跳到內容

跳到副菜單

跳到目錄

守望台(研讀版)  |  2017年7月

點解要“讚美耶和華”?

點解要“讚美耶和華”?

“要​讚美​耶和華!……噉​係​美好​嘅​事;你哋​要​讚美​佢,噉樣​做​又​可​喜​又​合宜。”——詩篇​147:1

唱詩​104,152​

1-3. (甲)詩篇​147​篇​可能​係​幾時​寫​嘅​呢?(乙)我哋​通過​研讀​詩篇​147​篇​可以​學​到​乜嘢?

如果​某​個人​出色​噉​完成​一​件​工作,或者​表現​出​美好​嘅​基督徒​特質,就​會​受​到​稱讚。既然​我哋​有​理由​稱讚​人,噉​唔​係​有​更​多​嘅​理由​去​讚美​耶和華​上帝​咩?我哋​通過​奇妙​嘅​受造物​睇​出​耶和華​有​無窮​嘅​力量,亦​都​通過​佢​犧牲​愛​子​作為​贖價​睇​出​佢​對​人類​充滿​温情,所以​我哋​應該​讚美​佢。

2 詩篇​147​篇​嘅​執筆者​唔單止​自己​深​受​感動​去​讚美​上帝,佢​仲​積極​鼓勵​其他​人​同​佢​一齊​將​讚美​獻​俾​耶和華。(請​讀​詩篇​147:1,7,12

3 我哋​唔​知道​詩篇​147​篇​係​邊個​寫​嘅,但​睇嚟​佢​生活​喺​耶和華​幫助​以色列人​脱離​巴比倫​嘅​奴役,返翻​耶路撒冷​嗰​段​時期。(詩篇​147:2)上帝​嘅​子民​可以​回歸​故土​恢復​正確​嘅​崇拜,的確​打動​詩篇​執筆者​去​讚美​耶和華。佢​仲​有​更​多​嘅​理由​噉樣​做。有​邊啲​理由​呢?喺​你​生活​裏面 ,你​會​因​乜嘢​理由​而​衷心“讚美​耶和華”呢?

耶和華​醫治​心碎​嘅​人

4. 被​擄​嘅​以色列人​得​知​居魯士​王​要​釋放​佢哋​嘅​時候,點解​感​到​好​安慰?

4 想像​吓,被​擄​嘅​以色列人​喺​巴比倫​會​有啲​乜嘢​感受。奴役​佢哋​嘅​人​嘲笑​話:“唱​一​首​錫安​嘅​歌​俾​我哋​聽​吓!”正確​崇拜​嘅​中心​耶路撒冷​係​佢哋​喜樂​嘅​最​大​因由,不過​喺​嗰時​已經​淪​為​一​片​廢墟。(詩篇​137:1-3,6)猶太人​心靈​破碎,好​需要​安慰,根本​冇​心情​唱歌。後來,就​好似​耶和華​預言​所​講,波斯王​居魯士​為​佢哋​帶​嚟​拯救。佢​征服​咗​巴比倫,宣布​話:“耶和華……指派​我​喺​猶大​嘅​耶路撒冷​為​佢​建造​聖殿。你哋​當中​凡​係​佢​子民​嘅,都​可以​上去,願​耶和華​佢哋​嘅​上帝​與​佢哋​同​在!”(歷代志下​36:23)對於​嗰啲​住​喺​巴比倫​嘅​以色列人​嚟​講,事態​嘅​發展​的確​俾​咗​佢哋​好​大​嘅​安慰!

5. 關於​耶和華​嘅​醫治​能力,詩篇​執筆者​留意​到​乜嘢?

5 耶和華​唔單止​為​整​個​以色列​國族​帶​嚟​安慰,仲​個别​安慰​每​一​個​以色列人。今日​亦​都​係​一樣。關於​上帝,詩篇​執筆者​話:“佢​醫治​心碎​嘅​人,包紮​佢哋​嘅​傷口。”(詩篇​147:3)冇錯,耶和華​關心​嗰啲​喺​身體​上​同​感情​上​有​創傷​嘅​人。今日,耶和華​好​渴望​為​我哋​提供​安慰,減輕​我哋​喺​感情​上​嘅​痛楚。(詩篇​34:18;以賽亞書​57:15)佢​賜​我哋​智慧​同​力量,使​我哋​可以​應付​任何​難題。(雅各書​1:5

6. 我哋​從​詩篇​147:4​學​到​乜嘢?(請​睇​吓​課文​開頭​嘅​圖片)

6 之後,詩篇​執筆者​抬頭​望​向​夜空,話​耶和華​佢“數算​星辰​嘅​數目,一一​點名​呼召”。(詩篇​147:4)點解​佢​突然​間​轉​話題,去​留意​天上​嘅​星星​呢?試​諗​吓:雖然​詩篇​執筆者​能够​用​肉眼​睇​到​天上​嘅​星星,但係​佢​根本​冇​辦法​知道​確切​嘅​數目。時​至​今日,我哋​可以​觀察​到​嘅​星星​比​以前​多​咗​好多。有​人​認為,單​係​我哋​嘅​銀河系​就​有​數​以​十億​計​嘅​星星,而​宇宙​裏面​存在​嘅​星系,可能​多​至​數​萬億!對​我哋​人類​嚟​講,星星​真​係​多​到​數​都​數​唔​晒!但係,造物主​為​每​一​粒​星​都​起​咗​個​名​或​稱號。呢個​意味​住,對​耶和華​嚟​講,每​一​粒​星​都​係​獨一無二​嘅。(哥林多前書​15:41)噉​地上​嘅​人​呢?既然​耶和華​上帝​確切​知道​每​一​粒​星​喺​任何​時候​嘅​位置,同樣,無論​幾時​佢​都​清楚​知道​你​喺​邊度,明白​你​嘅​感受,同埋​了解​你​嘅​個人​需要。佢​真​係​對​我哋​每​個​人​都​瞭如指掌!

7,8. (甲)當​耶和華​幫助​佢​嘅​子民​應付​考驗​嘅​時候,佢​會​考慮​啲​乜嘢?(乙)喺​幫助​唔完美​嘅​人​方面,耶和華​點樣​表現​體恤​之​心?請​舉例。

7 耶和華​唔單止​了解​你,佢​亦​都​體恤​你​嘅​情況,而且​有​能力​幫助​你​解決​生活​上​嘅​難題。(請​讀​詩篇​147:5你​可能​覺得,自己​嘅​情況​太​艱難,負擔​太​重。耶和華​上帝​清楚​知道​你​嘅​限度,“記得[你]不過​係​塵土”。(詩篇​103:14)因為​唔​完美,我哋​一​次​又​一​次​犯​同樣​嘅​錯。我哋​經常​會​因為​講​錯​嘢​而​感​到​後悔,又​時​不時​有​ 錯誤​嘅​慾望​或者​妒忌​其他​人。雖然​耶和華​冇​任何​弱點,但係​佢​智慧​深不可測,對​我哋​唔​完美​嘅​人​嘅​了解​無可估量。(以賽亞書​40:28

8 你​可能​已經​體驗​過​耶和華​點樣​用​佢​大能​嘅​手​幫助​你​應付​某​啲​考驗。(以賽亞書​41:10,13)我哋​嚟​睇​吓​一​個​叫​做​恭子​嘅​先驅​姊妹​嘅​例子。佢​搬​咗​去​新​委派​嘅​地區​之後​有​一​段​時間​變​得​好​灰心。乜嘢​表明​耶和華​了解​佢​嘅​難題?後來,恭子​發覺​佢​身邊​嘅​人​都​好​理解​佢​嘅​感受。佢​覺得​好似​耶和華​喺​度​同​佢​講:“我​愛​你,唔​單單​因為​你​係​個​先驅,仲​因為​你​係​我​嘅​女,你​獻​咗​身​俾​我。我​希望​你​可以​開開心心​噉​做​我​嘅​見證人!”喺​你​嘅​生活​上,全能​嘅​上帝​點樣​表現​出“佢​嘅​悟性​無​可​測度”呢?

耶和華​提供​我哋​所​需​嘅

9,10. 耶和華​首先​會​提供​乜嘢​嚟​幫助​我哋?請​舉例。

9 我哋​每​個​人​都​有​物質​上​嘅​需要。例如,你​可能​擔心​自己​冇​足够​嘅​食物。但係,耶和華​創造​咗​自然​循環​嚟​供應​食物,甚至​連​幼小​嘅​烏鴉​都​得到​餵養!(請​讀​詩篇​147:8,9既然​耶和華​一直​提供​食物​俾​烏鴉,你​都​可以​確信​耶和華​同樣​會​供應​你​嘅​物質​所​需。(詩篇​37:25

10 最​重要​嘅​係,耶和華​供應​强化​信心​嘅​屬靈​食物,賜​俾​我哋“超越​人​所​能​理解​嘅[平安]”。(腓立比書​4:6,7)我哋​睇​吓​陸奧夫​同​佢​太太​喺​2011​年​日本​海嘯​期間,點樣​親身​體會​到​耶和華​用​佢​嘅​大能​扶助​佢哋。海嘯​嘅​時候,佢哋​爬​咗​上​自己​屋頂,先​可以​死裏逃生。但係,佢哋​喺​嗰​日​幾乎​失去​晒​自己​所有​嘅​嘢,連​間​屋​都​爛​埋。佢哋​喺​二​樓​嘅​房間,捱​過​咗​一​個​又​黑​又​凍​嘅​夜晚。朝早,佢哋​好​想​得到​一啲​屬靈​上​嘅​鼓勵。佢哋​唯一​揾​到​嘅​一​本​書,就​係《2006​耶和華見證人​年鑑》。陸奧夫​即刻​留意​到“最​嚴重​的​海嘯”呢個​標題。資料​提​到​2004​年​蘇門答臘​嘅​一​場​地震,引發​咗​有史以來​傷亡​最​慘重​嘅​海嘯。陸奧夫​同​佢​太太​一​邊​睇​一​邊​喊。喺​佢哋​最​需要​嘅​時候,得到​適時​嘅​屬靈​鼓勵,使​佢哋​感受​到​耶和華​嘅​温暖​同​愛心。耶和華​亦​都​仁慈​噉​提供​俾​佢哋​物質​所​需,通過​弟兄​姊妹​使​佢哋​得到​救援​物資。但係,最​鼓勵​佢哋​嘅​係,上帝​嘅​組織​派​代表​嚟​探訪​會衆。陸奧夫​話:“我​感受​到​耶和華​就​喺​我哋​每​一​個​人​嘅​身邊​照顧​緊​我哋。真​係​好​安慰​啊!”耶和華​會​先​提供​我哋​屬靈​食物,之後​都會​滿足​我哋​物質​上​嘅​需要。

從​耶和華​嘅​幫助​得益

11. 如果​我哋​想​從​耶和華​嘅​幫助​得益,需要​點樣​做?

11 耶和華​隨時​出手“為​謙和​嘅​人​紓​困​解​危”。(詩篇​147:6​上)佢​咁​樂意​幫助​我哋,我哋​可以​點樣​從中​得益​呢?我哋​要​同​佢​建立​親密​嘅​關係。所以,我哋​需要​培養​謙和​嘅​特質。(西番雅書​2:3)謙和​嘅​人​會​等候​耶和華​糾正​一切​錯誤,消除​佢哋​所​受​嘅​傷害。佢哋​可以​得到​耶和華​嘅​認可,令​佢​嘅​心​歡喜。

12,13. (甲)為咗​從​耶和華​嘅​幫助​得益,我哋​應該​要​避免​乜嘢?(乙)耶和華​喜悦​點樣​嘅​人?

 12 另​一​方面,上帝“將​邪惡​嘅​人​貶抑​於​地”(詩篇​147:6​下)呢​番​話​真​係​嚴厲!想​從​耶和華​嘅​忠貞​之​愛​得益,避免​得罪​耶和華,我哋​就​一定​要​恨​佢​所​恨。(詩篇​97:10)例如,我哋​應該​憎恨​不道德​嘅​性行為。即​係​話,要​避開​任何​會​導致​我哋​犯​性不道德​嘅​事物,包括​色情​資訊。(詩篇​119:37;馬太福音​5:28)可能​我哋​需要​經歷​一​番​爭鬥,但​為咗​得到​耶和華​嘅​祝福,付出​任何​努力​都​係​值得​嘅。

13 喺​呢​場​鬥爭,我哋​要​依靠​耶和華​上帝​而​唔​係​自己。詩篇​嘅​經文​話:“馬​雖然​力​大,[耶和華]並​唔​喜愛;人​縱​使​腿​快,佢​亦​唔​喜悦”。(詩篇​147:10)古代​嘅​人​相信​只要​人强馬壯​就​可以​打​勝仗。如果​我哋​嘗試​靠​自己​嘅​能力​或者​其他​人​嘅​幫助​使​自己​得救,噉樣​可​唔可以​取悦​耶和華​呢?當然​唔​可以!相反,我哋​一定​要​親近​耶和華,懇求​佢​嘅​幫助。同​世人​唔​一樣,就算​我哋​一​次​又​一​次​向​耶和華​求助,佢​都​唔​會​覺得​厭煩,總​係​耐心​聆聽​我哋​嘅​請求。“耶和華​喜悦​嘅,係​敬畏​佢​嘅​人,係​等待​佢​忠貞​之​愛​嘅​人。”(詩篇​147:11)因為​耶和華​有​忠貞​之​愛,我哋​可以​確信,佢​會​對​我哋​不離不棄,幫助​我哋​戰勝​自己​嘅​錯誤​慾望。

14. 詩篇​執筆者​確信​乜嘢?

14 耶和華​使​我哋​確信,喺​需要​嘅​時候,佢​一定​會​出手​幫助​自己​嘅​子民。詩篇​執筆者​諗​起​耶路撒冷​嘅​復興,就​歌頌​耶和華​話:“佢​使​你​嘅​門閂​堅固,賜​福​俾​你​當中​嘅​居民。佢​使​你​四境​平安”。(詩篇​147:13,14)知道​耶和華​會​鞏固​城門​嚟​保護​佢​嘅​忠心​子民,詩篇​執筆者​真​係​覺得​好​安心!

當​考驗​壓​到​我哋​唞​唔​到​氣​嘅​時候,上帝​嘅​話語​點樣​幫助​我哋?(請​睇​第​15-17​段)

15-17. (甲)面對​考驗​嘅​時候,通常​我哋​會​有​乜嘢​感受?耶和華​點樣​運用​佢​嘅​話語​嚟​幫助​我哋?(乙)舉例​説明​上帝​嘅​話語​點樣“迅速​頒行”。

15 你​可能​會​面對​一啲​難題​而​感​到​憂慮,但係,耶和華​會​俾​你​智慧​去​應付。詩篇​執筆者​話:“[耶和華]向​大地​下令,佢​嘅​話​迅速​頒行。”然後,又​話​上帝“降​下​嘅​雪​如同​羊毛,撒​下​嘅​霜​如同​灰燼,扔​下​嘅​冰雹​如同​碎渣”。執筆者​跟住​問:“佢​發出​寒冷,邊個​能​受​得​住​呢?”最後​又​話,耶和華“下令,呢​一切​就​融化”。(詩篇​147:15-18)上帝​係​無所不知、無所不能​嘅。既然​佢​可以​控制​冰雹​同​雪,佢​亦​都​可以​幫助​你​越​過​任何​障礙。

16 喺​今日,耶和華​用​佢​嘅​話語​聖經​嚟​指引​我哋。“佢​嘅​話​迅速​頒行”,意思​係,喺​我哋​有​需要​嘅​時候,耶和華​會​迅速​俾​我哋​屬靈​嘅​指引。試​諗​吓,你​通過​研讀​聖經,查考“忠信​睿智​嘅​奴隸”製作​嘅​出版物,收睇​JW電視網​嘅​節目,瀏覽​jw.org​網站,向​長老​尋求​幫助​以及​同​弟兄​姊妹​一齊​交往​得到​幾多​益處!(馬太福音​24:45)你​有冇​從​呢啲​安排​睇​出,耶和華​喺​生活​上​迅速​噉​俾​你​指引​呢?

17 西蒙娜​就​體驗​過​上帝​話語​嘅​力量 ​嘞。佢​覺得​自己​冇​乜​價值,懷疑​自己​得​唔​到​上帝​嘅​肯定​同​認可。但係,每​當​灰心​嘅​時候,佢​都​仲係​堅持​禱告,向​耶和華​尋求​幫助。同時,佢​亦​都​好​勤力​做​個人​研讀。佢​話:“我​從​未​試​過​得​唔​到​耶和華​嘅​强化​同​指引。”呢​種​體會​幫助​佢​盡力​保持​積極。

18. 點解​我哋​可以​感受​到​耶和華​恩待​我哋?有​乜嘢​理由​我哋​要​衷心“讚美​耶和華”?

18 詩篇​執筆者​知道,上帝​幾​咁​恩待​佢​古代​嘅​子民。佢哋​曾經​係​唯一​一​個​可以​得到​上帝​嘅“話[語]”、“條例​同​法令”嘅​國族。(請​讀​詩篇​147:19,20今日,世上​只​有​我哋​有​福分,成為​上帝​名下​嘅​人。我哋​認識​耶和華,而且​佢​嘅​話語​喺​我哋​生活​上​發揮​作用,所以​我哋​可以​同​佢​享​有​特殊​嘅​關係。就​好似​詩篇​147​篇​嘅​執筆者​噉,我哋​真​係​有​理由​要​衷心“讚美​耶和華”,亦​都​要​鼓勵​其他​人​噉樣​做!