Ir al contenido

Ir al índice

Testigu xhte Jehová

Select language ditsa

 LECCIÓN 6

¿Lá zbiʼ ibaín de bniety ni a guty?

¿Lá zbiʼ ibaín de bniety ni a guty?

1. ¿Lá zbiʼ ibaín de bniety ni a guty?

Chi Jesús bzugua lo Guixliú, xhamiguni Lázaro guty. Laab gubáin tuby guɨdx ni lá Betania, tuby guɨdx ni ná gax Jerusalén. Chi bzein Jesús rik a guk tap dxi guty Lázaro. Marta ne Maria de bzaan togul zuguanedeb laani, Jesús güe rut ná baa, ne tuby ratzi bxhágsaʼ zien bniety rik. ¿Lá ruynbiú xhgab xhati bkitlaaz Marta ne María chi Jesús guzbáin Lázaro? Bily Juan 11:21-24, 38-44.

Lo de didx zák ni ka laʼn xhtidx Dios rní dek zuʼ dxi ibáin de bniety ni a guty. Marta nanpakba dek Jehová rní dek zbiʼ ibáin de bniety lo Guixliú reʼ. Bily Job 14:14, 15.

2. ¿Kalí nuʼ de bniety ni a guty?

Dios repy Adán: «kun guxhul guku ne guxhul gaku stuby» (GÉNESIS 3:19)

De bniety guixliú guk kun «guxhul» (Génesis 2:7; 3:19). Kɨt naptinu tuby espirít ni kalí rie chi ratynu. Nánu bniety lo guixliú, ne kɨtruʼ kaliti bainnu chi a gutynu. Kɨt xhi xhgabti ruynnu, chi a gutynu. De ni a guty kɨt rzientideb kɨt rienlotideb ne kɨt xhi gakti guyndeb. Chi guzbáin Jesús Lázaro, laab kɨt bgüetyb didx kalí guub o kalí bzuguab. Bily Eclesiastés 9:5, 6, 10.

Nuʼ de bniety ruyndeb xhgab dek nuʼ tuby infierno rut Dios ruyn kastigu de bniety ni a guty, per nde ná tuby didxhiú. Zik ní a bguien de bniety ni a guty kɨt xhi xhagbti ruyndeb, ne kɨt xhi cheleʼti guyndeb. Pur de didx ni rliuʼ de  bniety dek Dios ruynni kastigu de togul lo baly kɨt didxlíti náy, de didx reʼ rniyáa Dios ne kɨt riulaaztini guynnu xhgab zik, naxháb ná nde par laani. Bily Jeremías 7:31.

Bguie videu ¿Kalí nuʼ de bniety ni a guty?

3. ¿Á zak ininen de bniety ni a guty?

De bniety ni a guty kɨt rnitideb ne kɨt rindiagtideb (Salmo 115:17). Per nuʼ de ángl ni ná malduuxh rninedeb de bniety ne rakdeb zik de bniety ni a guty (2 Pedro 2:4). Pur nii, Jehová rdxichduuxhni chi rkaznu ininenu de bniety ni a guty. Bily Deuteronomio 18:10, 11.

4. ¿Tú de ni ibiʼ ibáin?

Millón de bniety ni a guty zbiʼ ibaindeb lo Guixliú reʼ. Axht de bniety ni kɨt beynbeti Jehová ne beindeb ni ná mal zbíʼ ibaindeb. Bily Hechos 24:15.

De bniety ni ibiʼ ibáin zak izeddeb ni ná didxlí xhte Dios, zeleʼ gapdeb fe en Jesús ne zak ikuadiagdeb xhtidxni (Apocalipsis [Revelación] 20:11-13). Bel guyndeb zik, nasáʼ ibaindeb ne kɨt chuʼti dxi gatydeb. Bily Juan 5:28, 29.

5. ¿Xhi rzednu de Jehová pur ni izbainni de bniety?

Ni ibiʼ ibáin de bniety rliuʼ dek rkáz ne rlazlaaz Jehová dunún. Xhtios Jehová bxhel xiʼnni Jesús par beddedni galnabáin xhtenni pur dunún, nanpaknu dek zbíʼ ibáin de bniety ni a guty. Labiú aʼ, ¿tú rkazbiú iguiebiú ibiʼ ibáin? Bily Juan 3:16 ne Romanos 6:23.