跳到內容

跳到副菜單

跳到目錄

守望台(研讀版)  |  2017年10月

“愛……要有真誠嘅行動”

“愛……要有真誠嘅行動”

“我哋​嘅​愛,唔​好​空口​講​白話,要​有​真誠​嘅​行動。”——約翰一書​3:18

唱詩​72,124​

1. 乜嘢​係​最​偉大​嘅​愛?點解?(請​睇​吓​課文​開頭​嘅​圖片)

愛​係​嚟自​上帝​嘅​恩賜。耶和華​係​愛​嘅​源頭。(約翰一書​4:7)喺​聖經​裏面,希臘語詞“阿格配”呢​種​愛​係​最​偉大​嘅,係​以​正確​嘅​原則​為​基礎​嘅。雖然​呢​種​愛​都​包括​温情​同​愛意,但​最​主要​嘅​表現​係​無私​噉​為​他人​付出。按照​一​本​參考書​所​講,“人​只​能够​從​愛​所​引發​嘅​行動,先​可以​睇​得​出​乜嘢​係​阿格配​嘅​愛。”如果​我哋​向​人​表現,或者​人哋​向​我哋​表現​無私​嘅​愛,我哋​嘅​生活​就​會​變​得​豐富多彩,充滿​喜樂​同​意義。

2,3. 耶和華​點樣​向​人類​表現​無私​嘅​愛?

2 耶和華​喺​創造​亞當​同​夏娃​之前,就​已經​向​人類​表現​愛​嘞。佢​創造​地球​作為​人類​嘅​永久​家園,使​人類​唔止​係​擁有​生命,仲​可以​充分​享受​生命​嘅​樂趣。耶和華​所​做​嘅​一切​唔​係​為咗​佢​自己,而係​完全​為​我哋​嘅​益處​着想。佢​為​地上​嘅​兒女​準備​好​一​個​樂園,使​佢哋​可以​喺​呢個​樂園​入面​享有​永遠​嘅​生命,通過​呢​一​點​進一步​表現​出​佢​無私​嘅​愛。

 3 喺​亞當​同​夏娃​反叛​之後,耶和華​以​最​偉大​嘅​方式​表現​出​無私​嘅​愛。佢​為​佢哋​嘅​後代​作出​贖價​嘅​安排,確信​人類​當中​一定​會​有​人​回應​佢​嘅​愛。(創世記​3:15;約翰一書​4:10)事實​上,喺​耶和華​睇嚟,從​佢​應許​拯救​人類​嘅​嗰​一刻​開始,贖價​嘅​犧牲​就​已經​付出​咗。四千​幾​年​後,耶和華​付出​高昂​嘅​代價,為​所有​人​犧牲​佢​嘅​獨生子。(約翰福音​3:16)我哋​真係​非常​感激​耶和華​無私​嘅​愛!

4. 乜嘢​表明​唔​完美​嘅​人​係​能够​表現​愛​嘅?

4 因為​耶和華​按照​佢​嘅​形像​創造​我哋,所以​我哋​都​能够​表現​無私​嘅​愛。即使​我哋​遺傳​咗​罪,喺​表現​愛​方面​會​有​挑戰,但​唔​等於​我哋​做​唔​到。亞伯​無私​噉​獻​出​佢​最好​嘅​牲畜​嚟​表現​佢​對​耶和華​嘅​愛。(創世記​4:3,4)挪亞​表現​無私​嘅​愛,即使​幾十​年​來​都​冇​人​積極​回應,佢​仲係​向​周圍​嘅​人​傳講​上帝​嘅​信息。(彼得後書​2:5)亞伯拉罕​表明​佢​愛​耶和華​多​過​愛​自己,願意​將​自己​嘅​仔​以撒​獻​俾​耶和華。(雅各書​2:21)我哋​好想​效法​呢啲​忠僕,就算​唔​容易​都​繼續​努力​表現​愛。

真摯​嘅​愛​同​虚假​嘅​愛

5. 我哋​可以​點樣​表現​真摯​嘅​愛?

5 聖經​話,表現​真摯​嘅​愛,就“唔​好​空口​講​白話,要​有​真誠​嘅​行動”。(約翰一書​3:18)噉​係咪​話,我哋​唔​可以​用​言語​嚟​表達​我哋​嘅​愛​呢?當然​唔​係!(帖撒羅尼迦前書​4:18)其實​經文​嘅​意思​係,我哋​嘅​愛​唔​好​只係​口​講,喺​某​啲​時候​應該​有​實際​嘅​行動。例如,當​一​個​基督徒​同工​缺乏​基本​嘅​生活​所​需,佢​需要​嘅​唔​係​淨係​我哋​口頭​上​嘅​祝福。(雅各書​2:15,16)同樣,對​耶和華​同​其他​人​嘅​愛​推動​我哋​全心​投入​傳道​工作,而​唔​係​只​求​耶和華​差派​工人​收割​屬靈​莊稼。(馬太福音​9:38

6,7. (甲)乜嘢​係“無偽​嘅​愛心”?(乙)請​舉​出​一啲​同​虚假​嘅​愛​有關​嘅​例子。

6 正如​使徒​約翰​所​寫,我哋​嘅​愛​一定“要​有​真誠​嘅​行動”。所以,我哋​嘅​愛“唔​應該​虚偽”,而​應該​係“無偽​嘅”。(羅馬書​12:9;哥林多後書​6:6)噉​意味​住,戴​住​面具​假扮​向​人​表現​嘅​愛,並​唔​係​真摯​嘅。我哋​可能​會​諗,“虚偽​嘅​愛​有​冇​價值​呢?”呢個​就​好似​假​銀紙​噉,一啲​價值​都​冇。

7 我哋​嚟​睇​吓​一啲​同​虚假​嘅​愛​有關​嘅​例子。喺​伊甸園,撒但​假扮​關心​夏娃,但​佢​所​做​嘅​嘢​其實​表明​佢​又​自私​又​虚偽。(創世記​3:4,5)喺​大衛​嘅​日子,亞希多弗​為咗​個人​利益​背叛​大衛,佢​嘅​所作所為​表明​佢​同​王​之​間​嘅​友誼​係​虚假​嘅。(撒母耳記下​15:31)今日​都​一樣,叛道者​同​其他​喺​會衆​製造​分裂​嘅​人“講​嘢​油腔滑調,阿諛奉承”,假扮​成​好​有​愛心​噉,但​實際​上​只係​為咗​自私​嘅​目的。(羅馬書​16:17,18

8. 我哋​可以​問​吓​自己​乜嘢​問題?

8 虚假​嘅​愛​同​上帝​無私​嘅​愛​背道而馳,特别​可恥。噉樣​嘅​行為​呃​得到​人​但係​呃​唔​到​耶和華。實際​上,耶穌​話 嗰啲​虚偽​嘅​人​會​受​到“最​重​嘅​懲罰”。(馬太福音​24:51)當然,耶和華​嘅​忠僕​絶對​唔​想​表現​虚假​嘅​愛。我哋​應該​問​吓​自己:“我​嘅​愛​係咪​一直​都​咁​真摯​呢?我​係咪​一​個​自私​虚偽​嘅​人​呢?”等​我哋​嚟​睇​吓,努力​表現“無偽​嘅​愛心”嘅​九​種​方法。

以“真誠​嘅​行動”嚟​表現​愛

9. 真摯​嘅​愛​會​推動​我哋​做​乜嘢?

9 樂意​做​幕後​工作。我哋​應該​甘願“暗中”為​弟兄​姊妹​服務,盡​可能​保持​低調。(請​讀​馬太福音​6:1-4亞拿尼亞​同​撒非拉​並​冇​噉​做。佢哋​好想​人​知道​自己​嘅​善行,就​誇大​自己​所​作​嘅​捐獻,最終​因為​虚偽​嘅​行為​而​導致​可悲​嘅​下場。(使徒行傳​5:1-10)我哋​有​真摯​嘅​愛,就​會​樂意​為​弟兄​姊妹​服務,即使​冇​人​認可​或​稱讚,我哋​都​會​噉​做。例如,好多​弟兄​默默無聞​噉​協助​中央長老團​預備​屬靈​食物,佢哋​唔​想​人​留意​自己,亦​都​唔​會​透露​自己​嘅​工作​内容。

10. 我哋​可以​點樣​帶頭​互相​尊重?

10 帶頭​互相​尊重。(請​讀​羅馬書​12:10耶穌​甘願​做​卑微​嘅​工作,喺​尊重​他人​方面​樹立​咗​好好​嘅​榜樣。(約翰福音​13:3-5,12-15)我哋​如果​想​效法​耶穌​尊重​其他​人,就​要​付出​努力​培養​謙卑。喺​領受​聖靈​之前,就算​係​使徒​都​唔​能够​完全​明白​耶穌​所​做​嘅​事。(約翰福音​13:7)我哋​向​人​表現​尊重,就​唔​會​因為​自己​受​過​更​高​嘅​教育、擁有​更​多​嘅​財富,或者​享有​特别​嘅​服務​機會​而​覺得​比​其他​人​優越。(羅馬書​12:3)我哋​見到​其他​人​得到​稱讚​嗰陣,即使​覺得​自己​配​得​同樣​嘅​讚賞,都​唔​應該​妒忌,而​應該​戥​佢哋​開心。

11. 點解​我哋​嘅​稱讚​一定​要​真心?

11 真心​稱讚​弟兄​姊妹。我哋​一​有​機會​就​應該​互相​稱讚,噉樣​做​就係​講“强化​人​嘅​好話”。(以弗所書​4:29)不過,如果​我哋​嘅​稱讚​唔​係​出於​真心,就​會​變​成​係​阿諛奉承,或者​係​逃避​責任,冇​俾​人​適當​嘅​勸告。(箴言​29:5)稱讚​完​一​個​人​之後,又​喺​背後​講​佢​壞話,呢個​係​虚偽​嘅​一​種​表現。使徒​保羅​真心​稱讚​其他​人,對​人​表現​真摯​嘅​愛,為​我哋​樹立​咗​好​榜樣。例如,保羅​真心​稱讚​哥林多​基督徒​做​得​好​嘅​地方。(哥林多前書​11:2)但係,當​佢哋​需要​勸告​嘅​時候,保羅​就​用​仁慈​嘅​態度,清晰​噉​向​佢哋​解釋。(哥林多前書​11:20-22

我哋​表現​愛心​同​慷慨​嘅​一​個​方法​就係,為​有​需要​嘅​弟兄​姊妹​提供​實際​嘅​幫助。 (請​睇​第​12​段)

12. 喺​好客​方面,我哋​可以​點樣​表現​真摯​嘅​愛?

12 要​有​好客​精神。耶和華​吩咐​我哋​要​對​弟兄​姊妹​慷慨​大方。(請​讀​約翰一書​3:17不過,我哋​必須​懷​住​純正​嘅​動機,避免​有​任何​自私​嘅​目的。我哋​可以​問​吓​自己:“我​係咪​只係​慷慨​對待​親密​好友、顯要​人物,或者​嗰啲​將來​能够​回報​自己​嘅​人​呢?抑或,我哋​會​揾​機會​對​嗰啲​自己​唔​係​好​認識,或者​冇​乜嘢​可以​回報​我哋​嘅​弟兄​姊妹​表現​慷慨?”(路加福音​14:12-14)假設​有​一​個​基督徒​同工​因為​作出​唔​明智​嘅​決定 ​而​需要​幫助,又​或者​我哋​款待​完​一​個​同工​之後​冇​得到​感謝。喺​噉​嘅​情況​之下,我哋​應該​聽從​聖經​嘅​勸告:“要​好客,彼此​款待,唔​好​發​牢騷。”(彼得前書​4:9)如果​我哋​實踐​呢個​忠告,就​會​因為​自己​懷​住​正確​嘅​動機​為​其他​人​付出​而​得到​喜樂。(使徒行傳​20:35

13. (甲)喺​幫助​軟弱​嘅​人​方面,我哋​會​遇​到​乜嘢​特别​嘅​挑戰?(乙)我哋​可以​做​啲​乜嘢​實際​嘅​事​去​支持​軟弱​嘅​人?

13 支持​軟弱​嘅​人。聖經​嘅​一​個​吩咐​可以​驗證​我哋​嘅​愛​係咪​真摯​嘅。呢個​吩咐​就係,“支持​軟弱​嘅​人,耐心​對待​所有​人”。(帖撒羅尼迦前書​5:14)雖然,好多​軟弱​嘅​人​後來​都​恢復​翻​堅强​嘅​信心,但​有啲​人​仲係​需要​我哋​耐心​噉​繼續​支持​佢哋。我哋​可以​用​聖經​鼓勵​佢哋,邀請​佢哋​一齊​傳道,或者​撥​出​時間​聆聽​佢哋​心​入面​嘅​諗法。我哋​唔​應該​隨意​斷定​某​個​同工​係“堅强”抑或​係“軟弱”嘅,我哋​應該​承認​所有​人​都​有​自己​嘅​優點​同​弱點。就算​係​使徒​保羅​都​承認​自己​有​軟弱​嘅​一​面。(哥林多後書​12:9,10)所以,我哋​都​能够​通過​基督徒​同工​嘅​支持​而​得益。

14. 為咗​維持​同​弟兄​姊妹​之​間​嘅​和睦​關係,我哋​願意​付出​幾多?

14 保持​和睦。就算​有時​我哋​覺得​自己​俾​人​誤會​或者​受​到​唔​公平​嘅​對待,都​要​盡​己​所​能​同​弟兄​姊妹​保持​和睦。(請​讀​羅馬書​12:17,18一​句​真心​嘅​道歉​就​可以​修復​彼此​之​間​嘅​關係。與其​話,“唔​好​意思​呀,我​唔​知​你​會​噉​諗​㗎”,不如​承認​喺​呢個​問題​上​自己​都​有​責任。你​可以​同​對方​道歉​話:“真係​唔​好​意思,我​講​嘅​嘢​傷害​咗​你。”和睦​嘅​關係​對​婚姻​尤​其​重要。夫婦​唔​應該​只係​喺​人​前​假扮​恩愛,而​私底下​就​以​冷戰、惡言​惡語​或者​暴力​嚟​互相​傷害。

15. 我哋​可以​點樣​表明​自己​真心​寬恕​人?

15 甘心​寬恕。如果​我哋​俾​人​得罪,就​應該​樂意​原諒​對方,唔​好​懷恨​在心。我哋“用​愛心​彼此​包容,用​和平​維繫​團結,竭力​持守​聖靈​所​賜​嘅​合一”,就​會​樂於​寬恕​嗰啲​無意​得罪​我哋​嘅​人。(以弗所書​4:2,3)如果​我哋​真心​想​寬恕​人,就​唔​好​成​日​諗​住​對方​嘅​過錯,“唔[​好​]計較​人​對​我哋​嘅​傷害”。(哥林多前書​13:4,5)如果​我哋​對​人​懷恨​在心,就​可能​會​使​我哋​同​弟兄​姊妹,甚至​同​耶和華​嘅​關係​受​到​永久​嘅​傷害。(馬太福音​6:14,15)我哋​亦​都​可以​為​嗰啲​得罪 ​我哋​嘅​人​禱告,表明​我哋​真心​寬恕​佢哋。(路加福音​6:27,28

16. 如果​我哋​喺​事奉​耶和華​方面​有​特别​嘅​委派,應該​注意​乜嘢?

16 犧牲​個人​嘅​利益。如果​我哋​喺​事奉​耶和華​方面​得到​一啲​特别​嘅​委派,我哋​應該​將​呢個​視​為​一​個​機會,“求​其他​人​嘅​益處,唔​好​總​係​求​自己​嘅​益處”,噉樣​做​就​表明​我哋​有​真摯​嘅​愛。(哥林多前書​10:24)例如,喺​大會​嗰陣,招待員​會​早​過​其他​人​入場。佢哋​唔​會​利用​呢個​機會​提前​幫​自己​同​家人​霸​靚​位,反而​會​喺​自己​受​委派​嘅​區域​選擇​嗰啲​唔​係​咁​理想​嘅​位置。佢哋​願意​犧牲​自己​嘅​個人​利益,表現​無私​嘅​愛心。你​會​點樣​效法​佢哋​嘅​好​榜樣​呢?

17. 如果​一​個​人​犯​咗​嚴重​嘅​罪,真摯​嘅​愛​會​推動​佢​點樣​做?

17 承認​同​離棄​不​為​人​知​嘅​罪。為咗​保全​面子​或者​唔​想​令​其他​人​失望,一啲​有​嚴重​過犯​嘅​基督徒​會​掩飾​自己​嘅​罪。(箴言​28:13)不過,噉樣​做​唔​係​愛心​嘅​表現,到頭來​只​會​害​人​害​己,亦​都​會​阻礙​上帝​聖靈​嘅​運作,危害​整​個​會衆​嘅​安寧。(以弗所書​4:30)如果​一​個​基督徒​犯​咗​嚴重​嘅​罪,真摯​嘅​愛​會​推動​佢​向​長老​講​出​實情,噉​長老​就​能够​向​佢​提供​所​需​嘅​幫助。(雅各書​5:14,15

18. 真摯​嘅​愛​有​幾​重要?

18 愛心​係​所有​特質​當中​最​偉大​嘅​一​種。(哥林多前書​13:13)如果​我哋​向​人​表現​愛心,就係​效法​愛​嘅​源頭​耶和華,其他​人​亦​都​因​此​睇​出​我哋​係​耶穌​嘅​門徒。(以弗所書​5:1,2)喺​聖靈​啟示​下,保羅​話:“我……冇​愛心,就​唔​算​得​係​乜嘢。”(哥林多前書​13:2)願​我哋​繼續​表現​愛心,唔​係​淨係“空口​講​白話”,亦​都“有​真誠​嘅​行動”。