跳到內容

跳到副菜單

跳到目錄

守望台(研讀版)  |  2017年6月

睇人唔好只睇外表

睇人唔好只睇外表

唐​係​加拿大​嘅​一​個​耶和華見證人,佢​特别​想​對​流浪漢​作​見證。佢​講​到​其中​一​個,話:“彼得​係​一​個​無家可歸​嘅​人,係​我​喺​巷仔​裏面​見​過​最​邋遢​嘅​人。佢​會​專登​做​啲​嘢,令​人​覺得​佢​好​討厭,想​遠​離​佢。有​好多​次​其他​人​好心​想​幫​佢,佢​都​拒絶​人。”雖然​係​噉,有​14​年​嘅​時間,唐​依然​耐心​噉​向​呢個​無家可歸​嘅​人​表現​仁慈。

有​一​日,彼得​問​唐:“我​同​你​非親非故,人人​都​懶​得​理​我,點解​你​咁​關心​我?”唐​好​有​技巧​噉​運用​三​節​經文,嘗試​打動​彼得​嘅​心。首先,佢​問​彼得​知​唔​知​上帝​有​個​名,然後​請​彼得​直接​喺​聖經​入面​讀​出​詩篇​83:18。跟住,唐​再​請​彼得​讀​出​羅馬書​10:13,14,經文​話“凡​呼求​耶和華​之​名​嘅​人,都​必​得救”,唐​用​呢​節​經文​解釋​點解​佢​咁​關心​彼得。最後,唐​讀​出​馬太福音​9:36,然後​請​彼得​自己​再​讀​一​次。經文​話:“佢​睇見​群衆,就​憐憫​佢哋,因為​佢哋​俾​人​剝削,四處​流離,好似​冇​牧人​嘅​綿羊​一樣。”讀​完​之後,彼得​眼濕濕​噉​問:“我​係​唔​係​其中​一​隻​綿羊​呢?”

彼得​開始​作​出​改變。佢​洗​乾淨​個​身,修剪​好​啲​鬍鬚,換​咗​唐​俾​佢​嘅​衫。彼得​繼續​保持​住​乾淨​嘅​儀容。

彼得​有​寫​日記​嘅​習慣。佢​先​前​寫​嘅​都​係​好​悲慘​好​絶望​嘅​事,但係​寫​到​最近​嘅​内容​就​好​唔​一樣​嘞。其中​一​篇​話:“今日​我​認識​到​上帝​嘅​名。而家​我​禱告​嗰時,都​會​用​耶和華​呢個​名。認識​佢​嘅​名​真​係​好​奇妙​啊!唐​話​俾​我​知,我​可以​同​耶和華​做​朋友,無論​咩​事​都​好,佢​隨時​都​會​聽​我​傾訴。”

 喺​日記​裏面,彼得​最後​嘅​説話​係​寫​俾​佢​細佬​同​家姐​嘅。佢​寫​到:

“今日​我​覺得​特别​唔​舒服,我​諗​自己​時日​無​多​嘞。就算​今日​係​我​人生​嘅​最後​一​日,但​我​知道,我​會​喺​樂園​見​到​我​嘅​朋友[唐]。可能​你哋​睇​到​呢​篇​日記​嘅​時候,我​已經​唔​喺​度​嘞。如果​你哋​喺​我​嘅​葬禮​度​留意​到​一​個​男人​明顯​同​其他​人​唔​一樣​嘅,就​一定​要​揾​佢​傾​吓,同埋​記得​讀​吓​呢​本​藍色​嘅​書。 * 呢​本​書​話,我​會​喺​樂園​裏面​見​翻​我​嘅​朋友。我​深信​呢​件​事。你哋​親愛​嘅​兄弟,彼得。”

葬禮​結束​之後,彼得​嘅​家姐​烏米​話:“大約​兩​年​前,彼得​聯絡​我。咁​多​年​來,我​第​一​次​見​到​佢​開心​嘅​樣,佢​仲​面​帶​笑容​添。”烏米​話​俾​唐​知:“我​一定​會​睇​呢​本​書,因為​任何​打動​到​我​細佬​嘅​嘢,一定​係​非​比​尋常​嘅。”烏米​應​承​同​耶和華見證人​討論《辨明​聖經​的​真理》呢​本​書。

同樣,睇​人​唔​好​只​睇​外表,我哋​應該​對​人​有​耐心,向​所有​人​都​表現​真摯​嘅​愛。(提摩太前書​2:3,4)如果​我哋​噉​做,就​好​可能​會​打動​到​嗰啲​好似​彼得​噉,雖然​因​外表​俾​人​睇​低,但​其實​心地​善良​嘅​人。我哋​深信​耶和華​係​睇​人“内心”嘅​上帝,佢​一定​會​幫助​嗰啲​誠心正意​嘅​人,使​真理​喺​佢哋​心​裏面​生根​發芽。(撒母耳記上​16:7;約翰福音​6:44

^ 7段 呢​本​書​係​彼得​喺​幾​年​之前​得到​嘅,叫​做《導至​永生​的​真理》。耶和華見證人​為咗​幫助​人​明白​聖經​而​出版​呢​本​書,而家​已經​停止​發行。