跳到內容

跳到副菜單

跳到目錄

上帝嘅王國統治嘞!

 第​9​章

傳道嘅成果——“農作物已經成熟,可以收割咯!”

傳道嘅成果——“農作物已經成熟,可以收割咯!”

本​章​概要

耶和華​使​王國​真理​嘅​種子​成長

1,2. (甲)耶穌​講​咗​啲​乜嘢,門徒​唔​明白?(乙)耶穌​講​嘅​係​乜嘢​收割​工作?

耶穌​同​門徒​講:“舉目​睇​吓​啲​田;農作物​已經​成熟,可以​收割​咯!”門徒​唔​明​呢​句​話,覺得​好​奇怪。佢哋​望​去​耶穌​指​嘅​方向,只係​見到​田​裏面​一​片​綠油油,全部​都​係​啱啱​發芽​嘅​大麥,邊度​睇​得到​成熟​嘅​大麥​呢?門徒​可能​心​諗:“收割​乜嘢​呀?仲​要​等​好​幾​個​月​先​可以​收割​喎!”(約翰福音​4:35

2 不過,耶穌​講​嘅​唔​係​實際​嘅​收割,而係​屬靈​嘅​收割,要​收​嘅​農作物​代表​人。耶穌​趁​呢個​機會​教導​門徒​兩​個​同​屬靈​收割​有關​嘅​重要​道理。乜嘢​道理​呢?等​我哋​先​嚟​睇​吓​呢​件​事​嘅​背景。

投入​工作,一定​得到​喜樂

3. (甲)點解​耶穌​對​門徒​講,“農作物​已經​成熟,可以​收割​咯”?(乙)耶穌​點樣​幫​門徒​明白​佢​嘅​意思?

3 公元​30​年​年底,喺​撒馬利亞​嘅​叙加城​附近,耶穌​同​門徒​講​咗​上面​呢​番​話。當時​門徒​入​咗​城,耶穌​喺​井​邊​遇​到​一​個​婦人,就​主動​同​佢​講​屬靈​嘅​事。婦人​覺得​好​奇妙,佢​好​快​就​睇​出​耶穌​教​嘅​道理​非常​重要。門徒​返​到​耶穌​身邊​嗰時,婦人​就​即刻​趕​返​去​叙加城,將​自己​學​到​嘅​事​話​俾​城​裏面​嘅​人​知。佢​嘅​話​引起​佢哋​嘅​好奇心,好多​人​跑​去​井​邊​見​耶穌。可能​就​喺​嗰陣,耶穌​望​去​田地​嗰邊,睇到​遠處​有​一​班​撒馬利亞人​過​緊​嚟,於是​同​門徒​講: “舉目​睇​吓​啲​田;農作物​已經​成熟(《聖經​新世界​譯本》作‘發白’),可以​收割​咯!” * 耶穌​想​門徒​明白​收割​嘅​農作物​係​屬靈​嘅​而​唔​係​實際​嘅,佢​跟住​話:“收割​嘅​人……為​永生​積聚​果實”。(約翰福音​4:5-30,36

4. (甲)關於​屬靈​嘅​收割​工作,耶穌​教​門徒​邊​兩​個​道理?(乙)我哋​會​討論​乜嘢​問題?

4 關於​屬靈​嘅​收割​工作,耶穌​教導​門徒​邊​兩​個​重要​道理​呢?第​一,收割​工作​係​當務之急。佢​話​俾​門徒​知,田地 “已經​成熟,可以​收割​咯”,意思​係​叫​佢哋​馬上​投入​工作。為​咗​令​門徒​緊記​收割​工作​有​幾​咁​迫切,耶穌​又​話,採取​行動​嘅​人​已經“得到​報賞”嘞。冇錯,當時​嘅​屬靈​收割​工作​已經​開始​咗,唔​應該​耽誤​時間!第​二,工人​充滿​喜樂​噉​收割​農作物。耶穌​話,撒種​嘅​同​收割​嘅​會“一齊​快樂”。(約翰福音​4:35下,36)耶穌​見​到​好多​撒馬利亞人​都​信從​佢,一定​覺得​好​欣慰。同樣,佢​嘅​門徒​全心​投入​收割​工作,亦​都​肯定​充滿​喜樂。(約翰福音​4:39-42)聖經​嘅​呢個​記載​對​我哋​有​特别​嘅​意義。今日,有史以來​最​偉大​嘅​屬靈​收割​工作​正​喺​度​進行​緊。耶穌​嘅​話​使​我哋​知道,呢​段​時期​會​有​乜嘢​事​發生。現代​嘅​收割​工作​喺​幾時​開始​呢?有​邊啲​人​參與​呢​件​工作​呢?有​乜嘢​成果​呢?

君王​領導​有史以來​最​偉大​嘅​收割​工作

5. (甲)邊個​領導​全球​嘅​收割​工作?(乙)約翰​睇到​嘅​異象​點樣​表明,收割​工作​係​當務之急?

5 喺​使徒​約翰​睇到​嘅​異象​裏面,耶和華​透露​佢​委派​咗​耶穌​去​領導​全球​嘅​屬靈​收割​工作。(請​讀啟示錄​14:14-16異象​裏面​嘅​耶穌​頭​戴​金冠,手​拎​鐮刀。耶穌“頭​上​戴​住​金​冠冕”顯示​佢​係​在位​嘅​君王;“手​拎​住​鋒利​嘅​鐮刀”顯示​佢​係​收割​嘅​人。為​咗​强調​收割​工作​係​當務之急,耶和華​通過​天使​宣布​地上​嘅​農作物“已經​熟透”。冇錯,“收割​嘅​時[刻]已​到”,唔​可以​拖延​嘞!耶穌​聽從​上帝​嘅​吩咐,伸​出​鐮刀,地(指​地上​嘅​人)就​收割​好​嘞。呢個​振奮​人心​嘅​異象​再次​提醒​我哋,“農作物​已經​成熟,可以​收割​咯”。通過​異象,我哋​可唔可以​睇​出​全球​嘅​收割​工作​喺​幾時​開始​呢?可以!

6. (甲)收割​時期​幾時​開始?(乙)“地上​嘅​農作物”幾時​開始​被​收割?請​解釋。

6 根據​啟示錄​14​章​嘅​記載,約翰​喺​異象​裏面​睇​到,負責​收割​嘅​耶穌​頭​戴​金冠(14​節),顯然​呢​件​事​係​耶穌​喺​1914​年​登基​之後​發生​嘅。(但以理書​7:13,14)過​咗​一​段​時間,耶穌​奉命​開始​收割(15​節)。事情​嘅​先後​次序,同​小麥​嘅​比喻​裏面​提​到​嘅​次序​吻合。耶穌​解釋​小麥​嘅​比喻​嗰時,話:“收割​時​係​世界​嘅​末日​[末期​]”。所以,收割​時期​同埋​呢個​制度​嘅​末期​係​同時​開始​嘅,就​係​1914​年。(馬太福音​13:30,39)回顧​過去,今日​我哋​可以​睇​出,收割​工作​實際​上​係​耶穌​登基​幾​年​之後​先​開始​嘅。點解​噉​講​呢?從​1914​年​到​1919​年​初,耶穌​先​潔淨​佢​嘅​受膏​門徒。(瑪拉基書​3:1-3;彼得前書​4:17)然後​喺​1919​年,“地上​嘅​農作物”開始​被​收割​嘞。於是, 耶穌​就​任用​佢​新​委派​嘅​忠信​奴隸,幫助​啲​弟兄​明白​傳道​工作​係​當務之急。等​我哋​嚟​睇​吓​當時​有​咩​事​發生。

7. (甲)弟兄​點樣​睇​出​傳道​工作​係​非常​緊迫​嘅?(乙)上帝​嘅​組織​鼓勵​弟兄​姊妹​點樣​做?

7 英語版《守望台》1920​年​7​月刊​話:“仔細​查考​聖經​之後,我哋​睇​出​上帝​嘅​子民​得到​一​個​好​光榮​嘅​任務,就​係​傳講​上帝​嘅​王國。”例如,從​以賽亞​嘅​預言,弟兄​睇​出​上帝​王國​嘅​好消息​一定​會​喺​世界​各​地​廣傳​開​去。(以賽亞書​49:6;52:7;61:1-3)佢哋​唔​知道​點樣​完成​呢個​工作,但係​深信​耶和華​一定​會​打開​出路。(請​讀​以賽亞書​59:1上帝​嘅​組織​更​清楚​噉​睇​出​傳道​工作​非常​緊迫,就​鼓勵​弟兄​姊妹​努力​傳道。佢哋​有​咩​反應​呢?

8. 喺​傳道​工作​方面,弟兄​喺​1921​年​已經​領會​到​邊​兩​個​要點?

8 英語版《守望台》1921​年​12​月刊​話:“1921​年​係​成果​最​好​嘅​一​年。今年​聽​到​聖經​真理​嘅​人​比​以往​任何​一​年​都​要​多。”雜誌​又​話:“要​做​嘅​工作​仲​有​好多。……等​我哋​懷​住​喜樂​嘅​心​去​做。”請​留意,關於​傳道​工作,弟兄​領會​嘅​兩​個​要點,同​耶穌​要​使徒​謹記​喺​心​裏面​嘅​一樣:傳道​工作​係​當務之急;上帝​嘅​僕人​充滿​喜樂​噉​傳道。

9. (甲)關於​收割​工作,1954​年​有​一​期《守望台》點樣​講?點解​會​有​噉​嘅​成果?(乙)過去​50​年,各​地​傳道員​嘅​人數​有​乜嘢​增長?(見​附表“ 各​地​傳道員​人數​嘅​增長”)

9 喺​上​個​世紀​30​年代,弟兄​明白​到​會​有​一​大​群“其他​嘅​羊”接受​上帝​王國​嘅​信息,就​進一步​加緊​傳道​活動。(以賽亞書​55:5;約翰福音​10:16;啟示錄​7:9)有​咩​成果​呢?傳講​上帝​王國​嘅​人數​大​幅度​上升。1934​年,只​有​4萬1000​人​傳道;到​1953​年,傳道員​嘅​數目​已經​增加​到​50萬!英語版《守望台》1954​年​12​月​1​日​刊​講​得​好​啱:“全​靠​耶和華​嘅​靈​同​佢​嘅​話語​所​發揮​嘅​力量,全球​嘅​收割​工作​先​可以​有​咁​豐盛​嘅​成果。” *撒加利亞書​4:6

 

各​地​傳道員​人數​嘅​增長

國家

1962​年

1987​年

2013​年

澳大利亞

1萬5927

4萬6170

6萬6023

巴西

2萬6390

21萬6216

75萬6455

法國

1萬8452

9萬6954

12萬4029

意大利

6929

14萬9870

24萬7251

日本

2491

12萬722

21萬7154

墨西哥

2萬7054

22萬2168

77萬2628

尼日利亞

3萬3956

13萬3899

34萬4342

菲律賓

3萬6829

10萬1735

18萬1236

美國

28萬9135

78萬676

120萬3642

贊比亞

3萬129

6萬7144

16萬2370

 

聖經​課程​嘅​數目​不斷​增加

1950​年

23萬4952

1960​年

64萬6108

1970​年

114萬6378

1980​年

137萬1584

1990​年

362萬4091

2000​年

476萬6631

2010​年

805萬8359

 生動​嘅​比喻​預示​收割​嘅​成果

10,11. 關於​種子​嘅​生長,芥籽​嘅​比喻​强調​咗​乜嘢?

10 耶穌​講​咗​唔​少​同​上帝​王國​有關​嘅​比喻,生動​噉​預告​收割​工作​會​有​乜嘢​成果。接​落嚟,我哋​會​講​吓​芥籽(芥菜種)嘅​比喻​同埋​酵​嘅​比喻,集中​睇​吓​呢​兩​個​比喻​點樣​喺​最後​嘅​日子​應驗。

11 芥籽​嘅​比喻 有​一​個​人​將​一​粒​芥籽​種​落​田​度,後來​芥籽​長​成​一​棵​樹,連​雀仔​都​嚟​樹​上​棲宿。(請​讀​馬太福音​13:31,32關於​芥籽​嘅​生長,呢個​比喻​强調​乜嘢​呢?(1)生長​嘅​速度​快​到​令​人​難以​想象。芥籽​雖然“係​世上​最​小​嘅​種”,但係“生​出​大​枝”,長​成​一​棵​大樹。(馬可福音​4:31,32)(2)芥籽​一定​會​生長。種子“種​落​地,長大​起嚟”。請​留意,耶穌​唔​係​話“可能​會​長大”,而係​話“長大​起嚟”。乜嘢​都​唔​能够​阻止​芥籽​嘅​生長。(3)呢​棵​生長​緊​嘅​樹​吸引​咗​好多​雀仔​嚟,為​佢哋​提供​棲宿​嘅​地方。“飛鳥​亦​喺​佢​嘅​蔭​下​棲宿”。呢​三​點​同​現代​嘅​屬靈​收割​工作​有​乜嘢​關係​呢?

12. 芥籽​嘅​比喻​同​今日​嘅​收割​工作​有​乜嘢​關係?(另​見​附表“ 聖經​課程​嘅​數目​不斷​增加”)

12 (1) 增長​嘅​速度:呢個​比喻​强調,上帝​王國​嘅​信息​不斷​傳講​開​去,基督徒​會衆​嘅​人數​不斷​增多。自從​1919​年​以來,熱心​嘅​收割​工人​被​召集​到​復興​咗​嘅​基督徒​會衆​裏面。當時​工人​嘅​數目​雖然​少,但​增長​得​好​快。從​上​世紀​初​到​今日,增長​嘅​速度​的確​令​人​驚歎。(以賽亞書​60:22(2) 必然​嘅​結果:基督徒​會衆​嘅​增長,邊個​都​阻止​唔​到。上帝​嘅​敵人​蓄意​迫害​真​基督徒,就​好似​將​一​層​又​一​層​嘅​石頭​壓​喺​細細​粒​嘅​種子​上面,存心​要​阻止​種子​嘅​生長。即使​係​噉,種子​都​可以​破​土​而​出,繼續​生長。(以賽亞書​54:17(3) 棲宿​嘅​地方:天上​嘅“飛鳥”喺​樹​上​棲宿,象徵​心地​正直​嘅​人​接受​上帝​王國​嘅​好消息,成為​基督徒​會衆​嘅​一分子。佢哋​嚟自​大約​240​個​國家​同​地區,人數​有​好​幾百萬。(以西結書​17:23)喺​基督徒​會衆​裏面,佢哋​唔單止​得到​屬靈​嘅​食物,亦​都​得到​安舒​同​保護。(以賽亞書​32:1,2;54:13

芥籽​嘅​比喻​表明,上帝​嘅​僕人​可以​棲宿​喺​基督徒​會衆​裏面,而且​得到​保護(見​第​11,12​段)

13. 關於​增長​過程,酵​嘅​比喻​强調​乜嘢?

13 酵​嘅​比喻 有​個​女人​將​酵​放​喺​麪粉​裏面,結果​成​團​麪​都​發​咗​起嚟。(請​讀​馬太福音​13:33關於​增長​嘅​過程,呢個​比喻​强調​乜嘢​呢?我哋​會​討論​吓​兩​點。(1)引起​改變:酵​使​麪團“發​起嚟”。(2)遍布​各​處:將​酵​放​落“三​斗​麪粉”裏面,使​成​團​麪​全部​都​發​起嚟。呢​兩​點​同​屬靈​嘅​收割​工作​有​乜嘢​關係​呢?

14. 酵​嘅​比喻​同​今日​嘅​收割​工作​有​乜嘢​關係?

 14 (1)改變:酵​象徵​上帝​王國​嘅​信息,麪團​象徵​人類。酵​加​入​麪粉​裏面,使​麪粉​發生​變化。同樣,人​接受​王國​信息​之後,内心​情況​就​會​發生​改變。(羅馬書​12:2(2)遍布​各​處:發酵​過程​象徵​上帝​王國​信息​嘅​傳播。就​好似​酵​會​使​成​團​麪​發​起嚟,王國​信息​亦​都​不斷​傳播​開​去,“甚至​到​天涯海角”。(使徒行傳​1:8)就算​有啲​國家​禁止​我哋​嘅​工作,我哋​仲係​會​喺​當地​傳講​上帝​王國​嘅​信息,只係​大多數​人​發覺​唔​到。

15. 以賽亞書​60:5,22​嘅​話​點樣​應驗?(另​見​93​頁​附欄“ 耶和華​使​凡​事​都​可能”;96-97​頁​附欄“ 最​弱​嘅​族​成為​强國”)

15 喺​耶穌​講​呢啲​比喻​之前​大約​800​年,耶和華​已經​通過​以賽亞​生動​噉​預告,現代​屬靈​收割​工作​會​有​幾​大​嘅​規模,所​得​嘅​成果​又​會​帶​嚟​幾​大​嘅​喜樂。 * 耶和華​指​出,從​遠方​嚟​嘅​人​紛紛​加​入​佢​嘅​組織。以賽亞書​記載​咗​耶和華​對“耶路撒冷”(《聖經​新世界​譯本》作“婦人”)所​講​嘅​話。呢​節 經文​裏面​嘅“耶路撒冷”由​今日​仲​喺​地上​嘅​受膏​基督徒​所​代表。耶和華​話:“你​睇見​呢​一切​會​禁唔住​歡喜;你​嘅​心​會​興奮​跳動。從​海​嗰邊,金​銀​滾滾​而​嚟;萬國​嘅​財富​不斷​流​入​你​手​中。”(以賽亞書​60:1,4,5,9)呢​番​話​講​得​一啲​都​冇錯!今日,忠心​事奉​耶和華​多​年​嘅​基督徒,親眼​睇到​當地​嘅​傳道員​由​區區​幾​個​增加​到​千倍​萬倍,又​點​會​唔​興奮​跳動​呢!

耶和華​嘅​僕人​都​應該​開心​快樂

16,17. “撒種​嘅​同​收割​嘅,一齊​快樂”,其​中​一​個​原因​係​乜嘢?(另​見​附欄“ 兩​張​傳單​打動​咗​兩​個​人​嘅​心”)

16 上面​提​到,耶穌​對​使徒​講:“收割​嘅​人……為​永生​積聚​果實,使​撒種​嘅​同​收割​嘅,一齊​快樂。”(約翰福音​4:36)喺​全球​嘅​收割​工作​中,點解​我哋​應該“一齊​快樂”呢?有​好多​理由,而家​討論​吓​其中​三​個。

17 第​一,我哋​好​高興​喺​傳道​工作​方面​有​耶和華​做​同工。我哋​向​人​傳講​上帝​嘅​王國,就​係​撒播​王國​真理​嘅​種子。(馬太福音​13:18,19)我哋​幫助​其他​人​成為​基督徒,就​有​收成​嘞。無論​係​撒種​嘅​抑或​收割​嘅,當​我哋​懷​住​敬畏​之​心​去​睇​耶和華​點樣​使​王國​真理​嘅​種子“發芽​生長”,就​會​深深​感到​喜樂。(馬可福音​4:27,28)有​時​撒​落​嘅​種子​可能​要​等​一​段​時間​先​會​發芽​生長,而​收割​嘅​會​係​其他​人。英國​有​個​受浸​咗​六十​年​嘅​姊妹​叫​瓊,就​有​噉​嘅​經歷。佢​話:“經常​有​人​同​我​講,好多​年​前​我​曾經​向​佢​傳道,將​真理​種子​撒​喺​佢​心​裏面。後來​有​其他​耶和華見證人​教​佢​聖經,幫​佢​成為​耶和華​嘅​僕人。起初​種​落​嘅​種子​終於​有​咗​收成,我​真​係​好​開心。”(請​讀​哥林多前書​3:6,7你​有​冇​類似​嘅​經歷​呢?

18. 哥林多前書​3:8​提​到,我哋​開心​快樂​嘅​另​一​個​原因​係​乜嘢?

18 第​二,我哋​謹記​保羅​嘅​話,就​可以​繼續​喜樂​噉​執行​傳道​工作。保羅​話:“上帝​將​照​每​個​人​嘅​工作​酬報​佢。”(哥林多前書​3:8)每​個​人​唔​係​照​自己​嘅​成績,而係​照​自己​喺​工作​上​所​付出​嘅​努力​得​獎賞。保羅​嘅​話​真​係​好​鼓勵​人,喺​反應​唔​好​嘅​地區​堅守​崗位​嘅​傳道員​就​更​加​受​到​鼓勵​嘞!喺​上帝​眼​中,每​個​見證人​只要​全心​投入​撒種​嘅​工作,就​可以“結​好多​果實”。所以,每​個​耶和華見證人​都​應該​開心​快樂。(約翰福音​15:8;馬太福音​13:23

19. (甲)馬太福音​24:14​嘅​預言​同​我哋​嘅​喜樂​有​乜嘢​關係?(乙)就算​自己​仲​未​幫​到​其他​人​成為​基督徒,我哋​應該​謹記​乜嘢?

19 第​三,我哋​因為​傳道​工作​應驗​咗​聖經​嘅​預言​而​覺得​好​開心。 請​睇​吓​耶穌​點樣​回答​幾​位​使徒​嘅​問題。佢哋​嚟​問​耶穌:“你​嘅​來臨​同​世界​嘅​終局​有​乜​預兆​呢?”耶穌​話​俾​佢哋 ​知,末世​徵象​嘅​一​個​特點​係​全球性​嘅​傳道​工作。耶穌​指​嘅​係咪​幫助​人​成為​基督徒​嘅​工作​呢?唔​係。耶穌​講:“天國​嘅​福音​先​要​傳遍​天下,向​全​人類​做​見證”。(馬太福音​24:3,14)所以,傳講​上帝​嘅​王國,就​係​撒播​王國​真理​嘅​種子,係​末世​徵象​嘅​一​個​特點。我哋​傳講​王國​嘅​好消息​嗰時,應該​謹記,就算​自己​仲​未​幫​到​其他​人​成為​基督徒,亦​都​已經​同​對方​做​咗​見證​嘞。 * 無論​其他​人​有​乜嘢​反應,我哋​有​份​應驗​耶穌​嘅​預言,亦​都​有​榮幸​做“上帝​嘅​同工”,真​係​值得​開心​啊!(哥林多前書​3:9

“從​日出​到​日落​之​地”

20,21. (甲)詩篇​113:3​嘅​話​點樣​應驗?(乙)喺​屬靈​嘅​收割​工作​上,你​決心​點樣​做?點解?

20 公元​一​世紀,耶穌​幫助​使徒​睇​出,收割​工作​係​當務之急。從​1919​年​開始,耶穌​亦​都​幫助​現代​嘅​基督徒​明白​呢​一​點。所以,上帝​嘅​子民​加緊​傳道​活動。事實​證明,無論​邊個​都​阻止​唔​到​屬靈​嘅​收割​工作。正如​詩篇​嘅​經文​預告,今日“從​日出​到​日落​之​地”都​會​有​上帝​嘅​僕人​執行​傳道​工作。(詩篇​113:3)的確,由​日出​到​日落,即​係​由​東​到​西,無論​喺​邊度,撒種​嘅​同​收割​嘅​都​並肩​工作,一齊​快樂。由​日出​到​日落,亦​即​係​由​朝​到​晚,任何​時候​我哋​都​急切​噉​去​做​屬靈​嘅​收割​工作。

21 諗​翻​過去​百幾​年​嘅​歷史,我哋​睇​到​上帝​嘅​一​小​群​僕人​已經​增長​千倍,“成為​大族”,心裏“興奮​跳動”,真​係​開心​到​不得了。(以賽亞書​60:5,22)希望​我哋​每​個​人​心​裏面​一直​都​有​呢​種​喜樂,對“農場​嘅​主人”耶和華​嘅​愛​有增無減。噉樣,我哋​自然​就​會​竭盡​全力,完成​有史以來​最​偉大​嘅​屬靈​收割​工作!(路加福音​10:2

^ 3段 喺​聖經​原文​裏面,耶穌​講​田地​已經“發白”。有​可能​係​指​撒馬利亞人​身​上​嘅​白袍。因為​當時​耶穌​睇​到​一​班​撒馬利亞人​嚟​緊,可能​佢哋​着​住​嘅​袍​係​白色​嘅。

^ 9段 如果​你​想​知道​當年​同​隨後​幾十​年​發生​嘅​事,請​睇​吓《耶和華見證人——上帝​王國​的​宣揚者》425-520​頁,當中​叙述​咗​屬靈​收割​工作​從​1919​年​到​1992​年​所​得​嘅​成果。

^ 15段 關於​呢個​含意​豐富​嘅​預言,詳見《以賽亞​的​預言​光照​全​人類》下册​303-320​頁

^ 19段 聖經研究者​早​就​已經​明白​呢個​重要​嘅​真理。英語版《錫安​嘅​守望台》1895​年​11​月​15​日​刊​話:“就算​收割​到​嘅​小麥​只係​得​一啲啲,不過​至少​我哋​可以​努力​噉​為​真理​作​見證。……人人​都​可以​傳​福音。”