跳到內容

跳到副菜單

跳到目錄

守望台(研讀版)  |  2017年9月

 人物​生平

同靈性成熟嘅人一齊工作係我嘅福分

同靈性成熟嘅人一齊工作係我嘅福分

20​世紀​30​年代​中期,我​爸爸​詹姆斯·辛克萊​同​媽媽​潔西​搬​到​紐約市​嘅​布朗克斯​區。佢哋​嘅​一​位​新​朋友​叫​做​威利·史奈頓,同樣​都​嚟自​蘇格蘭。啱啱​認識​冇​幾​分鐘,佢哋​三​個​就​開始​提​到​自己​嘅​屋企人。呢​件​事​就​發生​喺​我​出世​嘅​前​幾​年。

媽媽​同​威利​講,喺​第一次世界大戰​爆發​之前​冇幾耐,佢​嘅​爸爸​同​哥哥​因為​漁​船​喺​北​海​撞​到​水雷​而​葬​身​大海。威利​就​對​媽媽​講:“你​爸爸​而家​喺​地獄!”威利​係​一​位​耶和華見證人,而​呢個​就係​媽媽​第​一​次​聽到​嘅​聖經​真理,當時​佢​覺得​好​震驚。

威利·史奈頓​同​太太​莉詩

威利​所​講​嘅​令​媽媽​好​反感,因為​媽媽​知道​自己​嘅​爸爸​係​一​個​好人。但係,威利​跟住​話:“如果​我​同​你​講,耶穌​都​去​過​地獄,噉​你​嘅​心​會​唔​會​覺得​舒服​啲​呢?”媽媽​記得​教會​嘅​信​條​話,耶穌​落​咗​去​地獄,之後​喺​第​三​日​復活。於是​佢​心​諗:“如果​地獄​係​一​個​烈​火​熊熊、折磨​壞人​嘅​地方,點解​耶穌​會​去​嗰度​嘅?”呢個​激​發​咗​媽媽​對​聖經​真理​嘅​興趣。好​快,佢​就​開始​參加​布朗克斯​會衆​嘅​聚會,之後​喺​1940​年​受浸。

我​同​媽媽,後來​我​同​爸爸

嗰時,基督徒​父母​並​冇​受​到​特别​嘅​鼓勵​去​同​仔女​學習​聖經。媽媽​去​參加​週​末​嘅​聚會​同​傳道​工作​嘅​時候,就​由​爸爸​嚟​負責​照顧​啱啱​識​行​路​嘅​我。幾​年​之後,我哋​一​家​三​口​開始​一齊​參加​聚會。媽媽​好​熱心​噉​傳講​好消息,仲​同​幾​個​對​真理​感​興趣​嘅​人​討論​聖經。有啲​聖經​學生​住​得​好​近,所以​有​一​段​時間,媽媽​會​同​佢哋​幾​個​一齊​討論。學校​放​假​嗰時,我​會​同​媽媽​一齊​傳道。因為​噉,我​學​到​好多​聖經​知識,仲​學識​點樣​教導​人。

好​可惜,我​好​細個​嗰陣​對​真理​冇​咩 體會,亦​都​冇​重視​學​到​嘅​聖經​知識。但係​從​12​歲​開始,我​就​成為​王國​傳道員,經常​參與​傳道​工作。我​16​歲​嗰​年​獻身​俾​耶和華,喺​1954​年​7​月​24​日​嘅​加拿大​多倫多​大會​受浸。

喺​伯特利​服務

喺​會衆​裏面,一啲​曾經​係​伯特利​家庭​成員​嘅​弟兄​俾​咗​我​好​大​嘅​影響。佢哋​講解​聖經​真理​嘅​技巧​令​我​印象​深刻。雖然​學校​嘅​老師​鼓勵​我​讀​大學,不過​我​嘅​目標​係​去​伯特利​服務。於是​喺​多倫多​嘅​大會,我​遞​交​咗​伯特利​申請​表。喺​1955​年​紐約市​洋基​體育場(楊基​運動場)嘅​大會,我​再​一​次​遞​交​申請​表。冇幾耐​之後,喺​1955​年​9​月​19​日,我​就​受​到​邀請,開始​喺​布魯克林​嘅​伯特利​工作,當時​我​17​歲。喺​伯特利​嘅​第​二​日,我​就​開始​喺​亞當士街​117​號​嘅​裝訂部​工作。我​要​操作​配頁機,將​啲​書​頁​按照​每​32​頁​一​份​噉​嚟​準備​好,然後​等​另​一​部​機器​去​裝​訂​成​書。

17​歲,我​開始​喺​布魯克林​嘅​伯特利​服務

由於​我​識得​打​字,喺​裝訂部​工作​咗​大概​一​個​月​之後,就​被​分配​到​雜誌部。嗰時,有​好多​人​訂​閲《守望台》同《警醒!》雜誌。弟兄​姊妹​會​將​呢啲​人​嘅​名​同​地址​輸​入​一​部​機器,再​通過​機器​打​喺​金屬​片​上面。幾​個​月​後,我​又​去​咗​裝運部​工作。克勞斯·延森​係​裝運部​嘅​監督,佢​問​我​願唔願意​協助​貨車​司機,將​嗰啲​供應​俾​全​世界​嘅​書刊​從​總部​運​去​碼頭。我​亦​都​要​將​一​袋​袋​嘅​雜誌​送​到​郵局,寄​去​美國​各​地​嘅​會衆。延森​弟兄​認為​呢啲​體力​工作​對 我​有益。嗰時​我​骨瘦如柴,體​重​只​有​57​公斤(125​磅)。既​要​去​碼頭​又​要​跑​郵局,噉樣​使​我​嘅​體質​增强​咗​好多。延森​弟兄​的確​知道​乜嘢​對​我​係​最好​嘅!

雜誌部​亦​都​負責​提供​足够​嘅​雜誌​俾​各​地​會衆。我​喺​呢個​部門​工作​嘅​時候​了解​到,由​布魯克林​印刷​同​運送​去​世界​各​地​嘅​雜誌​有​好多​種​語言。呢啲​語言,大部分​我​連​聽​都​未​聽​過,但係​我​好​開心​知道,成千上萬​嘅​雜誌​被​分發​到​遙​遠​嘅​地方。當時​我​唔​知道,自己​將來​會​有​榮幸​探訪​呢啲​地區。

我​同​羅伯特·沃倫、查爾斯·莫洛漢、唐·亞當斯​嘅​合照

1961​年,我​被​委派​到​司庫​辦事處​工作,當時​格蘭特·蘇特​係​呢個​部門​嘅​監督。喺​呢個​部門​工作​咗​幾​年​之後,有​一​日,負責​督導​全球​工作​嘅​内森·諾爾​叫​我​去​佢​嘅​辦公室。佢​同​我​講,佢​辦公室​嘅​一​個​弟兄​喺​一​個​月​内​會​參加​王國​職務​訓練班,之後​要​調​去​傳道部​工作。於是​我​接​手​呢個​弟兄​嘅​職務,同​唐·亞當斯​一齊​工作。原來​唐​就係​1955​年​大會​接收​我​份​伯特利​申請​表​嘅​嗰個​弟兄。喺​同​一​個​辦公室​工作​嘅​仲​有​另外​兩​個​弟兄,佢哋​就係​羅伯特·沃倫​同​查爾斯·莫洛漢。我哋​四​個​一齊​工作​嘅​時間​超過​50​年。我​真​係​好​開心​可以​同​呢啲​咁​忠心​咁​屬靈​嘅​弟兄​一齊​工作!(詩篇​133:1

1970​年​探訪​委内瑞拉,呢個​係​我​嘅​第​一​次​海​外​特訪

從​1970​年​開始,每​年​或者​每​兩​年,有​幾​個​星期​我​都​會​受​到​委派​去​探訪​守望台社​嘅​唔同​分部,當時​叫​做​海​外​特訪。呢 個​工作​包括​探訪​世界​各​地​嘅​伯特利​家庭​同​特派​傳道員,提供​屬靈​鼓勵,同埋​查閲​分部​嘅​記錄。有​機會​認識​早期​嘅​基列​學校​畢業​生,睇到​佢哋​依然​忠心​噉​堅守​崗位,我​真​係​好​開心!我​好​榮幸​去​過​90幾​個​國家​探訪,呢個​工作​帶​俾​我​好​大​嘅​喜樂。

好​開心​從事​海​外​特訪​工作,探訪​超過​90​個​國家!

揾​到​忠心​伴侶

所有​喺​布魯克林​嘅​伯特利​家庭​成員,都​被​委派​到​紐約市​嘅​各​群​會衆。我​被​委派​嘅​會衆​屬於​布朗克斯​區。呢個​區​嘅​第​一​個​會衆​不斷​發展,後來​分​成​咗​好多​個。我​參加​嘅​就係​最初​嘅​會衆,叫​做​上​布朗克斯​會衆。

60​年代​中期,一​個​拉脱維亞​家庭​搬​咗​嚟​我​嘅​會衆,佢哋​係​喺​布朗克斯南​接受​真理​嘅。利維婭​係​呢個​家庭​嘅​大​女,佢​高​中​一​畢業​就​做​正​規​先驅。幾​個​月​之後,佢​就​搬​去​需要​更​多​王國​傳道員​嘅​馬薩諸塞​州。我​開始​寫​信​俾​佢,同​佢​傾​吓​會衆​最近​發生​嘅​事,而​佢​就​會​回信​同​我​講​翻​喺​波士頓​嘅​傳道​成果。

我​同​利維婭

幾​年​後,利維婭​被​委派​做​特别​先驅。佢​好想​繼續​擴展​服務,盡力​為​耶和華​做​更​多,於是​申請​去​伯特利,而且​喺​1971​年​受​到​邀請。我​覺得​呢個​就係​耶和華​俾​我​嘅​提示!1973​年​10​月​27​日,我哋​結婚​當日,好​榮幸​由​諾爾​弟兄​為​我哋​發表​婚禮​演講。箴言​18:22​話:“揾​到​賢​妻​嘅​人,就係​揾​到​美​福,又​得​蒙​耶和華​嘅​美意。”我​同​利維婭​好​榮幸​一齊​喺​伯特利​服務​咗​超過​40​年。而家​我哋​繼續​支持​布朗克斯​嘅​一​個​會衆。

同​基督​嘅​弟兄​並肩​工作

同​諾爾​弟兄​一齊​工作​的確​係​一​個​好​大​嘅​福分。佢​一直​竭盡​全力​為​真理​服務,亦​都​好​感激​全球​特派​傳道員​所​付出​嘅​努力。好多​特派​傳道員​喺​自己​受​委派​嘅​地區​係​第​一​批​見證人。令​人​傷心​嘅​係,諾爾​弟兄​喺​1976​年​患​上​癌症。有​一​次,佢​瞓​喺​病​床​上,叫​我​將​一啲​準備​要​印刷​嘅​資料​讀​俾​佢​聽。佢​請​我​叫​埋​弗德烈克·法蘭兹​過嚟​一齊​聽。之後​我​先​知道​法蘭兹​弟兄​嘅​視​力​越來越​差,所以​諾爾​弟兄​會​用​好多​時間​嚟​讀​資料​俾​佢​聽。

1977​年,同​丹尼爾·薛力克​以及​佢​太太​瑪蓮娜​一齊​做​海​外​特訪

諾爾​弟兄​喺​1977​年​去世。嗰啲​認識​同​愛​戴​佢​嘅​弟兄​姊妹,知道​佢​忠心​完成​地上​嘅​人生​旅程,都​深​感​安慰。(啟示錄​2:10)之後,由​法蘭兹​弟兄​嚟​督導​全球​嘅​工作。

 喺​嗰時,我​係​米爾頓·韓素爾​嘅​秘​書。佢​同​諾爾​弟兄​一齊​工作​咗​幾十​年。韓素爾​弟兄​同​我​講,而家​我​喺​伯特利​最​重要​嘅​工作,就係​盡力​協助​法蘭兹​弟兄。我​經常​將​一啲​準備​要​印刷​嘅​資料​讀​俾​法蘭兹​弟兄​聽。法蘭兹​弟兄​有​驚人​嘅​記憶​力,而且​佢​能够​將​自己​嘅​專注​力​完全​集中​喺​聽到​嘅​資料​上。1992​年​12​月,法蘭兹​弟兄​去世。可以​一直​協助​佢​直到​佢​完成​地上​嘅​旅程,真​係​俾​咗​我​好​大​嘅​喜樂!

哥倫比亞山道​124​號,我​喺​呢度​工作​咗​幾十​年

我​喺​伯特利​嘅​61​年​過​得​好​快。我​嘅​父母​直到​去世​都​一直​對​耶和華​保持​忠心。我​好​期待​將來​可以​喺​新世界​迎接​佢哋。(約翰福音​5:28,29)呢個​舊​嘅​事物​制度​所​提供​嘅​任何​嘢,點​都​比​唔​上​可以​同​忠心​嘅​弟兄​姊妹​一齊,為​上帝​全球​子民​服務​嘅​殊榮。從事​咗​咁​多​年​嘅​全時​服務,利維婭​同​我​都​可以​衷心​噉​講,“耶和華​所​賜​嘅​喜樂,就係[我哋]嘅​力量”。(尼希米記​8:10

喺​上帝​嘅​組織​入面,冇​人​係​必​不可​少​嘅。無論​如何,傳講​王國​真理​嘅​工作​都​會​繼續​進行​落去。多​年​來,同​咁​多​信心​堅定​嘅​忠心​弟兄​姊妹​並肩​工作,係​好​大​嘅​喜樂​同​殊榮。大多數​並肩​工作​過​嘅​受膏基督徒​都​已經​唔​喺​地上​嘞,但係​我​好​感激​耶和華​俾​機會​我,可以​成為​呢啲​靈性​成熟​嘅​人​嘅​同工。