨt tu niakne laani (Juan 1:14). Ne zikza láni «la Palabra» pur ni reneni xhtidx Dios. Bily Proverbios 8:22, 23, 30 ne Colosenses 1:15, 16.

2. ¿Xhi ní bied Jesús lo Guixliú?

Dios bxhel xiʼnganni lo Guixliú. Tuby dxap ni bdielá María, gup bdoo ki. Pur nii, kɨt tu bniety guixliuti guk xhtadni (Lucas 1:30-35). Laani bied lo Guixliú pur chon rson: 1) iliuʼni tupak ni ná Dios, 2) iliuʼni kun ejémpl xhtenni xha guynnu voluntá xhte Dios, mazk chuʼ galnagán, ne 3) par bdedni galnabáin xhtenni par «kueʼ dunún lo duld ne galguty». Bily Mateo 20:28.

3. ¿Xhi ní rkinnu tu kueʼ dunún lo duld ne galguty?

Tuby rescate ná zik chi rdednu mɨl par rguixnu te guynu salvar galnabáin xhte tuby de saʼn (Éxodo 21:29, 30). Nikza galguty nikza galbɨngúl kɨt gukti xhgab xhte Dios par de bniety guixliú. Nannu nde pur ni Jehová repy Adán bel kɨt ikuadiagba xhtidxni satyba. Zikni, bel kɨt niunba duld ló Dios kɨt niatyb (Génesis 2:16, 17; 5:5) Xhtidx Dios rní, dek galguty «biu» lo Guixliú pur Adán. Zeʼle inin, dek pur ni nan xiʼn Adán bdikanen duld ne galguty. Pur nii iratenu rkinnu tu kueʼ dunún laznaa duld ne galguty. Bily Romanos 5:12 ne 6:23.

Per na, ¿tú kueʼ dunún lo duld ne galguty? Chi ratynu, rguixnu duld xhtennu. Pur ni nan bniety duld, nikza tubynu kɨt cheleʼti kixh duld xhten esteruʼ de bniety. Bily Salmo 49:7-9.

4. ¿Xhi ní guty Jesús?

Jesús kɨt gukti zik dunún, laani kɨt guktini bniety duld. Pur nii kɨt gutyni pur de duld xhtenni, gutyni pur duld xhte de bniety guixliú. Chi Dios bxhel xiʼnganni par bied gatyni pur dunún, bliuʼ dek rkáz duuxhni de bniety guixliú. Ne zikza Jesús bliuʼ dek rkazni dunún chi bkuadiagni xhtidx xhtadni ne bdedni galnabáin xhtenni par kueʼ dunún laznaa duld ne galguty. Bily Juan 3:16 ne Romanos 5:18, 19.

Bguie videu ¿Xhi ní guty Jesús?

5. ¿Xhi kaguiuny Jesús tiemp reʼ?

Chi bied Jesús lo Guixliú, bziakni de bniety ni rakxú, guzbaani benguty ne gukneni de ni kaded galzí, pur ni beinni bliuʼni irate de galnazák ni guyn Galrnabee xhte Dios pur de siervos ni ikuadiagpak xhtidxni chi inabeeni lo Guixliú reʼ (Mateo 15:30, 31; Juan 5:28). Chi Jesús guty, Dios guzbain laani ne gubiʼ gukniʼ tuby spirít guibá (1 Pedro 3:18). Biepni guibá bleezni lad ldí xhte xhtadni, axht chi xhtadni bded Galrnabee laani par inabeeni lo Guixliú (Hebreos 10:12, 13). Nadxi reʼ kanabeeni guibá zik Rey xhte Galrnabee xhte Dios, ne de discípulos xhtenni kagüene de bniety de didx zák reʼ lo idubte Guixliú. Bily Daniel 7:13, 14 ne Mateo 24:14.

Kun Galrnabee ni bded Dios laani, zed guiub Rey poderoso reʼ ilduxh kun de bniety ni ná mal ne kun de galzí ni kayundeb. Irate de ni chindilazpak Jesús ne ni rkuadiág xhtidxni zbaindeb nasáʼ lo Guixliú reʼ, chi gakni tuby paraíso. Bily Salmo 37:9-11.