跳到內容

跳到副菜單

跳到目錄

守望台(研讀版)  |  2017年7月

“同哭泣嘅人一齊哭泣”

“同哭泣嘅人一齊哭泣”

“不斷​彼此​安慰,互相​强化”——帖撒羅尼迦前書​5:11

唱​詩​121,75​

1,2. 我哋​需要​討論​一下​點樣​安慰​失去​親友​嘅​人。點解​呢?(請​睇​吓​課文​開頭​嘅​圖片)

“我哋​個​仔​死​咗​差唔多​一​年​嘞,到​而家,我哋​嘅​心​仲係​痛​到​好似​俾​刀​㓤​噉”,一​個​叫​做​蘇西​嘅​姊妹​噉樣​講。一​個​弟兄​嘅​太太​突然​間​去世,當時​弟兄​感受​到“一​種​無​辦法​形容​嘅​悲痛”。無奈​嘅​係,世上​無數​人​都​要​經歷​生離死别​嘅​痛苦。好多​弟兄​姊妹​可能​都​冇​諗​過,佢哋​摯愛​嘅​親友​會​喺​哈米吉多頓​之前​去世。無論​係​你​自己​所​愛​嘅​人​去世,抑或​係​知道​其他​人​失去​親友,你​都​可能​會​問:“嗰啲​傷心​嘅​人​點​先​可以​得到​幫助,嚟​醫治​佢哋​内心​嘅​傷痛?”

2 可能​你​聽​過​有​句​話​講,“時間​係​醫治​一切​創傷​嘅​良藥”。但係,破碎​嘅​心​係咪​真​係​只​靠​時間​就​醫​得到​呢?一​個​寡婦​話:“我​覺得​呢​句​話​更​準確​嚟​講​應該​係,一​個​人​有​冇​得到​醫治,取決​於​佢​點樣​運用​自己​嘅​時間。”冇錯,同​身體​所​受​嘅​傷​一樣,感情​上​嘅​傷痛​如果​得到​悉​心​嘅​照顧,隨​住​時間​過去​可能​會​慢慢​好​翻。有​咩​實際​嘅​方法​可以​幫助​失去​親友​嘅​人​醫治​佢哋​感情​上​嘅​創傷?

 耶和華——“賜​一切​安慰​嘅​上帝”

3,4. 點解​我哋​可以​確信,耶和華​明白​悲傷​嘅​人​需要​安慰?

3 毫無​疑問,我哋​充滿​憐憫​之​心​嘅​天父​耶和華​係​安慰​嘅​主要​來源。(請​讀​哥林多後書​1:3,4耶和華​係​表現​體恤​嘅​最好​榜樣,佢​向​佢​嘅​子民​保證:“我​就​係​安慰​你哋​嘅​上帝。”(以賽亞書​51:12;詩篇​119:50,52,76

4 我哋​慈悲​嘅​天父​都​失去​過​心愛​嘅​人,例如​亞伯拉罕、以撒、雅各、摩西​同​大衛​王。(民數記​12:6-8;馬太福音​22:31,32;使徒行傳​13:22)聖經​向​我哋​保證,耶和華​定意​將來​要​復活​佢​嘅​忠僕,佢​一直​熱切​等待​呢個​日子​嘅​到來。(約伯記​14:14,15)到時,呢啲​忠僕​會​充滿​活力,滿心​喜樂。另外,耶和華​深深“寵愛”嘅​兒子​受​盡​折磨​而​死。(箴言​8:22,30)耶和華​當時​肯定​忍受​咗​難​以​形容​嘅​悲痛。(約翰福音​5:20;10:17

5,6. 耶和華​點樣​安慰​我哋?

5 我哋​可以​有​堅定​嘅​信心,相信​耶和華​一定​會​幫助​我哋。所以,我哋​應該​向​耶和華​傾心吐意,喺​禱告​裏面​將​自己​内心​嘅​悲痛​毫無​保留​噉​話​俾​佢​知。知道​耶和華​理解​我哋​嘅​痛苦,而且​喺​我哋​最​需要​嘅​時候​提供​幫助,真​係​令​我哋​深感​安慰!佢​會​點樣​做​呢?

6 上帝​幫助​我哋​嘅​其中​一​個​方法​就​係,用“聖靈​安慰”我哋。(使徒行傳​9:31)上帝​發出​嘅​動力​係​强大​嘅​安慰​來源。耶穌​承諾,天父​耶和華​一定​會​樂意“將​聖靈​賜​俾​懇求​佢​嘅​人”。(路加福音​11:13)文章​之前​提​到​嘅​蘇西​話:“我​同​先生​好多​次​都​跪​喺​地上​懇切​祈求​耶和華​安慰​我哋。每​一​次,上帝​都​真​係​賜​平安​保護​我哋​嘅​内心​同​頭腦。”(請​讀​腓立比書​4:6,7

耶穌——有​體恤​之​心​嘅​大祭司

7,8. 點解​我哋​可以​確信,耶穌​一定​會​提供​安慰?

7 耶穌​富​有​同情心,佢​喺​地上​所​講​所​做​嘅,十全十美​噉​反映​出​耶和華​對​人​嗰​份​親切​嘅​憐恤​之​情。(約翰福音​5:19)耶穌​被​派​嚟​安慰​嗰啲“心靈​破碎​嘅​人”同“所有​哀慟​嘅​人”。(以賽亞書​61:1,2;路加福音​4:17-21)聖經​描述​佢​滿懷​體恤​之​心,深切​體會​到​人類​嘅​痛苦,而且​好​渴望​減輕​佢哋​嘅​苦楚。(希伯來書​2:17

8 耶穌​年輕​嘅​時候,肯定​面對​過​家人​同​朋友​嘅​死亡。睇嚟​養父​約瑟​去世​嗰陣時,耶穌​仲係​個​年輕人。 * 可能​喺​十幾​二十​歲​嗰時,心地​善良​嘅​耶穌​除咗​要​面對​喪父​之​痛,仲​要​去​安慰​媽媽​同​細佬妹。

9. 拉撒路​去世​嗰時,耶穌​點樣​表現​出​體恤​之​心?

9 耶穌​一​開始​佢​嘅​傳道​工作,就​已經​好​識得​體恤​人,而且​有​出色​嘅​洞察力 。我哋​就​以​耶穌​嘅​好朋友​拉撒路​嘅​死​為​例。雖然​耶穌​將​會​復活​拉撒路,不過​佢​仲係​體恤​馬利亞​同​馬大​嘅​嗰​種​哀痛。佢​深深​感受​到​呢​種​心如刀割​嘅​悲痛,忍​唔​住​流​出​眼淚。(約翰福音​11:33-36

10. 點解​我哋​可以​確信​耶穌​憐恤​今日​嘅​世人?

10 耶穌​講​嘅​話​充滿​憐恤​同​安慰,喺​今日​點樣​幫助​到​我哋?經文​保證​話,“耶穌​基督​昨天、今天、永永遠遠,始終如一”。(希伯來書​13:8)因為​呢​位“領​人​得​生命​嘅​領袖”親身​體會​過​人類​生離死别​嘅​悲痛,所以“而家​就​能够​扶助​受​考驗​嘅​人”。(使徒行傳​3:15;希伯來書​2:10,18)因為​噉,我哋​可以​深信,耶穌​一直​以來​都​感受​到​人類​嘅​哀痛,明白​佢哋​嘅​悲傷,佢​會​繼續​俾​佢哋“合時​嘅”安慰。(請​讀​希伯來書​4:15,16

“聖經​所​帶​嚟​嘅​安慰”

11. 邊啲​經文​特别​令​你​感​到​安慰?

11 上帝​嘅​話語​當中​有​無數​安慰​人​嘅​經文,耶穌​因​拉撒路​死亡​而​悲傷​嘅​記載​只​係​其中​一​個​例子。唔​怪​得​經文​話,“從前​寫​落嚟​嘅​話,全部​都​係​為咗​教導​我哋​而​寫​嘅,等​我哋​靠​住​忍耐,靠​住​聖經​所​帶​嚟​嘅​安慰,可以​懷​有​希望。”(羅馬書​15:4)如果​你​因為​失去​親友​而​感​到​悲傷,你​都​可以​從​以​下​嘅​經文​得到​安慰:

  • “耶和華​親近​心碎​嘅​人,拯救​心靈​傷痛​嘅​人。”——詩篇​34:18,19

  • “每​當​我​心​裏​多​憂​多慮,你​都​安慰​我,使​我​安心。”——詩篇​94:19

  • “上帝​愛​我哋,又​憑​住​分外​恩典,賜​俾​我哋​恆久​嘅​安慰​同​美好​嘅​希望。願​我哋​嘅​父​上帝​同​我哋​嘅​主​耶穌​基督,安慰​你哋​嘅​心,使​你哋……堅定不移。”——帖撒羅尼迦後書​2:16,17 *

會衆——安慰​嘅​另​一​個​來源

12. 我哋​安慰​其他​人​嘅​一​個​重要​方式​係​乜嘢?

12 對​嗰啲​感到​悲傷​嘅​人​嚟​講,另​一​個​安慰​嘅​來源​係​基督徒​會衆。(請​讀​帖撒羅尼迦前書​5:11你​可以​點樣​强化、安慰​嗰啲“黯然​神傷”嘅​人?(箴言​17:22)要​記住,“有​靜默​嘅​時候,有​講話​嘅​時候”。(傳道書​3:7)一​個​叫​達琳​嘅​寡婦​話:“人​失去​親友​嗰時,好​需要​將​自己​嘅​諗法​同​感受​講​出嚟。所以,你​最​幫​到​佢哋​嘅​就​係​用心​聆聽,唔​好​打​斷​佢哋​嘅​話。”尤尼亞​嘅​哥哥​自殺​死​咗,佢​話:“可能​你​無​辦法​完全​理解​佢哋​嘅​悲痛,但​重要​嘅​係​你​好​想​明白​佢哋​嘅​感受。”

13. 對於​每​個​人​表達​悲傷​嘅​方式,我哋​要​記得​乜嘢?

13 要​記得,每​個​人​嘅​感受​同​表達​悲傷​嘅​方式​都​係​唔​一樣​嘅。有時,只​有​當事人​先​體會​到​内心​嘅​悲痛​到底​有​幾​深,可能​對​佢​嚟​講,好​難​用​言語​將 自己​内心​真正​嘅​感受​表達​出嚟。聖經​話:“自己​愁苦,唯​有​心裏​知曉;自己​歡喜,外人​無法​分享。”(箴言​14:10)就算​佢​可以​講​出​自己​嘅​感受,但係​其他​人​唔​一定​可以​明白​佢​想​表達​嘅​意思。

14. 我哋​可以​點樣​安慰​嗰啲​失去​親友​嘅​人?

14 我哋​對​嗰啲​失去​親友​嘅​人​唔​知​講​咩​好,係​可以​理解​嘅。不過,聖經​話“明智​人​嘅​舌​就​如​良藥”。(箴言​12:18)好多​人​都​喺《痛​失​親者》 *呢​本​册子​入面,揾​到​一啲​建議,知道​點樣​安慰​佢哋。好多​時,最好​嘅​做法​就​係“同​哭泣​嘅​人​一齊​哭泣。”(羅馬書​12:15)“眼淚​已經​成為​我​表達​内心​情感​嘅​語言。”失去​丈夫​嘅​嘉貝​噉樣​講,“所以​當​朋友​同​我​一齊​喊​嘅​時候,喺​嗰​一刻​我​就​冇​咁​孤獨​喇。”

15. 如果​覺得​好​難​面對面​去​安慰​人​嘅​話,我哋​可以​點​做?(請​參考​附欄“ 令​人​安慰​嘅​言詞”)

15 如果​你​覺得​面對面​嘅​時候​唔​知​講​咩​好,或者​你​可以​寫​慰問卡、發​電子郵件、發​短信​或者​寫​信​俾​佢哋。你​可以​簡單​引用​一​節​令​人​安慰​嘅​經文,提及​死者​嘅​一啲​美好​特質,或者​分享​你​珍惜​嘅​快樂​回憶。“收到​弟兄​姊妹​一​條​鼓勵​嘅​短信,或者​受​邀請​去​參加​一​個​交往,我​就​已經​得到​好​大​嘅​安慰,”尤尼亞​話,“佢哋​噉樣​做​使​我​知道​大家​都​好​關心​我,好​愛​我。”

16. 提供​安慰​嘅​一​個​有效​方法​係​乜嘢?

16 同​失去​親者​嘅​人​一齊​禱告,而且 ​為​佢​禱告,千祈​唔​好​低估​噉樣​做​嘅​價值。喺​呢​種​情緒​咁​唔​穩定​嘅​情況​下,可能​你​會​覺得​好​難​通過​禱告​嚟​表達​自己​嘅​諗法。但​只要​你​流露​出​真實​嘅​情感,就算​流​住​眼淚​為​佢​懇切​祈求,都​一定​可以​舒解​佢​嘅​悲痛。“有時​啲​姊妹​嚟​安慰​我,”達琳​回憶​話,“我​會​請​佢哋​為​我​作​個​禱告。佢哋​禱告​嗰時,通常​一​開始​都​唔​知​講​啲​咩​好。不過​每​次​講​吓​講​吓,佢哋​嘅​語氣​就​自然​咗​好多,講​出​最​由衷​嘅​禱告。佢哋​堅强​嘅​信心,佢哋​嘅​愛​同​關懷,使​我​信心​大​增。”

繼續​提供​安慰

17-19. 點解​我哋​要​繼續​提供​安慰?

17 每​個​失去​親友​嘅​人​經歷​悲痛​嘅​過程​都​好​唔​一樣。一般​嚟​講,最初​嗰​幾​日​好多​親戚​朋友​都​會​去​探訪​慰問​佢哋,不過​大多數​人​都​唔​能够​繼續​留​喺​佢哋​身邊。所以,之後​我哋​都​應該​撥​出​時間,繼續​提供​安慰。“真​朋友​時刻​顯​出​愛心,好似​兄弟​為​共​患難​而​生。”(箴言​17:17)無論​一​個​人​要​用​幾​長​時間​去​平服​悲痛​嘅​心情,基督徒​同工​都​可以​成為​佢哋​長久​嘅​安慰​來源。(請​讀​帖撒羅尼迦前書​3:7

18 周年​紀念日、某​啲​音樂、相片、活動​或者​甚至​一​種​特别​嘅​氣味、聲音、季節​都​可能​會​觸發​失去​親友​嘅​人​一陣陣​嘅​心痛。一​個​人​失去​配偶​之後,一​開始​要​單獨​做​某​件​事​嗰時​可能​會​覺得​好​難過,例如​參加​大會​或者​耶穌​受難紀念​聚會。“本​來​我​諗​住​太太​去世​之後​嘅​第​一​個​結婚​紀念日​我​會​非常​難過,”一​個​弟兄​話,“的確​好​唔​容易。不過,有​幾​個​弟兄​姊妹​安排​咗​個​小​交往,邀請​幾​個​我​最好​嘅​朋友​一齊​參加,令​我​唔使​咁​孤獨。”

19 我哋​要​記得,失去​親友​嘅​人​唔​係​只​有​特别​嘅​日子​先​需要​鼓勵。“通常,就算​唔​係​特别​嘅​日子,得到​幫助​同​陪伴​都​係​好​有​用​嘅,”尤尼亞​解釋​話,“呢啲​咁​寶貴​又​令​人​驚喜​嘅​時刻,俾​到​我​好​大​嘅​安慰。”當然,我哋​唔​可能​為​佢哋​完全​消除​悲痛,或者​填補​心靈​上​嘅​空虚,不過​我哋​通過​實際​嘅​行動​去​幫助​嗰啲​失去​親友​嘅​人,可以​喺​一定​程度​上​為​佢哋​帶​嚟​安慰。(約翰一書​3:18)嘉貝​回憶​話:“我​非常​感激​耶和華,因為​仁愛​嘅​長老​陪​我​走​過​艱難​嘅​每​一​步。我​真​係​感受​到​耶和華​用​佢​嘅​雙手​慈愛​噉​攬實​我。”

20. 點解​耶和華​嘅​應許​係​一​個​好​大​嘅​安慰​來源?

20 當“所有​喺​紀念墓​入面​嘅​人……聽見[基督]嘅​聲音,就​出嚟”嘅​時候,一切​嘅​哀傷​都​會​被​消除,我哋​會​得享​永久​嘅​安慰!(約翰福音​5:28,29)耶和華​的確​係​賜​一切​安慰​嘅​上帝!佢​應許“一定​會​永遠​吞滅​死亡。至高​主宰​耶和華​要​擦​去​所有​人​面​上​嘅​眼淚”。(以賽亞書​25:8)將來,我哋​唔​再​需要“同​哭泣​嘅​人​一齊​哭泣”,因為​到時,地上​所有​人​都​會“同​歡樂​嘅​人​一齊​歡樂”。(羅馬書​12:15

^ 8段 聖經​最後​一​次​提​到​約瑟,係​耶穌​12​歲​嗰時。當​耶穌​施行​佢​第​一​個​奇迹,將​水​變​成​酒​嘅​時候,聖經​冇​提​到​約瑟​在場,之後​嘅​記載​亦​都​冇​再​提​到​約瑟。後​來​耶穌​俾​人​釘​喺​苦刑柱​上,佢​將​媽媽​馬利亞​交託​俾​使徒​約翰​照顧。如果​當時​約瑟​仲​在生,耶穌​就​好​可能​唔​會​噉​做。(約翰福音​19:26,27

^ 11段 仲​可以​參考,詩篇​20:1,2;31:7;38:8,9,15;55:22;121:1,2;以賽亞書​57:15;66:13;腓立比書​4:13;彼得前書​5:7。好多​人​都​從​呢啲​嘅​經文​得到​安慰。

^ 14段 請​參考《守望台》2010​年​11​月​1​日​刊“效法​耶穌,安慰​喪親​的​人”。