跳到內容

跳到副菜單

跳到目錄

守望台(研讀版)  |  2017年6月

將目光集中喺重要嘅事上

將目光集中喺重要嘅事上

“等​人人​都​知道,你​嘅​名​係​耶和華,惟有​你​係​統治​全​地​嘅​至高者。”——詩篇​83:18

唱詩​46​,136​

1,2. (甲)全​人類​都​面對​緊​乜嘢​重大​問題?(乙)感激​之​心​有​幾​重要?

今日,對​好多​人​嚟​講,錢​係​最​重要​嘅。佢哋​將​注意力​放​喺​積存​財富​上面。有啲​人​就​覺得​家庭、健康​或者​個人​成就​係​最​重要​嘅。

2 但係​對​我哋​嚟​講,擁護​耶和華​嘅​至高統治權​先至​係​非常​重要​嘅。我哋​要​小心,千祈​唔​好​忽視​呢個​至​關​重要​嘅​問題。點解​噉​講​呢?我哋​會​因為​太​過​專注​於​一​日​又​一​日​嘅​瑣碎​事,或者​顧​住​應付​個人​考驗,就​忘記​咗​擁護​上帝​至高統治權​嘅​重要性。相反,如果​我哋​滿懷​感激​之​心​擁護​耶和華​嘅​至高統治權,就​可以​更​好​噉​裝備​自己,迎接​日常​生活​當中​嘅​挑戰。呢​種​感激​之​心​仲​可以​拉​近​我哋​同​耶和華​嘅​關係。

點解​咁​重要?

3. 撒但​點樣​質疑​耶和華​嘅​至高統治權?

3 魔鬼​撒但​質疑​耶和華​嘅​至高統治權。佢​聲稱​耶和華​嘅​統治​唔​公正,仲​將​最好​嘅​嘢​收​埋​唔​俾​受造物。撒但​嘅​意思​ 係,由​人類​嚟​統治​自己,先至​係​最好​最​開心​嘅。(創世記​3:1-5)撒但​亦​都​暗示​冇​人​會​發​自​内心​忠於​上帝,一旦​面對​巨大​嘅​壓力,任何​人​都​會​離棄​上帝​嘅​統治。(約伯記​2:4,5)對於​呢個​爭議,耶和華​俾​人類​足够​嘅​時間​去​證明,人​冇​咗​耶和華​嘅​正義​統治,係​幾​咁​悲慘!

4. 點解​至高統治權​呢個​爭議​需要​解決?

4 耶和華​當然​好​清楚​撒但​喺​度​講​大話。噉​點解​耶和華​俾​機會​撒但​證明​自己​嘅​主張​呢?因為​呢個​牽涉​到​天使​同​全​人類。(請​讀​詩篇​83:18自從​第​一​對​夫婦​離棄​耶和華​嘅​統治​之後,有​好多​人​都​步​佢哋​後塵。有啲​人​可能​會​諗,撒但​講​嘅​係咪​啱​嘅​呢?只要​呢個​問題​一​日​未​解決,國族、部族、民族、家人​之​間​都​仲​會​有​紛爭。耶和華​嘅​至高統治權​得​以​彰顯​之後,所有​受造物​都​會​永遠​服從​佢​嘅​正義​統治,宇宙​亦​會​恢復​和平。(以弗所書​1:9,10

5. 喺​擁護​上帝​嘅​至高統治權​方面,你​可以​點​做?

5 事實​將​會​表明​上帝​嘅​至高統治權​係​正當​嘅,而​撒但​同​人類​嘅​統治​一敗塗地,要​被​徹底​鏟除。上帝​通過​彌賽亞​王國​嘅​統治​一定​會​成功,對​上帝​保持​忠貞​嘅​人​亦​會​證明​人類​可以​擁護​上帝​嘅​統治。(以賽亞書​45:23,24)喺​擁護​上帝​嘅​至高統治權​方面,從​古​至今​有​好多​忠貞​嘅​榜樣,你​想​唔​想​效法​佢哋​呢?你​一定​都​好​想。我哋​將​目光​集中​喺​至高統治權​嘅​爭議​之​上,明白​呢​件​事​有​幾​咁​重要,就​可以​幫助​我哋​保持​忠貞。

比​得救​更​重要

6. 擁護​耶和華​嘅​至高統治權​有​幾​重要?

6 就​好似​之前​所​講​嘅​一樣,對於​全​人類​嚟​講,擁護​耶和華​嘅​至高統治權​係​極其​重要​嘅,甚至​比​個人​嘅​快樂​更加​重要。噉​係咪​我哋​嘅​得救​唔​重要​呢?抑或,耶和華​唔​係​咁​關心​我哋​呢?絶對​唔​係。點解​呢?

7,8. 點解​耶和華​實現​佢​嘅​應許,係​彰顯​至高統治權​嘅​一​部分?

7 耶和華​深愛​同​珍視​人類。佢​樂意​通過​佢​愛子​嘅​血,使​我哋​有​機會​得到​永遠​嘅​拯救。(約翰福音​3:16;約翰一書​4:9)如果​耶和華​冇​實現​佢​嘅​應許,魔鬼​就​有​藉口​話​耶和華​講​大話,仲​收​埋​啲​好​嘅​嘢​唔​俾​人類,所以​佢​嘅​統治​係​唔​公正​嘅。亦​都​俾​反對者​有​機會​羞辱​上帝,話:“佢​應許​要​臨在,邊​有​實現​呢?其實,自從​我哋​列祖​長眠​以來,一切​始終​同​創世​開始​嗰時​一模一樣。”(彼得後書​3:3,4)因為​噉,耶和華​一定​會​拯救​嗰啲​順服​佢​嘅​人,呢個​係​彰顯​佢​嘅​至高統治權​嘅​一​部分。(請​讀​以賽亞書​55:10,11另外,耶和華​嘅​統治​係​以​愛心​為​基礎​嘅。所以​我哋​可以​確信​佢​會​永遠​關愛、珍視​同​賞識​佢​忠貞​嘅​僕人。(出埃及記​34:6

8 雖然​我哋​承認​耶和華​嘅​至高統治權​非常​重要,但係​都​唔​應該​覺得​我哋​得救​嘅​希望​唔​重要,或者​我哋​喺​耶和華​眼​中​冇​咩​價值。對​統治權​同​得救​嘅​希望​有​正確​嘅​觀點​係​好​重要​嘅。如果​我哋​想​將​目光​集中​喺​至高統治權​嘅 重大​爭議​上,擁護​耶和華​嘅​正義​統治,就​好​需要​有​正確​嘅​觀點。

要​有​正確​嘅​觀點

9. 撒但​對​約伯​提​出​乜嘢​質疑?(請​睇​吓​課文​開頭​嘅​圖片)

9 約伯記​係​聖經​入面​最​早​寫成​嘅​書卷​之​一,裏面​清楚​提​到​我哋​需要​有​正確​嘅​觀點。撒但​質疑​話,約伯​一旦​遭受​猛烈​嘅​打擊,就​會​離棄​上帝。撒但​建議​耶和華​親自​折磨​約伯。耶和華​冇​噉​做,但​佢​容許​撒但​去​試探​約伯,佢​話:“[約伯]嘅​一切​都​交​喺​你​手​上。”(請​讀​約伯記​1:7-12之後,約伯​喺​短​時間​之内​喪失​咗​佢​嘅​僕人、收入​來源​同埋​十​個​心愛​嘅​仔女。撒但​所​用​嘅​方式​令​人​以為​約伯​嘅​難題​係​上帝​造成​嘅。(約伯記​1:13-19)撒但​跟住​用​痛苦​嘅​惡疾​去​折磨​約伯。(約伯記​2:7)約伯​嘅​妻子​同​三​個​所​謂​嘅​朋友​仲​講​埋​晒​啲​令​人​灰心​沮喪​嘅​話,搞​到​佢​更加​絶望。(約伯記​2:9;3:11;16:2

10. (甲)約伯​點​做,表明​佢​忠於​上帝?(乙)佢​一時​産生​乜嘢​錯誤​嘅​觀點?

10 結果​點​呢?事實​證明​撒但​嘅​質疑​大錯特錯,因為​約伯​並​冇​背叛​上帝。(約伯記​27:5)不過,約伯​一時​産生​咗​錯誤​嘅​觀點,佢​變​得​過分​正義,甚至​仲​要求​上帝​解釋​佢​受苦​嘅​原因。(約伯記​7:20;13:24)可能​我哋​都​會​覺得,約伯​經歷​咗​咁​多​嘅​苦難​之後​有​噉​嘅​諗法,係​情有可原​嘅。不過,耶和華​睇​出​需要​糾正​佢​嘅​諗法。耶和華​幫助​佢​明白​啲​乜嘢?

11,12. 耶和華​幫助​約伯​明白​咗​乜嘢?約伯​點樣​回應​呢?

11 約伯記​38-41​章都​係​上帝​對​約伯​講​嘅​話,入面​冇​一​句​提​到​約伯​受苦​嘅​真正​原因​係​乜嘢。耶和華​主要​想​講​嘅​唔​係​約伯​點解​要​受苦,佢​亦​都​唔​需要​為​自己​辯護​啲​乜嘢。相反,佢​係​想​幫助​約伯​意識​到,相對​於​耶和華​嘅​偉大​作為​嚟​講,人類​嘅​問題​係​幾​咁​渺小。上帝​仲​幫助​約伯​睇​出,佢​需要​關心​更加​重要​嘅​問題。(請​讀​約伯記​38:18-21耶和華​所​講​嘅​話,使​約伯​恢復​翻​正確​嘅​觀點。

12 約伯​遭受​咁​猛烈​嘅​打擊​之後,耶和華​提​出​咁​直接​嘅​勸告​係​唔​係​太​無情​呢?唔​係,而且​約伯​都​冇​噉​諗。雖然 經歷​咁​多​苦難,但​後來​約伯​改變​態度,開始​講​出​感激​嘅​話。佢​仲​講​到:“我​收​翻​自己​講​過​嘅​話,喺​塵土​同​灰燼​中​懊悔。”雖然​耶和華​嘅​勸告​好​直接,但係​就​可以​令​約伯​重新​振作​起嚟。(約伯記​42:1-6)而​之前,以利户​亦​都​俾​咗​一啲​勸告​幫助​約伯​調整​自己​嘅​觀點。(約伯記​32:5-10)由於​約伯​對​耶和華​嘅​糾正​作​出​回應,佢​調整​咗​自己​嘅​觀點,結果​耶和華​好​賞識​佢​所​表現​嘅​信心。(約伯記​42:7,8

13. 耶和華​點樣​祝福​約伯?考驗​結束​之後,約伯​點樣​繼續​保持​正確​嘅​觀點?

13 即使​約伯​嘅​考驗​結束​咗,耶和華​俾​佢​嘅​勸告​依然​繼續​使​佢​得益。約伯​點樣​從中​得益​呢?聖經​話:“後來​耶和華​賜​福​俾​約伯,比​之前​更​多。”毫無​疑問,恢復​翻​以前​嘅​生活​同埋​復原​身心​嘅​創傷​係​需要​時間​嘅。一​段​時間​過後,佢“又​有​七​個​仔、三​個​女。”(約伯記​42:12-14)約伯​肯定​好​掛​住​之前​俾​撒但​害​死​咗​嘅​仔女,可能​佢​不時​都​仲​會​回憶​起​一啲​慘痛​嘅​經歷。雖然​佢​之後​更加​明白​自己​受​考驗​嘅​原因,但係​佢​都​可能​會​諗,自己​受​嘅​苦​係咪​真​係​要​到​噉​嘅​程度​呢!無論​佢​點​諗​都​好,佢​都​可以​回想​翻​上帝​俾​佢​嘅​勸告​嚟​幫助​自己​保持​正確​嘅​觀點,得到​安慰。(詩篇​94:19

我哋​可唔可以​將​目光​集中​喺​重要​嘅​事​上,而​唔​係​專注​於​自己​嘅​難題?(請​睇​第​14​段)

14. 我哋​從​約伯​嘅​經歷​學​到​乜嘢?

14 我哋​沉思​約伯​嘅​記載,都​可以​培養​正確​嘅​觀點,得到​安慰。而​耶和華​將​呢啲​記載​保存​落嚟,就​係“為咗​教導​我哋……等​我哋​靠​住​忍耐,靠​住​聖經​所​帶​嚟​嘅​安慰,可以​懷​有​希望。”(羅馬書​15:4)我哋​學​到​乜嘢​呢?主要​係:我哋​唔​好​過度​關注​自己​嘅​生活,要​將​目光​集中​喺​擁護​耶和華​嘅​至高統治權​呢​件​重要​嘅​事​上。另外,喺​至高統治權​嘅​問題​上,我哋​係​可以​發揮​重要​作用​嘅。就算​喺​好​艱難​嘅​環境​之下,我哋​都​可以​好似​約伯​噉,繼續​保持​忠義。

15. 我哋​喺​考驗​之下​保持​忠貞​可以​達成​乜嘢​目的?

15 沉思​保持​忠貞​嘅​價值,點解​可以​令​人​得到​安慰​呢?千祈​唔​好​以為​受​考驗​就​代表​上帝​唔​鍾意​我哋,其實​呢啲​考驗​係​可以​達成​一​個​目的​嘅,就​係​使​我哋​有​機會​去​表明​自己​支持​上帝​嘅 至高統治權。(箴言​27:11)我哋​保持​忍耐​就​可以​得​蒙“悦納”,而且​對​未來​嘅​希望​更​有​信心。(請​讀​羅馬書​5:3-5約伯​嘅​事例​表明​耶和華​係“充滿​温情,慈悲​為​懷”嘅​上帝。(雅各書​5:11)所以​我哋​好​肯定,佢​會​獎賞​所有​擁護​佢​至高統治權​嘅​人。知道​呢​一​點,可以​幫助​我哋“凡​事​忍耐,懷​住​喜樂​而​堅忍”。(歌羅西書​1:11

要​保持​專注

16. 點解​我哋​需要​提醒​自己,擁護​耶和華​至高統治權​嘅​重要性?

16 當然,要​專注​於​擁護​耶和華​嘅​至高統治權,對​我哋​嚟​講,都​可以​係​一​種​挑戰。有時,我哋​會​覺得​難題​大​到​自己​根本​應付​唔​嚟。就算​係​一啲​小​問題,如果​我哋​成​日​諗​嚟​諗​去,都​會​俾​我哋​諗​成​係​大​問題。所以,面對​困難​嗰時,我哋​要​經常​提醒​翻​自己,支持​上帝​至高統治權​嘅​重要性。

17. 經常​做​耶和華​嘅​工作,點樣​幫助​我哋​將​目光​集中​喺​重要​嘅​事​上?

17 經常​做​耶和華​嘅​工作,可以​幫助​我哋​將​目光​集中​喺​重要​嘅​事​上。例如,一​位​名叫​勒妮​嘅​姊妹​中​咗​風,同時​又​患​有​癌症,長期​都​受​到​病痛​嘅​折磨。喺​唔​同​嘅​地方​接受​治療​嗰陣,佢​同​醫護​人員、患者​同埋​嚟​探病​嘅​人​作​見證。喺​某​一​間​醫院,佢​喺​短短​兩​個​半​星期​裏面,就​用​咗​80​個​鐘​嚟​傳道。直到​臨死​之前,勒妮​姊妹​都​依然​專注​於​耶和華​嘅​至高統治權,噉樣​做​減輕​咗​佢​嘅​痛苦。

18. 一​位​姊妹​嘅​經歷​點樣​表明​擁護​耶和華​嘅​至高統治權​係​大​有​益處​嘅?

18 冇錯,我哋​每​一​日​都​會​面對​好多​壓力​同​瑣碎​事,但係​我哋​都​要​將​目光​集中​喺​耶和華​嘅​至高統治權​上。由於​航班​接二連三​噉​被​取消,珍妮弗​姊妹​返​唔​到​屋企,惟有​喺​機場​等​咗​三​日。喺​噉​嘅​情況​之下,一般​人​好​容易​會​變​得​淨係​關注​自己​嘅​困境。雖然​珍妮弗​覺得​又​攰​又​孤獨,但​佢​仲係​向​耶和華​禱告,想​睇​吓​自己​可以​點樣​用​聖經​知識​嚟​鼓勵​其他​人。結果​點​呢?佢​同​好多​人​傳道,分發​咗​好多​聖經​資料。佢​話:“即使​喺​咁​艱難​嘅​情況​下,我​依然​感受​到​耶和華​幫助​我,俾​我​足够​嘅​力量,有效​噉​宣揚​佢​嘅​名。”珍妮弗​姊妹​確實​將​目光​集中​喺​耶和華​嘅​旨意​之​上。

19. 上帝​嘅​子民​應該​點樣​擁護​上帝​嘅​至高統治權?

19 我哋​可以​點樣​分辨​正確​同​錯誤​嘅​宗教?關鍵​就​係,睇​吓​呢個​宗教​有​冇​重視​耶和華​嘅​至高統治權。上帝​嘅​子民​一直​以來​都​擁護​耶和華​嘅​統治。如果​想​支持​純真​崇拜,我哋​每​一​個​人​就​要​盡力​保持​同​聖經​一致​嘅​觀點。

20. 耶和華​點​睇​你​為​擁護​佢​嘅​至高統治權​所​作​嘅​努力?

20 為咗​擁護​耶和華​嘅​至高統治權,你​一直​忠心​服務,喺​考驗​下​亦​都​保持​堅忍。要​緊記,耶和華​非常​珍視​你​所​付出​嘅​呢​一切​努力。(詩篇​18:25)下​一​篇​課文​會​進一步​分析,點解​耶和華​嘅​統治​值得​我哋​全心​支持,同埋​我哋​可以​點樣​擁護​佢​嘅​至高統治權。