跳到內容

跳到副菜單

跳到目錄

上帝嘅王國統治嘞!

 第​4​章

耶和華彰顯自己嘅名

耶和華彰顯自己嘅名

本​章​概要

上帝​嘅​子民​顯揚​上帝​嘅​名

1,2. 《新世界​譯本》點樣​顯揚​上帝​嘅​名?

1947​年​12​月​2​日​星期二,一​個​晴朗、清涼​嘅​早晨,喺​美國​紐約市​布魯克林​嘅​伯特利,有​一​小群​受膏​弟兄​着手​執行​一​項​艱巨​嘅​任務。佢哋​勞心​勞力,細緻​嚴謹​噉​工作,用​咗​12​年​嘅​時間,終於​喺​1960​年​3​月​13​日​星期日​完成​咗​整​本​聖經​嘅​翻譯​工作。三​個​月​之後,1960​年​6​月​18​日,喺​英國​曼徹斯特市​嘅​大會​上,内森·諾爾​弟兄​宣布​發行《聖經​新世界​譯本》(英語)嘅​最後​一​册,在場​所有​人​都​興奮​到​不得了。諾爾​弟兄​講​出​咗​大家​嘅​心聲:“今日​的確​係​個​歡樂​嘅​日子,世界​各​地​嘅​耶和華見證人​都​歡欣​鼓舞!”《新世界​譯本》有​個​鮮明​嘅​特點​令​到​耶和華​嘅​子民​特别​開心,就​係:原文​裏面​凡​係​有​上帝​聖名​嘅​地方,都​一一​翻譯​出嚟。

1950​年,《希臘語​經卷​新世界​譯本》喺“神治國​嘅​擴展”大會​上​發行(左圖: 美國​紐約市​楊基​運動場;右圖:加​納)

2 好多​聖經​譯本​就​啱啱​相反,冇​將​上帝​嘅​名​翻譯​出嚟。撒但​企圖​使​上帝​嘅​名​銷聲匿迹,但係​耶和華​嘅​受膏​僕人​堅決​抵抗​撒但​嘅​奸計。當日​發行​嘅《新世界​譯本》嘅​前言​話,呢個​譯本“最​主要​嘅​特點​就​係​恢復​上帝​嘅​名​喺​聖經​裏面​嘅​應有​地位”。耶和華​呢個​名​喺《新世界​譯本》裏面​出現​咗​超過​7000​次,呢個​譯本​的確​大大​顯揚​天父​耶和華​嘅​聖名!

3. (甲)我哋​嘅​弟兄​睇​出​上帝​嘅​名​有​乜嘢​含意?(乙)我哋​應該​點樣​理解​出埃及記​3:13,14​嘅​經文?(見​附欄“ 上帝​名字​嘅​含意”)

3 早期​嘅​聖經研究者​一直​以為​上帝​嘅​名​意思​係:“我​是​自有永有​的”。(出埃及記​3:14,《和合本》)所以,英語版《守望台》1926​年​1​月​1​日​刊​話:“耶和華​呢個​名​所​代表​嘅​嗰​位​神​係​自有​嘅……係​冇​開始​亦​都​冇​終結​嘅。”但係,到​上帝​嘅​子民​着手​翻譯《新世界​譯本》嘅​時候,上帝​就​幫​佢哋​睇​出,耶和華​呢個​名​唔​單單​係​指,佢“係​自有​嘅”。上帝​聖名​嘅​主要​含意​係,佢​一定​會​採取​行動​實現​自己​嘅​旨意。上帝​嘅​子民​亦​都​明白,耶和華​呢個​名​嘅​字面​意思​係“佢​使……成為”, 亦​即​係​話,佢​係“成事者”。耶和華​定意​創造​宇宙​同​各​種​活物,使​其中​一​部分​活物​能够​崇拜​佢,呢​一切​都​已經​成事​嘞。佢​仲​會​繼續​實現​自己​嘅​旨意,亦​都​一定​會​成事。上帝​嘅​名​應該​受​到​顯揚。點解​噉樣​做​非常​重要?我哋​可以​點樣​顯揚​上帝​嘅​聖名​呢?

尊​上帝​嘅​名​為​聖

4,5. (甲)我哋​祈求​上帝​嘅​名​彰顯​為​聖,就​等於​係​求​乜嘢?(乙)上帝​會​喺​幾時​同埋​點樣​使​自己​嘅​名​彰顯​為​聖​呢?

4 耶和華​要​彰顯​自己​嘅​名。喺​模範​禱告​裏面,耶穌​所​求​嘅​第​一​件​事​就​係:“願​人​都​尊​你​嘅​名​為​聖。”(馬太福音​6:9)從​呢​點​睇​出,喺​上帝​嘅​旨意​當中,最​重要​嘅​就​係​使​耶和華​呢個​名​彰顯​為​聖。噉​我哋​祈求​上帝​嘅​名​彰顯​為​聖,就​等於​求​乜嘢​呢?

5 呢​本​書第​1​章提過,耶穌​喺​模範​禱告​裏面​求​咗​三​件​同​上帝​旨意​有關​嘅​事,第​一​件​就​係“願​人​都​尊​你​嘅​名​為​聖”,其餘​兩​件​係:“願​你​嘅​國​降臨”,“願​你​嘅​旨意​行​在​地上”。(馬太福音​6:10)我哋​既然​求​耶和華​採取​行動,使​佢​嘅​王國​降臨,使​佢​嘅​旨意​喺​地上​實現,我哋​亦​都​會​求​耶和華​採取​行動,使​佢​嘅​名​彰顯​為​聖。其實,自從​伊甸園​嘅​反叛​事件​以​來,耶和華​嘅​名​一直​受​到​羞辱。我哋​求​耶和華​彰顯​自己​嘅​名,就​等於​係​求​佢​除去​自己​嘅​名​所​受​嘅​一切​羞辱。耶和華​會​點樣​回應​呢個​禱告​呢?佢​話“我​要……證實​我​嘅​名​係​聖​嘅”,喺​列國​中“我​嘅​名​受​辱”咗。(以西結書​36:23;38:23)喺​哈米吉多頓​大戰​嗰陣,耶和華​會​鏟除​一切​惡人​惡事,喺​天地​衆生​眼前​使​自己​嘅​名​彰顯​為​聖。

6. 我哋​點樣​做​就​係​尊​上帝​嘅​名​為​聖?

6 自古​以​來,耶和華​嘅​僕人​一直​有​榮幸​尊​佢​嘅​名​為​聖。當然,無論​我哋​做​乜嘢​都​唔​能够​令​上帝​嘅​名​更加​神聖,因為​上帝​嘅​名​係​絶對​神聖​嘅。噉​我哋​點樣​做​就​係​尊​上帝​嘅​名​為​聖​呢?以賽亞​話:“總要​記得[​尊​]我——耶和華、萬軍​嘅​統帥​係​神聖​嘅”。講​到​自己​嘅​子民,耶和華​話:“你哋​就​必​承認​我​係​以色列​神聖​嘅​上帝。你哋​會​尊敬​我,敬畏​我。”(以賽亞書​8:13;29:23)所以,我哋​尊​上帝​嘅​名​為​聖​嘅​話,就​會​承認​惟有​上帝​嘅​名​係​至高無上​嘅,亦​都​會​尊重​呢個​名​所​代表​嘅​一切,仲​會​幫助​其他​人​尊​上帝​嘅​名​為​聖。如果​我哋​承認​耶和華​係​統治者,全心​服從​佢,就​表明​自己​真​係​敬畏​上帝,尊崇​佢​嘅​名​嘞。(箴言​3:1;啟示錄​4:11

 準備​好​歸於​上帝​名​下,而且​顯揚​佢​嘅​名

7,8. (甲)上帝​嘅​僕人​點樣​先至​能够​成為​上帝​名下​嘅​子民?(乙)我哋​接​落嚟​會​睇​下​邊啲​内容​呢?

7 從​19​世紀​70​年代​開始,上帝​嘅​現代​僕人​就​一直​喺​佢哋​嘅​出版物​裏面​使用​上帝​嘅​名。例如,英語版《錫安​嘅​守望台》1879​年​8​月​刊​同埋​同​一​年​出版​嘅​詩歌集《新婦​之​歌》(英語),都​提​到​上帝​嘅​名​耶和華,但​噉樣​做​仲​未够。我哋​要​知道,可以​成為​上帝​名​下​嘅​子民​係​莫大​嘅​榮幸。睇嚟,上帝​要​佢​嘅​僕人​先​符合​一啲​條​件,然後​至​會​俾​佢哋​採用​一​個​包含​上帝​聖名​嘅​名稱。既然​係​噉,耶和華​點樣​幫助​早期​嘅​聖經研究者​做​好​準備,成為​佢​名​下​嘅​子民​呢?

8 回顧​19​世紀​末​到​20​世紀​初​嘅​歷史,我哋​可以​睇​出​耶和華​點樣​幫助​佢​嘅​子民​更加​清楚​理解​同​佢​嘅​名​有關​嘅​重要​真理。等​我哋​講​下​其中​三​點。

9,10. (甲)點解​早期​嘅《守望台》文章​經常​將​注意力​放​喺​耶穌​身上?(乙)自從​1919​年​以​來​有​乜嘢​改變?結果​點樣?(另​見​附欄“ 《守望台》顯揚​上帝​嘅​名”)

9 第​一,耶和華​嘅​僕人​對​上帝​嘅​名​嘅​重要性​有​咗​正確​嘅​睇法。早期​忠心​嘅​聖經研究者​以​為,基督​所​獻​嘅​贖價​係​聖經​嘅​主要​教義。所以,嗰時​嘅《守望台》往往​將​注意力​放​喺​耶穌​身上。例如,第​一​年​嘅《守望台》提​到“耶穌”呢個​名​嘅​次數​比“耶和華”多​好​多,大概​係​十​比​一。《守望台》1976​年​9​月​15​日​刊​指​出,早期​嘅​聖經研究者“過度​重視”耶穌。不過​後嚟​耶和華​幫助​佢哋​睇​出,聖經​非常​重視​上帝​嘅​名。聖經研究者​跟住​點樣​做​呢?同​一​篇《守望台》文章​話,從​1919​年​起,“佢哋​更加​尊崇​彌賽亞​嘅​天父​耶和華”。1919​年​之後​嘅​十​年​期間,《守望台》提​到​上帝​嘅​名​超過​6500​次。

10 我哋​嘅​弟兄​都​尊崇​耶和華​呢個​名,表明​佢哋​愛​上帝​嘅​名。佢哋​就​好似​古代​嘅​摩西​噉樣,開始​向​人“宣揚​耶和華​嘅​名”。(復傳律例書​32:3;詩篇​34:3)耶和華​留意​到​佢​嘅​子民​為咗​佢​嘅​名​所​顯​嘅​愛心,就​恩待​佢哋,好似​聖經​講​嘅​噉樣。(希伯來書​13:15,16;啟示錄​11:18

11,12. (甲)1919​年​之後​冇幾耐,上帝​組織​嘅​出版物​喺​内容​方面​有​乜嘢​改變?(乙)耶和華​不斷​提醒​佢​嘅​僕人​要​點樣​做?點解​呢?

11 第​二,真​基督徒​對​上帝​所​委派​嘅​工作​有​咗​正確​嘅​理解。1919​年​之後​冇幾耐,帶頭​嘅​受膏​弟兄​仔細​查考​以賽亞​嘅​預言。由​嗰時​起,上帝​組織​出版​嘅​書刊​開始​將​焦點​更加​集中​喺​傳道​工作​上。點解​話​呢​種​改變​係“按時​分配​糧食”呢?(馬太福音​24:45

12 以賽亞​記述​耶和華​嘅​話:“你哋​係​我​嘅​證人;我​選 你哋​做​我​嘅​僕人”。(請​讀​以賽亞書​43:10-121919​年​之前,《守望台》從來​都​冇​仔細​分析​過​呢​幾​節​經文。1919​年​之後​冇幾耐,上帝​組織​嘅​出版物​開始​探討​上面​提​到​嘅​經文,鼓勵​所有​受膏基督徒​為​耶和華​作​見證,因為​呢個​係​耶和華​委派​俾​佢哋​嘅​工作。事實​上,從​1925​年​到​1931​年,就​有​57​期《守望台》分析​過​以賽亞書​43​章,而​每​一​期​都​講​以賽亞​嘅​話​所​指​嘅​係​真​基督徒。好​明顯,喺​嗰​幾​年​期間,耶和華​不斷​提醒​佢​嘅​僕人,要​執行​佢​交託​俾​佢哋​嘅​工作。點解​呢?係​為咗​等​佢哋“先​受​考驗”,睇​下​係咪​適合。(提摩太前書​3:10)聖經研究者​一​定​要​用​行動​證明​自己​真​係​為​耶和華​作​見證,然後​先至​有​資格​成為​上帝​名​下​嘅​子民。(路加福音​24:47,48

13. 聖經​點樣​將​至為​重要​嘅​真理​顯示​出嚟?

13 第​三,耶和華​嘅​子民​慢慢​明白​尊​上帝​嘅​名​為​聖​非常​重要。上​世紀​20​年代,佢哋​睇​出​上帝​嘅​名​彰顯​為​聖​比​乜嘢​都​重要。聖經​點樣​將​呢個​至為​重要​嘅​真理​顯示​出嚟​呢?請​睇​下​下面​兩​個​例子。上帝​救​以色列人​離開​埃及​嘅​主​要​原因​係​乜嘢​呢?耶和華​話:“使​我​嘅​名聲​傳遍​天下”。(出埃及記​9:16)以色列人​多​次​反叛​耶和華,點解​耶和華​依然​向​佢哋​大​顯​慈悲​呢?耶和華​講​明​原因:“我​唔​願​我​嘅​聖​名​被​毁謗”。(以西結書​20:8-10)聖經研究者​從​呢​兩​個​例子​同​其他​聖經​記載​學​到​乜嘢​呢?

14. (甲)到​咗​上​個​世紀​20​年代​末,上帝​嘅​子民​領悟​到​乜嘢?(乙)聖經研究者​深入​理解​呢​點​之後,對​傳道​工作​有​乜嘢​睇法​呢?(另​見​附欄“ 要​去​傳道​嘅​一​個​重要​原因”)

14 大約​2700​年​前,以賽亞​談及​耶和華,話:“佢​帶領​佢哋,使​自己​嘅​名​得​稱頌。”(以賽亞書​63:14)到​咗​上​個​世紀​20​年代​末,上帝​嘅​子民​先至​領悟​呢​句​話​嘅​含意。佢哋​明白​最​重要​嘅​係​尊​耶和華​嘅​名​為​聖,而​唔​係​自己​得​救。(以賽亞書​37:20;以西結書​38:23)1929​年​出版​嘅《預言》(英語)一​書​扼要​噉​指​出:“對​天地​衆生​嚟​講,耶和華​嘅​名​彰顯​為​聖​係​最​重要​嘅。”聖經研究者​明白​呢​點​之後,就​更加​努力​為​耶和華​作​見證,免得​佢​嘅​聖名​受​到​詆毁。

15. (甲)到​咗​上​個​世紀​30​年代,我哋​嘅​弟兄​對​乜嘢​事​有​咗​正確​嘅​睇法?(乙)時候​到​咗,耶和華​會​點樣​做​呢?

15 到​咗​上​世紀​30​年代​初,我哋​嘅​弟兄​對​上帝​嘅​名​嘅​重要性​已經​有​咗​正確​嘅​睇法,對​上帝​所​委派​嘅​工作​亦​都​有​咗​更​清晰​嘅​理解,而且​深刻​領悟​到​上帝​嘅​名​彰顯​為​聖​比​乜嘢​都​重要。而家,時候​到​嘞,耶和華​要​使​佢​嘅​僕人​稱​為​佢​名下​嘅​子民,呢個​係​莫大​嘅​殊榮!事情​嘅​經過​係​點樣​嘅​呢?等​我哋​嚟​回顧​一下​歷史。

 耶和華​選​出​一​群​歸​佢​名​下​嘅​子民

16. (甲)耶和華​點樣​彰顯​自己​嘅​名?(乙)古代​邊​一​群​人​最​先​成為​上帝​名下​嘅​子民?

16 耶和華​點樣​彰顯​自己​嘅​名​呢?一​個​重要​嘅​方法​係,揀選​一​群​人​歸於​佢​名下,做​佢​嘅​子民。從​公元前​1513​年​起,以色列​民族​就​代表​耶和華,佢哋​係​耶和華​嘅​子民。(以賽亞書​43:12)以色列人​雖然​同​上帝​立​咗​約,但係​冇​謹守​呢個​約。到​咗​公元​33​年,佢哋​失去​咗​同​上帝​嘅​寶貴​關係。冇幾耐,耶和華​轉而“眷顧​異邦人,由​佢哋​中​選召​人​嚟​歸​屬​自己[​名下​]”。(使徒行傳​15:14)呢​群​蒙​揀選​嘅​人​嚟自​唔​同​嘅​國族,全部​都​係​基督​嘅​受膏​門徒,稱​為“上帝​嘅​以色列”。(加拉太書​6:16,英語《聖經​新世界​譯本》)

17. 撒但​嘅​乜嘢​陰謀​得逞?

 17 公元​44​年​前​後,耶穌​嘅​門徒​蒙​上帝​指引​稱​為“基督徒”。(使徒行傳​11:26)一​開始,“基督徒”呢個​獨特​嘅​名稱,指​嘅​係​名副其實​嘅​基督徒。(彼得前書​4:16)但​就​好似​麥​同​稗​嘅​比喻​講​嘅​噉,撒但​企圖​以​假​亂​真,佢​嘅​陰謀​得逞,令​到“基督徒”呢個​名稱​亦​都​包括​埋​嗰啲​有名無實​嘅​基督徒。結果,有​千幾​年​嘅​時間,真​假​基督徒​好​難​分辨,直到​1914​年​收割​時期​開始​之後,呢​種​情況​先至​有​所​改變。點解​呢?因為​天使​開始​將​真​基督徒​同​假基督徒​分開。(馬太福音​13:30,39-41

18. 我哋​嘅​弟兄​點樣​睇​出​需要​一​個​新​名稱?

18 忠信​嘅​奴隸​喺​1919​年​受​主人​委派。之後,耶和華​幫助​佢​嘅​子民​明白,佢哋​受託​要​執行​嘅​任務​係​乜嘢。佢哋​開始​逐家逐户​傳道,好​快​就​睇​出​呢​件​工作​使​佢哋​同​有名無實​嘅​基督徒​區分​開嚟。過​咗​冇幾耐,佢哋​就​意識​到“聖經研究者”呢個​名稱​唔够​貼切,因為​佢哋​最​重要​嘅​工作​係​要​為​上帝​作​見證,尊崇​同埋​顯揚​上帝​嘅​名,而​唔​係​單單​研究​聖經。所以,乜嘢​名稱​先至​同​佢哋​所​做​嘅​工作​相符​呢?1931​年,答案​就​揭曉​嘞。

1931​年​大會​節目表

19,20. (甲)1931​年​嘅​大會​提​出​乜嘢​振奮​人心​嘅​決議?(乙)對於​新​名稱,我哋​嘅​弟兄​有​乜嘢​反應​呢?

19 1931​年​7​月,大約​有​1萬5000​個​聖經研究者​嚟​到​美國​俄亥俄州​嘅​哥倫布市​參加​大會,睇​到​節目表​嘅​封面​上面​印​住​兩​個​特别​大​嘅​英文​字母“JW”。呢個​係​乜嘢​意思​呢?大家​都​喺​度​估​呢​兩​個​字母​代表​乜嘢。7​月​26​日​星期日,盧述福​弟兄​向​在場​嘅​所有​人​提​出​決議,其中​有​句​話​噉​講:“我哋​決定​採用‘耶和華見證人’呢個​名稱,亦​都​希望​其他​人​用​呢個​名稱​嚟​稱呼​我哋。”全​場​聽衆​終於​明白,“JW”原來​就​係​代表“耶和華見證人”,呢個​名稱​取自​以賽亞書​43:10

20 聽衆​都​大聲​贊同​呢個​決議,跟住​全​場​掌聲​雷動,持續​不斷。通過​電台​廣播,喺​地球​另​一​邊​嘅​聖經研究者​亦​都​可以​感受​到​哥倫布​大會​嘅​熱烈​氣氛。喺​澳大利亞​嘅​歐内斯特·巴伯​同​太太​内奧米​回憶​話:“聽​到​美國​傳​過​嚟​嘅​熱烈​掌聲,墨爾本​嘅​弟兄​激動​到​跳​起嚟,亦​都​跟住​佢哋​不斷​鼓掌。當時​嘅​情景​真​係​令​我哋​畢生​難忘。” *

上帝​嘅​名​喺​全球​受​顯揚

21. 新​名稱​對​傳道​工作​起​咗​乜嘢​作​用?

21 上帝​嘅​僕人​採用​咗“耶和華見證人”呢個​取自​聖經​嘅​名稱,就​更加​落力​傳講​好消息。美國​一​對​先驅​夫婦​ 愛德華·格蘭姆斯​同​太太​潔西,參加​咗​1931​年​喺​哥倫布市​舉行​嘅​大會。佢哋​話:“我哋​去​參加​大會,出發​嗰陣​仲係​聖經研究者,返嚟​嗰時​就​已經​係​耶和華見證人​嘞。有​咗​呢個​名稱,我哋​就​更加​能够​顯揚​上帝​嘅​名,真​係​好​開心。”大會​之後,有啲​耶和華見證人​用​一​個​新​方法​嚟​宣揚​上帝​嘅​名。佢哋​探訪​住户​嗰時,遞​俾​對方​一​張​卡片,上面​寫​住:“我​係​個​耶和華見證人,嚟​宣揚​耶和華​上帝​嘅​王國。”上帝​嘅​子民​覺得​好​自豪,因為​佢哋​嘅​名稱​包含​上帝​嘅​名“耶和華”。佢哋​已經​準備​好​將​上帝​嘅​名​嘅​含意​傳遍​四方。(以賽亞書​12:4

“我哋​去​參加​大會,出發​嗰陣​仲係​聖經研究者,返嚟​嗰時​就​已經​係​耶和華見證人​嘞”

22. 有​乜嘢​可以​表明​耶和華​嘅​子民​具有​獨特​嘅​身份?

22 耶和華​指引​受膏​嘅​弟兄​採用“耶和華見證人”呢個​獨特​嘅​名稱,到​而家​已經​幾十​年​嘞。咁​多​年​嚟,撒但​企圖​令​人​認​唔​出​上帝​嘅​子民,佢​有​冇​成功​呢?撒但​亦​都​設法​令​我哋​同​世上​嘅​宗教​混​為​一體,佢​有​冇​得逞​呢?當然​冇。作​為​上帝​嘅​見證人,我哋​呢個​獨特​嘅​身份​比​以往​任何​時候​都​更加​鮮明。(請​讀​米迦書​4:5;馬拉基書​3:18我哋​嘅​身份​同​上帝​嘅​名​係​密不可分​嘅。今日​邊個​傳講​上帝​嘅​名,其他​人​就​好​快​可以​睇​出​佢​係​個​耶和華見證人。正確​嘅​宗教​已經​堅立,“超乎​諸​山”,冇​俾​好似​群山​一樣​嘅​各​種​錯誤​宗教​遮住。(以賽亞書​2:2)今日,耶和華​所​悦納​嘅​宗教​同​佢​嘅​聖名​確實​大​受​顯揚。

23. 詩篇​121:5​話​耶和華​會​點樣​做,令​我哋​深​受​鼓舞​呢?

23 無論​而家​定​係​將來,耶和華​都​會​保護​我哋,幫助​我哋​能够​抵抗​撒但​嘅​攻擊,知道​呢​一​點​幾​咁​令​人​鼓舞​咧!(詩篇​121:5)詩篇​執筆者​嘅​話​表達​咗​我哋​嘅​心聲,佢​話:“尊​耶和華​為​上帝​嘅​國​有​福!佢​揀選​嚟​歸​屬​自己​嘅​人民​有​福!”(詩篇​33:12

^ 20段 關於​用​電台​傳播​聖經​真理,詳見 第​7​章​72-74​頁。