跳到內容

跳到副菜單

跳到目錄

上帝嘅王國統治嘞!

 第​10​章

君王幫助子民保持靈性潔淨

君王幫助子民保持靈性潔淨

本​章​概要

耶穌​點解​同​點樣​熬煉​門徒,幫助​佢哋​保持​靈性​潔淨

1-3. 耶穌​發現​聖殿​俾​人​玷污​咗,就​點樣​做?

耶穌​非常​尊重​耶路撒冷​嘅​聖殿,因為​佢​知道​聖殿​代表​乜嘢。呢​座​聖殿​作​為​地上​崇拜​真神​耶和華​嘅​中心,已經​有​好​長​時間​嘞。人​對​聖潔​嘅​上帝​耶和華​嘅​崇拜,一定​要​潔淨​同​純正。公元​33​年​尼散月​十​日,當​耶穌​嚟​到​耶路撒冷​嘅​聖殿,發現​聖殿​俾​人​玷污​咗,試​諗​吓​佢​有​咩​感覺​呢?到底​當時​發生​咗​啲​乜嘢​事?(請​讀​馬太福音​21:12,13

2 崇拜​耶和華​嘅​人​嚟​聖殿​獻祭,外邦人​院子​裏面​嘅​商人​同​兑錢商​就​乘機​牟取​暴利。 * 耶穌​睇​到,就“將​聖殿​裏面​做​買賣​嘅​人​全部​趕​晒​出去,又​推冧​兑錢商​嘅​檯”。(參考​尼希米記​13:7-9)佢​嚴厲​責備​嗰啲​自私​嘅​商人​將​天父​嘅​殿​變​成“强盜​嘅​巢穴”。好​明顯,耶穌​非常​尊重​聖殿​同​聖殿​所​代表​嘅​一切。正確​嘅​崇拜​一定​要​保持​潔淨。

3 千幾​年​後,耶穌​登基​成為​彌賽亞​君王。佢​再次​潔淨​聖殿——呢​座​聖殿​同​而家​想​得到​耶和華​悦納​嘅​人​有關。耶穌​潔淨​嘅​係​點樣​嘅​聖殿​呢?

“使​利未人​潔淨”

4,5. (甲)從​1914​年​到​1919​年​初期,耶穌​點樣​熬煉​同​潔淨​受膏基督徒?(乙)上帝​嘅​子民​受​到​嘅​熬煉​同​潔淨​係咪​到​此​為止​呢?請​解釋。

4 呢​本​書第​2​章講​過,耶穌​喺​1914​年​登基​之後,同​天父​一齊​嚟​視察​屬靈​聖殿。屬靈​聖殿​係​指,耶和華​為​正確​崇拜​所​作​嘅​安排。 * 君王​視察​聖殿​之後,睇​出​有​必要​熬煉​同​潔淨“利未人”所​代表​嘅​受膏​基督徒。(瑪拉基書​3:1-3)從​1914​年​到​1919​年​初期,耶和華​容許​佢​嘅​子民​經歷​考驗​同​艱辛,就​好似​熬煉​金​銀​噉​熬煉​佢哋,使​佢哋​潔淨。值得​高興​嘅​係,受膏​基督徒​經​得​起​好似​火​一樣​嘅​考驗,成為​靈性​潔淨​嘅​人,好​願意​為​彌賽亞​君王​效勞!

 5 上帝​子民​所​受​嘅​熬煉​同​潔淨​係咪​到​此​為止​呢?唔​係。喺​末世​期間,耶和華​一直​任用​彌賽亞​君王,幫助​真​基督徒​保持​潔淨,等​佢哋​可以​繼續​留​喺​屬靈​聖殿​裏面。 接​落嚟​兩​章​會​講​吓​耶穌​點樣​喺​道德​同​組織​方面​熬煉​門徒。而家​先​講​吓​靈性​上​嘅​潔淨。耶穌​做​咗​好多​事​幫助​門徒​保持​靈性​潔淨。呢啲​事​有啲​明顯​睇​得到,有啲​就​睇​唔​見。認真​諗諗​耶穌​所​做​嘅​一切,可以​令​我哋​信心​大​增。

“保持​潔淨”

6. (甲)耶和華​吩咐​嗰啲​俾​人​捉​咗​嘅​猶太人​點樣​做?(乙)佢​嘅​吩咐​令​我哋​明白,要​保持​靈性​潔淨,就​要​點樣​做?

6 靈性​潔淨​係​咩​意思​呢?為咗​回答​呢個​問題,等​我哋​先​睇​吓​公元​前​537​年,嗰啲​俾​人​捉​咗​去​巴比倫​嘅​猶太人,喺​離開​嗰度​之前,耶和華​對​佢哋​講​咗​啲​乜嘢。(請​讀​以賽亞書​52:11猶太人​獲得​釋放​返翻​耶路撒冷,主要​係​為咗​重建​聖殿,復興​正確​嘅​宗教。(以斯拉記​1:2-4)耶和華​要​佢​嘅​子民​徹底​擺脱​巴比倫​嘅​錯誤​宗教。請​留意​耶和華​吩咐​佢哋​點樣​做:“唔​好​接觸​不潔​嘅​嘢”“應該​從​嗰​座​城​出嚟”“保持​潔淨”。正確​崇拜​耶和華​意味​住,完全​唔​受​錯誤​宗教​玷污。我哋​可以​得到​乜嘢​結論​呢?要​保持​靈性​潔淨,就​要​棄絶​錯誤​宗教​嘅​道理​同​習俗。

7. 耶穌​通過​乜嘢​渠道​幫助​門徒​保持​靈性​潔淨?

7 耶穌​作​王​之後​冇幾耐,就​安排​咗​一​個​明顯​嘅​渠道​嚟​幫助​門徒​保持​靈性​潔淨。呢個​渠道​就​係​1919​年​受​耶穌​委派​嘅​忠信​睿智​嘅​奴隸。(馬太福音​24:45)到​咗​嗰​一​年,聖經研究者​已經​棄絶​咗​好多​錯誤​嘅​宗教​道理,但​喺​靈性​上​仲​需要​進一步​受​到​潔淨。基督​通過​忠信​嘅​奴隸​幫助​門徒​睇​出,邊啲​習俗​同​節慶​活動​係​要​徹底​放棄​嘅。(箴言​4:18)等​我哋​嚟​睇​吓​一​啲​例子。

基督徒​應​唔​應該​慶祝​聖誕節?

8. (甲)關於​聖誕節,聖經研究者​早就​意識​到​乜嘢?(乙)但係​佢哋​仲​未​睇​出​乜嘢?

8 聖經研究者​早就​意識​到​聖誕節​源自​異教,耶穌​唔​係​12​月​25​日​出世​嘅。英語版《錫安​嘅​守望台》1881​年​12​月​刊​話:“千百萬​信奉​異教​嘅​人​加入​教會。呢個​只​不過​係​名義​上​嘅​改變,但​實際​上,異教​嘅​祭司​做​咗​教會​嘅​牧師,異教​嘅​節慶​換​咗​個​名,變​成​教會​嘅​節日。聖誕節​就​係​個​例子。”1883​年,英語版《守望台》嘅​一​篇​文章《耶穌​係​幾時​誕生 ​嘅?》提​出​論據​證明,耶穌​係​十​月​出世​嘅。 * 雖然​係​噉,當時​聖經研究者​仲​未​睇​出​有​必​要​停止​慶祝​聖誕節。佢哋​照舊​慶祝,連​布魯克林​嘅​伯特利​家庭​都​唔​例外。1926​年​之後,情況​改變​咗。點解​呢?

9. 關於​聖誕節,聖經研究者​終於​明白​乜嘢?

9 經過​仔細​查考,聖經研究者​終於​明白​咗​聖誕節​嘅​起源​同​有關​嘅​習俗​會​羞辱​上帝。英語版《黃金時代》1927​年​12​月​14​日​刊​嘅​一​篇​文章《聖誕節​嘅​起源》指​出,聖誕節​係​異教​節日,慶祝​嘅​人​縱情​作樂,崇拜​偶像。文章​説明,基督​冇​吩咐​人​慶祝​聖誕節,而且​喺​結尾​直截了當​噉​講:“世界​同​魔鬼​都​鼓吹​聖誕節,想​呢個​節日​流傳​落去,亦​都​迎合​咗​人​嘅​慾望。單​係​呢個​原因,全心​事奉​耶和華​嘅​人​就​應該​停止​慶祝​聖誕節。”所以​從​嗰​一​年​開始,伯特利​家庭​就​唔​再​慶祝​聖誕節​嘞。

10. (甲)1928​年​12​月,聖經研究者​對​聖誕節​嘅​起源​有​乜嘢​更​透徹​嘅​了解?(另​見​附欄“ 聖誕節——起源​同​目的”)(乙)關於​其他​節日​同​慶祝​活動,上帝​嘅​子民​受​到​乜嘢​提醒?(見​附欄“ 其他​節慶​嘅​起源”)

10 第​二​年,聖經研究者​對​聖誕節​嘅​起源​有​咗​更​透徹​嘅​了解。1928​年​12​月​12​日,喺​總部​工作​嘅​理查德·​巴伯​弟兄​通過​電台​發表​演講,詳細​説明​聖誕節​嘅​起源​同​不潔​可憎​嘅​事​有關。上帝​嘅​子民​對​總部​俾​嘅​明確​指引​有​乜嘢​反應​呢?查爾斯​·布朗德林​弟兄​同​屋企人​聽從​指引,停止​慶祝​聖誕節。佢​諗​翻​當​年,話:“我哋​要​揼​晒​嗰啲​同​異教​有關 ​嘅​嘢,捨​唔​捨得?當然​捨得​啦!……呢個​就​好似​將​啲​污糟​邋遢​嘅​衫​除​落嚟,掉​咗​佢,唔​覺得​可惜。”亨利·​坎特韋爾​弟兄​亦​都​有​同感,佢​後來​從事​探訪​嘅​工作。佢​回憶​話:“無論​要​作出​乜嘢​犧牲,只要​可以​證明​自己​愛​耶和華,我哋​都​好​樂意​去​做。”忠心​嘅​基督徒​樂意​聽從​指引,甘願​作出​改變,從此​唔​再​參與​任何​不潔​嘅​節慶​活動。 *約翰福音​15:19;17:14

11. 我哋​點樣​做​就​表明​自己​擁護​彌賽亞​君王?

11 忠心​嘅​聖經研究者​的確​值得​我哋​效法。不妨​諗​吓​佢哋​嘅​好​榜樣,然後​問​吓​自己:“我​對​上帝​組織​發出​嘅​指引​有​咩​睇法​呢?我​係咪​願意​接受​指引,而且​照住​去​做​呢?”彌賽亞​君王​任用​忠信​嘅​奴隸​喺​適當​嘅​時候​分發​屬靈​嘅​食物,我哋​甘願​服從​忠信​奴隸​嘅​指引,就​表明​自己​擁護​彌賽亞​君王。(使徒行傳​16:4,5

基督徒​應​唔​應該​用​十字架?

“十字架​與​王冠”胸針(見​第​12,13​段)

12. 有​好多​年​嘅​時間,聖經研究者​對​十字架​有​乜嘢​睇法?

12 有​好多​年​嘅​時間,聖經研究者​認為​十字架​係​基督教​嘅​標誌,基督徒​使用​十字架​冇​乜嘢​唔​妥。佢哋​知道​唔​應該​崇拜​十字架,因為​拜​偶像​係​唔啱​嘅。(哥林多前書​10:14;約翰一書​5:21)早​喺​1883​年,英語版《守望台》就​指​出: “上帝​憎恨​形形式式​嘅​偶像​崇拜。” 雖然​係​噉,聖經研究者​起初​唔​反對​人​用​十字架,只要​用​得​適當​就​得​嘞。例如,佢哋​戴“十字架​與​王冠”胸針,覺得​有​呢個​標誌​好​自豪。呢個​胸針​對​佢哋​有​特别​嘅​意義:只要​至​死​忠心,佢哋​就​會​獲得​生命​嘅​冠冕。從​1891​年​開始,“十字架​與​王冠”胸針​嘅​圖案​都​印​喺《守望台》封面​度。

13. 關於​使用​十字架,基督徒​得到​乜嘢​啟發?(另​見​附欄“ 逐步​明白​唔​應該​使用​十字架”)

13 聖經研究者​好​珍視“十字架​與​王冠”胸針。但係,從​上​世紀​20​年代​後期​開始,關於​使用​十字架,基督徒​逐步​得到​啟發。格蘭特​·​蘇特​弟兄​參加​咗​1928​年​喺​美國​密歇根州​底特律市​嘅​大會。佢​後​來​做​咗​中央長老團​嘅​成員。蘇特​弟兄​回憶​話:“大會​嘅​節目​清楚​表明,我哋​冇​必要​戴‘十字架​與​王冠’胸針,噉樣​做​只​會​令​上帝​反感。” 之後​幾​年,真理​嘅​光​越​照​越​明亮。喺​正確​同​潔淨​嘅​宗教​裏面,十字架​顯然​冇​立足​之​地。

14. 當​上帝​嘅​子民​明白​到​唔​應該​用​十字架​之後,就​點樣​做?

14 上帝​嘅​子民​明白​到​唔​應該​用​十字架​之後​點樣​做​呢?佢哋​一直​都​好​重視“十字架​與​王冠”胸針,噉​而家​戴​定​唔​戴​呢?忠心​事奉​耶和華​好多​年​嘅​萊拉​·​羅伯特斯​姊妹​話:“我哋​一​知道​十字架​象徵​乜嘢,就​即刻​揼​咗​個​胸針,唔​再​戴​嘞。”另​一​個​忠心​嘅​姊妹​烏爾蘇拉·​謝連科​講​出​咗​好多​人​嘅​心​聲。佢​話:“我哋​曾經​以​為​十字架​象徵​主​嘅​犧牲​同​基督徒​嘅​忠誠,後​來​先至​睇​出​自己​以往​珍視​嘅​標誌​原來​係​異教​嘅​象徵。正如​箴言​4:18​講​嘅,義人​嘅​路​越​照​越​明亮。我哋​因為​噉​而​滿懷​感激。” 忠心​嘅​基督徒​絶對​唔​會​俾​任何​錯誤​不潔​嘅​宗教​習俗​沾染​自己。

15,16. 我哋​點樣​做,就​表明​自己​決心​使​屬靈​聖殿​嘅​地上​院子​保持​潔淨?

15 今日,我哋​都​有​同樣​嘅​決心。我哋​承認​基督​一直​運用​一​個​明顯​嘅​渠道——忠信​睿智​嘅​奴隸,嚟​幫助​門徒​保持​靈性​潔淨。所以,每​當​忠信​嘅​奴隸​通過​靈糧​提醒​我哋,要​棄絶​嗰啲​受​錯誤​宗教​玷污​嘅​節慶​同​風俗​習慣,我哋​都​會​毫​不​猶豫​噉​聽從。就​好似​嗰啲​生活​喺​基督​臨在​初期​嘅​弟兄​姊妹​一樣,我哋​決心​使​耶和華​屬靈​聖殿​嘅​地上​院子​保持​潔淨。

16 喺​最後​嘅​日子,基督​一直​喺​幕後​保護​耶和華​子民​嘅​會衆,避免​會衆​嘅​靈性​俾​不良​分子​玷污。佢​點樣​保護​會衆​呢?等​我哋​嚟​睇睇。

 “將​惡人​從​義人​當中​分​出嚟”

17,18. 請​解釋​喺​拖​網​嘅​比喻​裏面,下面​嘅​句​子​有​咩​含意:(甲)“拖​網​撒​落​海​裏面”;(乙)“收集​各​類​嘅​魚”;(丙)“將​好​嘅​收入​器皿”;(丁)“唔​啱​用​嘅​就​揼​咗​佢”。

17 君王​耶穌​基督​密切​留意​上帝​子民​喺​各​地​會衆​嘅​情況。基督​同​天使​一直​將​惡人​從​義人​當中​分​出嚟。佢哋​用​嘅​方法,我哋​唔​一定​察覺​得到。耶穌​用​拖​網​嘅​比喻​嚟​講​明​分開​惡人​義人​嘅​工作。(請​讀馬太福音​13:47-50呢個​比喻​有​咩​含意​呢?

拖​網​象徵​喺​人海​當中​傳講​上帝​王國​嘅​工作(見​第​18​段)

18 “拖網​撒​落​海​裏面”。拖​網​象徵​喺​人海​當中​傳講​上帝​王國​嘅​工作。“收集​各​類​嘅​魚”。好消息​吸引​各​種​各​樣​嘅​人。呢啲​人​當中​有啲​接受​真理​成為​基督徒,亦​都​有​好多​起初​對​真理​感​興趣,但​後​來​冇​擁護​正確​嘅​宗教。 * “將​好​嘅​收​入​器皿”。誠心正意​嘅​人​會​被​收入​好似​器皿​一樣​嘅​會衆​裏面,以​潔淨​嘅​方式​崇拜​耶和華。“唔​啱​用​嘅​就​揼​咗​佢”。喺​最後​嘅​日子,基督​同​天使​一直“將​惡人​從​義人​當中​分​出嚟”。 * 結果,邊個​冇​正確​嘅​内心​情況,即​係​唔​肯​放棄​錯誤​嘅​信仰​同​習俗,邊個​就​唔​可以​加入​會衆,以免​會衆​受​到​玷污。 *

19. 知道​基督​一直​捍衛​正確​嘅​宗教,幫助​上帝​嘅​子民​保持​靈性​潔淨,你​有​咩​感覺?

19 知道​君王​一直​保護​緊​佢​嘅​子民,我哋​唔​係​覺得​好​安心​咩?今日,耶穌​基督​依然​熱心​捍衛​正確​嘅​宗教,幫助​真心​崇拜​上帝​嘅​人​保持​靈性​潔淨,就​好似​喺​公元​1​世紀,佢​為​正確​嘅​宗教​大​發​熱心​潔淨​聖殿​一樣。知道​呢​點,俾​到​我哋​好​大​嘅​安慰。基督​一直​都​努力​確保​上帝​嘅​子民​保持​靈性​潔淨,以免​正確​嘅​宗教​受​到​玷污。我哋​唔​係​應該​滿懷​感激​咩?凡​係​同​錯誤​宗教​有關​嘅​事物,我哋​都​應該​棄絶,噉樣​做​就​係​用​行動​嚟​擁護​君王​耶穌​同​佢​嘅​王國。

^ 2段 從​外地​嚟​嘅​猶太人​一定​要​用​指定​嘅​貨幣​交​一​年​一​次​嘅​聖殿税。兑錢商​同​佢哋​兑換​貨幣​嗰陣,會​收​手續費。外來​嘅​猶太人​都​可能​要​買​牲畜​獻祭。耶穌​將​呢啲​商人​叫​做“强盜”,好​可能​係​因為​佢哋​獅子開大口,亂​咁​開價。

^ 4段 耶和華​嘅​子民​喺​偉大​屬靈​聖殿​嘅​地上​院子​裏面​崇拜​佢。

^ 8段 呢​篇​文章​指​出,如果​耶穌​係​冬天​出世​嘅​話,就​同​牧羊人​喺​野外​放羊​嘅​聖經​記載​唔​相符。(路加福音​2:8

^ 10段 弗德烈克​·​法蘭兹​弟兄​喺​1927​年​11​月​14​日​寫​嘅​一​封​私人​信件​提​到:“我哋​今年​唔​慶祝​聖誕節​嘞。伯特利​家庭​一致​通過,從​今​以後​唔​會​再​慶祝​聖誕節。”幾​個​月​之後,1928​年​2​月​6​日​弗德烈克​·​法蘭兹​喺​另​一​封​信​裏面​話:“主​一步步​噉​潔淨​我哋,幫​我哋​改正​錯誤,徹底​擺脱​大巴比倫​嘅​束縛,因為​大巴比倫​係​受​魔鬼​操控​嘅。”

^ 18段 就​以​2013​年​為​例,傳道員​最​高​人數​係​796萬5954​人,而​出席​耶穌​受難紀念​聚會​嘅​人數​係​1924萬1252​人。

^ 18段 將​好​嘅​魚​同​唔​啱​用​嘅​魚​分開,仲​有​將​綿羊​同​山羊​分開,完全​係​兩​回​事。(馬太福音​25:31-46)耶穌​分開​綿羊​同​山羊​嘅​工作,即​係​最後​嘅​審判,會​喺​即​將​來臨​嘅​大患難​期間​進行。今日,好多​人​就​好似​比喻​中​唔​啱​用​嘅​魚,但​喺​大患難​嚟​到​之前,佢哋​仲​有​機會​返轉​頭​歸向​耶和華,被​收入​會衆​呢個​器皿​裏面。(瑪拉基書​3:7

^ 18段 凡​係“唔​啱​用​嘅”,最終​會​被“抛​入​火爐”,象徵​永遠​被​毁滅。