跳到內容

跳到副菜單

跳到目錄

上帝嘅王國統治嘞!

 第​5​章

君王使人明白王國嘅真理

君王使人明白王國嘅真理

本​章​概要

上帝​嘅​子民​逐步​明白​關於​上帝​王國​嘅​重要​真理,例如​邊啲​人​會​統治​上帝​嘅​王國?邊啲​人​會​成為​王國​嘅​子民?忠於​上帝​嘅​王國​意味​住​乜嘢?

1,2. 點解​話,耶穌​係​最​有​智慧​嘅​嚮導​呢?

試​諗下,一​個​經驗​豐富​嘅​導遊​帶​住​你​同​其他​團友​去​到​一​個​城市​觀光,嗰度​景色​迷人,令​人​驚歎。你哋​從來​都​未​去​過​嗰個​城市,乜嘢​都​覺得​好​新奇。所以​導遊​講​嘅​每​一​句​話,你哋​都​留心​聽。對於​嗰啲​仲​未​見​到​嘅​景物,你哋​又​好奇​又​興奮,於是​去​問​導遊。但係​導遊​話,到時​你哋​就​知道​喇。導遊​通常​會​到​咗​景點,先至​同​你哋​介紹、講解。你​慢慢​睇​出​導遊​好​有​智慧,佢​會​喺​最​適當​嘅​時候​將​你​需要​知道​嘅​講​俾​你​知。

2 真​基督徒​嘅​情況​同​呢啲​遊客​差唔多。不過,我哋​好​想​認識​嘅,係​一​座​最​令​人​驚歎​嘅​城,呢​座“根基​永固​嘅​城”就​係​上帝​嘅​王國。(希伯來書​11:10)耶穌​仲​喺​地上​嗰時,親自​指引​門徒​深入​認識​上帝​嘅​王國。門徒​提​出​嘅​問題,耶穌​有​冇​全部​都​回答​晒​呢?冇。佢​係​唔​係​一下子​就​將​上帝​王國​嘅​事​全部​都​話​俾​門徒​知​呢?唔​係。耶穌​話:“我[仲]有​好多​事​要​話​俾​你哋​知,但係​你哋​現今​擔負​唔​嚟。”(約翰福音​16:12)耶穌​係​最​有​智慧​嘅​屬靈​嚮導,一直​都​按照​門徒​能够​理解​嘅,指引​佢哋​認識​上帝​嘅​王國。

3,4. (甲)耶穌​點樣​繼續​教導​忠心​嘅​門徒​認識​上帝​嘅​王國?(乙)本​章​會​探討​乜嘢?

3 約翰福音​16:12​所​記載​嘅​話,係​耶穌​喺​犧牲​生命​之前​嗰​晚​講​嘅。噉​耶穌​犧牲​生命​之後,會​點樣​繼續​教導​忠心​嘅​門徒​認識​上帝​嘅​王國​呢?佢​向​使徒​保證:“賜​真理​嘅​聖靈……指引​你哋​明白​一切​嘅​真理”。 *約翰福音​16:13)耶穌​會​用​聖靈​指引​門徒​認識​上帝​嘅​王國,所以​聖靈​亦​都​好似​耐心​嘅​嚮導。門徒​需要​明白​嘅,耶穌​都​會​喺​最​適當​嘅​時候​使​佢哋​明白。

4 下文​會​分析,聖靈​點樣​指引​誠心​跟隨​基督​嘅​人​深入​認識​上帝​嘅​王國。首先​講​下,我哋​點樣​睇​出​上帝​嘅​王國​係 幾時​開始​統治​嘅。跟住​會​探討,邊啲​人​會​統治​上帝​嘅​王國,邊啲​人​會​成為​呢個​王國​嘅​子民,同埋​呢​兩​群​人​有​乜嘢​唔​同​嘅​希望。最後​會​睇睇,基督徒​點樣​更加​清楚​明白,忠於​上帝​嘅​王國​意味​住​乜嘢。

明白​1914​年​係​個​重要​年份

5,6. (甲)關於​上帝​王國​嘅​建立​同​收割​時期,聖經研究者​有​乜嘢​錯誤​嘅​睇法?(乙)點解​門徒​理解​錯​咗,並​唔​表示​耶穌​冇​用​聖靈​指引​佢哋?

5 呢​本​書第​2​章提​到,聖經研究者​用​咗​幾十​年​嘅​時間,向​人​指​出​1914​年​係​個​重要​年份,對​聖經​預言​嘅​應驗​有​重大​意義。不過,當時​佢哋​以​為​基督​嘅​臨在​喺​1874​年​已經​開始​咗,亦​都​以​為​1878​年​基督​已經​喺​天上​開始​統治,但​其實​上帝​嘅​王國​要​到​1914​年​10​月​先至​完全​建立。1874​年​到​1914​年間​係​收割​時期,到​咗​收割​嘅​高潮,受膏基督徒​會​被​召集​到​天上。 事實​表明,當時​嘅​理解​係​錯誤​嘅。噉​係​唔​係​話,耶穌​冇​用​聖靈​指引​佢​嘅​忠心​門徒​呢?絶對​唔​係!

6 再​睇​下​文章​開頭​嘅​比喻。遊客​出於​好奇,迫不及待​噉​提​出​問題,但係​導遊​冇​馬上​答​佢哋。噉​係​唔​係​話​導遊​唔够​稱職​呢?當然​唔​係。上帝​子民​嘅​情況​亦​都​好​類似。有時,聖靈​指引​佢哋​明白​耶和華​旨意​嘅​時候​仲​未​到,佢哋​就​嘗試​解釋​其中​嘅​一啲​細節,不過​耶穌​繼續​帶領​住​佢哋。後嚟,忠心​嘅​基督徒​謙卑​噉​改變​自己​嘅​睇法,表明​佢哋​甘願​接受​糾正。(雅各書​4:6

7. 上帝​嘅​子民​得到​乜嘢​屬靈​嘅​亮光?

7 1919​年​之後,上帝​嘅​子民​得到​越​嚟​越​多​屬靈​嘅​亮光。(請​讀​詩篇​97:111925​年,英語版《守望台》刊登​咗《國家​嘅​誕生》呢​篇​深具​歷史​意義​嘅​文章,解釋​啟示錄​12​章​嘅​預言。預言​提​到​上帝​喺​天上​嘅“女人”生​咗​個​仔,呢​件​事​象徵​彌賽亞​王國​喺​天上​誕生。文章​亦​都​提​出​確鑿​嘅​證據,表明​呢個​王國​已經​喺​1914​年​建立。 *文章​進一步​指​出,第一次世界大戰​期間,耶和華​嘅​子民​遭到​迫害,忍受​磨難,呢​一​點​清楚​顯示​撒但​就​喺​嗰​段​時間​從​天上​被​扔​落嚟。佢“滿​懷​忿恨……因為​佢​知​自己​來日​無多”。(啟示錄​12:12

8,9. (甲)《守望台》點樣​表明​上帝​嘅​王國​非常​重要?(乙)我哋​會​解答​邊啲​問題?

8 上帝​嘅​王國​有​幾​重要?喺​1928​年,英語版《守望台》已經​强調,上帝​嘅​王國​比​人類​通過​贖價​得救​更加​重要。通過​彌賽亞​所​統治​嘅​王國,耶和華​會​使​佢​嘅​名​彰顯​為​聖,證明​佢​嘅​至高統治權​係​正當​嘅,而且​徹底​執行​佢​對​人類​嘅​旨意。

9 喺​上帝​嘅​王國​裏面,邊啲​人​會​同​基督​一齊​統治​呢? 邊啲​人​會​成為​王國​嘅​地上​子民?基督徒​應該​專心​做​乜嘢​工作​呢?

收割​工作​着重​召集​受膏基督徒

10. 關於​14萬4000​人,上帝​嘅​子民​喺​好​耐​之前​已經​睇​出​乜嘢?

10 1914​年​之前​幾十​年,真​基督徒​已經​明白,會​有​14萬4000​個​忠心​門徒​同​耶穌​基督​一齊​喺​天上​統治。 *當時​嘅​聖經研究者​睇​出,14萬4000​係​個​實數,而且​喺​公元​1​世紀​上帝​已經​開始​召集​14萬4000​人。

11. 有​希望​成為​基督“新娘”嘅​嗰​群​人,點樣​睇​出​自己​喺​地上​有​任務​要​執行?

11 呢​群​人​有​希望​成為​基督​嘅“新娘”。噉​佢哋​仲​喺​地上​嘅​時候,要​執行​乜嘢​任務​呢?佢哋​睇​出,耶穌​好​重視​傳道​工作,而且​將​呢​件​工作​同​收割​時期​聯繫​起嚟。(馬太福音​9:37;約翰福音​4:35)呢​本​書第​2​章講​過,曾經​有​一​段​時間,聖經研究者​認為​收割​時期​只​係​會​延續​40​年,喺​收割​嘅​高潮​受膏基督徒​會​被​召集​到​天上。但​40​年​過去​嘞,傳道​工作​仲係​繼續​擴展。顯然,當時​聖經研究者​有​好多​事​仲​未​完全​明白。今日,我哋​知道​收割​時期​喺​1914​年​開始​咗。喺​收割​期間,麥​同​稗​會​分開,亦​即​係​話,忠心​嘅​受膏基督徒​會​同​假基督徒​區分​開來。係​時候​全力​召集​14萬4000​人​嘅​剩餘​分子​嘞!

收割​時期​喺​1914​年​開始(見​第​11​段)

12,13. 喺​十​個​處女​嘅​比喻​同​金幣​嘅​比喻​裏面,耶穌​提​到​嘅​事​點樣​喺​最後​嘅​日子​應驗?

12 從​1919​年​起,喺​基督​嘅​指引​之下,忠信​睿智​嘅​奴隸​一直​强調​傳道​工作​非常​重要。喺​公元​1​世紀,基督​已經​差​門徒​去​傳道。(馬太福音​28:19,20)佢​仲​指​出​受膏​門徒​必須​具備​乜嘢​特質​先​可以​完成​傳道​任務。我哋​點​知​呢?喺​十​個​處女​嘅​比喻​裏面,耶穌​表明​受膏​門徒​一定​要​時刻​守望,喺​靈性​上​保持​警惕,先​能够​得到​最終​嘅​獎賞,可以​去​到​綿羊羔​天上​嘅​盛大​婚宴。喺​呢個​場合,綿羊羔​基督​會​迎娶​由​14萬4000​個​忠心​受膏​門徒​組​成​嘅“新娘”。(啟示錄​21:2)喺​金幣 嘅​比喻​裏面,耶穌​指​出​受膏​僕人​要​勤懇​噉​執行​佢​交託​嘅​傳道​任務。(馬太福音​25:1-30

13 過​去​一百​年​期間,受膏基督徒​唔單止​保持​警惕,而且​勤奮​傳道。佢哋​警醒​守望,一定​會​蒙​上帝​獎賞。但​呢​件​偉大​嘅​收割​工作​所​召集​嘅,係​唔​係​只​有​嗰啲​同​基督​一齊​作​王​嘅​14萬4000​人​嘅​剩餘​分子​呢?

召集​王國​喺​地上​嘅​子民

14,15. 《完成​嘅​奧秘》提​到​邊​四​群​人?

14 以前,忠心​嘅​基督徒​一直​都​好​想​知道,啟示錄​7:9-14​提​到​嘅“大群人”係​指​邊啲​人。喺​基督​使​人​明白“大群人”嘅​身份​之前,聖經研究者​關於​呢個​課題​所​發表​嘅​見解,大部分​都​複雜​難明,同​我哋​而家​學​到​嘅​顯淺​真理​相差​好遠。

15 1917​年​出版​嘅《完成​嘅​奧秘》(英語)指​出,“得救​到​天上​享​永生​嘅​人​有​兩​群​或​兩​個​階層,得救​喺​地上​享​永生​嘅​人​亦​都​有​兩​群​或​兩​個​階層”,亦​即​係​話,一共​有​四​群​人​得救。邊​四​群​呢?先​講​下​有​希望​到​天上​去​嘅​人。第​一​群​就​係​同​基督​一齊​作​王​嘅​14萬4000​人。第​二​群​係​大群人,當時​嘅​聖經研究者​認為,呢​群​人​係​名義​上​嘅​基督徒,但​仲​未​正式​脱離​教會。佢哋​唔​係​冇​信心,只​係​信心​唔够​堅定,喺​考驗​之下​冇​緊守​忠義,所以​喺​天上​居​次要​地位。再​講​下​有​希望​喺​地上​享​永生​嘅​人。聖經研究者​認為,第​三​群​係​古代​嘅​忠僕,例如​亞伯拉罕、摩西​等。佢哋​會​喺​地上​管理​第​四​群​人,亦​即​係​全​地​嘅​人。

16. 喺​1923​年​同​1932​年,上帝​嘅​子民​得到​乜嘢​屬靈​嘅​亮光?

16 今日,我哋​對​基督徒​所​懷​嘅​希望​有​咗​清晰​嘅​理解。噉​聖靈​係​點樣​指引​基督徒​清楚​理解​呢啲​真理​嘅​呢?屬靈​嘅​亮光​一​次​又​一​次​噉​照耀​佢哋,逐步​幫助​佢哋​明白。喺​1923​年,英語版《守望台》早就​已經​提及​有​一​群​人​唔​嚮往​到​天上,佢哋​會​喺​地上​生活,受​基督​統治。1932​年,英語版《守望台》提​到,約拿撻​支持​上帝​所​膏立​嘅​以色列王​耶户,願意​同​佢​一齊​去​對抗​錯誤​嘅​宗教。(列王紀下​10:15-17)文章​指​出​現代​有​一​群​人​好似​約拿撻,仲​話​耶和華​會​帶領​呢​群​人“渡​過​哈米吉多頓​大戰”繼續​喺​地上​生活。

17. (甲)1935​年,上帝​嘅​子民​得到​乜嘢​燦爛​嘅​屬靈​亮光?(乙)關於“大群人”,忠心​嘅​基督徒​對​新​嘅​理解​有​乜嘢​反應​呢?(見​附欄“ 大大​鬆​咗​一口氣”)

17 1935​年,一​道​燦爛​嘅​屬靈​亮光​照耀​上帝​嘅​子民。喺​美國​首都​華盛頓​舉行​嘅​大會​裏面,上帝​嘅​子民​明白​咗“大群人”嘅​身份,佢哋​就​係​耶穌​所​講​嘅​綿羊​山羊​比喻​裏面​嘅​ 綿羊,有​希望​喺​地上​享​永生。(馬太福音​25:33-40)大群人​屬於“其他​嘅​羊”。講​到“其他​嘅​羊”,耶穌​話:“我​必​帶​佢哋​嚟”。(約翰福音​10:15-16)喺​大會​上,盧述福​對​在場​嘅​人​話:“凡​係​希望​永遠​喺​地上​生活​嘅​人,請​企​起身。”聽衆​當中​有​超過​一半​嘅​人​都​企​咗​起身,於是​盧述福​宣布:“睇​下!大群人!”好多​人​都​感動​到​不得了,因為​終於​明白​咗​自己​嘅​希望​係​喺​地上​享​永生。

18. (甲)基督​嘅​門徒​全力​召集​邊​群​人?(乙)結果​點樣​呢?

18 “大群人”會​安然​渡​過​大患難。自從​1935​年​以​來,基督​一直​指引​佢​嘅​門徒​全力​召集“大群人”。起初,大群人​嘅​數目​唔​係​好多。有​一​次,盧述福​弟兄​甚至​話:“聖經​講​嘅‘大群人’睇嚟​唔​係​咁​大。”今日,我哋​當然​知道,從​1935​年​開始,耶和華​就​大大​賜​福​俾​佢​嘅​子民,大群人​嘅​數目​不斷​增多。喺​耶穌​同​聖靈​嘅​指引​之下,受膏基督徒​同“其他​嘅​羊”已經“合成​一​群”,並肩​工作,服從“一​個​牧人”,就​好似​耶穌​預告​嘅​一樣。

盧述福​弟兄​點​都​諗​唔​到,大群人​嘅​數目​會​有​咁​多(從​左​到​右:内森·諾爾,約瑟夫·盧述福,海登·科温頓)

19. 我哋​可以​點樣​做,使​大群人​嘅​數目​不斷​增多?

19 忠於​上帝​嘅​人​當中,絶​大多數​會​喺​地上​嘅​樂園​裏面​享​永生。統治​佢哋​嘅,除咗​君王​基督,仲​有​同​基督​一齊​作​王​嘅​14萬4000​人。聖經​提​出​嘅​希望​清晰​明確。沉思​基督​點樣​指引​上帝​嘅​子民​明白​呢個​希望,唔​係​好​令​人​欣慰​咩?能够​向​人​傳講​呢個​希望​係​幾​咁​大​嘅​榮幸!等​我哋​盡​己​所​能,熱心​傳道。隨​住​大群人​嘅​數目​增多,讚美​耶和華​聖名​嘅​聲音​亦​都​會​越​嚟​越​雄壯!(請​讀​路加福音​10:2

大群人​嘅​數目​不斷​增多

忠於​上帝​嘅​王國​意味​住​乜嘢

20. (甲)撒但​嘅​組織​包括​乜嘢?(乙)要​忠於​上帝​嘅​王國,基督徒​就​要​點樣​做?

20 上帝​嘅​子民​要​繼續​認識​上帝​嘅​王國,亦​都​要​完全​明白​忠於​呢個​天上​政府​意味​住​乜嘢。關於​呢​點,1922​年,英語版《守望台》指​出​有​兩​個​對立​嘅​組織,就​係​耶和華​嘅​組織​同​撒但​嘅​組織。撒但​嘅​組織​包括​當今​世界​嘅​商業、宗教​同埋​政治​制度。邊個​忠於​基督​所​統治​嘅​上帝​王國,就​要​避免​同​撒但​嘅​組織​有​任何​不當​嘅​來往,絶對​唔​會​妥協​讓步。(哥林多後書​6:17)呢個​係​乜嘢​意思​呢?

21. (甲)關於​商業界,忠信​嘅​奴隸​告誡​上帝​嘅​子民​要​提防​乜嘢?(乙)關於“大巴比倫”,1963​年​嘅《守望台》點樣​講?

21 忠信​嘅​奴隸​喺​出版​嘅​靈糧​裏面​一再​指​出,商業界​貪污​腐敗,充滿​物質​至上​的​精神,告誡​上帝​嘅​子民​唔​好​受​到​呢​種​歪風​影響。(馬太福音​6:24)上帝​組織​嘅​出版物​亦​都​經常​談論​撒但​組織​嘅​宗教​制度。1963​年,英語版《守望台》 (漢語版​1964​年)清楚​表明,“大巴比倫”唔​單單​指​有名無實​嘅​基督教,仲​包含​世上​所有​錯誤​嘅​宗教。呢​本​書第​10​章會​詳細​講​下,上帝​點樣​幫助​嚟自​唔​同​國家​唔​同​文化​背景​嘅​子民​離開​大巴比倫,棄絶​錯誤​宗教​嘅​一切​習俗。(啟示錄​18:2,4

22. 第一次世界大戰​期間,唔​少​聖經研究者​對於​羅馬書​13:1​嘅​勸告​有​點樣​嘅​理解​呢?

22 而家​講​下​撒但​組織​嘅​政治​制度。真​基督徒​可唔可以​參與​戰爭​或者​國際​衝突​呢?第一次世界大戰​期間,聖經研究者​普遍​都​明白,基督​嘅​門徒​唔​可以​殺人。(馬太福音​26:52)但​由於​羅馬書​13:1​勸​人​要​服從“國家​嘅​權力​機構”,唔​少​聖經研究者​認為,基督徒​可以​參軍,着​軍裝,甚至​帶​武器,但​奉命​上陣​嗰時,只​可以​向​天​開​槍,唔​可以​殺人。

23,24. (甲)第二次世界大戰​期間,上帝​嘅​子民​對於​羅馬書​13:1​又​有​點樣​嘅​理解​呢?(乙)關於​呢​節​經文,基督​指引​門徒​得到​乜嘢​正確​嘅​理解?

23 1939​年,第二次世界大戰​爆發​之後,英語版《守望台》嘅​文章​深入​探討​中立​嘅​問題,講​明​基督徒​絶對​唔​會​參與​撒但​世界​嘅​戰爭​同​衝突。呢個​真​係​適時​嘅​指引!基督​嘅​門徒​聽從​呢個​指引,就​唔​會​好似​參戰國​噉​背負​沉重​嘅​血債。 其實,喺​1929​年,上帝​組織​嘅​出版物​指​出,羅馬書​13:1​所​講​嘅“國家​嘅​權力​機構”係​指​耶和華​同​耶穌,而​唔​係​指​世上​嘅​統治者,不過​當時​嘅​理解​並​唔​確切。

24 到​咗​1962​年,聖靈​指引​基督​嘅​門徒​得到​正確​嘅​ 理解。英語版《守望台》11​月​15​日​刊​同​12​月​1​日​刊(漢語版​1963​年​6​月​15​日​刊​同​7​月​1​日​刊)登載​咗​幾​篇​深具​歷史​意義​嘅​文章,詳細​講解​羅馬書​13:1-7​。上帝​嘅​子民​終於​領悟​到​耶穌​講​嘅​話​所​藴含​嘅​原則。耶穌​曾經​講​過:“該撒​嘅​嘢​歸返​該撒,上帝​嘅​嘢​歸返​上帝。”(路加福音​20:25)從​呢​句​至理名言,上帝​嘅​子民​睇​出​基督徒​要​服從“國家​嘅​權力​機構”,但​呢​種​服從​唔​係​絶對​嘅。今日,真​基督徒​明白,“國家​嘅​權力​機構”係​指​世上​各​個​政府,基督徒​要​服從​政府,但​唔​係​絶對​服從。如果​世上​嘅​當權者​要求​我哋​違抗​耶和華​上帝​嘅​命令,我哋​就​會​效法​古代​嘅​使徒,回答​話:“我哋​必須​服從​上帝,唔​服從​人。”(使徒行傳​5:29)呢​本​書​第​13​同​14​章​會​講​下,上帝​嘅​子民​點樣​堅守​基督徒​嘅​立場,嚴守​中立。

能够​向​人​傳講​聖經​所​講​嘅​永生​希望,係​好​大​嘅​榮幸!

25. 聖靈​指引​上帝​嘅​子民​認識​上帝​嘅​王國,你​對​呢​件​事​有​咩​感覺?點解​呢?

25 關於​上帝​嘅​王國,過去​一百​年​期間,基督​嘅​門徒​學​到​乜嘢?我哋​學​到​上帝​嘅​王國​幾時​喺​天上​建立,亦​都​學​到​呢個​王國​有​幾​重要。我哋​清楚​睇​出,聖經​話​有​兩​種​唔​同​嘅​希望,上帝​嘅​忠僕​有啲​會​到​天上,有啲​會​喺​地上​享​永生。我哋​明白​忠於​上帝​嘅​王國​意味​住​乜嘢,亦​都​知道​要​服從​世上​嘅​政府,但​呢​種​服從​唔​係​絶對​嘅。不妨​問​下​自己:“如果​唔​係​耶穌​基督​指引​地上​嘅​忠信​奴隸​明白​呢啲​寶貴​嘅​真理,然後​教導​人​認識,我​又​點會​知道​呢?”有​基督​同​聖靈​指引​我哋,係​幾​咁​大​嘅​福分​啊!

^ 3段 據​一​本​參考書​解釋,喺​呢​節​經文​裏面​譯​做“指引”嘅​希臘語詞​有“為​人​指​路”嘅​意思。

^ 7段 之前,聖經研究者​以​為,異象​指​嘅​係​羅馬​帝國​嘅​異教​同​羅馬​天主教會​之​間​嘅​戰爭。

^ 10段 英語版《錫安​嘅​守望台》1880​年​6​月​刊​話,14萬4000​人​全部​都​係​喺​1914​年​之前​歸信​咗​基督​嘅​猶太人。1880​年​之後,《守望台》修正​咗​呢個​觀點,作出​嘅​解釋​同​我哋​而家​嘅​理解​比較​接近。