跳到內容

跳到副菜單

跳到目錄

上帝嘅王國統治嘞!

 第​7​章

傳道嘅方法——盡一切可能將好消息傳俾人

傳道嘅方法——盡一切可能將好消息傳俾人

本​章​概要

上帝​嘅​子民​用​唔​同​嘅​方法​傳道,盡量​接觸​更​多​人

1,2. (甲)耶穌​用​乜嘢​方法​令​群衆​清楚​聽​到​佢​嘅​話?(乙)忠心​嘅​基督徒​點樣​效法​佢哋​嘅​主?目的​係​乜嘢?

民衆​聚集​喺​岸​邊,圍​住​耶穌。但係,耶穌​上​咗​一​隻​船,船​划​離​咗​岸​邊。佢​點解​要​噉樣​做​呢?因為​佢​知道​喺​船​上​講​話,聲音​通過​水面​可以​放​大,岸​上​嘅​群衆​就​會​聽​得​更加​清楚。(請​讀​馬可福音​4:1,2

2 上帝​王國​建立​前後​嘅​幾十​年間,忠心​嘅​基督徒​已經​效法​佢哋​嘅​主,用​新​方法​將​上帝​王國​嘅​好消息​傳​俾​更​多​嘅​人。喺​君王​基督​嘅​指導​之下,上帝​嘅​子民​繼續​嘗試​用​唔​同​嘅​方法​傳道。佢哋​靈活​變通,善用​新​科技,趁​末日​仲​未​嚟​到,盡量​接觸​更​多​嘅​人。(馬太福音​24:14)無論​人​住​喺​邊度,上帝​嘅​子民​都​會​想方設法​將​王國​信息​傳​俾​佢哋。下文​會​講​吓,上帝​嘅​子民​用​嘅​幾​個​方法。不妨​一邊​睇,一邊​諗​吓​自己​可以​點樣​向​早期​傳講​好消息​嘅​人​學習,效法​佢哋​嘅​信心。

令​更​多​人​認識​王國

3. 上帝​嘅​子民​通過​報章​傳播​王國​真理,點解​令​敵視​真理​嘅​人​大​受​挫折​呢?

3 通過​報章 羅素​弟兄​同​佢​嘅​同工​從​1879​年​開始​出版《守望台》,將​王國​嘅​信息​傳播​俾​好多​人。不過,1914​年​之前​大約​十​年,有​一連串​嘅​事​發生​咗。睇嚟,基督​指引​事態​嘅​發展,令​更​多​人​認識​到​上帝​王國​嘅​好消息。先​從​1903​年​講​起。嗰​一​年,伊頓​博士​代表​美國​賓夕法尼亞州​基督新教​嘅​一​群​牧師​發言,就​某​啲​教義​嘅​聖經​根據,一​次​又​一​次​噉​要求​羅素​弟兄​同​佢​辯論。伊頓​寫​信​俾​羅素​話:“喺​一啲​問題​上,你​同​我​之​間​有​嚴重​嘅​分歧。……我​希望​同​你​公開​辯論,相信​公衆​亦​都​好​想​知道​呢啲​問題​嘅​答案。”羅素​同​佢​嘅​同工​都​認為​公衆​會​對​呢啲​問題​感​興趣,於是​安排​喺​一​份 主流​報紙——《匹兹堡​新聞報》上面​登載​辯論​嘅​内容。文章​見報​之後​深​受​讀者​歡迎,因為​羅素​對​聖經​真理​嘅​解釋​非常​清晰,令​人​信服。結果,《匹兹堡​新聞報》主動​揾​羅素,話​每​個​星期​都​可以​刊登​佢​嘅​演講。呢個​真​係​令​敵視​真理​嘅​人​大​受​挫折!

到​1914​年,超過​2000​份​唔​同​嘅​報紙​刊登​咗​羅素​嘅​傳道​演講

4,5. (甲)羅素​表現​出​乜嘢​特質?(乙)肩負​職責​嘅​弟兄​可以​點樣​效法​佢?

4 冇幾耐,有​多​份​報紙​都​想​刊登​羅素​嘅​演講。1908​年,英語版《守望台》指​出,“有​11​份​報紙​經常”將​羅素​嘅​傳道​演講​登​出嚟。有啲​對​報業​比較​在行​嘅​弟兄​向​羅素​建議,如果​將​守望台​辦事處​從​匹兹堡​搬​到​大​城市,可能​會​有​更​多​報紙​願意​刊登​以​聖經​為​題材​嘅​文章。羅素​考慮​咗​佢哋​嘅​建議,衡量​過​其他​因素​之後,喺​1909​年​將​辦事處​搬​到​紐約市​布魯克林區。結果​點樣​呢?搬遷​之後​短短​幾​個​月,就​有​400​份​唔​同​嘅​報紙​刊登​羅素​嘅​演講,仲​有​越​嚟​越​多​嘅​報紙​都​噉樣​做。到​上帝​嘅​王國​喺​1914​年​建立​嗰時,羅素​嘅​文章​同​傳道​演講​分别​用​4​種​語言,喺​2000​幾​份​唔​同​嘅​報紙​上面​刊登​出嚟。

5 回顧​呢​段​歷史,我哋​從​中​學​到​乜嘢​呢?今日,喺​上帝​嘅​組織​裏面,肩負​職責​嘅​弟兄​應該​好似​羅素​弟兄​噉樣​謙卑​自抑。喺​邊​方面​要​謙卑​呢?就​係​做​重大​決定​之前,要​考慮​其他​人​嘅​意見。(請​讀​箴言​15:22

6. 請​舉​例​説明​報紙​上​談論​王國​真理​嘅​文章​點樣​改變​人​嘅​一生。

6 報紙​上面​談論​王國​真理​嘅​文章​改變​咗​好多​人​嘅​一生。(希伯來書​4:12)1917​年​受浸​嘅​奧拉​·​赫策爾​就​係​通過​報紙​上面​嘅​文章​認識​真理​嘅。奧拉​話:“我​結婚​之後,有​一​次​返​到​明尼蘇達州​嘅​羅切斯特​探​我​媽媽,啱啱​返​到​屋企​就​睇見​媽媽​喺​度​將​報紙​嘅​一​啲​文章​剪​落嚟,原來​係​羅素​嘅​傳道​演講。媽媽​話​俾​我​知,佢​喺​文章​裏面​學​到​好多​嘢。”奧拉​睇​出​剪報​上面​講​嘅​係​真理,之後​嘅​六十​年,佢​一直​忠心​宣揚​上帝​嘅​王國。

7. 點解​帶頭​嘅​弟兄​重新​衡量​用​報章​傳播​真理​呢個​方法?

7 1916​年​發生​咗​兩​件​大事,促使​帶頭​嘅​弟兄​重新​衡量​要​唔​要​繼續​用​報章​傳播​上帝​王國​嘅​好消息。第​一,當時​大戰​進行​得​好​激烈,印刷​材料​非常​短缺。1916​年,英國​分部​報社​聯絡處​嘅​一​份​報告​話:“目前​只​有​30幾​份​報紙​刊登​羅素​弟兄​嘅​傳道​演講。由於​紙張​嘅​價格​暴漲,呢個​數目​好​可 能​會​大​幅度​下降。”第​二,羅素​弟兄​喺​1916​年​10​月​31​日​去世。英語版《守望台》1916​年​12​月​15​日​刊​宣布:“既然​羅素​弟兄​已經​唔​喺​度,傳道​演講​亦​都​唔​會​再​喺​報紙​上面​刊登​嘞。”雖然​上帝​嘅​組織​唔​再​借助​報章​傳播​王國​嘅​好消息,但​會​繼續​採用​其他​方法​宣揚​真理,例如​播放《創世影劇》。呢啲​方法​都​同樣​係​卓有成效​嘅。

8. 製作《創世影劇》要​花費​幾多​工夫?

8 通過​影片 羅素​同​佢​嘅​同工​用​咗​三​年​時間​製作​嘅《創世影劇》,終於​喺​1914​年​面世​嘞。(箴言​21:5)《創世影劇》結合​咗​影片​同​彩色​幻燈片,而且​配​埋​聲音,非常​有​創意。佢哋​將​聖經​裏面​唔​同​嘅​故事​拍​成​影片,前後​有​幾百​人​參與 演出,連​動物​亦​都​有​份。1913​年​嘅​一​份​報告​話:“為咗​將​挪亞​嘅​故事​製作​成​有​聲​電影,有​間​大型​動物園​嘅​大部分​動物​都​上​咗​銀幕。”至於​另外​嘅​幾百​張​幻燈片,係​由​倫敦、巴黎、紐約​同​費城​嘅​畫家​逐一​油​上​顔色​嘅。

9. 點解​要​用​咁​多​時間​同​金錢​製作《創世影劇》呢?

9 點解​要​用​咁​多​時間​同​金錢​製作《創世影劇》呢?喺​1913​年​舉行​嘅​一連串​大會​當中,參加​嘅​人​通過​咗​以​下​決議:“美國​報章​利用​漫畫、圖片​嚟​影響​公衆​嘅​話題​同​關注點,得到​前所未有​嘅​成功,播放​影片​呢​種​方法​非常​靈活,而且​深​受​觀衆​歡迎,顯示​呢啲​工具​大​有​價值。我哋​作​為​傳道員​同​聖經​研究班​導師,應該​要​與​時​並進。我哋​毫無​保留​噉​贊成​採用​呢啲​方法,而且​我哋​深信,用​影片​同​幻燈片​嚟​傳播​福音​同埋​教​人​聖經​係​非常​有效​嘅。”

上圖:《創世影劇》嘅​放映室;下圖:《創世影劇》嘅​幻燈片

10. 播放《創世影劇》嘅​地區​有​幾​廣泛?

10 1914​年,《創世影劇》每​日​喺​80​個​城市​播放。喺​美國​同​加拿大,差唔多​有​八百萬​人​睇​過​呢​部​影劇。同​一​年,《創世影劇》亦​都​喺​英國、丹麥、芬蘭、德國、挪威、瑞典、瑞士、新西蘭​同埋​澳大利亞​放映。 上帝​嘅​組織​仲​為《創世影劇》製作​咗​一​個​簡化版,喺​小鎮​度​播放。呢個​版本​稱​為《尤里卡​影劇》,只​有​幻燈片,唔​包含​影片,製作費​比較​低,運送​起嚟​亦​都​比較​容易。到​咗​1916​年,無論​係《創世影劇》定​係《尤里卡​影劇》,都​已經​被​譯​成​法語、德語、希臘語、波蘭語、瑞典語、意大利語、西班牙語、亞美尼亞語​同埋​丹麥​-​挪威語。

1914​年,播映《創世影劇》嘅​會堂​逼​滿​晒​觀衆

11,12. (甲)一​個​年輕​男子​睇​過《創世影劇》之後,有​乜嘢​感受?(乙)我哋​可以​點樣​向​佢​學習​呢?

11 18​歲​嘅​夏爾​·​羅納​睇​過​法語版​嘅《創世影劇》之後,深​受​感動,印象​難忘。夏爾​話:“呢​部​影劇​喺​我​家鄉​法國​阿爾薩斯省​嘅​科爾馬鎮​播放。影劇​清楚​解釋​聖經​嘅​真理,一​開始​就​打動​咗​我。”

12 夏爾​後嚟​受​咗​浸,仲​喺​1922​年​投身​先驅​工作。佢​起初​嘅​一​個​任務​就​係​喺​法國​播放《創世影劇》。提​到​呢個​任務,夏爾​話:“我​一​個​人​兼​做​幾​樣​工作:拉​小提琴,做​會計​同埋​管理​書籍。節目​開始​之前,我​仲​負責​請​觀衆​安靜。中場​休息​嗰時,我哋​就​分發​書刊。我哋​將​會堂​分​成​唔​同​嘅​區,每​個​區​都​由​一​個​弟兄​或者​姊妹​負責。呢啲​弟兄​姊妹​雙手​捧​滿​住​書,逐一​向​區​内​嘅​觀衆​分發。另外,我哋​喺​會堂​入口 ​都​擺​咗​啲​檯,上面​放​滿​書刊。”1925​年,夏爾​獲得​邀請,到​美國​紐約市​布魯克林​嘅​伯特利​服務。嗰時,WBBR​電台​啱啱​成立,夏爾​受​到​委派,喺​電台​管弦樂團​做​指揮。睇​過​羅納​弟兄​嘅​經歷​之後,不妨​問​吓​自己:“為咗​將​上帝​王國​嘅​信息​傳​開去,我​願​唔​願意​接受​上帝​嘅​組織​委派​嘅​任何​工作​呢?”(請​讀​以賽亞書​6:8

13,14. 上帝​嘅​組織​點樣​運用​電台​傳播​王國​嘅​好消息?(另​見​附欄“ WBBR​電台​嘅​節目”“ 一​個​劃時代​嘅​大會”)

13 通過​電台 到​咗​上​世紀​20​年代,《創世影劇》嘅​放映​次數​越​嚟​越​少。隨​住​電台​廣播​越​嚟​越​流​行,上帝​嘅​組織​開始​用​電台​傳播​王國​嘅​好消息。1922​年​4​月​16​日,喺​美國​賓夕法尼亞州​費城​嘅​大都會​歌劇院,盧述福​弟兄​用​無線電​廣播​佢​嘅​演講,題目​係“現今​活着​嘅​千百萬​人​將​永遠​唔​會​死”,收聽​廣播​嘅​人數​估計​有​五萬。 1923​年,大會​嘅​部分​節目​首次​通過​電台​播放​出去。 除咗​運用​商營​電台​之外,帶頭​嘅​弟兄​仲​決定​建立​自己​嘅​無線​電台,第​一​個​電台​設立​喺​美國​紐約市​嘅​斯塔滕島,註册​為​WBBR​電台,喺​1924​年​2​月​24​日​啟播。

1922​年,“現今​活着​嘅​千百萬​人​將​永遠​唔​會​死”呢個​演講​通過​無線電​廣播​出去,收聽​嘅​人數​估計​有​五萬

14 英語版《守望台》1924​年​12​月​1​日​刊​指​出​開辦​WBBR​電台​嘅​目的:“至今​用​嚟​傳播​真理​嘅​方法​當中,我哋​相信​最​經濟、最​有效​嘅​就​係​電台​廣播​嘞。”文章​又​話:“如果​主​認為​開辦​其他​電台​可以​促進​真理​嘅​傳播,自然​會​提供​需要​嘅​資金。”(詩篇​127:1) 到​咗​1926​年,耶和華​嘅​子民​已經​擁有​六​個​無線​電台,兩​個​設立​喺​美國,就​係​紐約​嘅​WBBR​電台​同​芝加哥​附近​嘅​WORD​電台。其餘​四​個​電台​設立​喺​加拿大​嘅​艾伯塔省、安大略省、薩斯喀徹温省、不列顛哥倫比亞省。

15,16. (甲)對於​我哋​用​電台​傳播​聖經​真理,加拿大​嘅​教士​有​乜嘢​反應?(乙)電台​廣播​嘅​聖經​演講​同​逐家逐户​嘅​傳道​工作​點樣​相輔相成?

15 上帝​嘅​子民​通過​電台​將​聖經​真理​廣泛​噉​傳播​開去,教會​啲​教士​又​點會​注意​唔​到​呢?艾伯特​·​霍夫曼​熟悉​加拿大​薩斯喀徹温省​電台​嘅​操作,佢​話:“越​嚟​越​多​人​認識​聖經研究者(而家​叫​做​耶和華見證人)。通過​電台​廣播,我哋​為​聖經​真理​作​咗​美好​嘅​見證,直到​1928​年​啲​教士​向​政府​當局​施壓​為止。結果,聖經研究者​喺​加拿大​持有​嘅​全部​電台​執照​都​俾​政府​收翻。”

16 雖然​上帝​嘅​組織​喺​加拿大​嘅​電台​全部​都​關閉​咗,但 聖經​演講​繼續​通過​商營​電台​播放​出​去。(馬太福音​10:23)為咗​提高​電台​節目​嘅​收聽率,令​更​多​人​得益,《守望台》同《黃金時代》(而家​叫​做《警醒!》)將​廣播​聖經​真理​嘅​商營​電台​一一​列​出嚟。噉樣,傳道員​逐家逐户​傳道​嗰時,就​可以​鼓勵​住户​收聽​本地​電台​嘅​聖經​演講​嘞。結果​點樣​呢?英語版《通報》1931​年​1​月​刊​話:“電台​廣播​大大​促進​咗​逐家逐户​嘅​傳道​工作。總部​辦事處​收到​好多​報告,話​大家​收聽​盧述福​弟兄​嘅​演講​之後,都​好​樂意​接受​書刊。”《通報》話, 電台​廣播​同​逐户​探訪​係“主​嘅​組織​使用​嘅​兩​大​傳道​方法”。

17,18. 情勢​改變​之後,電台​廣播​點樣​繼續​發揮​作用?

17 上​世紀​30​年代,反對​我哋​使用​商營​電台​嘅​聲音​越​嚟​越​强烈。1937​年​後​期,耶和華​嘅​子民​針對​當時​嘅​情勢,隨機應變。佢哋​唔​再​用​商營​電台​廣播​聖經​演講,反而​將​重點​放​喺​逐家逐户​嘅​傳道​工作​上面。 *雖然​係​噉,電台​廣播​繼續​發揮​重要​作用,將​上帝​王國​嘅​信息​傳播​到​偏遠​同​受​限制​嘅​地區。舉​個​例,從​1951​年​到​1991​年,德國​西柏林​嘅​一​個​電台​經常​播放​聖經​演講,連​前​東德​嘅​居民​都​可以​聽​到​上帝​王國​嘅​信息。從​1961​年​起,有​超過​三十​年​嘅​時間,喺​南美洲​嘅​蘇里南,一​個​國營​電台​每​個​星期​都​有​15​分​鐘​嘅​節目​廣播​聖經​真理。 從​1969​年​到​1977​年,上帝​嘅​組織​為《聖經​對​人​有益》呢個​電台​節目​製作​咗​超過​350​個​節目​錄音,喺​美國​48​個​州​嘅​291​個​電台​播放。 1996​年,喺​南太平洋​薩摩亞​嘅​首都​阿皮亞,一​個​電台​每​個​星期​都​播放《回答​你​嘅​聖經​問題》呢個​節目。

18 到​咗​20​世紀​後期,電台​廣播​唔​再​係​傳播​上帝​王國​好消息​嘅​主要​工具​嘞,取而代之​嘅​係​另​一​種​新​科技。通過​呢​種​新​科技,上帝​王國​嘅​信息​可以​傳​俾​更加​多​嘅​人,達到​前所未有​嘅​程度。

19,20. (甲)點解​耶和華​嘅​子民​製​作​jw.org​網站?(乙)成效​有​幾​大?(另​見​附欄“ JW.ORG”)

19 通過​互聯網 到​2013​年​為止,上網​嘅​人​超過​27​億,差唔多​佔​世界​總人口​嘅​百​分​之​40。據​估計,用​智能​手機​或者​平板電腦​上網​嘅​人​大約​有​20​億。呢個​數字​喺​世界​各​地​不斷​上升,而​增長​最​快​嘅​地區​就​係​非洲。目前​非洲​有​9000幾萬​人​用​手機​或者​平板電腦​上網。互聯網​嘅​出現​徹底​改變​咗​大衆​接收​資訊​嘅​方式。

 20 自從​1997​年​以​來,耶和華​嘅​子民​一直​用​互聯網​將​上帝​王國​嘅​好消息​傳播​俾​大衆。 2013​年,耶和華見證人​嘅​官方​網站​jw.org​可以​用​300​種​語言​瀏覽,亦​都​有​超過​520​種​語言​版本​嘅​聖經​資料​提供​俾​人​下載。瀏覽​呢個​網站​嘅​人次​每​日​超過​75萬。平均​每​個​月​嘅​下載量,大約​係​300幾萬​本​書、400萬​本​雜誌​同​2200萬​個​錄音​檔案。

21. 你​從​西納​嘅​經歷​睇​出​乜嘢?

21 耶和華見證人​嘅​官方​網站​係​好​有效​嘅​工具。通過​呢個​網站,王國​嘅​好消息​傳遍​四方,甚至​傳​到​見證​工作​被​禁止​嘅​地區。例如,2013​年​年初,一​個​叫​做​西納​嘅​男子​瀏覽​咗​jw.org​網站,之後​打​電話​俾​耶和華見證人​喺​美國​嘅​世界​總部,表示​想​進一步​了解​聖經。呢個​電話​有​咩​特别​呢?西納​住​喺​偏遠​嘅​鄉村,屋企人​都​信奉​伊斯蘭教。而且,喺​佢​嘅​國家,耶和華見證人​嘅​工作​受​到​禁止。雖然​係​噉,西納​仲係​可以​通過​網上​視頻,同​一​位​總部​安排​嘅​美國​弟兄,每​個​星期​討論​兩​次​聖經。

個别​教導

22,23. (甲)我哋​為咗​接觸​更​多​嘅​人​所​使用​嘅​各​種​方法,可唔可以​取代​逐家逐户​嘅​傳道​工作​呢?(乙)我哋​盡力​宣揚​上帝​嘅​王國,有​冇​得到​君王​賜​福​呢?

22 為咗​接觸​更​多​嘅​人,我哋​用​過​唔​同​嘅​方法,例如​報章、《創世影劇》、電台​廣播​同​耶和華見證人​嘅​官方​網站,但​呢啲​方法​點​都​唔​可以​取代​逐家逐户​嘅​傳道​工作。點解​呢? 因為​耶和華​嘅​子民​效法​耶穌。耶穌​唔單止​向​群衆​傳道,仲​留意​每​個​人,個别​噉​幫助​佢哋。(路加福音​19:1-5)耶穌​訓練​門徒​噉樣​做,而且​話​俾​佢哋​知​要​傳講​乜嘢​信息。(請​讀​路加福音​10:1,8-11呢​本​書第​6​章講​過,帶頭​嘅​弟兄​一直​鼓勵​耶和華​嘅​所有​僕人​逐家逐户​傳道,面對面​同​住户​交談。(使徒行傳​5:42;20:20

23 上帝​嘅​王國​建立​一百​年​之後,已經​有​超過​790萬​傳道員​努力​教導​人​認識​上帝​嘅​旨意。毫無​疑問,我哋​用​嚟​宣揚​上帝​王國​嘅​各​種​方法,一直​都​得到​君王​耶穌​嘅​賜​福。下​一​章​會​講​吓,王國​嘅​君王​仲​提供​咗​唔​同​嘅​工具,俾​我哋​可以​向​每​個​國族、部族、語言​嘅​人​宣揚​好消息。(啟示錄​14:6

^ 17段 1957​年,帶頭​嘅​弟兄​決定​將​設立​喺​紐約市​嘅​最後​一​個​電台​WBBR​關閉。