跳到內容

跳到副菜單

跳到目錄

守望台(研讀版)  |  2017年6月

擁護耶和華嘅至高統治權!

擁護耶和華嘅至高統治權!

“耶和華​我哋​嘅​上帝,你​配​得​榮耀、尊崇、力量,因為​你​創造​咗​一切,一切​都​係​因為​你​嘅​旨意​先至​存在,先至​被​創造​嘅。”——啟示錄​4:11

唱​詩​112​,133​

1,2. 我哋​每​個​人​要​確信​乜嘢​呢?(請​睇​吓​課文​開頭​嘅​圖片)

上​一​篇​文章​提​到,魔鬼​話​耶和華​唔​配​統治​人類,人​自己​統治​自己​會​更加​好。撒但​噉​講​啱​唔​啱​呢?假如​人​選擇​自己​統治​自己,又​可以​有​永遠​嘅​生命,噉​佢哋​係咪​真​係​唔​需要​上帝​嘅​統治​呢?假如​你​可以​完全​脱離​上帝,又​有​永遠​嘅​生命,係咪​真​係​會​更加​開心​呢?

2 呢啲​問題​冇​人​可以​替​你​回答,我哋​每​個​人​都​要​自己​認真​諗​清楚。噉樣​你​就​可以​確信,耶和華​嘅​至高統治權​係​正當​嘅,佢​嘅​統治​對​我哋​嚟​講​係​最好​嘅,值得​我哋​全心​擁護。下面,我哋​可以​討論​吓,聖經​點樣​提​出​充分​嘅​理由​證明​只​有​耶和華​先至​有​權​統治​全​宇宙。

耶和華​有​權​統治

3. 點解​只​有​耶和華​先至​配​得​至高統治權?

3 耶和華​最​有​權​統治​全​宇宙,因為​佢​係​全能​嘅​上帝​同 創造主。歷代志上​29:11;使徒行傳​4:24啟示錄​4:11​提​到,喺​天上​嘅​異象​入面,同​基督​一齊​作​王​嘅​14萬4000​人​話:“耶和華​我哋​嘅​上帝,你​配​得​榮耀、尊崇、力量,因為​你​創造​咗​一切,一切​都​係​因為​你​嘅​旨意​先至​存在,先至​被​創造​嘅。”冇錯,因為​耶和華​創造​咗​一切,只​有​佢​先至​有​權​統治​天使​同​全​人類。

4. 點解​反叛​上帝​嘅​統治​就​係​濫用​自由意志?

4 撒但​冇​創造​過​任何​嘢,所以​佢​根本​冇​權​統治​宇宙。當​撒但​同​第​一​對​男女​反叛​耶和華​嘅​時候,佢哋​高傲​自大,完全​冇​將​耶和華​放​喺​眼​内。(耶利米書​10:23)當然,人類​有​自由意志,能够​選擇​脱離​上帝,管理​自己。但係,佢哋​有​冇​權​噉​做​呢?當然​冇​啦。有​自由意志,係​指​人​可以​為​日常​生活​嘅​事​做​決定,但係​唔​等於​可以​反叛​賜​生命​俾​人​嘅​耶和華。顯然,反叛​耶和華​就​係​濫用​咗​自由​選擇權​呢個​恩賜。我哋​人類​係​應該​服從​耶和華​嘅​正義​統治​嘅。

5. 點解​我哋​可以​確信​上帝​嘅​決定​係​公正​嘅?

5 耶和華​最​有​權​統治​嘅​另​一​個​原因​係,佢​會​完全​公正​噉​運用​佢​嘅​權力。佢​宣布​話:“認識​我​係​耶和華,我​喺​地上​顯​忠貞​之​愛,主持公道,伸張​正義;我​喜歡​呢啲​事。”(耶利米書​9:24)耶和華​唔​需要​靠​人​嘅​法律​嚟​決定​乜嘢​係​公平​公正。反而​係​耶和華​以​佢​嘅​完美​公正​為​基礎,為​人類​制定​律法。詩篇​話:“正義​同​公正​係​你​寶座​嘅​基礎”。所以,我哋​可以​對​耶和華​正義​嘅​律法、原則​同​決定​有​信心。(詩篇​89:14;119:128)撒但​指控​耶和華​唔​係​一​個​公正​嘅​統治者,但係​撒但​自己​都​冇​辦法​創造​一​個​正義​嘅​世界。

6. 耶和華​有​權​管理​世界​嘅​一​個​原因​係​乜嘢?

6 另外,耶和華​有​權​統治​嘅​原因​係,佢​有​知識​同​智慧​去​管理​好​宇宙​萬物。例如,上帝​使​佢​嘅​兒​子​有​能力​醫​好​連​醫生​都​束手無策​嘅​奇難雜症。(馬太福音​4:23,24;馬可福音​5:25-29)喺​耶和華​睇嚟,呢啲​都​唔​算​得​上​係​奇迹。佢​好​清楚​人​體​嘅​運作,知道​點樣​使​人​完全​康復。佢​亦​都​有​能力​復活​死​去​嘅​人,仲​可以​阻止​天災​發生。

7. 點解​耶和華​比​撒但​世界​嘅​任何​人​更​有​智慧?

7 撒但​統治​嘅​世界​冇​辦法​解決​國家​内​外​嘅​難題,只​有​耶和華​先​有​智慧​為​世界​帶​嚟​和平。(以賽亞書​2:3,4;54:13)我哋​繼續​學習​耶和華​嘅​知識​同​智慧,就​會​同意​使徒​保羅​所​講​嘅,佢​話“上帝​嘅​厚恩、智慧、知識​幾​咁​高深!佢​嘅​判決​難​以​測​透!佢​嘅​道路​難​以​追尋!”(羅馬書​11:33

耶和華​嘅​統治權​係​最​優越​嘅

8. 耶和華​仁愛​嘅​統治​點樣​深深​打動​你?

8 聖經​清楚​表明​耶和華​嘅​統治權​係​正當​嘅,仲​證明​點解​佢​嘅​統治​比​其他​人​嘅​更​優越。其中​一​個​原因​係,佢​嘅​統治​基​於​愛心。耶和華​仁愛​嘅​統治​深深​打動​我哋,因為​佢“係​有​慈悲​有​恩典​嘅​上帝,唔​輕易​發嬲,滿懷​忠貞 之​愛,信守​真理”。(出埃及記​34:6)耶和華​好​尊重​佢​嘅​僕人,使​佢哋​有​尊嚴。佢​亦​都​悉心​照顧​我哋,仲​好​過​我哋​自己​照顧​自己。同​魔鬼​講​嘅​啱啱​相反,耶和華​從來​都​冇​收埋​啲​好​嘢​唔​俾​佢​嘅​忠心​僕人,甚至​犧牲​佢​嘅​愛子,等​我哋​有​希望​享有​永遠​嘅​生命!(請​讀​詩篇​84:11;羅馬書​8:32

9. 我哋​點​知道​耶和華​好​關心​個别​嘅​人​呢?

9 當然,耶和華​好​關心​佢​所有​嘅​子民。但係,佢​亦​都​對​人​表現​深切​嘅​個人​關注。請​考慮​一下​發生​喺​士師​時期​嘅​一​個​例子。當時​有​三百​年​嘅​時間,耶和華​興起​士師​從​外敵​手​中​拯救​以色列人。喺​呢​段​動盪不安​嘅​時期,耶和華​特别​留意​到​一​個​叫​路得​嘅​外族​女子。路得​作​出​好​大​嘅​犧牲,放棄​以前​嘅​信仰,選擇​事奉​耶和華。後來,路得​可以​結婚​生​仔,呢啲​都​係​耶和華​嘅​賜​福。唔單止​係​噉,路得​復活​之後,就​會​知道​自己​個​仔​有​幸​做​咗​彌賽亞​嘅​祖先。試​諗​吓,將來​路得​發現​聖經​有​一​卷​書​以​佢​嘅​名​嚟​命名,仲​記載​咗​佢​嘅​故事,會​幾​咁​感動​呢!(路得記​4:13;馬太福音​1:5,16

10. 點解​話​耶和華​唔​係​專制​殘暴​嘅​統治者?

10 耶和華​唔​係​一​個​專制​殘暴​嘅​統治者,佢​嘅​統治​方式​使​人​享有​自由,充滿​喜樂。哥林多後書​3:17)大衛​提​到​耶和華,話:“尊嚴​同​光彩​喺​佢​嘅​面前,能力​同​喜樂​喺​佢​嘅​聖所​當中。”(歷代志上​16:7,27)類似​嘅​係,詩篇​執筆者​以探​話:“向​你​歡呼​嘅​人民​幾​咁​有​福!耶和華​啊,佢哋​喺​你​慈顔​嘅​光輝​當中​行走。佢哋​因​你​嘅​名​終日​喜樂,靠​住​你​嘅​正義​得​以​高升。”(詩篇​89:15,16

11. 我哋​點樣​做​就​會​更加​確信​耶和華​嘅​統治​係​最好​嘅?

11 經常​沉思​耶和華​嘅​良善,令​我哋​確信​佢​嘅​統治​係​最好​嘅。我哋​都​認同​詩篇​執筆者​所​講​嘅:“喺​你​嘅​院子​過​一​日,好​過​喺​其他​地方​住​千​日;寧願​喺​我​上帝​嘅​殿​中​守​門口,都​唔​願​喺​惡人​嘅​帳幕​裏面​逗留。”(詩篇​84:10)耶和華​係​仁愛​嘅​設計者​同​創造主,佢​好​清楚​我哋​需要​乜嘢​先​會​得到​真正​嘅​快樂,佢​供應​俾​我哋​嘅​遠遠​超過​我哋​所​需要​嘅。雖然​有時​我哋​需要​作出​一啲​犧牲,但​耶和華​要求​嘅​一切​都​係​為咗​令​我哋​得到​最​大​嘅​喜樂​同​益處。(請​讀​以賽亞書​48:17

12. 我哋​擁護​耶和華​至高統治權​嘅​主要​原因​係​乜嘢?

12 聖經​預言​基督​千年​統治​之後,仍然​有​人​反叛​耶和華​嘅​統治。(啟示錄​20:7,8)點解​佢哋​會​噉​做​呢?魔鬼​被​釋放​出嚟​之後,會​再次​迷惑​人類,挑​起​佢哋​自私​嘅​慾望,就​同​佢​一直​以來​所​做​嘅​一樣。撒但​令​人​以為,唔使​聽從​耶和華​都​可以​得到​永遠​嘅​生命。呢個​根本​係​冇​可能​嘅。不過,我哋​會​唔​會​咁​容易​俾​撒但​呃​到​呢?如果​我哋​真​係​愛​耶和華,相信​佢​係​良善​嘅,擁護​佢​嘅​至高統治權,堅決​拒絶​撒但​嘅​任何​主張。耶和華​又​仁愛​又​公正,所以​我哋​只​會​渴望​生活​喺​佢​嘅​統治​之下。

 忠心​擁護​耶和華​嘅​統治

13. 我哋​點​做​就​表明​自己​支持​上帝​呢?

13 好​明顯,耶和華​嘅​至高統治權​非常​值得​我哋​全心​擁護。既然​耶和華​有​權​統治,而且​佢​嘅​統治​方式​係​最好​嘅,我哋​就​應該​忠於​耶和華,盡​己​所​能​事奉​佢,擁護​佢​嘅​至高統治權。我哋​可以​點樣​表明​自己​支持​耶和華​呢?我哋​用​耶和華​嘅​方式​行事​為人,就​可以​表明​自己​愛​佢​同埋​擁護​佢​嘅​統治。(請​讀​以弗所書​5:1,2

14. 長老​同​家主​可以​點樣​效法​耶和華?

14 我哋​從​聖經​學​到,耶和華​以​仁愛​嘅​方式​行使​佢​嘅​權力。同樣,愛​耶和華​嘅​家主​同​長老​唔​會​好似​個​皇帝​噉​一​個​人​話​晒​事,對​其他​人​諸​多​要求。反而,佢哋​會​效法​耶和華​嘅​仁愛​統治。喺​效法​上帝​同​耶穌​方面,保羅​係​個​好​榜樣。(哥林多前書​11:1)保羅​唔​會​强迫​人​做​任何​嘢,或者​令​佢哋​尷尬,相反,佢​好​仁慈​噉​懇求​佢哋​做​啱​嘅​事。(羅馬書​12:1;以弗所書​4:1;腓利門書​8-10)呢個​就​係​耶和華​嘅​處事​方式。如果​我哋​愛​耶和華,擁護​佢​嘅​統治,都​應該​噉​做。

15. 我哋​可以​點樣​表明​支持​耶和華​嘅​統治?

15 我哋​點​睇​領導權​嘅​安排​呢?尊重​同​支持​呢個​安排,就​表明​我哋​支持​耶和華​嘅​至高統治權。就算​有時​我哋​唔​完全​明白​或者​同意​一​個​決定,我哋​仲係​好​想​支持​上帝​嘅​一切​安排。我哋​嘅​做法​同​世人​嘅​好​唔​一樣,因為​我哋​接受​上帝​做​我哋​嘅​統治者。(以弗所書​5:22,23;6:1-3;希伯來書​13:17 我哋​尊重​領導權​嘅​安排,就​可以​從中​得益,因為​上帝​總​係​為​我哋​嘅​益處​着想。

16. 我哋​所​做​嘅​決定,點樣​表明​我哋​支持​耶和華​嘅​至高統治權?

16 我哋​做​個人​決定​嗰時,都​可以​表明​我哋​支持​上帝​嘅​至高統治權。耶和華​冇​針對​每​一​種​情況,一一​規定​我哋​要​點樣​做。相反,佢​話​俾​我哋​知​佢​嘅​諗法,指引​我哋​做​正確​嘅​決定。例如,佢​冇​俾​基督徒​一​個​詳細​嘅​衣着​清單,話​乜嘢​可以​着,乜嘢​唔​可以。反而,佢​希望​我哋​嘅​衣着​打扮​莊重​得體,符合​一​個​基督徒​嘅​身份。(提摩太前書​2:9,10)佢​都​希望​我哋​諗​吓,自己​嘅​決定​會​唔​會​影響​到​其他​人。(哥林多前書​10:31-33)我哋​做​決定​嘅​時候,應該​考慮​耶和華​嘅​諗法,而​唔​只​係​自己​嘅​喜好,噉樣​就​表明​我哋​真​係​愛戴​同​支持​佢​嘅​統治。

喺​個​人​決定​同​家庭​事​務​上​擁護​耶和華​嘅​至高統治權(請​睇​第​16-18​段)

17,18. 基督徒​夫婦​可以​點樣​支持​耶和華​嘅​至高統治權​呢?

17 我哋​嚟​睇​吓,基督徒​夫婦​可以​點樣​支持​耶和華​嘅​至高統治權。如果​我哋​嘅​婚姻​唔​係​咁​理想,甚至​睇嚟​令​人​失望,我哋​可以​點​做​呢?我哋​可以​諗​吓​耶和華​係​點樣​對待​以色列人​嘅。佢​將​自己​比喻​成​以色列​嘅​丈夫。(以賽亞書​54:5;62:4)不過​以色列人​成​日​都​令​耶和華​失望,維持​噉​嘅​婚姻​真​係​好​難!即使​係​噉,耶和華​冇​輕易​放棄。佢​一​次​又​一​次​噉​寬恕​以色列人,信守​對​佢哋​嘅​承諾。(請​讀​詩篇​106:43-45耶和華​嘅​忠貞​之​愛​唔​係​令​我哋​深​受​感動​咩?

18 所以,愛​耶和華​嘅​夫婦​即使​婚姻​出現​問題,都​會​努力​效法​佢,唔​會​違反​聖經​原則​輕易​離婚。因為​佢哋​知道​耶和華​好​重視​婚約,希望​丈夫​同​妻子“廝守”終生。聖經​容許​人​離婚​或​再婚​嘅​惟一​理由​係,夫婦​有​一​方​淫亂。(馬太福音​19:5,6,9)夫婦​盡力​維持​同​改善​婚姻​關係,就​表明​佢哋​支持​耶和華​嘅​正義​統治。

19. 我哋​做​錯​事​嘅​時候,應該​點樣​做?

19 因為​人​唔​完美,我哋​有時​會​令​耶和華​失望。耶和華​知道​呢​一​點,所以​佢​好​仁慈​噉​為​我哋​提供​贖價​嘅​安排。如果​我哋​做​錯​事,就​應該​求​耶和華​寬恕。(約翰一書​2:1,2)與​其​不斷​自責,不如​努力​從​錯誤​中​學習。如果​我哋​緊緊​依附​耶和華,佢​就​會​寬恕​我哋,幫助​我哋​康復​過嚟,等​我哋​以後​可以​成功​應付​類似​嘅​問題。(詩篇​103:3

20. 點解​我哋​而家​就​要​支持​耶和華​嘅​至高統治權?

20 喺​新世界​裏面,人人​都​接受​耶和華​嘅​統治,學習​佢​正義​嘅​標準。(以賽亞書​11:9)其實,我哋​而家​就​接受​緊​噉樣​嘅​教育​嘞。好​快,唔​會​再​有​人​質疑​耶和華​嘅​統治權​係​唔​係​正當​嘅。所以,我哋​而家​就​要​忠心​噉​事奉​上帝,甘心​樂意​服從​佢,喺​一切​事​上​都​盡力​去​效法​佢,噉樣​做​就​係​全力​支持​耶和華​嘅​至高統治權​嘞。