跳到內容

跳到副菜單

跳到目錄

上帝嘅王國統治嘞!

 第​11​章

提高道德素質——反映上帝嘅聖潔

提高道德素質——反映上帝嘅聖潔

本​章​概要

君王​教導​子民​尊重​上帝​嘅​道德​標準

想象​吓,你​行​入​門樓,走​向​耶和華​嘅​偉大​屬靈​聖殿​嘅​外院

1. 以西結​睇​到​乜嘢​令​人​望而生畏​嘅​異象?

等​我哋​返​到​2500​年​前,想像​一下​你​就​係​以西結​先知。一​座​宏偉​輝煌​嘅​聖殿​就​喺​你​面前,你​慢慢​行​過去,一​位​大能​嘅​天使​帶​住​你,仔細​參觀​成​座​建築物。你​行​上​七​級​樓梯,嚟​到​外院​三​個​門樓​嘅​其中​一​個,睇​到​每​個​門樓​大約​成​30​米​高(100​英尺),好​自然​就​會​望而生畏。一​入​門樓,就​見​到​守衛室,入面​嘅​牆柱​刻​住​精緻​嘅​棕櫚樹​圖案。(以西結書​40:1-4,10,14,16,22;41:20

2. (甲)異象​裏面​嘅​聖殿​象徵​乜嘢?(另​見​腳注)(乙)聖殿​門樓​嘅​唔​同​特點​使​我哋​學​到​乜嘢?

2 呢個​係​以西結​喺​異象​裏面​睇​到​嘅​屬靈​聖殿。以西結​將​自己​睇​到​嘅​細節​詳細​噉​記錄​喺​佢​寫​嘅​預言​書​裏面,就​係​以西結書40-48​章。異象​裏面​嘅​聖殿​象徵​耶和華​為​正確​宗教​所​作​嘅​一切​崇拜​安排。聖殿​嘅​每​個​特點​都​有​象徵​意義,同​我哋​呢啲​喺​最後​嘅​日子​崇拜​耶和華​嘅​人​密切​相關。 * 高大​嘅​門樓​象徵​乜嘢​呢?呢啲​門樓​令​我哋​諗​起,邊個​想​加入​正確​嘅​宗教,就​一定​要​按照​耶和華​崇高​正義​嘅​標準​生活。牆柱​上面​嘅​棕櫚樹​同樣​强調​呢​一​點,因為​聖經​有時​用​棕櫚樹​代表​正義。(詩篇​92:12)守衛室​又​象徵​乜嘢​呢?好​明顯,邊個​唔​尊重​上帝​嘅​標準,就​唔​可以​加入​正確​嘅​宗教,失去​得到​永生​嘅​機會。(以西結書​44:9

3. 點解​基督徒​要​不斷​受​到​熬煉?

3 以西結​嘅​異象​有​冇​應驗​呢?呢​本​書第​2​章講​到,從​1914​年​到​1919​年​初期,耶和華​任用​耶穌​熬煉​佢​嘅​子民。上帝​子民​所​受​嘅​熬煉​係咪​到​此​為止​呢?當然​唔​係。過去​一百​年間,基督​一直​要​門徒​遵守​耶和華​所​定​嘅​聖潔​標準。門徒​要​有​聖潔​嘅​品行,就​要​不斷​受​到​熬煉。原因​係,喺​呢個​道德​敗壞​嘅​世界​裏面,雖然​基督​將​門徒​聚集​起嚟,不過​撒但​就​一心​要​將​佢哋​拉​返​去​放縱​私慾​嘅​泥潭​裏面。(請​讀​彼得後書​2:20-22等​我哋​而家​嚟​睇​吓​真​基督徒​喺​三​個​方面​逐步​受 到​熬煉:第​一,提高​道德​素質;第​二,保持​會衆​潔淨;第​三,加强​家庭​關係。

逐步​提高​道德​素質

4,5. 撒但​通常​用​乜嘢​手段?結果​點樣?

4 耶和華​嘅​子民​一​向​注重​貞潔​正義​嘅​行為。每​逢​耶和華​嘅​組織​發出​更​清晰​嘅​指示,佢哋​都​樂意​聽從。請​睇​吓​下面​幾​點。

5 喺​耶和華​嘅​旨意​裏面,夫妻​間​嘅​性生活​本​來​應該​係​美好、潔淨​嘅。呢​份​本來​係​耶和華​賜​俾​夫妻​嘅​寶貴​禮物,不過​撒但​誘惑​上帝​嘅​子民,想​佢哋​喺​婚姻​關係​以外​尋求​性​滿足,令​到​性關係​變​得​污穢​下流,以​致​失去​上帝​嘅​悦納。呢​一​招​係​撒但​好​鍾意​用​嘅。喺​巴蘭​嘅​日子,佢​就​成功​誘使​上帝​嘅​子民​犯​咗​淫亂​嘅​大罪。喺​而家​呢​段​最後​嘅​日子,撒但​比​以往​任何​時候​更​常​用​呢​種​伎倆。(民數記​25:1-3,9;啟示錄​2:14

6. (甲)《守望台》刊登​咗​乜嘢​誓願?(乙)上帝​嘅​子民​對​呢個​誓願​有​乜嘢​睇法?(另​見​腳注)(丙)後來,點解​佢哋​唔​再​噉樣​做?

6 為咗​抵擋​撒但​嘅​攻擊,英語版《守望台》1908​年​6​月​15​日​刊​嘅​一​篇​文章​登載​咗​一​個​誓願,其中​包含​呢個​承諾:“我​喺​公開​場合​點樣​對待​異性,私底下​都​會​一樣,唔​分​時間​同​地點。” *上帝​嘅​子民​唔​一定​都​要​起​噉樣​嘅​誓願,但​好多​人​都​噉​做,仲​將​自己​嘅​名​交俾​總部​辦事處,喺《錫安​嘅​守望台》刊登​出嚟。當時​呢個​誓願​對​好多​人​的確​起​咗​保護​作用,但​後來​上帝​嘅​組織​睇​出,有啲​人​起​呢個​誓願​只​係​例行公事。於是,慢慢​大家​就​冇​再​噉樣​做​嘞。雖然​係​噉,上帝​嘅​組織​始終​堅守​呢個​誓​願​所​藴含​嘅​崇高​道德​原則。

7. (甲)1935​年​嘅《守望台》坦率​噉​指​出​乜嘢​問題?(乙)文章​再次​强調​上帝​嘅​子民​一​定​要​遵守​乜嘢​標準?

7 撒但​對​上帝​子民​嘅​攻擊​變本加厲。英語版《守望台》1935​年​3​月​1​日​刊​坦率​噉​指​出,喺​上帝​嘅​子民​當中​出現​咗​一​種​情況:有啲​人​以為,只要​參與​傳道​工作,喺​私人​生活​方面​就​唔使​遵守​耶和華​所​定​嘅​道德​標準。呢​種​情況​越​來​越​嚴重。《守望台》直截了當​噉​講:“要​記住,耶和華​對​我哋​嘅​要求,唔​淨係​向​人​作​見證。身​為​耶和華見證人,我哋​唔單止​代表​耶和華,亦​都​代表​佢​嘅​王國。我哋​行事​為人​一​定​要​同​呢個​身份​相稱。”文章​根據​聖經,就​婚姻​同​性道德​提​出​明確​嘅​指引,幫助​上帝​嘅​子民“遠避​淫亂”。(哥林多前書​6:18

8. 點解《守望台》一​再​强調​譯​做“淫亂”嘅​希臘語詞​嘅​全部​含義?

8​近​幾十​年​嘅《守望台》一​再​强調,譯​做“淫亂”嘅​希臘語詞“波尼阿”嘅​正確​定義​係​乜嘢。“波尼阿”唔​淨係​指​性交, 仲​包括​形形色色​嘅​不道德​性行為。一般​嚟​講,賣淫​場所​嗰啲​淫蕩​下流​嘅​行為​通通​都​係“波尼阿”。基督徒​聽從《守望台》嘅​勸告,就​得到​保護,唔​似​而家​世上​好多​人​噉​沉迷​於​變態​嘅​性行為。(請​讀​以弗所書​4:17-19

9,10. (甲)1935​年​嘅《守望台》仲​提​到​乜嘢​問題?(乙)聖經​對​飲酒​有​乜嘢​合理​嘅​觀點?

9 英語版《守望台》1935​年​3​月​1​日​刊​仲​提​到​一​個​問題,話:“我哋​都​留意​到,有啲​人​喺​酒精​嘅​影響​之下​傳道​或者​執行​其他​屬靈​職責。人​因為​飲酒​而​妨礙​自己​為​主​嘅​組織​所​作​嘅​服務,噉樣​做​啱​唔​啱​呢?究竟​喺​咩​情況​下​飲酒​先​唔​會​違反​聖經​嘅​原則​呢?”

10 為咗​解答​呢啲​問題,文章​根據​聖經,就​飲酒​提​出​合理​嘅​觀點。聖經​唔​反對​人​適量​飲酒,但係​强烈​譴責​人​醉酒。(詩篇​104:14,15;哥林多前書​6:9,10)關於​喺​酒精​影響​之下​執行​神聖​職務,上帝​嘅​子民​早就​已經​受​到​提醒,要​謹記​亞倫​兩​個​仔​嘅​教訓:佢哋​喺​上帝​嘅​壇​前​違法​獻​上​香火,結果​俾​上帝​處死。聖經​嘅​記載​透露​咗​佢哋​行為​不當​嘅​可能​成因:喺​亞倫​兩​個​仔​被​處死​之後​冇幾耐,上帝​頒布​咗​一​條​律法,禁止​所有​祭司​執行​聖職​嗰時​飲酒。(利未記​10:1,2,8-11)今日,基督徒​亦​都​遵守​同樣​嘅​原則,避免​喺​酒精​嘅​影響​之下​執行​神聖​職務。

11. 上帝​嘅​子民​對​飲酒​成癮​嘅​問題​有​咗​進一步​嘅​認識,點解​話​呢個​係​福分?

11 近​幾十​年​來,基督徒​對​飲酒​成癮​呢個​問題​有​咗​進一步​嘅​認識。多​得​上帝​嘅​組織​提供​適時​嘅​靈糧,唔​少​人​得到​幫助,學識​正視​呢個​問題,慢慢​戒除​咗​酒​癮,恢復​正常​嘅​生活。而​更​多​嘅​人​從​呢啲​提醒​得益,對​飲酒​有​平衡​嘅​睇法,可以​完全​避免​呢個​難題。我哋​唔​想​因為​縱酒​而​喪失​尊嚴,破壞​家庭,而​最​大​嘅​損失​就​係,我哋​唔​能够​保持​潔淨,失去​崇拜​耶和華​嘅​殊榮。

“我哋​好​難​想象​主​耶穌​食​煙,成​身​煙味,或者​將​任何​玷污​身體​嘅​嘢​放​入​嘴​裏面。”——查爾斯​·泰兹​·羅素

12. 末期​仲​未​到,基督​嘅​僕人​已經​對​食​煙​有​咩​睇法?

12 煙草 末期​仲​未​開始,基督​嘅​僕人​已經​勸​人​唔​好​食​煙。好多​年​前,年長​嘅​查爾斯​·​卡彭​回想,佢​喺​19​世紀​後期​第​一​次​同​查爾斯​·​泰兹​·羅素​見面​嘅​情景。當時​卡彭​弟兄​先至​13​歲,仲​有​哥哥​同​兩​個​弟弟​同​佢​一齊。佢哋​四​個​人​就​企​喺​賓夕法尼亞州​阿勒格尼​嘅​聖經​書屋​嘅​樓梯​上。羅素​經過,問​佢哋:“你哋​食​緊​煙​呀?我​聞​到​有​煙味。”四​個​男仔​用​肯定​嘅​口吻​話​俾​羅素​弟兄​知,佢哋​冇​食​煙。呢​件​事​發生​之後,估計​佢哋​一定​好​清楚​羅素​弟兄​對​食​煙​嘅​睇法。喺​英語版《守望台》1895​年​8​月​1​日​刊,羅素​弟兄​提​到​哥林多後書​7:1,話: “基督徒​無論​以​乜嘢​方式​使用​煙草,都​唔​能够​為​上帝​增光,亦​都​對​自己​冇益。……我哋​好​難​想象​主​耶穌​食​煙,成​身​煙味,或者​將​任何​玷污​身體​嘅​嘢​放​入​嘴​裏面。”

13. 1973​年,上帝​嘅​子民​點樣​進一步​受​到​熬煉?

13 英語版《守望台》1935​年​3​月​1​日​刊​將​煙草​叫​做“穢草”,指​出​基督徒​無論​食​煙​抑或​噍​煙草,都​唔​可以​繼續​喺​伯特利​工作,亦​都​唔​可以​再​做​上帝​組織​嘅​代表,例如​做​先驅​或者​從事​探訪​工作。1973​年,上帝​嘅​子民​進一步​受​到​熬煉。英語版《守望台》1973​年​6​月​1​日​刊(漢語版​1973​年​12​月​1​日​刊)指​出,使用​煙草​唔單止​危害​生命,玷污​身體,亦​都​係​缺乏​愛心​嘅​行為。文章​聲明,耶和華見證人​如果​繼續​食​煙​或者​噍​煙草,喺​會衆​裏面​就​冇​好​名聲。邊個​唔​肯​戒除​呢​種​惡習,就​會​被​開除。 *基督​仲​喺​另​一​個​方面​熬煉​佢​嘅​門徒。

14. (甲)關於​血,上帝​有​乜嘢​命令?(乙)輸血​係​點樣​普及​起嚟​嘅​呢?

14 早​喺​挪亞​嘅​日子,上帝​已經​話​唔​可以​食​血。佢​頒布​律法​俾​以色列人​嗰時​再​一​次​講​明,任何​血​都​唔​可以​食。後來,佢​亦​都​吩咐​基督徒​會衆“禁戒​血”。(使徒行傳​15:20,29;創世記​9:4;利未記​7:26)到​咗​近代,撒但​揾​到​新​方法​使​好多​人​違背“禁戒​血”嘅​命令。19​世紀,醫生​開始​嘗試​同​病人​輸血。後​來,科學家​知道​點樣​將​血液​分​為​唔​同​類型​之後,輸血​就​逐漸​普及。1937​年,血液​開始​被​收集​起嚟,儲存​喺​血庫​裏面。第二次世界大戰​嘅​爆發​大大​推動​咗​輸血​技術​嘅​發展。冇幾耐,輸血​療法​就​喺​世界​各​地​廣泛​噉​流行​起嚟。

15,16. (甲)耶和華見證人​對​輸血​有​乜嘢​立場?(乙)關於​輸血​嘅​問題,基督徒​得到​乜嘢​幫助​可以​採用​不​輸血​療法?(丙)有​乜嘢​成果?

15 早​喺​1944​年,英語版《守望台》就​已經​表明,接受​輸血​同​食​血​冇​咩​分别。 第​二​年,《守望台》再次​根據​聖經​解釋,點解​接受​輸血​等於​食​血,强調​基督徒​喺​呢​方面​要​堅守​立場。 1951​年,英語版《守望台》刊登​咗​一連串​嘅​問題​同​答案,使​上帝​嘅​子民​知道​應該​點樣​回答​專業​醫護​人員​嘅​問題。喺​嗰時,世界​各​地​忠心​嘅​基督徒​都​勇敢​緊守​立場,堅決​唔​接受​輸血,所以​往往​俾​人​取笑​同​敵視,甚至​受​到​猛烈​嘅​迫害。但係​基督​一直​帶領​上帝​嘅​組織​前進,不斷​提供​幫助。後來,上帝​嘅​組織​經過​深入​仔細​嘅​研究,出版​咗​一啲​同​血​有關​嘅​册子​同​文章。

16 1979​年,有啲​長老​開始​去​探訪​醫院​嘅​醫生。呢啲​弟兄​引用​聖經,向​醫生​解釋​耶和華見證人​唔​輸血​嘅​立場,同時 ​亦​都​幫助​佢哋​知道,除咗​輸血​之外,仲​有​其他​療法​可以​用。1980​年,美國​有​39​個​城市​嘅​長老​喺​呢​方面​受​到​特别​培訓。後來,中央長老團​批准​喺​世界​各​地​成立​醫院​聯絡​委員會。自從​嗰時​以​來,醫院​聯絡​委員會​嘅​工作​有​乜嘢​進展​呢?今日,數​以​萬​計​嘅​專業​醫護​人員,包括​外科​醫生、麻醉科​醫生​同​其他​專科​醫生,都​尊重​耶和華見證人​嘅​決定,願意​同​我哋​合作,按照​我哋​嘅​意願​採用​不​輸血​療法。越​來​越​多​醫院​提供​不​輸血​療法,有啲​醫院​甚至​將​不​輸血​療法​視​為​最​高​水平​嘅​醫療​技術。撒但​千方百計​使​基督徒​受​到​玷污,但係​耶穌​用​唔​同​嘅​方法​幫助​門徒​保持​潔淨。認真​諗​吓​耶穌​為​我哋​所​做​嘅​一切,唔​係​好​振奮​人心​咩?(請​讀​以弗所書​5:25-27

越​來​越​多​醫院​提供​不​輸血​療法,有啲​醫院​甚至​將​不​輸血​療法​視​為​最​高​水平​嘅​醫療​技術

17. 基督​一直​熬煉​門徒,噉​我哋​點樣​做​就​表明​自己​珍惜​佢​所​做​嘅​一切?

17​我哋​應該​認真​諗​吓:“基督​一直​熬煉​門徒,教導​我哋​緊守​耶和華​崇高​嘅​道德​標準,我哋​有​冇​好​好​珍惜​呢?”我哋​要​謹記,撒但​想方設法​使​我哋​唔​再​尊重​上帝​所​定​嘅​道德​標準,一心​要​令​我哋​同​耶和華、耶穌​嘅​關係​疏遠。但係​耶和華 ​嘅​組織​出於​愛心,經常​告誡​我哋,要​提防​當今​世界​各​種​不道德​嘅​行為,幫助​我哋​抗拒​撒但​嘅​影響。願​我哋​保持​警惕,時刻​聽從​呢啲​有益​嘅​勸告。(箴言​19:20

維護​會衆​清白​嘅​名聲

18. 如果​基督徒​蓄意​背棄​上帝​嘅​標準,以西結​嘅​異象​俾​我哋​乜嘢​清晰​嘅​提醒?

18 第​二​方面​嘅​熬煉​同​保持​會衆​嘅​潔淨​有關。好多​人​決定​按照​耶和華​嘅​標準​行事​為人,而且​獻身​事奉​佢,但​好​可悲​嘅​係,唔​係​每​個​人​都​可以​堅持​到底。後來,有啲​人​嘅​内心​情況​改變​咗,佢哋​就​蓄意​背棄​耶和華​嘅​標準。會衆​應該​點樣​對待​噉樣​嘅​人​呢?呢​一​章​開頭​提​到,以西結​睇​到​一​個​同​屬靈​聖殿​有關​嘅​異象,通過​呢個​異象​我哋​可以​得到​提示。仲​記​唔​記得​嗰啲​高大​嘅​門樓​呢?每​個​門樓​裏面​都​有​守衛室。守衛​有​責任​保護​聖殿,阻止​心​裏“冇​受​過​割禮”嘅​人​入去。(以西結書​44:9)呢個​係​清晰​嘅​提醒,表明​我哋​一​定​要​努力​按照​耶和華​嘅​標準​生活,培養​聖潔​嘅​品行,先至​可以​加入​正確​嘅​宗教。今日,我哋​能够​同​基督徒​弟兄​姊妹​一齊​崇拜​耶和華​係​好​大​嘅​榮幸,但​呢​種​榮幸​唔​係​人人​都​可以​享有​嘅。

19,20. (甲)基督​點樣​逐步​熬煉​門徒,幫助​佢哋​知道​處理​嚴重​過犯​嘅​正確​做法?(乙)有​邊​三​個​理由​會衆​必須​將​唔​肯​悔改​嘅​犯過者​開除​呢?

19 早​喺​1892​年,英語版《守望台》已經​指​出,“如果​有​人​直接​或者​間接​否認​基督​犧牲​生命……救贖​所有​人,我哋​就​有​責任​開​除​噉樣​嘅​人(唔​再​承認​佢​係​基督徒)”。(請​讀​約翰二書​101904​年​出版​嘅《新​嘅​受造物》(英語)表明,經常​作惡​嘅​人​危害​會衆​嘅​靈性。喺​嗰個​年代,如果​有​人​犯​咗​嚴重​嘅​罪,整​群​會衆​都​會​參與​所謂​嘅“教會​審訊”。不過,呢​種​情況​好​罕見。1944​年,英語版《守望台》指​出,惟獨​肩負​職責​嘅​弟兄​先至​可以​處理​嚴重​嘅​過犯。1952​年,英語版《守望台》登載​咗​一​篇​文章,講​明​點樣​按照​聖經​原則​處理​司法​事件,而且​强調​將​唔​肯​悔改​嘅​人​開除,主要​係​為咗​保持​會衆​嘅​潔淨。

20 從​嗰時​開始,基督​一直​熬煉​門徒,幫助​佢哋​明白​應該​點樣​處理​嚴重​嘅​過犯。基督徒​長老​受​到​培訓,處理​司法​事件​嘅​時候​效法​耶和華,既​要​公正​又​要​慈悲。今日,我哋​清楚​睇​出​至​少​有​三​個​理由,會衆​必須​將​唔​肯​悔改​嘅​犯過者​開除:(1)免得​耶和華​嘅​名​受​到​羞辱;(2)保護​會衆​唔​受​到​嚴重​嘅​罪​腐化;(3)希望​促使​犯過者​悔改。

21. 點解​開除​嘅​安排​對​上帝​嘅​子民​有​益?

 21 今日,你​睇​唔​睇​得​出​開除​嘅​安排​對​基督徒​係​有益​嘅​呢?喺​古代,以色列​犯過者​嘅​不良​影響​往往​敗壞​成​個​國族,呢啲​人​嘅​數目​有時​甚至​比​嗰啲​愛​耶和華、努力​做​啱​嘅​事​嘅​人​仲​要​多。結果,以色列人​經常​使​耶和華​嘅​名​受​到​羞辱,最後​失去​上帝​嘅​悦納。(耶利米書​7:23-28)今日,耶和華​唔​係​只​同​一​個​國族,而​係​同​一​大​群​嚟自​唔​同​國族​嘅​人​來往。呢個​群體​當中​如果​有​人​唔​肯​悔改,就​會​被​開除,噉​做​係​為咗​將​佢哋​嘅​壞​影響​降​到​最​低。撒但​亦​都​唔​能够​利用​佢哋​嚟​進一步​腐化​會衆,損害​會衆​嘅​名聲。噉樣,以​整體​嚟​講,我哋​先至​可以​繼續​得到​耶和華​嘅​悦納。要​謹記​耶和華​嘅​應許:“凡​為​攻擊​你​而​造​嘅​武器,都​一定​會​失去​功用。”(以賽亞書​54:17)長老​肩負​處理​司法​事件​嘅​沉重​責任,我哋​有​冇​忠貞​噉​支持​佢哋​呢?

要​榮耀​天父,因為​所有​家族​都​係​靠​佢​得​名​嘅

22,23. (甲)上​世紀​初​嘅​基督徒​點樣​做,令​我哋​滿​心​感激?(乙)點解​嗰個​年代​嘅​基督徒,喺​從​事​屬靈​工作​同​照顧​家庭​呢​兩​方面​需要​取得​平衡?

22 基督徒​喺​第​三​方面​受​到​嘅​熬煉,涉及​到​婚姻​同​家庭​生活。咁​多​年​來,我哋​對​家庭​關係​嘅​睇法​有​冇​修正​呢?有。例如​話,讀​到​上帝​嘅​僕人​喺​上​世紀​初​表現​嘅​自我​犧牲​精神,我哋​好​自然​就​産生​敬佩​之​心。呢啲​忠僕​將​神聖​職務​放​喺​最​優先​最​重要​嘅​位置,我哋​深深​感激​佢哋,但​亦​都​睇​出​佢哋​需要​喺​各​方面​取得​平衡。點解​噉​講​呢?

23 以前,弟兄​奉派​到​離​屋企​比較​遠​嘅​地方​傳道​或者​從​事​探訪​嘅​工作,通常​一​去​就​幾​個​月。嗰陣時,上帝​組織​嘅​出版物​經常​强調​獨身​好​過​結婚,措辭​有時​比​聖經​更加​强烈,而且​好少​講​到​點樣​鞏固​基督徒​嘅​婚姻​關係。但​時​至​今日,呢​種​情況​有​冇​改變​呢?有!

基督徒​唔​應該​只顧​做​上帝​嘅​工作​而​唔​顧​家庭

24. 基督​點樣​幫助​忠心​嘅​門徒​對​婚姻​同​家庭​生活​有​合理​嘅​睇法?

24 今日,基督徒​唔​應該​只顧​做​上帝​嘅​工作​而​唔​顧​家庭。(請​讀​提摩太前書​5:8聖經​就​婚姻​同​家庭​生活​提​出​嘅​勸告​合情合理,實際​有效。喺​呢​方面,基督​一直​確保​忠心​嘅​門徒​不斷​受​到​提醒。(以弗所書​3:14,15)1978​年,上帝​嘅​組織​出版​咗《使​你​的​家庭​生活​美滿​幸福》(漢語版​1979​年​出版)。大約​18​年​後,《家庭​幸福​的​秘訣》面世​嘞。另外,《守望台》仲​刊登​咗​好多​文章,幫助​夫婦​實踐​聖經​原則,鞏固​婚姻​關係。

25-27. 我哋​點樣​睇​出,耶和華​嘅​組織​越​來​越​關注​唔​同​年齡​嘅​小朋友​嘅​需要?

25 噉​年輕人​呢?隨​住​時間​嘅​過去,年輕人​得到​嘅​關注​越​來​越​多。其實,上帝​嘅​組織​好​早​就​為​唔​同​年齡​嘅​兒童 提供​有​益​嘅​刊物。以前,專​門​為​兒童​而​寫​嘅​書刊​就​好似​涓涓流水,時​至​今日​已經​成​咗​滾滾洪流。例如,從​1919​年​到​1921​年,英語版《黃金時代》有​個​欄目​叫​做“少年​聖經​研究”。1920​年,上帝​嘅​組織​出版​咗​一​本​册子​叫《黃金時代​初階》(英語),1941​年​又​出版​咗《兒童》(英語)。上​世紀​70​年代,《聆聽​偉大​的​導師》《盡量​善用​你​的​青春》《我​的​聖經​故事​書》陸續​面世。1982​年,《警醒!》推​出​咗​一​個​新​欄目——“青年人​問”。上帝​嘅​組織​將​呢個​欄目​裏面​嘅​文章​編寫​成《青少年​所​提​出​的​問題——有​實效​的​答案》,1989​年​出版。

喺​德國​嘅​大會​裏面,小朋友​好​開心​可以​收到《寶寶​學​聖經》

26 今日,我哋​為​年輕人​提供​咗​最​新​嘅​兩​册《青年人​問》書。“青年人​問”欄目​嘅​文章​會​繼續​放​喺​jw.org​網站​上面。我哋​亦​出版​咗《向​偉大​的​導師​學習》。我哋​嘅​網站​仲​有​好多​專​為​青少年​同​小朋友​設計​嘅​欄目,例如“聖經​人物卡”“看​聖經​動動​腦”“兒童​聖經​遊戲”“看​圖​玩​遊戲”“聖經​故事​漫畫” “寶寶​學​聖經”,同埋​各​種​唔​同​嘅​影片。公元​1​世紀,基督​將​小朋友​召集​到​佢​嗰度,用​手​攬​住​佢哋。(馬可福音​10:13-16)今日,佢​一如既往,依然​好​關愛​小朋友,好想​令​我哋​當中​嘅​年輕人​感受​到​愛,喺​靈性​上​得到​飽足。

27 耶穌​亦​都​好想​保護​啲​小朋友,唔​想​佢哋​受​到​傷害。喺​呢個​腐敗​嘅​世界​裏面,世人​嘅​道德​水平​越​來​越​低,淫辱​兒童​嘅​行為​越​來​越​普遍。針對​呢啲​情況,上帝​嘅​組織​出版​咗​唔​同​嘅​文章,提​出​清晰​明確​嘅​指引,幫助​父母​保護​兒女​免​受​性侵犯。 *

28. (甲)正如​以西結​睇​見​嘅​聖殿​異象​顯示,我哋​要​加入​正確​嘅​宗教​崇拜​耶和華,就​一​定​要​點樣​做?(乙)你​決心​點樣​做​呢?

28 基督​繼續​熬煉​門徒,教導​佢哋​尊重​同​遵守​耶和華​崇高​嘅​道德​標準,從​而​得到​益處。沉思​基督​為​我哋​做​嘅​呢​一切,唔​係​好​振奮​人心​咩?要​多​啲​諗​吓​以西結​喺​異象​裏面​睇​到​嘅​聖殿,亦​都​要​記住​高大​嘅​門樓​象徵​乜嘢。當然,呢​座​係​屬靈​嘅​聖殿​而​唔​係​實際​嘅​建築物,但​喺​我哋​心目​中,呢​座​聖殿​有​幾​真實​呢?要​進​入​屬靈​嘅​聖殿,唔​係​靠​淨係​去​參加​聚會,翻​開​吓​聖經,或者​去​吓​傳道​就​得​嘅。呢啲​事​都​係​其他​人​睇​得到​嘅,連​唔​想​入​耶和華​聖殿​嗰啲​虚偽​嘅​人​都​識得​做​嘅。所以,除咗​參加​聚會,研讀​聖經,向​人​傳道​之外,仲​要​遵守​耶和華​崇高​嘅​道德​標準,懷​住​純正​嘅​動機​崇拜​耶和華。我哋​噉樣​做,就​能够​進​入​屬靈​嘅​聖殿,喺​最​神聖​嘅​地方​崇拜​耶和華​上帝。願​我哋​時刻​珍惜​呢個​寶貴​嘅​殊榮,亦​都​願​我哋​努力​緊守​耶和華​嘅​正義​標準,盡​己​所​能​反映​佢​嘅​聖​潔!

^ 2段 喺​現代,邊個​應驗​咗​關於​上帝​嘅​子民​獲得​釋放,返回​家鄉​嘅​聖經​預言​呢?1932​年​出版​嘅《洗雪》(英語)第​2​册​首次​指​出,係​屬靈​嘅​以色列,而​唔​係​血統​上​嘅​以色列。呢啲​預言​指​向​正確​宗教​嘅​復興。《守望台》1999​年​3​月​1​日​刊​解釋,以西結​喺​異象​裏面​睇​到​嘅​聖殿​係​其中​一​個​同​復興​有關​嘅​預言,所以​喺​最後​嘅​日子,呢個​預言​喺​屬靈​方面​得到​重大​嘅​應驗。

^ 6段 誓願​禁止​男女​喺​房間​裏面​單獨​相處,除非​對方​係​自己​嘅​配偶​或者​屋企人,唔​係​嘅​話,就​要​將​房門​完全​打開。有​好多​年​嘅​時間,呢個​誓願​喺​伯特利​每​日​嘅​早晨​崇拜​嗰陣​讀​出嚟。

^ 13段 使用​煙草​包括​食​煙、噍​煙草、吸​鼻煙,同埋​為咗​呢啲​原因​而​種植​煙草。

^ 27段《向​偉大​的​導師​學習》第​32​課;另​見《警醒!》2007​年​10​月​刊​3-11​頁。