跳到內容

跳到副菜單

跳到目錄

守望台(研讀版)  |  2017年7月

追求真正嘅財富

追求真正嘅財富

“要​用​不義​嘅​錢財​結交​朋友。”——路加福音​16:9

唱詩​32,154​

1,2. 喺​呢個​事物制度​之下,點解​一直​都​有​窮人?

今日​嘅​經濟​制度​又​殘酷​又​唔​公平。好多​年輕人​揾​極​都​揾​唔​到​工。好多​人​冒​住​生命​危險​都​要​搬​到​更​富裕​嘅​地區。就算​喺​富裕​嘅​地區,貧窮​都​係​隨處​可​見​嘅。有​錢​人​同​窮人​之​間​嘅​差距​越​來​越​大。最近​嘅​統計​顯示,世界​上​最​富裕​嗰​百​分​之​一​嘅​人​所​擁有​嘅​財富,相​當​於​另外​百​分​之​九十九​嘅​人​嘅​總和。雖然​好​難​證實​呢啲​數字,不過​無可否認​嘅​係,世上​有​數​以​億​計​嘅​人​極​度​貧窮,而​有啲​人​就​錢​多​到​幾​代​人​都​使​唔​晒。耶穌​體會​到​呢個​殘酷​嘅​現實,話:“你哋​身邊​經常​有​窮人”。(馬可福音​14:7)點解​呢個​世界​咁​唔​公平​呢?

2 撒但​嘅​世界​係​由​政治、宗教​同​商業​制度​所​構成​嘅。耶穌​知道,上帝​王國​嚟​到​之前,撒但​統治​下​嘅​經濟​制度​係​唔​會​改變​嘅。啟示錄​18:3​將​貪婪​嘅​商業​制度​稱​為“商旅”。雖然,上帝​嘅​子民​可以​同​世界​嘅​政治、錯誤​宗教​徹底​劃清​界線,但​就​冇​辦法​同​撒但​世界​嘅​商業​制度​完全​分離。

3. 我哋​會​討論​邊啲​問題?

3 身​為​基督徒,我哋​需要​審察​一下​自己​對​商業​制度​有 乜嘢​睇法,可以​問​吓​自己:“我​點樣​運用​物質​財富,就​可以​表明​自己​對​上帝​有​信心?我哋​可以​點樣​減少​受​唯利是圖​嘅​商業​世界​影響,追求​簡單​嘅​生活?喺​呢個​動盪不安​嘅​世界,有​乜嘢​例子​表明​上帝​嘅​子民​完全​信賴​佢?”

不義​管家​嘅​比喻

4,5. (甲)喺​耶穌​所​講​嘅​比喻​裏面,管家​陷入​乜嘢​困境?(乙)耶穌​俾​佢​嘅​門徒​乜嘢​勸告?

4 請​讀​路加福音​16:1-9耶穌​呢個​關於​不義​管家​嘅​比喻​發人深省。管家​俾​人​指控​浪費​資財​之後,就​即刻​用“實用​嘅​智慧”,去​結交​嗰啲​喺​佢​失業​之後​可以​幫​到​自己​嘅​朋友。 * 耶穌​當然​唔​係​鼓勵​佢​嘅​門徒,用​唔​正當​嘅​手段​喺​呢個​世界​生存。管家​嘅​做法​係“今世​之​子”所​為,亦​即​係​呢個​世界​嘅​人​會​做​嘅。其實,耶穌​只​係​想​通過​呢個​比喻​講​明​一​個​要點。

5 耶穌​清楚​知道,同​嗰個​陷​入​困境​嘅​管家​一樣,大多數​基督徒​要​喺​呢個​唔​公平​嘅​商業​世界​謀生​係​好​艱難​嘅。所以​耶穌​勸勉​門徒:“要​用​不義​嘅​錢財​結交​朋友。噉樣,到​你哋​無​財​可​用​嘅​時候,佢哋[耶和華​同​耶穌]就​接​你哋​去​永恆​嘅​居所。”我哋​從​呢個​勸告​學​到​乜嘢?

6. 我哋​點​知道,人類​從事​商業​活動​追求​物質​財富​唔​係​上帝​原定​嘅​旨意?

6 耶穌​冇​解釋​點解​錢財​係“不義”嘅,但係​聖經​幫助​我哋​清楚​睇​出,按照​上帝​原定​嘅​旨意,人類​唔​需要​從事​商業​活動​追求​物質​財富。喺​伊甸園,耶和華​俾​亞當​夏娃​充足​嘅​供應。(創世記​2:15,16)後來,到​咗​公元​一​世紀,聖靈​喺​受膏​基督徒​會衆​發揮​作用​嘅​時候,“冇​人​話​自己​嘅​財物​係​自己​嘅,大家​凡​物​共​享”。(使徒行傳​4:32)先知​以賽亞​指​出,終​有​一​日,全​人類​都​可以​盡情​享用​地球​嘅​物質​資源。(以賽亞書​25:6-9;65:21,22)但係​而家,耶穌​嘅​門徒​就​需要​有“實用​嘅​智慧”,用“不義​嘅​錢財”喺​現今​呢個​世界​度​謀生,同時​仲​要​努力​取悦​上帝。

明智​使用​不義​嘅​錢財

7. 路加福音​16:10-13​提​出​乜嘢​勸告?

7 請​讀​路加福音​16:10-13喺​耶穌​所​講​嘅​比喻​裏面,管家​為咗​個人​利益​而​結交​朋友。但係,耶穌​提醒​佢​嘅​門徒,唔​應該​為咗​自私​嘅​目的​而​結交​天上​嘅​朋友。講​完​管家​嘅​比喻​之後,耶穌​將​點樣​運用“不義​嘅​錢財”同​忠於​上帝​聯繫​埋​一齊。佢​想​我哋​明白,我哋​適當​運用“不義​嘅​錢財”,就​可以​證明​自己​對​耶和華​忠心。可以​點樣​做​呢?

8,9. 請​舉例​説明,有啲​人​點樣​用​不義​嘅​錢財​嚟​表現​忠心。

8 表明​我哋​忠心​嘅​一​個​最​簡單​直接​嘅​方法​係,用​我哋​嘅​物質​資財​嚟​捐助​耶穌​所​預告​嘅​全球​傳道​工作。(馬太福音​24:14)一​個​印度​嘅​細路女,將​啲​銀仔​慢慢​儲​起嚟,放​入​自己​嘅​錢罌,甚至​放棄​買​玩具​都​要​噉​做。錢罌​滿​咗​之後,佢​就​將​啲​錢​捐​晒​出嚟​支持​傳道​工作。喺​印度,一​個​擁有​椰子園​嘅​弟兄, 捐​咗​好多​椰子​俾​馬拉雅拉姆語​遠程​翻譯處。佢​覺得,反正​遠程​翻譯處​都​需要​買​椰子,與其​捐​錢,不如​直接​提供​椰子​俾​佢哋​仲​更加​實際。呢個​就​係​實用​嘅​智慧​嘞。喺​希臘​都​有​類似​嘅​情況,弟兄​姊妹​經常​捐​橄欖油、芝士​同​其他​食物​俾​伯特利​家庭。

9 一​個​住​喺​外國​嘅​斯里蘭卡​弟兄,將​佢​家鄉​間​屋​提供​出嚟,作為​聚會​同​大會​嘅​場地,又​提供​俾​全時​服務​嘅​人​住。對​呢個​弟兄​嚟​講,噉樣​做​喺​經濟​上​會​有​損失,但係​就​大大​幫助​咗​經濟​條件​唔​係​咁​好​嘅​傳道員。喺​傳道​工作​受​限制​嘅​地區,有啲​弟兄​提供​自己​嘅​屋企​作為​當地​嘅​聚會​所,使​先驅​同​其他​經濟​困難​嘅​人​可以​有​一​個​聚會​嘅​地方,而​唔​需要​承受​經濟​壓力。

10. 我哋​慷慨​施與​就​會​得到​乜嘢​福份?

10 我哋​從​以上​嘅​例子​睇​到,上帝​嘅​子民​清楚​知道​屬靈​嘅​財富​先至​有​真正​嘅​價值,所以​佢哋​善用​物質​嘅​財富,“喺​最​小​嘅​事​上​忠心”。(路加福音​16:10)上帝​嘅​朋友​對​自己​作出​嘅​犧牲​有​咩​睇法?佢哋​明白​到,表現​慷慨​大方,可以​幫助​自己​獲得“真正​嘅​財富”。(路加福音​16:11)一​個​姊妹​經常​捐款​支持​王國​工作,佢​講​到​自己​得到​嘅​福分​話:“我​經常​喺​物質​上​表現​慷慨,結果​内心​發生​咗​好​大​嘅​改變,連​自己​都​意想​唔​到。我​發覺​自己​喺​物質​上​越​慷慨,喺​態度​同​諗法​上​就​越​大方。我​變​得​更加​樂意​寬恕​人,容易​對​人​表現​耐心,亦​都​更​容易​接受​勸告​同​面對​挫折。”好多​人​因為​表現​慷慨​而​得到​好多​屬靈​嘅​財富。(詩篇​112:5;箴言​22:9

11. (甲)我哋​慷慨​捐款​點樣​顯​出“實用​嘅​智慧”?(乙)上帝​嘅​子民​點樣​互相​彌補​不足?(請​睇​吓​課文​開頭​嘅​圖片)

11 另外,運用“實用​嘅​智慧”嘅​另​一​個​方法​係,用​物質​資財​嚟​支持​王國​事務。我哋​可以​充分​考慮​自己​嘅​環境​同​情況,把握​機會​去​幫助​其他​人。有啲​人​喺​物質​方面​比較​富裕,但係​就​冇​辦法​參與​全時​工作​或者​搬​到​需求​更​大​嘅​地區,不過​佢哋​仲係​可以​通過​資助​其他​人​嘅​服務​而​深​感​滿足。(箴言​19:17)有啲​地區​喺​物質​方面​非常​貧乏,而​屬靈​方面​就​好​富裕,因為​有​好多​人​接受​真理。自願​捐款​就​可以​為​呢啲​地區​供應​書刊,亦​都​為​當地​嘅​傳道​工作​帶​嚟​好​大​嘅​支持。多​年​以來,有啲​國家,例如​剛果、馬達加斯加​同​盧旺達,當地​嘅​弟兄​通常​要​用​成​個​星期​甚至​成​個​月​嘅​人工​先至​買​得​起​一​本​聖經。所以,佢哋​好多​時​都​要​面對​一​個​抉擇,到底​係​買​食物​ 俾​屋企人,抑或​係​買​聖經。而家,耶和華​嘅​組織​資助​翻譯​同​分發​聖經​嘅​工作,為​呢啲​家庭​嘅​成員​同​進步​良好​嘅​聖經​學生,免費​提供​聖經。呢啲​地區​嘅“不足”,由於​好多​慷慨​嘅​捐款,而家​可以​得到“彌補”。(請​讀​哥林多後書​8:13-15無論​係​樂於​施與​嘅,抑或​係​欣然​接受​嘅,耶和華​都​好​開心​同​佢哋​做​朋友。

追求​簡單​嘅​生活

12. 亞伯拉罕​點樣​表現​出​佢​信賴​耶和華?

12 同​耶和華​做​朋友​嘅​另​一​個​方法​係​盡量​同​商業​世界​減少​來往,而且​根據​自己​嘅​情況,盡力​追求“真正​嘅”財富。古代​嘅​忠僕​亞伯拉罕,為咗​鞏固​同​耶和華​之​間​嘅​友誼,聽從​上帝​嘅​指引,離開​富裕​嘅​吾珥城​住​喺​帳篷​入面。(希伯來書​11:8-10)佢​一直​都​認為​真正​嘅​財富​嚟自​耶和華,所以​佢​信賴​耶和華​而​唔​係​物質​所​帶​嚟​嘅​益處。(創世記​14:22,23)耶穌​鼓勵​我哋​要​培養​噉樣​嘅​信心,佢​同​一​個​有​錢​嘅​年輕人​講:“如果​你​想​達到​完美​嘅​地步,就​要​賣​咗​啲​財物,分​俾​窮人。噉樣,你​就​有​財寶​喺​天上。你​仲​要​嚟​跟隨​我。”(馬太福音​19:21)呢個​年輕人​睇嚟​缺乏​亞伯拉罕​噉樣​嘅​信心,不過​同​佢​唔​一樣​嘅​係,有​好多​人​都​全心全意​信賴​上帝。

13. (甲)保羅​俾​咗​提摩太​乜嘢​勸勉?(乙)今日​我哋​點樣​應用​保羅​嘅​勸勉?

13 提摩太​係​個​有​信心​嘅​人。保羅​話​提摩太​係“基督​耶穌​嘅​精兵”,仲​勸勉​佢​話:“凡​係​當​兵​嘅,都​唔​應該​商務​纏身,為​求​取悦​召​佢​當​兵​嘅​人。”(提摩太後書​2:3,4)今日,超過​一百萬​人​投身​全時​傳道​工作。佢哋​同​其他​跟從​耶穌​嘅​人​會​根據​自己​嘅​情況,盡力​將​保羅​嘅​勸勉​應用​出嚟。為咗​抵抗​呢個​貪婪​世界​嘅​廣告​誘惑,基督徒​經常​提醒​自己:“欠債​嘅​係​債主​嘅​僕人。”(箴言​22:7)撒但​好​想​我哋​用​晒​所有​嘅​時間​同​精力,為​呢個​商業​世界​做​奴隸。有啲​決定​可能​會​令​我哋​喺​經濟​上​長​時間​受​到​束縛。巨額​嘅​房貸、高昂​嘅​學費、名貴​嘅​汽車、奢華​嘅​婚禮,都​會​令​我哋​面對​巨大​嘅​經濟​壓力。我哋​運用​實用​嘅​智慧,簡化​生活,減少​開支​同​債務,就​可以​好​自由​噉​為​上帝​效勞,而​唔使​再​做​當今​商業​制度​嘅​奴隸。(提摩太前書​6:10

14. 我哋​需要​點樣​嘅​決心?請​舉例。

14 我哋​想​保持​過​簡單​嘅​生活,就​要​分​清楚​乜嘢​係​最​優先​嘅。有​一​對​夫婦​有​一​盤​好​賺錢​嘅​生意,但​佢哋​好​想​再次​參與​全時​服務。呢個​渴望,推動​佢哋​轉讓​咗​盤​生意,賣​咗​部​船​同​其他​物質​財産。跟住,佢哋​就​去​參加​紐約​沃威克​總部​嘅​志願​建築​工程。因為​噉,佢哋​得到​特别​嘅​祝福,可以​同​佢哋​嘅​女​仲​有​女婿​喺​伯特利​服務。甚至​有​幾​個​星期,佢哋​父母​都​嚟​埋,一齊​參與​總部​嘅​建築​工程。一​個​嚟自​美國​科羅拉多州​嘅​先驅​姊妹,喺​銀行​揾​咗​份​兼職。上司​好​滿意​佢​嘅​工作,想​用​三​倍​人工​請​佢​轉​做​全職。但係,姊妹​考慮​過​之後,覺得​噉樣​自己​就​唔​可以​全心​投入​傳道​工作,所以​拒絶​咗​呢個​咁​有​吸引力​嘅​機會。耶和華​嘅​忠僕​為咗​追求​王國​作出​咗​好多​犧牲,呢啲 只​不過​係​其中​嘅​一啲​例子。屬靈​財富​嘅​價值,遠遠​超過​今日​嘅​商業​制度​俾​到​我哋​嘅。如果​我哋​決心​將​王國​放​喺​生活​嘅​首位,就​可以​表明​我哋​重視​同​上帝​嘅​友誼,追求​真正​嘅​財富。

當​物質​財富​幫​唔​到​我哋

15. 我哋​喺​邊​方面​富足​就​可以​得到​莫大​嘅​滿足感?

15 我哋​喺​物質​上​富有,唔​等於​係​上帝​祝福​緊​我哋。耶和華​會​祝福​嗰啲“喺​善事​上​富足”嘅​人。(請​讀​提摩太前書​6:17-19例如,露西婭 *知道​阿爾巴尼亞​有​好​大​嘅​傳道​需要,就​好​想​去​嗰度​服務。雖然​佢​唔​知道​有​咩​方法​維持​以後​嘅​生活,但​仲係​全心​信賴​耶和華,於是​喺​1993​年​就​離開​意大利​搬​去​嗰度。佢​精通​阿爾巴尼亞語,幫助​咗​超過​60​個​人​獻身​俾​耶和華。雖然​唔​係​每​一​個​傳道​地區​都​有​咁​豐富​嘅​收穫,但​我哋​為咗​幫助​人​得到​永生​所​做​嘅​任何​事,都​會​係​我哋​一生​嘅​珍寶。(馬太福音​6:20

16. (甲)今日​嘅​商業​制度​將​會​有​乜嘢​結局?(乙)我哋​知道​呢​一​點,點樣​影響​我哋​對​物質​財富​嘅​睇法?

16 喺​路加福音​16:9,耶穌​講​嘅​係“……無​財[不義​嘅​錢財]可​用​嘅​時候”,而​唔​係“如果​無​財​可​用”。喺​最後​嘅​日子​會​發生​銀行​同​經濟​崩潰,但​比​起​不久​嘅​將來​喺​全球​發生​嘅​事,簡直​係​微不足道。撒但​嘅​成​個​制度——政治、宗教​同​商業——注定​會​徹底​失敗。先知​以西結​同​西番雅​都​預告,黃金、白銀​呢啲​商業​世界​嘅​重要​商品,到時​都​會​變​得​一文不值。(以西結書​7:19;西番雅書​1:18)如果​我哋​到​咗​生命​嘅​盡頭,意識​到​自己​因為​大量​積存​呢個​世界“不義​嘅​錢財”而​放棄​咗​真正​嘅​財富,會​有​點樣​嘅​感覺​呢?情形​就​好似,一​個​人​成世​搏命​揾​錢,到​最後​先​發現​啲​錢​係​假​嘅​噉。(箴言​18:11)呢啲​噉樣​嘅​財富​最終​將​會​變​得​毫無​價值,所以​千祈​唔​好​錯過​同​耶和華、耶穌“結交​朋友”嘅​機會。我哋​為咗​促進​耶和華​王國​事務​所​做​嘅​一切,都​可以​使​我哋​積存​更​多​嘅​屬靈​財富。

17,18. 上帝​嘅​朋友​會​有​點樣​嘅​未來?

17 當​上帝​嘅​王國​統治​地球​嘅​時候,我哋​唔​再​需要​交​租​或​供​樓,唔使​錢​就​可以​得到​豐富​嘅​食物,亦​都​唔使​再​去​睇病​食藥。耶和華​喺​地上​嘅​大家庭​將​會​享受​到​呢個​地球​最好​嘅​出産。金、銀、各​種​寶石​都​會​用​嚟​做​裝飾,而​唔​係​用​嚟​投資,或者​俾​少數​人​獨佔。我哋​可以​自由​噉​使用​優質​嘅​木材、石頭​同​金屬​嚟​建造​美觀​嘅​房屋。朋友​幫助​你,純粹​係​因為​佢哋​樂意​噉​做,而​唔​係​為咗​錢。到時,我哋​人人​都​可以​享用​大地​嘅​美物,呢​一切​安排​將​會​帶​俾​我哋​全​新​嘅​生活​方式。

18 結交​天上​嘅​朋友​會​為​我哋​帶​嚟​無價​嘅​財富,以上​提​到​嘅​只​係​其中​一​部分。耶和華​嘅​子民​將​會​享有​永​無​窮盡​嘅​喜樂,佢哋​會​聽見​耶穌​話:“蒙​我​父親​賜​福​嘅​人,嚟​承受​從​世界​奠基​以來​為​你哋​預備​好​嘅​王國​啦。”(馬太福音​25:34

^ 4段 喺​路加福音​16:1,“指控”呢個​希臘語詞​都​有​誹謗​嘅​意思,表明​管家​可能​係​俾​人​誣告​嘅。不過​耶穌​冇​表明​呢個​指控​係咪​啱​嘅,佢​想​强調​嘅​係​管家​嘅​反應,而​唔​係​管家​被​解雇​嘅​原因。

^ 15段 關於​露西婭·慕珊勒​姊妹​嘅​生平​故事,請​睇​英語版《警醒!》2003​年​6​月​22​日​刊​18-22​頁。