跳到內容

跳到副菜單

跳到目錄

上帝嘅王國統治嘞!

 第​12​章

組織起嚟為“賜平安嘅上帝”服務

組織起嚟為“賜平安嘅上帝”服務

本​章​概要

耶和華​逐步​將​佢​嘅​子民​組織​起嚟

1,2. (甲)英語版《錫安​嘅​守望台》1895​年​1​月​刊​有​乜嘢​改變?(乙)弟兄​有​乜嘢​反應?

約翰​·博内特​係​個​熱心​嘅​聖經研究者,佢​收到​英語版《錫安​嘅​守望台》1895​年​1​月​刊​嗰陣,非常​興奮。雜誌​嘅​封面​係​全​新​設計​嘅,上面​有​一​座​燈塔,屹立​喺​波濤​洶湧​嘅​大海​當中,塔頂​射​出​嘅​燈光​照亮​夜空。呢​期​雜誌​有​一​篇​文章​介紹​新​封面,題目​係《換​上​新裝》。

2 博内特​弟兄​非常​欣賞​新​封面,於是​寫​信​俾​羅素​弟兄,話:“我​好​開心​睇​到《守望台》換​咗‘新裝’,真​係​靚​啊!”另​一​個​忠心​嘅​聖經研究者​約翰​·布朗​亦​都​寫​咗​一​封​信,講​到​雜誌​嘅​新​設計,話:“封面​嘅​燈塔​喺​狂風​暴雨​嘅​吹襲​同​洶湧​巨浪​嘅​衝擊​之下,毫​不​動搖​噉​豎立​喺​堅固​嘅​基石​上,非常​鮮明,引​人​注目!” 《守望台》嘅​新​封面​只​不過​係​我哋​嘅​弟兄​喺​1895​年​見​到​嘅​第​一​個​改變。同​一​年​11​月,弟兄​知道​咗​另​一​個​重大​嘅​改變。好​有​意思​嘅​係,呢個​再​一​次​牽涉​到​波濤​洶湧​嘅​大​海。

3,4. (甲)英語版《守望台》1895​年​11​月​15​日​刊​提​到​乜嘢​問題?(乙)文章​話​會​有​乜嘢​影響​深遠​嘅​改變?

3 英語版《守望台》1895​年​11​月​15​日​刊​發表​咗​一​篇​相當​長​嘅​文章,坦率​噉​講​到​一​個​問題,就​係​上帝​組織​嘅​内部​鬧​矛盾,聖經研究者​之​間​彼此​不和。弟兄​經常​爭論​會衆​應該​由​邊個​嚟​帶頭,衝突​越​來​越​激烈,喺​會衆​當中​掀​起​咗​狂風​巨浪。為咗​幫助​弟兄​睇​出​佢哋​需要​糾正​呢啲​引起​分裂​嘅​競爭​精神,文章​將​上帝​嘅​組織​比喻​成​一​艘​船,亦​直率​噉​指​出,帶領​呢​艘​船​嘅​弟兄​冇​做​好​準備​應付​狂風​巨浪。噉​佢哋​應該​點​做​呢?

4 文章​話,稱職​嘅​船長​會​確保​船​上面​有​充足​嘅​救生​設備,船​上​嘅​工作​人員​都​應該​準備​好​隨時​封​艙,以​防​暴風雨 ​襲擊。同樣,帶領​上帝​組織​嘅​弟兄​亦​要​確保​所有​會衆​都​做​好​準備,抵擋​暴風雨​一樣​嘅​衝擊。要​達到​呢個​目的,文章​講​到​一​個​影響​深遠,即時​生效​嘅​改變,就​係“每​個​連(會衆)選​出​長老​嚟​督導​羊群”。(使徒行傳​20:28

5. (甲)點解​選​出​長老​呢個​新​安排​非常​合時?(乙)我哋​會​探討​邊啲​問題?

5 選​出​長老​督導​羊群​嘅​新​安排​非常​合時,對​會衆​嘅​組織​結構​起​咗​穩定​作用。喺​長老​嘅​督導​同​幫助​之下,會衆​嘅​弟兄​姊妹​渡​過​咗​第一次世界大戰​激​起​嘅​狂風​巨浪。 跟住​嘅​幾十​年​期間,上帝​嘅​子民​喺​組織​方面​不斷​改進,所以​能够​更​好​噉​為​耶和華​服務。聖經​裏面​有​乜嘢​預言​提及​呢​方面​嘅​進步?你​睇​到​上帝​嘅​子民​喺​組織​方面​有​邊啲​改變​呢?你​從​中​得到​乜嘢​益處?

“我​一​定​會​立​和平​做​你哋​嘅​監督”

6 呢​本​書第​9​章講​過,以賽亞​預告​耶和華​會​賜​福​俾​佢​嘅​子民,使​佢哋​嘅​數目​不斷​增多。(以賽亞書​60:22)但​耶和華​應許​嘅​唔止​呢啲。喺​同​一​個​預言​裏面,以賽亞​記述​咗​耶和華​嘅​話:“我​要​用​金​代替​銅,銀​代替​鐵,銅​代替​木,鐵​代替​石。我​一​定​會​立​和平​做​你哋​嘅​監督,立​正義​做​你哋​嘅​監工。”(以賽亞書​60:17)呢個​預言​有​乜嘢​含意​呢?同​我哋​又​有​乜嘢​關係​呢?

改變​唔​係​用​好​嘅​代替​唔​好​嘅,而​係​用​更加​好​嘅​代替​好​嘅

6,7. (甲)以賽亞書​60:17​嘅​話​係​乜嘢​意思?(乙)耶和華​提​到“監督”同“監工”,呢個​表明​咗​乜嘢?

7 以賽亞​嘅​預言​提​到​用​一​種​材料​嚟​代替​另​一​種。請​留意,呢​種​改變​唔​係​用​好​嘅​代替​唔​好​嘅,而​係​用​更加​好​嘅​代替​好​嘅。用​黃金​代替​銅​係​一​種​改進,呢個​預言​提​到​嘅​其他​材料​都​一樣。通過​呢個​比喻,耶和華​預告​佢​子民​嘅​情況​會​一​步​一​步​噉​改進。預言​指​嘅​係​邊​方面​嘅​改​進​呢?耶和華​提​到“監督”同“監工”,呢個​表明​佢​嘅​子民​喺​組織​方面​會​逐步​改進,得到​嘅​照顧​亦​會​越​來​越​好。

8. (甲)以賽亞​嘅​預言​提​到​嘅​改進​由​邊個​嚟​促成?(乙)我哋​從​中​得到​乜嘢​益處?(另​見​附欄“ 佢​謙卑​噉​接受​咗​糾正”)

8 促成​上帝​嘅​子民​喺​組織​方面​改進​嘅​係​邊個​呢?耶和華​話:“我​要​用​金​代替​銅,銀​代替​鐵……。我​一​定​會​立​和平​做​你哋​嘅​監督”。顯然,會衆​喺​組織​方面​嘅​任何​進步,都​係​耶和華​嘅​作為,而​唔​係​人​嘅​功勞。耶穌​作​王​之後,耶和華​就​通過​愛子​幫助​佢​嘅​子民​喺​組織​方面​不斷​改進。噉​我哋​從​中​得到​乜嘢​益處​呢?同​一​節​經文​顯示,呢啲​改進​會​帶​嚟“和平”(亦​可以​翻譯​為“和諧”“和睦”“平 安”)同“正義”。我哋​接受​上帝​嘅​指引,努力​作出​改變,會衆​就​會​充滿​和平​嘅​氣氛。我哋​喜愛​正義,就​自然​願意​為“賜​平安​嘅​上帝”耶和華​服務。(腓立比書​4:9

9. 會衆​嘅​秩序​同​團結​應該​以​乜嘢​為​根基?點解​呢?

9 講​到​耶和華,使徒​保羅​話:“上帝​唔​係​要​人​混亂,而​係​要​人​和諧”。(哥林多前書​14:33)請​留意,喺​保羅​嘅​話​裏面,同“混亂”相對​嘅​唔​係“秩序”,而​係“和諧”。點解​呢?因為​秩序​唔​一定​會​帶​嚟​和諧​平安。舉​個​例,一​支​軍隊​齊​步​走​向​前線,秩序井然,但​帶​嚟​嘅​係​戰爭​而​唔​係​和平。身​為​基督徒,我哋​應該​謹記:任何​有​秩序​嘅​組織​如果​唔​係​建基​於​和平,遲早​都​會​瓦解。如果​想​秩序​維持​落去,冇​咗​上帝​所​賜​嘅​和平​係​唔​得​嘅。睇​到“賜​平安​嘅​上帝”不斷​指引​佢​嘅​子民,熬煉​佢哋,我哋​唔​係​應該​滿​心​感激​咩?(羅馬書​15:33)由於​有​上帝​所​賜​嘅​和平​作​為​根基,世界​各​地​嘅​會衆​運作​得​井井有條,基督徒​之​間​團結​和諧,我哋​實在​應該​加倍​珍惜!(詩篇​29:11

10. (甲)上帝​嘅​現代​子民​早期​喺​組織​方面​有​邊啲​改​進?(見​附欄“ 改進​督導​嘅​方式”)(乙)我哋​會​討論​邊啲​問題?

10 附欄“ 改進​督導​嘅​方式”概述​咗​上帝​嘅​現代​子民​早期​喺​組織​方面​嘅​一啲​改進,使​成​個​組織​運作​得​井然有序。近​幾十​年​來,上帝​通過​君王​帶​嚟​邊啲“用​金​代替​銅”嘅​改變?督導​方式​嘅​改進,點樣​鞏固​全球​所有​會衆​嘅​團結,促進​會衆​嘅​和諧​呢?呢啲​改變​同​你​事奉“賜​平安​嘅​上帝”有​乜嘢​關係​呢?

基督​點樣​領導​會衆

11. (甲)關於​會衆​嘅​組織​結構,弟兄​深入​研究​聖經​之後​意識​到​乜嘢?(乙)中央長老團​嘅​弟兄​決心​點樣​做?

11 ​1964​年​到​1971​年​期間,喺​中央長老團​嘅​督導​之下,弟兄​進行​咗​一​個​深入​研究​聖經​嘅​計劃,探討​唔​同​嘅​課題,其中​一​個​同​公元​1​世紀​基督徒​會衆​嘅​運作​有關。 *就​會衆​嘅​組織​結構​嚟​講,弟兄​查考​聖經​之後​意識​到,公元​1​世紀​嘅​會衆​唔​係​由​一​位​長老(監督)而​係​由​一​個​長老團​嚟​督導​嘅。(請​讀​腓立比書​1:1;提摩太前書​4:14中央長老團​明白​呢​點​之後,睇​出​君王​耶穌​喺​度​指引​緊​佢哋,幫助​佢哋​知道​上帝​嘅​子民​喺​組織​結構​方面​需要​改進,所以​決心​聽從​君王​嘅​引導。佢哋​毫​不​猶豫​噉​按照​聖經​所​定​嘅​標準​委任​長老。 上​世紀​70​年代​初期,上帝​嘅​組織​喺​結構​方面​有​邊啲​改進​呢?

12. (甲)中央長老團​有​乜嘢​改變?(乙)請​描述​而家​中央長老團​嘅​結構。(見​130​頁​附欄“ 中央長老團​點樣​管理​上帝​王國​喺​地上​嘅​事務”)

 12 第​一​個​改進​同​中央長老團​有關。以前​中央長老團​由​賓夕法尼亞州​守望台​聖經​書社​董事會​嘅​七​位​成員​組​成,佢哋​都​係​受膏​弟兄。到​咗​1971​年,中央長老團​嘅​成員​由​七​位​增​加​到​十一​位,而且​佢哋​都​唔​再​係​董事會​嘅​成員。中央長老團​嘅​弟兄​彼此​平等,一視同仁。從​呢​一​年​開始,佢哋​按照​弟兄​姓氏​嘅​字母​順序​輪流​擔任​中央長老團​嘅​主席,任期​一​年。

13. (甲)有​40​年​嘅​時間,會衆​點樣​受​到​督導?(乙)到​咗​1972​年,中央長老團​點樣​做?

13 第​二​個​改進​同​各​群​會衆​有關。從​1932​年​到​1972​年,會衆​主要​由​一​個​弟兄​督導。到​1936​年​為止,呢個​受​委任​嘅​弟兄​一直​稱​為​服務指導員,之後​改​稱​為​連​嘅​僕人,再​改為​組務​僕人,最後​係​會衆​監督。呢啲​受​委任​嘅​弟兄​熱心​照顧​羊群,關心​佢哋​嘅​靈性。喺​嗰個​年代,會衆​嘅​事​通常​由​會衆​監督​一​個​人​做​決定,佢​唔使​同​其他​僕人(而家​叫​做​長老)商量。到​咗​1972​年,中央長老團​決定​改變​呢​種​情況,呢個​改變​深具​歷史​意義。到底​係​乜嘢​改變​呢?

14. (甲)乜嘢​新​安排​從​1972​年​10​月​1​日​開始​生效?(乙)長老團​協調人​點樣​將​腓立比書​2:3​嘅​原則​運用​出嚟?

 14 會衆​唔​再​由​會衆​監督​一​個​人​督導。其他​弟兄​只要​符合​聖經​所​定​嘅​標準,亦​會​受​委任​做​長老。佢哋​組​成​長老團,共​同​督導​會衆。呢個​新​安排​從​1972​年​10​月​1​日​起​生​效。 今日,長老團​協調人​唔​會​認為​自己​高人一等,反而“行事​為人​好似​後輩​噉”。(路加福音​9:48)喺​世界​各​地​有​呢啲​謙卑​嘅​弟兄​為​我哋​服務,係​幾​咁​大​嘅​福分​啊!(腓立比書​2:3

君王​耶穌​好​有​先見之明,喺​適當​嘅​時候​興​起​更​多​牧人​去​照顧​佢​嘅​門徒

15. (甲)長老團​嘅​安排​為​會衆​帶​嚟​乜嘢​益處?(乙)乜嘢​表明​君王​耶穌​確實​有​先見之明。

15 由​長老團​嘅​唔​同​弟兄​分擔​照顧​會衆​嘅​責任,的確​係​一​個​好​大​嘅​改進。請​睇​吓​其中​三​個​益處:第​一,無論​喺​會衆​裏面​有​幾​大​嘅​責任,長老團​嘅​所有​長老​都​時刻​謹記​耶穌​先至​係​會衆​嘅​頭。(以弗所書​5:23)第​二,箴言​11:14​話:“集思廣益,就​能​得救。”凡​係​同​會衆​靈性​有關​嘅​事,長老​都​會​一齊​商議,聽​吓​彼此​嘅​意見。噉樣,佢哋​所​作​嘅​決定​就​能够​同​聖經​原則​一致。(箴言​27:17)長老​噉樣​做,一定​會​得到​耶和華​嘅​賜​福,事事​亨通。第​三,會衆​嘅 數目​不斷​增加,好​需要​弟兄​負​起​督導​同​牧養​會衆​嘅​責任。上帝​嘅​組織​委任​更​多​符合​資格​嘅​弟兄​做​長老,就​能够​滿足​呢​方面​嘅​需求。(以賽亞書​60:3-5)試​諗​吓,全球​會衆​嘅​數目​從​1971​年​嘅​2​萬​7000幾​群,增​加​到​2013​年​嘅​11​萬​3000幾​群!顯然,君王​耶穌​好​有​先見之明,喺​適當​嘅​時候​興​起​更​多​牧人​去​照顧​佢​嘅​門徒。(彌迦書​5:5

“做​羊群​嘅​榜樣”

16. (甲)長老​有​乜嘢​責任?(乙)耶穌​吩咐​門徒“要​牧養​我​嘅​小​綿羊”,聖經研究者​點樣​睇​呢個​吩咐?

16 早​喺​聖經研究者​嘅​日子,長老​已經​明白​到​自己​有​責任​幫助​羊群​繼續​事奉​上帝。(請​讀​加拉太書​6:101908​年,英語版《守望台》有​一​篇​文章​論述​耶穌​吩咐​門徒“要​牧養​我​嘅​小​綿羊”。(約翰福音​21:15-17)文章​對​長老​講:“主​吩咐​我哋​牧養​佢​嘅​羊群,我哋​應該​將​呢個​吩咐​放​喺​心​上,亦​都​應該​將​餵養​同​照顧​羊群​嘅​責任​睇​成​係​殊榮。噉樣​做​非常​重要。”1925​年,英語版《守望台》再次​强調​長老​一定​要​負​起​牧人​嘅​責任。文章​提醒​長老:“教會​係​屬於​上帝​嘅……凡​係​有​榮幸​為​弟兄​服務​嘅,都​要​向​上帝​負責。”

17. 耶和華​嘅​組織​點樣​幫助​長老​提高​牧養​技巧?

17 耶和華​嘅​組織​點樣​幫助​長老​提高​牧養​嘅​技巧,用“銀​代替​鐵”呢?就​係​提供​培訓。1959​年,上帝​嘅​組織​為​長老​舉辦​咗​第​一​屆​王國​職務​訓練班。課程​裏面​有​一​課​係“關心​每​一​隻​羊”。長老​受​到​鼓勵​要“安排​時間​上門​探訪​ 傳道員”,亦​都​學識​用​唔​同​嘅​方法​喺​牧養​探訪​嗰陣​强化​佢哋​嘅​信心。1966​年,王國​職務​訓練班​嘅​課程​更新​咗,其中​一​課​係“牧養​工作​十​分​重要”。呢​課​嘅​重點​係:帶頭​嘅​弟兄“應該​照顧​好​上帝​嘅​羊群,但​都​唔​應該​忽略​屋企人​同​傳道​工作”。 近年​來,上帝​嘅​組織​為​長老​舉辦​咗​更​多​嘅​訓練班。長老​不斷​受​到​培訓,帶​嚟​點樣​嘅​結果​呢?今日,喺​全球​嘅​基督徒​會衆​裏面,有​成千上萬​符合​資格​嘅​弟兄​做​屬靈​嘅​牧人。

1966​年,喺​菲律賓​舉辦​嘅​王國​職務​訓練班

18. (甲)長老​要​執行​乜嘢​重大​嘅​任務?(乙)點解​耶和華​同​耶穌​深愛​勤奮​工作​嘅​長老?

18 耶和華​通過​君王​耶穌,設立​咗​基督徒​長老​呢個​安排​嚟​執行​一​件​重大​嘅​任務。咩​任務​呢?就​係​帶領​上帝​嘅​羊群​渡​過​人類​歷史​上​最​難​以​應付​嘅​時期。(以弗所書​4:11,12;提摩太後書​3:1)耶和華​同​耶穌​深​愛​勤奮​工作​嘅​長老,因為​佢哋​聽從​聖經​嘅​勸告:“務​要​牧養​上帝​嘅​羊群,……做​羊群​嘅​榜樣。”佢哋​噉樣​做​係​出於​樂意​同​熱誠。(彼得前書​5:2,3)基督徒​嘅​牧人​喺​各​方面​都​做​羊群​嘅​榜樣,大大​促進​會衆​嘅​和睦​同​喜樂,等​我哋​嚟​睇​吓​其中​兩​方面。

今日​嘅​長老​點樣​牧養​上帝​嘅​羊群

19. 長老​同​我哋​一齊​傳道,我哋​有​乜嘢​感覺?

19 第​一,長老​同​會衆​嘅​弟兄​姊妹​一齊​傳道。福音書​嘅​執筆者​路加​提​到​耶穌,話:“耶穌​起程​傳道, 逐​城​逐​村,宣揚​上帝​王國​嘅​好消息。同​佢​一齊​嘅​有​嗰​十二​個​人”。路加福音​8:1)正如​耶穌​同​使徒​一齊​傳道,今日​堪​作​模範​嘅​長老​亦​會​同​弟兄​姊妹​一齊​傳道。佢哋​睇​出,噉樣​做​可以​大大​促進​會衆​美好​嘅​精神。會衆​嘅​弟兄​姊妹​有​乜嘢​感覺​呢?年​近​九十​嘅​讓​尼娜​話:“同​長老​一齊​傳道,就​有​機會​同​佢​交流,更加​熟悉​佢​嘞。”三十​幾​歲​嘅​史提文​話:“同​長老​一齊​逐家逐户​傳道​嗰時,覺得​佢​好​想​幫​我。有​佢​幫​我,真​係​好​開心。”

就​好似​牧人​去​揾​迷失​嘅​綿羊​噉,今日​長老​亦​都​努力​去​揾​停止​同​會衆​來往​嘅​人

20,21. 長老​點樣​做,就​係​效法​比喻​裏面​嘅​牧人?請​舉​例​説明。(另​見​附欄“ 每​個​星期​嘅​探訪​得到​成果”)

20 第​二,耶和華​嘅​組織​培訓​長老​去​關心​嗰啲​同​會衆​停止​來往​嘅​人。(希伯來書​12:12)點解​長老​應該​幫助​呢啲​同​耶和華​疏遠​嘅​人?長老​應該​點樣​着手​呢?讀​一​讀​牧人​尋找​迷失​綿羊​嘅​比喻,就​知道​答案​嘞。(請​讀路加福音​15:4-7)比喻​裏面​嘅​牧人​發現​一​隻​羊​唔​見​咗,就​即刻​去​揾,好似​呢​隻​係​佢​惟一​嘅​羊​噉。今日​嘅​基督徒​長老​可以​點樣​向​呢個​牧人​學習​呢?喺​牧人​睇嚟,迷失​嘅​綿羊​係​非常​寶貴​嘅;同樣,喺​長老​睇嚟,同​上帝​子民​停止​來往​嘅​人​亦​都​係​好​寶貴​嘅。長老​將​靈性​軟弱​嘅​人​睇​成​係​迷失​嘅​綿羊,而​唔​係​無可救藥​嘅​人。除此之外,牧人​仲​決定“去​揾​嗰​隻​唔​見​咗​嘅,直至​揾​到​為止”,同樣​長老​亦​都​主動​去​揾​嗰啲​迷失​嘅​人,伸​出​援手,幫助​佢哋​恢復​同​耶和華​嘅​關係。

21 比喻​裏面​嘅​牧人​揾​到​綿羊​之後,點樣​做​呢?佢​温柔​噉​將​隻​羊​抱​起嚟,“放​喺​膊頭”,送​返​去​羊群​嗰度。同樣,長老​衷心​關懷​嗰啲​同​耶和華​疏遠​嘅​人,温柔​和藹​噉​將​佢哋​扶​起嚟,話唔定​可以​幫​到​佢哋​返翻​會衆。 非洲​一​個​叫​維克托​嘅​弟兄​曾經​停止​同​會衆​來往。佢​話:“喺​我​停止​傳道​嘅​八​年​期間,長老​從來​都​冇​放棄​幫助​我。”到底​係​乜嘢​打動​咗​佢​嘅​心​呢?維克托​話:“有​一​日,約翰​專程​嚟​睇​我。佢​係​個​長老,曾經​係​我​嘅​先驅​同學。約翰​俾​我​睇​以前​我哋​參加​先驅​訓練班​嗰時​影​嘅​相。呢啲​舊時​嘅​相​勾​起​咗​好多​美好​嘅​回憶,令​我​諗​起​以前​事奉​耶和華​嘅​快樂​時光,我​好​想​重新​得到​呢​種​喜樂。”約翰​探訪​後​冇幾耐,維克托​重新​返​到​會衆​嘅​懷抱。今日,佢​再次​成為​先驅。基督徒​長老​關心​弟兄​姊妹,確實​令​我哋​喜樂​大​增。(哥林多後書​1:24 *

 改​進​督導​方式,加强​上帝​子民​嘅​團結

22. 正義​同​和平​點樣​促進​會衆​嘅​團結?(另​見​附欄“ 我哋​真​係​喜出望外!”)

22 前面​講​過,耶和華​預告​喺​佢​嘅​子民​當中,正義​同​和平​嘅​果實​會​逐漸​增多,能够​鞏固​會衆​嘅​團結。(以賽亞書​60:17)先​講​吓​正義,“獨一​嘅​耶和華”嘅​正義​標準​唔​會​因​地​而​異,佢​對​所有​會衆​都​一視同仁。(申命記​6:4)耶和華​嘅​是非​標準​只​有​一​套,獨一無二,各​地​嘅​會衆​都​遵守​呢​套​標準。(哥林多前書​14:33)所以,會衆​只​有​按照​耶和華​嘅​標準​行事,先​會​興旺。再​講​吓​和平​點樣​鞏固​會衆​嘅​團結。君王​耶穌​唔單止​想​我哋​喺​會衆​裏面​享有​和平,亦​都​希望​我哋“促進​和睦”。(馬太福音​5:9)所以,我哋​要“追求​促進​和睦​嘅​事”。一旦​有​分歧,就​應該​主動​化解。(羅馬書​14:19)我哋​噉樣​做​就​可以​促進​會衆​嘅​和平​同​團結。(以賽亞書​60:18

23. 身​為​耶和華​嘅​僕人,今日​我哋​享有​乜嘢​福分?

23 喺​1895​年​11​月,英語版《守望台》提​到​選​出​長老​督導​羊群​嘅​新​安排​嗰陣,亦​都​講​出​咗​嗰啲​帶頭​弟兄​嘅​願望。乜嘢​願望​呢?佢哋​希望​呢個​新​安排​能够​幫助​上帝​嘅​子民“喺​信仰​方面​加​快​團結​嘅​步伐”,而且​祈求​上帝​賜​福。回顧​過去​嘅​百幾​年,我哋​可以​滿懷​感激​噉​講,耶和華​通過​君王​耶穌​改進​督導​嘅​方式,確實​令​我哋​喺​崇拜​方面​更加​團結。(詩篇​99:4)結果,今日​喺​世界​各​地,耶和華​嘅​子民​都​滿​心​喜樂,大家“本​住​同樣​嘅​精神,跟住​同樣​嘅​腳蹤”,齊心​一​意​為“賜​平安​嘅​上帝”服務。(哥林多後書​12:18請​讀​西番雅書​3:9

^ 11段 呢個​研究​計劃​嘅​成果,發表​喺《助​人​明白​聖經​嘅​工具》(英語)呢​本​書​裏面。

^ 21段《守望台》2013​年​1​月​15​日​刊​27-31​頁《基督徒​長老——促進​我​們​喜樂​的​同工》。