跳到內容

跳到副菜單

跳到目錄

守望台(研讀版)  |  2017年8月

上帝所賜嘅平安超越人嘅理解

上帝所賜嘅平安超越人嘅理解

“上帝​就​一定​會​賜​你哋​平安,超越​人​所​能​理解​嘅。……可以​守護​你哋​嘅​内心”——腓立比書​4:7

唱​詩​76,141​首

1,2. 喺​腓​立​比​發生​咗​乜嘢​事​之後,保羅​同​西​拉​俾​人​韞​咗​入​監?(請​睇​吓​課文​開頭​嘅​圖片)

而家​正​係​半​夜,喺​腓​立​比​從事​海​外​傳道​工作​嘅​保羅​同​西​拉​俾​人​韞​喺​監獄​嘅​最​深​處。佢哋​雙​腳​俾​人​用​枷​緊​緊​鎖住,背脊​啱啱​俾​人​打​完​仲​隱隱​作​痛。(使徒行傳​16:23,24)事情​轉​變​得​真​係​快!冇​任何​警告​嘅​情況​下,佢哋​俾​一​班​暴​民​拖​到​市集​廣​場,突然​間​要​面對​一​場​臨​時​審訊。佢哋​俾​人​扯爛​啲​衫,又​俾​人​用​長​棍​打​到​遍​體鱗傷。(使徒行傳​16:16-22)實在​太​唔​公平​喇!作為​一​個​羅馬​公民,保羅​有​權​得到​正式​嘅​審訊。 *

2 監獄​四​周圍​都​黑嘛嘛,保羅​坐​喺​度​諗​翻​當​日​發生​嘅​事。佢​諗​到​腓​立​比​人​嘅​情況。喺​佢哋​嘅​城市​連​一​個​猶太​會堂​都​冇,同​佢​之前​去​過​嘅​好多​城市​都​唔​一樣。實際​上,喺​腓​立​比​嘅​猶太人​要​做​崇拜,就​需要​聚集​喺​城​外​嘅​河​邊。(使 徒​行​傳​16:13,14)申請​成立​會堂​最​少​需要​10​個​猶太​男子,腓​立​比​係咪​連​10​個​猶太​男子​都​冇​呢?好​明顯,腓​立​比​人​以​羅馬​公民​嘅​身份​為​榮,就算​佢哋​只係​享有​部分​嘅​公民​權,或者​只係​做​二​等​公民,都​覺得​好​自豪。(使徒行傳​16:21)會​唔​會​因為​噉,佢哋​完全​冇​諗​過​保羅​同​西​拉​呢​兩​個​猶太人​會​係​羅馬​公民​呢?無論​點​都​好,總​之​保羅​同​西​拉​受​到​唔​公平​嘅​對待,俾​人​韞​咗​入​監。

3. 點解​保羅​對​俾​人​韞​入​監​呢​件​事​感到​困惑?但係​佢​表現​出​點樣​嘅​態度?

3 呢個​時候,保羅​可能​都​諗​翻​前​嗰​幾​個​月​發生​嘅​事。之前​喺​愛​琴​海​另​一邊​嘅​小​亞​細​亞,好多​次​聖靈​都​阻止​佢​進入​某​啲​地區​傳道。睇嚟,聖靈​指引​緊​佢​去​其他​地方。(使徒行傳​16:6,7)不過,到底​去​邊度​呢?喺​特洛阿斯​嘅​時候,保羅​通過​異象​得到​答案。異象​入面​有​人​懇​求​保羅​話:“請​嚟​馬​其​頓”。得到​耶和華​咁​清晰​嘅​指示,保羅​即刻​接受​邀請。(請​讀​使徒行傳​16:8-10但係,跟住​發生​咗​咩​事?佢​去​到​馬​其​頓​之後​冇幾耐,就​俾​人​韞​咗​入​監!點解​耶和華​容許​噉​嘅​事發​生​喺​保羅​身上​呢?佢​要​坐​幾​耐​監​呢?雖然​保羅​唔​知​呢啲​問題​嘅​答案,佢​仲係​繼續​保持​信心​同​喜樂。保羅​同​西​拉​開始“唱​歌​讚美​上帝”。(使徒行傳​16:25)佢哋​嘅​内心​同​頭腦​都​因為​上帝​所​賜​嘅​平安​而​得到​安慰。

4,5. (甲)我哋​嘅​情況​同​保羅​嘅​可能​有​乜嘢​相似​嘅​地方?(乙)保羅​嘅​情況​有​乜嘢​令​人​意想唔到​嘅​轉​變?

4 喺​生活​當中,你​可能​覺得​自己​嘅​情況​有時​同​保羅​嘅​好​相似。或者​你​已經​按照​上帝​聖靈​嘅​指引​去​做,不過​事情​嘅​發展​唔​係​好似​你​期待​嘅​噉。可能​你​要​面對​一啲​挑戰,又​或者​你​喺​新​環境​生活​要​作出​好​大​嘅​改變。(傳道書​9:11)諗​翻​轉​頭,你​都​可能​會​問,點解​耶和華​容許​某​啲​事發​生。如果​你​有​同樣​嘅​困惑,乜嘢​可以​幫助​你​全心​信賴​耶和華,繼續​保持​忍耐?為咗​揾​出​答案,等​我哋​再​睇​翻​保羅​同​西​拉​嘅​記載。

5 就​喺​保羅​同​西​拉​唱​讚美​歌​嘅​時候,發生​咗​一連串​佢哋​意想唔到​嘅​事。突然​間​發生​大​地震,監獄​嘅​門​都​打開​晒,所有​囚​犯​嘅​鎖鐐​都​鬆​開​咗,保羅​制止獄卒​自殺,獄卒​同​佢​全​家​都​受​咗​浸。第​二​日​天​一​光,民​政官​就​叫​執​法人​員​放​咗​保羅​同​西​拉,要​佢哋​安靜​噉​離開。後來,民​政官​知道​咗​保羅​同​西​拉​係​羅馬​公民,意識​到​自己​犯​咗​大​錯,於是​就​親自​護​送​佢哋​兩​個​離開。不過,保羅​同​西​拉​要求​先​去​同​啱啱​受浸​嘅​姊妹​呂底亞​道​别,仲​利用​呢個​大​好​機會​去​强化​弟兄。(使徒行傳​16:26-40)呢​一切​轉​變​得​真​係​快​啊!

“超越​人​所​能​理解​嘅”

6. 而家​我哋​會​討論​同​留意​乜嘢?

6 我哋​從​呢啲​事​學​到​乜嘢​呢?耶和華​能够​做​出​我哋​意想唔到​嘅​事,所以​我哋​面對​考驗​嘅​時候​唔​需要​過度​憂慮。保羅​後來​寫​咗​封​信​俾​腓​立​比​嘅​弟兄,提​到​憂慮​同​上帝​所​賜​嘅​平安。從​呢​一​點​睇​得​出,呢啲​經歷​肯定​令​保羅​印象 深刻。等​我哋​先​討論​吓​保羅​喺​腓立比書​4:6,7(請​讀)寫​嘅​話。然後,我哋​再​留意​其他​聖經​例子,睇​吓​耶和華​點樣​用​我哋​意想唔到​嘅​方式​嚟​解決​難題。最後,我哋​會​考慮​吓​耶和華​所​賜​嘅​平安​可以​點樣​幫助​我哋​保持​忍耐,全心​信賴​佢。

7. 保羅​寫​信​俾​腓​立​比​嘅​弟兄​嗰時,强調​咗​啲​乜嘢?我哋​可以​從​佢​嘅​話​學​到​乜嘢?

7 腓​立​比​嘅​弟兄​讀​保羅​寫​俾​佢哋​嘅​信​嗰陣,一定​記得​發生​喺​保羅​同​西​拉​身上​嘅​事,亦​都​唔​會​忘記​耶和華​點樣​出​人​意​料​噉​幫助​佢哋。保羅​想​教導​佢哋​乜嘢​呢?簡單​嚟​講,就係​唔使​擔心。只要​禱告,你​就​會​得到​上帝​所​賜​嘅​平安。值得​留意​嘅​係,上帝​所​賜​嘅​平安​係“超越​人​所​能​理解​嘅”。呢​句​話​係​咩​意思​呢?有啲​聖經​譯​者​將​呢​句​話​譯​成“超​出​我哋​嘅​一切​想像”或者“超越​人類​嘅​所有​計劃”。其實,保羅​嘅​意思​係,上帝​所​賜​嘅​平安​遠遠​超過​我哋​能够​想像​嘅。雖然​從​我哋​嘅​角度​可能​睇​唔​到​出路,不過​耶和華​可以,而且​佢​會​用​我哋​意想唔到​嘅​方式​幫助​我哋。(請​讀​彼得後書​2:9

8,9. (甲)雖然​發生​喺​保羅​身上​嘅​事​好​唔​公平,但係​最終​有​乜嘢​好​結果?(乙)點解​腓​立​比​嘅​弟兄​可以​相信​保羅​嘅​話?

8 腓​立​比​嘅​弟兄​諗​翻​起​呢​十​年​來​發生​嘅​事,一定​大​受​强化。保羅​寫​得​好​啱。雖然​耶和華​容許​唔​公平​嘅​事發​生​喺​保羅​身上,但​因為​噉,傳講​好消息​嘅​工作​最終​可以“通過​法律​途徑​確​立”。(腓立比書​1:7)可能​因為​保羅​係​羅馬​公民,所以,就算​民​政官​想​對​付​喺​腓​立​比​新​成立​嘅​基督徒​會衆,都​要​諗​清​諗​楚。亦​都​因為​噉,保羅​同​西​拉​離開​腓​立​比​之後,佢哋​嘅​同伴​路加​醫生​可以​繼續​留​低,為​當地​新​近​受浸​嘅​基督徒​提供​更​多​幫助。

9 冇錯,腓​立​比​嘅​弟兄​閲讀​保羅​嘅​信​嗰陣,佢哋​清楚​知道​呢啲​話​並​唔​係​嚟自​一​個​只係​識得​講​理​論,其實​冇​乜​實際​經驗​嘅​學者。事實​上,保羅​親身​經歷​咗​好多​艱難​險阻,但係​佢​依然​顯​出​有​上帝​所​賜​嘅​平安。保羅​寫​呢​封​信​嘅​時候,正​喺​羅馬​遭受​軟禁,而​上帝​所​賜​嘅​平安​一直​守護​住​佢。(腓立比書​1:12-14;4:7,11,22

“任何​事​都​唔​好​憂慮”

10,11. 當​我哋​過度​憂慮​一​件​事​嘅​時候,應該​點樣​做?我哋​可以​有​乜嘢​合理​嘅​睇法?

10 乜嘢​可以​幫助​我哋​對​任何​事​都​唔​會​過度​憂慮,享有​上帝​所​賜​嘅​平安​呢?保羅​對​腓​立​比​人​講​嘅​話​向​我哋​表明,禱告​係​解決​憂慮​嘅​良藥。所以,我哋​憂慮​嘅​時候,就​應該​將​擔心​嘅​事​全部​話​晒​俾​耶和華​知。(請​讀​彼得前書​5:6,7要​滿懷​信心​向​耶和華​傾​心​吐​意,相信​佢​一定​關心​你;亦​要​數​算​自己​得到​嘅​福分,“連​同​感謝”獻​上​禱告。緊記​耶和華​能够“成就​一切,遠遠​超過​我哋​一切​所​求​所​想​嘅”,我哋​對​佢​嘅​信心​就​會​受​到​强化。(以弗所書​3:20

11 就​好似​保羅​同​西​拉​呢​次​喺​腓​立 比​嘅​經歷​噉,耶和華​為​我哋​所​做​嘅,或者​會​出​乎​我哋​意​料​之外。呢啲​事​唔​一定​驚​天​動​地,但​就​一定​會​係​我哋​需要​嘅。(哥林多前書​10:13)當然,意思​唔​係​話​我哋​坐​喺​度​乜嘢​都​唔​做,淨係​等​住​耶和華​去​扭轉​事態​或​解決​問題。我哋​要​採取​同​禱告​一致​嘅​行動。(羅馬書​12:11)我哋​用​行動​證明​自己​係​懇切​真​誠​嘅,噉​耶和華​先至​有​理由​祝福​我哋。但​同時,我哋​要​知道​耶和華​唔​係​只​能够​做​到​我哋​請​求、計劃​同​期待​嘅​事,有時​佢​會​用​令​人​意想唔到​嘅​方式​俾​我哋​驚​喜。等​我哋​嚟​考慮​一啲​可以​增强​我哋​信心​嘅​聖經​例子,睇​吓​耶和華​幫助​我哋​嘅​方式​點樣​超​出​我哋​嘅​想像。

耶和華​令​人​意想唔到​嘅​作為

12. (甲)面對​亞述​王​西​拿基​立​威脅​嗰時,希​西​家​王​做​咗​啲​乜嘢?(乙)我哋​從​耶和華​解決​問題​嘅​方式​學​到​乜嘢?

12 我哋​查考​經文​嘅​時候​可以​揾​到​好多​耶和華​施行​奇妙​作為​嘅​例子。喺​希​西​家​王​嘅​日子,亞述​王​西​拿基​立​入​侵​猶大​國。除咗​耶路撒冷​之外,所有​堅​城​全部​淪陷。(列王紀下​18:1-3,13)後來,西​拿基​立​又​將​注意力​轉​向​耶路撒冷。喺​呢個​危急關​頭,希​西​家​王​做​咗​啲​乜嘢​呢?佢​向​耶和華​禱告,亦​都​向​先知​以賽亞​徵求​意見。(列王紀下​19:5,15-20)希​西​家​都​嘗試​讓步,交​出​咗​西​拿基​立​要求​嘅​貢品。(列王紀下​18:14,15)同時,希​西​家​為咗​長期​嘅​守​城​戰​而​做​好​準備。(歷代志下​32:2-4)危機​點樣​解除?耶和華​派​出​一​個​天使,喺​一​夜​之​間​殺​咗​18​萬​5000​個​西​拿基​立​嘅​士兵。連​希​西​家​都​冇​諗​到​事情​會​噉樣​發生!(列王紀下​19:35

通過​創世記​41:42,我哋​從​約瑟​嘅​經歷​學​到​乜嘢?(請​睇​第​13​段)

13. (甲)我哋​從​約瑟​嘅​經歷​學​到​乜嘢?(乙)有​乜嘢​出​乎​意​料​嘅​事發​生​喺​亞伯拉罕​嘅​妻子​撒​拉​身上?

13 我哋​又​睇​吓​年輕​時候​嘅​約瑟,佢​係​雅各​嘅​仔。喺​埃及​坐​監​嘅​時候,約瑟​有​冇​諗​過,有​一​日​自己​會​得到​法老​重​用​治​理​全​埃及​呢?或者​佢​有​冇​預料​到,耶和華​會​用​佢​去​拯救​自己​嘅​家族​免​受​饑荒?(創世記​40:15;41:39-4350:20)毫無​疑問,耶和華​所​做​嘅​遠遠​超​出​約瑟​嘅​想像。我哋​再​考慮​吓​約瑟​嘅​曾祖母​撒​拉。上​咗​年紀​嘅​撒​拉​有​冇​認為​耶和華​真​係​會​俾​佢​一​個​親​生​仔,而​唔​係​只係​通過​佢​嘅​女​僕替​自己​生​一​個​名義​上​嘅​仔?最終,以​撒​嘅​出世​確實​遠遠​超​出​撒​拉​嘅​想像。(創世記​21:1-3,6,7

14. 我哋​確信​耶和華​可以​點樣​幫助​我哋?

 14 當然,我哋​唔​會​期望,喺​應許​嘅​新世界​嚟​到​之前,耶和華​會​好​神奇​噉​除去​我哋​嘅​一切​難題;我哋​亦​都​唔​會​向​耶和華​提​出​要求,一定​要​喺​我哋​嘅​生活​裏面​做​啲​驚​天​動​地​嘅​事。但係​我哋​知道,如果​上帝​耶和華​想​以​奇妙​嘅​方式​幫助​佢​嘅​僕人,佢​一定​做​得到。(請​讀​以賽亞書​43:10-13知道​呢​一​點,使​我哋​對​佢​更加​有​信心。我哋​知道,佢​會​俾​我哋​所​需​嘅​力量​去​成就​佢​嘅​旨意。(哥林多後書​4:7-9)我哋​從​呢啲​聖經​例子​學​到​乜嘢​呢?希​西​家、約瑟​同​撒​拉​嘅​例子​表明,只要​我哋​忠於​耶和華,佢​就​會​幫助​我哋​解決​一啲​喺​人​睇嚟​冇​辦法​解決​嘅​事。

只要​我哋​忠於​耶和華,佢​就​會​幫助​我哋​解決​一啲​喺​人​睇嚟​冇​辦法​解決​嘅​事

15. 乜嘢​幫助​我哋​繼續​享有​上帝​所​賜​嘅​平安?通過​乜嘢​先​可以​做​得到?

15 我哋​面對​挑戰​嘅​時候,點​先​可以​繼續​享有​上帝​所​賜​嘅​平安​呢?就係​要​同​我哋​嘅​上帝​耶和華​保持​親密​嘅​關係。呢​種​關係​只​有“通過​基督​耶穌”獻​出​嘅​贖價​先​可以​得到。提供​贖價​係​我哋​天父​嘅​另​一​個​奇妙​作為。耶和華​用​贖價​嚟​遮​蓋​我哋​嘅​罪,使​我哋​有​清白​嘅​良心,可以​親近​佢。(約翰福音​14:6;雅各書​4:8;彼得前書​3:21

守護​我哋​嘅​内心​同​頭腦

16. 我哋​得到​上帝​所​賜​嘅​平安​之後,結果​會​點樣​呢?請​解釋。

16 我哋​得到​上帝​賜​嘅“超越​人​所​能​理解​嘅[平安]”之後,結果​會​點樣​呢?經文​話:“通過​基督​耶穌,可以​守護[我哋]嘅​内心​同​頭腦。”(腓立比書​4:7)“守護”呢個​詞​喺​聖經​原文​係​一​個​軍事​用語,用​嚟​描述​古代​嘅​駐​軍​部​隊​奉命​守衛​堅​城。腓​立​比​就係​一​座​噉樣​嘅​城。腓​立​比​嘅​居民​知道​有​士兵​守護​住​城​門,佢哋​就​可以​瞓​得​好​安心。同樣,當​我哋​有​上帝​所​賜​嘅​平安,内心​同​頭腦​就​可以​得到​安舒。我哋​知道​耶和華​好​關心​我哋,希望​我哋​享有​幸福​快樂​嘅​生活。(彼得前書​5:10)明白​呢​一​點,可以​使​我哋​避免​過度​憂慮​或者​感到​灰心。

17. 乜嘢​幫助​我哋​信心​十​足​噉​面對​未來?

17 好​快,地上​嘅​人類​將​會​面​臨史​無​前​例​嘅​大患難。(馬太福音​24:21,22)我哋​唔​知道​自己​喺​大患難​期間​會​遇​到​啲​咩​事。不過,我哋​唔​需要​為​呢​件​事​太​過​憂慮。雖然​我哋​唔​知道​耶和華​將​會​做​嘅​每​一​件​事,不過​我哋​認識​我哋​嘅​上帝。我哋​從​耶和華​以往​所​做​嘅​事​可以​睇​出,無論​發生​咩​事,佢​一定​會​實現​自己​嘅​旨意,有時​所​用​嘅​方式​係​我哋​意想唔到​嘅。每​一​次​耶和華​為​我哋​噉樣​做,我哋​都​可能​會​以​唔同​嘅​方式​體會​到​上帝​所​賜​嘅“超越​人​所​能​理解​嘅”平安。

^ 1段 睇嚟,西​拉​都​係​一​個​羅馬​公民。(使徒行傳​16:37