跳到內容

跳到副菜單

跳到目錄

上帝嘅王國統治嘞!

 第​3​章

耶和華透露佢嘅旨意

耶和華透露佢嘅旨意

本​章​概要

耶和華​逐步​透露​佢​嘅​旨意, 不過​淨係​俾​敬畏​佢​嘅​人​知道

1,2. 耶和華​點樣​透露​佢​對​人類​嘅​旨意?

仁愛​嘅​父母​商量​家事​嘅​時候,會​俾​仔女​加入​討論。至於​同​仔女​講​幾​多,父母​自有分寸。佢哋​淨係​會​講​一啲​仔女​可以​明白​嘅​細節。

2 同樣,耶和華​逐步​透露​佢​對​人類​家庭​嘅​旨意,不過​只​係​會​喺​適當​嘅​時候​噉樣​做。等​我哋​回顧​下​歷史,睇睇​耶和華​點樣​將​佢​王國​嘅​真理​揭示​出嚟。

點解​需要​上帝​嘅​王國

3,4. 耶和華​有​冇​預定​人類​嘅​歷史​點樣​發展?請​解釋。

3 建立​彌賽亞​王國​本嚟​唔​係​耶和華​嘅​旨意。點解​噉​講​呢?因為​耶和華​冇​預定​人類​嘅​歷史​應該​點樣​發展。佢​創造​人類​嘅​時候,賜​俾​人​選擇​嘅​自由。上帝​話​俾​亞當​同​夏娃​知,佢​嘅​旨意​係​要​人“生養​衆多,遍滿​地面,管理​大地”。(創世記​1:28)耶和華​仲​要​求​佢哋​遵守​佢​所​定​嘅​善惡​標準。(創世記​2:16,17)亞當​同​夏娃​本嚟​可以​選擇​服從​上帝。如果​佢哋​同​子孫​後代​都​噉樣​做​嘅​話,今日​成​個​地球​都​會​係​完美​嘅​人,齊心​一致​噉​崇拜​耶和華。我哋​原本​係​唔​需要​基督​所​統治​嘅​王國​嚟​實現​上帝​旨意​嘅。

4 即使​撒但、亞當​同​夏娃​叛逆​不忠,但係​耶和華​都​冇​改變​原定​嘅​旨意,佢​依然​定意​要​完美​嘅​人​遍滿​大地,四海一家。為咗​實現​自己​嘅​旨意,耶和華​可以​靈活變通。火車​一​定​要​喺​固定​嘅​軌道​上面​行駛​先至​可以​到達​目的地,一旦​遇​到​突發​情況​仲​可能​發生​脱軌。但​耶和華​就​唔​同​嘞,佢​講​過​要​做​嘅​事,一​定​會​成功,宇宙​當中​冇​任何​勢力​可以​阻止​佢​實現​自己​嘅​旨意。(請​讀​以賽亞書​55:11如果​一​條​路​唔​通,耶和華​就​會​用​另​一​條。 *出埃及記​3:14,15)喺​適當​嘅 時候,耶和華​亦​都​會​俾​忠心​嘅​僕人​知道,佢​改用​乜嘢​方法​實現​自己​嘅​旨意。

5. 伊甸園​嘅​反叛​事件​發生​之後,耶和華​點樣​做​呢?

5 伊甸園​嘅​反叛​事件​發生​咗​之後,耶和華​先至​定意​要​建立​一​個​由​彌賽亞​統治​嘅​王國。(馬太福音​25:34)喺​人類​冇​晒​希望​嘅​時候,耶和華​就​透露​咗​佢​會​用​乜嘢​方法​挫敗​撒但​奪權​嘅​陰謀,消除​撒但​造​成​嘅​傷害,俾​人類​恢復​完美。(創世記​3:14-19)不過,耶和華​冇​一下子​披露​晒​所有​同​呢個​王國​有關​嘅​細節。

耶和華​開始​揭示​同​王國​有關​嘅​真理

6. (甲)耶和華​應許​咗​乜嘢​呢?(乙)但​佢​冇​透露​乜嘢?

6 耶和華​喺​佢​講​嘅​第​一​個​預言​裏面,應許​會​有​一​個“後代”打碎​蛇​嘅​頭。(請​讀​創世記​3:15當時,耶和華​冇​透露​呢個​後代​同​蛇​嘅​後代​分别​係​邊個。耶和華​講​咗​呢個​預言​之後,有​差唔多​兩千​年​嘅​時間,冇​進一步​透露​其他​嘅​細節。 *

7. (甲)耶和華​點解​揀選​亞伯拉罕?(乙)我哋​從​呢​件​事​學​到​乜嘢?

7 後嚟,耶和華​揀選​咗​亞伯拉罕,而且​應許“後代”會​出自​佢​嘅​世系。亞伯拉罕​蒙​耶和華​揀選,係​因為​佢​聽從​耶和華​嘅​話。(創世記​22:18)我哋​從​呢​件​事​學​到​乜嘢​呢?耶和華​淨係​向​敬畏​佢​嘅​人​透露​佢​嘅​旨意。(請​讀​詩篇​25:14

8,9. 關於​預言​提​到​嘅​後代,耶和華​向​亞伯拉罕​同​雅各​透露​咗​乜嘢?

8 耶和華​通過​天使​向​佢​嘅​朋友​亞伯拉罕​講話,第​一​次​透露​咗​佢​應許​嘅“後代”會​係​人類。(創世記​22:15-17;雅各書​2:23)呢個“後代”會​點樣​打碎​蛇​嘅​頭​呢?蛇​指​嘅​係​邊個​呢?請​留意​耶和華​進一步​透露​嘅​細節。

9 耶和華​決定,“後代”會​出自​亞伯拉罕​嘅​孫​雅各​嘅​家族,因為​雅各​對​上帝​顯​出​好​大​嘅​信心。(創世記​28:13-22)耶和華​通過​雅各​預告,應許​嘅“後代”會​係​雅各​嘅​仔​猶大​嘅​後代,呢個​後代​會​得到​王權,“萬民​要​向​佢​跪拜”。(創世記​49:1,10)耶和華​通過​雅各​所​講​嘅​呢​句​話,表明“後代”會​成為​君王,統治​萬民。

10,11. 耶和華​點解​向​大衛​同​但以理​透露​佢​嘅​旨意?

10 猶大​去世​之後​大約​650​年,耶和華​向​猶大​嘅​後代​大衛​王​進一步​透露​自己​嘅​旨意。耶和華​話​大衛​係​一​個“合​佢​心意​嘅​人”。(撒母耳記上​13:14;17:12;使徒行傳​13:22)由於​大衛​有​敬畏​上帝​嘅​心,耶和華​決定​同​佢​立約,承諾​佢​嘅​一​個​後代​會​永遠​作​王。(撒母耳記下​7:8,12-16

11 大約​500​年​之後,耶和華​通過​先知​但以理​披露​ 彌賽亞(受膏者)喺​地上​出現​嘅​確切​年份。(但以理書​9:25)喺​耶和華​眼​中,但以理​係​佢“喜愛”嘅。點解​呢?因為​但以理​深深​尊崇​耶和華,而且​恆心​事奉​佢。(但以理書​6:16;9:22,23

12. 天使​吩咐​但以理​點樣​做?點解​呢?

12 雖然​耶和華​啟示​但以理​同​其他​先知​寫​低​好多​同“後代”(彌賽亞)有關​嘅​細節,但係​呢啲​忠僕​唔​能够​完全​領悟​其中​嘅​含意,因為​耶和華​所​定​嘅​時間​仲​未​到。舉​個​例子,但以理​睇​到​一​個​異象,同​上帝​王國​嘅​建立​有關。天使​吩咐​佢​要​用​印​封​住​自己​所​寫​嘅​預言,直至​耶和華​指定​嘅​時期​嚟​到。嗰時,“真確​嘅​知識​就​會​豐富​起嚟”。(但以理書​12:4,英語《聖經​新世界​譯本》)

耶和華​任用​但以理​等​忠僕​將​關於​彌賽亞​王國​嘅​細節​記錄​落嚟

耶穌​向​人​透露​上帝​嘅​旨意

13. (甲)邊個​係​上帝​應許​嘅​後代?(乙)耶穌​點樣​幫助​人​明白​創世記​3:15​記載​嘅​預言?

13 上帝​清楚​表明,大衛​嘅​後代​耶穌​就​係​上帝​應許​嘅​後代,佢​會​永遠​作​王。(路加福音​1:30-33;3:21,22)耶穌​開始​傳道,幫助​人​認識​上帝​嘅​旨意,就​好似​太陽​升起,照亮​咗​嗰啲​處於​屬靈​黑暗​嘅​人​噉樣。(馬太福音​4:13-17)例如,當時​嘅​人​唔​清楚​創世記​3:14,15​提​到​嘅“蛇”係​指​邊個。耶穌​解開​咗​呢個​謎,佢​話​魔鬼​從​最初​就​係“謀殺”人​嘅​兇手,亦​都​係“虚謊​嘅​根源”。(約翰福音​8:44)後嚟,耶穌​向​約翰​傳達​上帝​嘅​啟示,指​出“古蛇,叫​做​魔鬼​又​叫​撒但”。 *(請​讀​啟示錄​1:1;12:9耶穌​喺​同​一​個​啟示​裏面​亦​都​表明,身​為​上帝​應許​嘅​後代,佢​最終​會​點樣​鏟除​撒但,實現​上帝​喺​伊甸園​講​嘅​預言。(啟示錄​20:7-10

14-16. 公元​1​世紀,耶穌​向​門徒​講解​真理,門徒​係咪​總​係​能够​完全​領悟​其中​嘅​含意​呢?請​解釋。

14 呢​本​書第​1​章講​過,耶穌​經常​向​人​談論​上帝​嘅​王國。不過,耶穌​唔​一​定​將​門徒​想​知道​嘅​細節​全部​話​俾​佢哋​知。耶穌​講解​真理,就算​講​得​好​具體​好​詳細,門徒​通常​要​到​後嚟,有時​甚至​到​千幾​年​之後,先至​可以​完全​領悟​其中​嘅​含意。請​睇睇​下面​一啲​例子。

15 公元​33​年,耶穌​清楚​表明,上帝​會​從​地上​揀選​一啲​人​同​王國​嘅​君王​一齊​統治,蒙​揀選​嘅​人​死​咗​之後​會​復活​到​天上​成為​靈體。當時​門徒​仲​未​可以​領悟​耶穌​呢​番​話​嘅​意思。(但以理書​7:18;約翰福音​14:2-5)喺​同​一​年,耶穌​用​比喻​講​明,佢​升天​之後,仲​要​等​一​段​好​長​嘅​時間,上帝​嘅​王國​先至​會​建立。(馬太福音​25:14,19;路加福音​19:11,12)門徒​亦​都​唔​明白​呢​一​點。點解​噉​講​呢?因為​耶穌​復活​之後, 門徒​嚟​問​佢:“主​呀,你​係​唔​係​喺​此時​恢復​以色列國​嘅​主權?”當時​耶穌​冇​進一步​透露​任何​細節。(使徒行傳​1:6,7)耶穌​曾經​教導​門徒,佢​仲​有“其他​嘅​羊”,呢啲“羊”唔​屬於“小群[羊]”,所以​唔​會​同​佢​一齊​作​王。(約翰福音​10:16;路加福音​12:32)基督​嘅​門徒​要​到​上帝​嘅​王國​喺​1914​年​建立​之後​好多​年,先​可以​確切​噉​理解“小群[羊]”同“其他​嘅​羊”分别​指​邊啲​人。

16 耶穌​喺​地上​嗰時,其實​有​好多​事​要​話​俾​門徒​知,但​佢​冇​噉樣​做,因為​知道​當時​門徒​承擔​唔​嚟。(約翰福音​16:12)的確,耶穌​教導​門徒​認識​咗​唔​少​同​王國​有關​嘅​真理,但​喺​公元​1​世紀,關於​上帝​王國​嘅​知識​仲​未​豐富​起嚟。

真確​嘅​知識​會​喺​終結​時期​豐富​起嚟

17. (甲)為咗​明白​上帝​王國​嘅​真理,我哋​應該​點樣​做?(乙)我哋​仲​需要​邊個​嘅​幫助​呢?

17 耶和華​話​俾​但以理​知,喺“終結​嘅​時期”有​好多​人“來往​奔走”,“真確​嘅​知識”會​豐富​起嚟,人​就​可以​深入​認識​上帝​嘅​旨意。(但以理書​12:4,英語《聖經​新世界​譯本》)邊個​想​得到​呢啲​知識,就​要​落​一​番​功夫。一​本​參考書​指​出,譯​做“來往​奔走”嘅​希伯來語​動詞,有“從​頭​到​尾​仔細​查考”嘅​意思。但​唔​好​忘記,如果​唔​係​耶和華​提供​幫助,無論​我哋​幾​咁​仔細​查考​聖經,都​唔​能够​確切​理解​上帝​王國​嘅​真理。(請​讀​馬太福音​13:11

18. 點解​話,敬畏​耶和華​嘅​人​既​有​信心,又​好​謙卑​呢?

18 1914​年​之前,耶和華​逐步​向​人​揭示​佢​王國​嘅​真理。 喺​呢個​制度​嘅​終結​時期,佢​依然​噉樣​做。呢​本​書第​4第​5​章會​講​下,過去​一百​年​期間,上帝​嘅​子民​唔止​一​次​修正​咗​佢哋​對​王國​真理​嘅​理解。噉​係​唔​係​話,佢哋​冇​耶和華​嘅​支持​呢?唔​係,耶和華​一直​喺​背後​支持​佢哋。點解​噉樣​講​呢?因為​敬畏​耶和華​嘅​人​既​有​信心,又​好​謙卑,而​信心​同​謙卑​都​係​耶和華​鍾意​嘅​特質。(希伯來書​11:6;雅各書​4:6)耶和華​嘅​僕人​對​聖經​嘅​應許​有​信心,佢哋​相信​呢啲​應許​全部​都​會​實現。關於​聖經​嘅​應許​點樣​實現,當​佢哋​睇​出​自己​誤解​咗,就​會​謙卑​噉​承認​錯誤,就​好似​英語版《守望台》1925​年​3​月​1​日​刊​所​講:“我哋​知道,主​嘅​話語,主​自己​會​解釋。喺​指定​嘅​時候,主​會​用​最好​嘅​方式​向​佢​子民​清楚​解釋​佢​嘅​話語。”

“喺​指定​嘅​時候,主​會​用​最好​嘅​方式​向​佢​子民​清楚​解釋​佢​嘅​話語”

19. 今日,耶和華​令​佢​子民​對​佢​嘅​旨意​有​點樣​嘅​理解?點解​呢?

19 上帝​嘅​王國​喺​1914​年​建立,當時​上帝​子民​對於​王國​嘅​預言​點樣​應驗​只​有​片面​嘅​理解。(哥林多前書​13:9,10,12)由於​好​想​睇見​上帝​嘅​應許​實現,有時​上帝​嘅​子民​作出​咗​錯誤​嘅​結論。上​一​段​提​到​嘅《守望台》亦​都​話:“要​明白​預言​嘅​含意,睇嚟​最​保險​嘅​做法​係​等​到​預言​應驗​咗​或者​喺​度​應驗​緊​嘅​時候。”時間​證明​噉樣​做​係​明智​嘅。目前​嘅​制度​好​快​就​會​結束,關於​上帝​王國​嘅​預言,好多​已經​應驗​或​正​喺​度​應驗​緊​嘞。上帝​嘅​子民​有​謙卑​嘅​心,甘願​受​耶和華​糾正。所以,耶和華​就​令​佢哋​更​全面​噉​理解​佢​嘅​旨意。真確​嘅​知識​確實​豐富​起嚟。

 新​嘅​理解​為​上帝​嘅​子民​帶​嚟​考驗

20,21. 對於​新​嘅​理解,公元​1​世紀​嘅​基督徒​有​乜嘢​反應?

20 每​當​耶和華​幫助​我哋​對​真理​有​更​清晰​嘅​理解,我哋​嘅​内心​情況​就​會​顯露​出嚟。如果​我哋​對​上帝​有​信心,為人​謙卑,就​會​樂意​接受​新​嘅​理解。公元​1​世紀​中期,基督徒​面對​過​噉樣​嘅​考驗。想象​一​下,假如​你​係​嗰個​時代​嘅​猶太人,已經​歸信​基督,但​仲係​深深​尊重​摩西​律法,將​佢​睇​成​係​猶太​民族​嘅​驕傲。有​一​日,會衆​讀​出​使徒​保羅​喺​聖靈​啟示​下​寫​嘅​信。信​嘅​内容​係,摩西​律法​廢除​咗​嘞,耶和華​已經​捨棄​以色列​血統​嘅​人,轉而​恩待​屬靈​嘅​以色列,當中​有​猶太人​亦​都​有​外邦人。(羅馬書​10:12;11:17-24;加拉太書​6:15,16;歌羅西書​2:13,14)你​聽​到​呢啲​信​嘅​内容,會​有​乜嘢​反應​呢?

21 有啲​基督徒​謙卑​噉​聽從​保羅​嘅​勸告,結果​蒙​耶和華​賜​福。(使徒行傳​13:48)但​有啲​人​就​固執己見,點​都​唔​願意​接受​新​嘅​理解。(加拉太書​5:7-12)如果​佢哋​唔​肯​改變​自己​嘅​睇法,就​會​失去​同​基督​一齊​做​王​嘅​機會。(彼得後書​2:1

22. 上帝​幫​我哋​更​清晰​噉​理解​佢​嘅​旨意,對於​呢​一​點​你​有​乜嘢​感覺?

22 近​幾十​年​嚟,耶和華​亦​都​幫助​我哋​更​清晰​噉​理解​佢​嘅​王國。例如​話,佢​幫​我哋​更​清楚​噉​睇​出,基督​會​喺​幾時​將​上帝​王國​嘅​子民​同​嗰啲​唔​肯​聽從​真理​嘅​人​分開,就​好似​牧人​將​綿羊​山羊​分開​一樣。耶和華​仲​幫​我哋​明白​以​下​真理:14萬4000​人​會​喺​幾時​全部​召集​起嚟;關於​上帝​嘅​王國,耶穌​所​講​嘅​比喻​有​乜嘢​含意;仲​喺​地上​嘅​受膏基督徒​會​喺​幾時​被​接​到​去​天上。 *耶和華​幫​我哋​更​清晰​噉​理解​呢啲​真理,對於​呢​一​點​你​有​乜嘢​感覺​呢?你​嘅​信心​係​唔​係​增强​咗​呢?新​嘅​理解​唔​係​證明​咗​耶和華​一直​喺​度​教導​佢​謙卑​嘅​子民​咩?你​繼續​讀​呢​本​書,就​會​更加​相信,耶和華​正​喺​度​向​敬畏​佢​嘅​人​逐步​透露​佢​嘅​旨意。

^ 4段 上帝​嘅​名​係​希伯來語​動詞“成為”嘅​某​種​形態。 耶和華​呢個​名​嘅​意思​係, 佢​一定​會​實現​自己​嘅​應許。 見​呢​本​書​43​頁​附欄“上帝​名字​嘅​含意”。

^ 6段 喺​今日​睇嚟, 兩千​年​顯​得​好​長, 但係​要​記得, 喺​人類​歷史​嘅​初期, 人​嘅​壽命​長​好多。 亞當​仲​在生, 挪亞​嘅​父親​拉麥​就​已經​出世; 拉麥​仲​在生, 挪亞​嘅​仔​閃​就​已經​出世; 閃​仲​在生, 亞伯拉罕​就​已經​出世。 淨係​亞當、拉麥、 閃​同​亞伯拉罕​呢​四​個​人​嘅​生活​時期​銜接​起嚟, 就​已經​覆蓋​咗​將​近​兩千​年​嘅​時間。(創世記​5: 5,30-31; 9:29; 11:10,11;25:7-8

^ 13段 專指​上帝​嗰個​大​仇敵​嘅​詞“撒但”, 喺《希伯來語​經卷》出現​咗​18​次, 喺《希臘語​經卷》出現​咗​超過​30​次。 《希伯來語​經卷》嘅​重點​係​幫助​人​認​出​邊個​係​彌賽亞, 好少​提​到​撒但。 彌賽亞​嚟​到​之後, 將​撒但​嘅​所作所為​揭露​無遺, 呢​一切​都​記錄​喺《希臘語​經卷》裏面。

^ 22段 喺​理解​呢啲​真理​方面,想​知道​上帝​嘅​組織​做​咗​乜嘢​修正, 見 《守望台》1995​年​10​月​15​日​刊​23-28​頁; 2008​年​1​月​15​日​刊​20-24​頁; 2008​年​7​月​15​日​刊​17-21​頁; 2013​年​7​月​15​日​刊​9-14​頁