跳到內容

跳到副菜單

跳到目錄

上帝嘅王國統治嘞!

 第​8​章

傳道嘅工具——為萬國萬族出版嘅書刊

傳道嘅工具——為萬國萬族出版嘅書刊

本​章​概要

耶和華​不斷​提供​合適​嘅​工具,使​我哋​能够​教導​各​民族、部族、語言​嘅​人

1,2. (甲)公元​1​世紀​發生​咗​乜嘢​事,令​好消息​傳遍​成​個​羅馬​帝國?(乙)今日,有​乜嘢​證據​表明​我哋​得到​耶和華​嘅​支持?(請​睇​附欄“ 用​670幾​種​語言​傳播​王國​嘅​好消息”)

從​外地​嚟​耶路撒冷​過節​嘅​人,聽​到​一啲​加利利人​流利​噉​講​出​唔​同​嘅​外語,覺得​非常​驚訝。呢啲​加利利人​所​講​嘅​話​深深​吸引​住​在場​嘅​聽衆。呢​件​事​發生​喺​公元​33​年​五旬節,耶穌​嘅​門徒​神奇​噉​得到​講​外語​嘅​恩賜,證明​佢哋​有​上帝​嘅​支持。(請​讀​使徒行傳​2:1-8,12,15-17門徒​當日​傳講​嘅​好消息​打動​咗​唔​同​背景​嘅​人,後嚟​甚至​傳遍​咗​成​個​羅馬​帝國。(歌羅西書​1:23

2 今日,上帝​嘅​僕人​雖然​唔​會​神奇​噉​識​講​外語,但係​就​將​王國​嘅​信息​翻譯​成​670幾​種​語言,比​公元​1​世紀​嘅​門徒​所​講​嘅​外語​多​好多。(使徒行傳​2:9-11)由於​上帝​嘅​子民​以​好多​種​語言​出版​咗​巨量​嘅​書刊,使​王國​嘅​信息​可以​滲入​到​地球​每​個​角落。 *呢​一​點​亦​都​係​確鑿​嘅​證據,表明​耶和華​任用​緊​君王​耶穌​基督​指引​我哋​嘅​傳道​工作。(馬太福音​28:19,20)下面​會​講​吓,過​去​一百​年​嚟​我哋​用​過​嘅​一啲​傳道​工具。等​我哋​一邊​回顧​歷史,一邊​留意​君王​點樣​教導​我哋​關心​每​個​人,點樣​鼓勵​我哋​教​人​聖經。(提摩太後書​2:2

君王​幫助​僕人​撒播​真理​嘅​種子

3. 點解​我哋​用​唔​同​嘅​工具​嚟​傳播​王國​信息?

3 耶穌​將“天國​嘅​道理”比喻​成​種子,將​人​嘅​内心​比喻​成​泥土。(馬太福音​13:18,19)園丁​會​用​唔​同​嘅​工具​鬆​土,等​啲​種子​容易​種​入​泥土​裏面。同樣,耶和華​嘅​子民​亦​都​運用​唔​同​嘅​工具,令​成千上萬​嘅​人​打開​心窗,接受​王國​嘅​信息。有啲​工具​一​段​時間​内​好​有效,另​一啲​工具,例如​書刊​同​雜誌,就​一直​都​用​得​上。前​一​章​講​到,上帝​嘅​組織​通過 大衆​媒體​將​王國​信息​廣傳​開去。呢​一​章​會​講​吓,上帝​嘅​組織​提供​咗​乜嘢​工具,幫助​我哋​可以​面對面​同​人哋​討論​上帝​嘅​王國。(使徒行傳​5:42;17:2,3

喺​加拿大​多倫多市​製造​留聲機​同​音響​器材

4,5. (甲)上帝​嘅​子民​點樣​運用​留聲機​唱片?(乙)呢​種​傳道​工具​有​乜嘢​不足​之​處?

4 演講​錄音 上​世紀​三四十​年代,上帝​嘅​子民​傳道​嗰時,用​手提​留聲機​播放​聖經​演講​嘅​錄音。每​個​演講​錄音​唔​超過​五​分鐘,有啲​題目​好​簡短,例如“三位一體”“煉獄”“王國”等等。呢啲​演講​錄音​係​點樣​向​人​播放​嘅​呢?1930​年​喺​美國​受浸​嘅​克萊頓​·​伍德沃思​弟兄​話:“喺​嗰個​年代,我​攞​住​手提式​留聲機​去​傳道。如果​要​播放​唱片,就​先​要​上​鏈,然後​將​唱針​對​啱​個​位,放​正​喺​唱片​邊緣​先至​得。傳道​嗰時,我​行​到​住户​門口,打開​留聲機,裝​好​唱臂,準備​好​先至​撳​門鐘。住户​開​門​之後,我​會​同​佢​講:‘有​個​重要​嘅​信息​希望​你​聽​吓。’”住户​有​咩​反應​呢?伍德沃思​弟兄​話:“好多​住户​都​願意​聽,當然​都​會​有​人​即刻​關門,有時​仲​有​人​以​為​我​賣​留聲機​添。”

到​1940​年,上帝​嘅​組織​已經​錄製​咗​90幾​個​聖經​演講,製作​咗​超過​100萬​張​唱片

5 到​1940​年,上帝​嘅​組織​已經​錄製​咗​90幾​個​聖經​演講,製作​咗​超過​100萬​張​唱片。嗰時,約翰​·巴爾​弟兄​喺​英國​做​先驅,後嚟​成為​中央長老團​成員。佢​回憶​話:“從​1936​年​到​1945​年,留聲機​一直​都​係​我​嘅​傳道​同伴,如果​邊​日​冇​帶,就​好似​少​咗​啲​嘢​噉。喺​住户​門口,每​次​聽​到​盧述福​弟兄​嘅​聲音,我​都​會​覺得​好​鼓勵,就​好似​佢​喺​我​身邊​噉。不過 ​只​係​靠​播放​聖經​演講​係​唔够​嘅,因為​噉樣​做​唔​能够​教導​人,亦​都​培養​唔​到​打動​人心​嘅​技巧。”

6,7. (甲)用​見證卡​傳道​有​乜嘢​優點​同​缺點​呢?(乙)耶和華​點樣​做,好似​將​應該​講​嘅​話​放​入​我哋​嘅​嘴​裏面?

6 見證卡 從​1933​年​開始,上帝​嘅​組織​鼓勵​傳道員​逐户​傳道​嗰時​使用​見證卡。見證卡​係​一​張​大約8厘米​乘​13​厘米(3英寸​乘​5​英寸)嘅​卡片,上面​寫​住​一​個​簡短​嘅​聖經​信息,仲​有​兩三​句​話​向​住户​解釋,佢哋​點樣​可以​攞​到​一啲​聖經​書刊。傳道員​直接​將​見證卡​遞​俾​住户,請​對方​讀​吓​卡片​上​嘅​内容。莉蓮​·​卡馬魯德​回憶​話:“我​好​鍾意​用​見證卡​傳道。”點解​呢?佢​話:“喺​陌生​人​面前​講​一​個​傳道​介紹詞,唔​係​個個​做​得到​嘅,見證卡​幫助​我​學識​主動​向​人​傳道。”後嚟,卡馬魯德​姊妹​喺​波多黎各​同​阿根廷​做​特派​傳道員。

見證卡(意大利語)

7 1918​年​受浸​嘅​大衛​·​羅伊斯​話:“好多​弟兄​都​唔​知道​傳道​嗰時​應該​講​啲​乜嘢,見證卡​真​係​幫​到​我哋​唔​少。”不過,用​見證卡​傳道​亦​都​會​引起​誤會。羅伊斯​弟兄​跟住​話:“有時,住户​以​為​我哋​係​啞​嘅。講​真​呀,嗰陣時​我哋​真​係​唔​知​講​咩​好,但係​耶和華​幫​我哋​做​好​準備​向​人​傳道。冇幾耐,佢​就​教​我哋​喺​逐户​傳道​嗰時​使用​聖經,就​好似​將​應該​講​嘅​話​放​入​我哋​嘅​嘴​裏面​噉。從​上​個​世紀​40​年代​開始,我哋​一直​通過​傳道​訓練班​學習​點樣​用​聖經​嚟​傳道。”(請​讀​耶利米書​1:6-9

8. 你​點樣​做​就​表明​自己​願意​接受​基督​嘅​培訓​呢?

8 書籍 自從​1914​年​以​來,耶和華​嘅​子民​出版​咗​百幾​本​書,討論​聖經​嘅​各​種​課題,其中​一啲​係​為咗​幫助​傳道員​可以​更加​有效​噉​傳道​而​編寫​嘅。丹麥​嘅​安娜​·​拉森​參與​傳道​工作​足足​七十​年,佢​話:“耶和華​通過​傳道​訓練班​同​有關​嘅​書刊,幫助​我哋​提高​傳道​技巧。我​仲​記得,第​一​本​教​我哋​傳道​嘅​書​叫​做《俾​王國​傳道員​嘅​神治​幫助》,1945​年​出版。第​二​本​係​1946​年​出版​嘅《預備​行​各​樣​嘅​善事》。今日,我哋​用​嘅​係《神聖​教育​使​你​得益——傳道​訓練班​課本》,2001​年​出版。”耶和華​幫助​我哋​勝任​傳道​工作,喺​呢​方面​傳道​訓練班​同​有關​嘅​課本​確實​起​咗​重要​嘅​作用。(哥林多後書​3:5,6)我哋​通過​週​中​聚會,喺​傳道​方面​一直​得到​培訓。而家,我哋​每​個​月​都​會​收到《傳道​與​生活​聚會​手册》。你​有​冇​積極​參與​呢個​安排,從​中​得到​最​大​嘅​益處​呢?如果​有,就​表明​你​自己​願意​接受​基督​嘅​培訓,噉​就​能够​更加​勝任​教導​工作。(哥林多後書​9:6;提摩太後書​2:15

9,10. 喺​栽種​王國​真理​種子​同​淋​水​方面,書籍​起​咗​乜嘢​作用?

 9 為咗​幫助​我哋​向​人​解釋​聖經​嘅​基本​真理,耶和華​指引​佢​嘅​組織​出版​咗​其他​書,其中​有​一​本​非常​實用,就​係《導​至​永生​的​真理》。1968​年,呢​本​書​一​發行​就​馬上​睇​到​成效。英語版《王國​傳道​月報》1968​年​11​月​刊​話:“由於《真理》書​嘅​需求​非常​大,喺​啱啱​過去​嘅​9​月,布魯克林​總部​嘅​印刷廠​夜晚​唔​加班​都​唔​得。”文章​仲​講:“喺​8​月,《真理》書​嘅​需求量​仲​試​過​比​貨存量​超​出​150萬​本。”到​1982​年,《真理》書​已經​以​116​種​語言​發行,印刷​咗​超過​1億​本。從​1968​年​到​1982​年,即​係《真理》書​發行​之後​嘅​14​年​期間,王國​傳道員​增​加​咗​百幾萬。 *

10 2005​年,《辨明​聖經​的​真理》出版​咗。 目前​呢​本​書​用​256​種​語言​發行,到​而家​已經​印刷​咗​大約​2億​本,喺​幫助​人​學習​聖經​方面​好​有​成效。有​咩​成效​呢?從​2005​年​到​2012​年,短短​七​年,就​有​120萬​人​成為​王國​傳道員。其間,學習​聖經​嘅​人​亦​都​從​600萬​增加​到​870幾萬。無論​係​栽種​定​係​淋​水,我哋​絶對​相信​為​王國​真理​種子​嘅​成長​所​付出​嘅​努力,都​會​得到​耶和華​嘅​賜​福。(請​讀​哥林多前書​3:6,7

11,12. 請​用​段落​裏面​嘅​經文​解釋,唔​同​嘅​雜誌​分别​係​為咗​邊啲​人​而​寫​嘅。

11 雜誌 最初,《守望台》主要​係​為“被​上帝​選召”嘅“小群[羊]”寫​嘅。(路加福音​12:32;希伯來書​3:1) 1919​年​10​月​1​日,上帝​嘅​組織​發行​咗​一​本​為​大衆​寫​嘅​雜誌。呢​本​雜誌​好​受​歡迎,聖經研究者​同​其他​讀者​都​好​鍾意,所以​有​好多​年,發行量​遠遠​超過《守望台》。 呢​本​雜誌​起初​叫​做《黃金時代》, 1937​年​改​名​叫​做《安慰報》, 喺​1946​年​再​改​名​叫​做《警醒!》。

12 咁​多​年​嚟,雖然《守望台》同《警醒!》嘅​寫作​風格​同​版面​格式​改變​咗​唔​少,但​宗旨​一直​都​冇​變​過,始終​係​宣揚​上帝​嘅​王國,同埋​幫助​人​建立​對​聖經​嘅​信心。今日,《守望台》有​研讀版​同​公衆版。研讀版​嘅​寫作​對象​係“僕人”,亦​即​係“小群[羊]”同“其他​嘅​羊”。 *馬太福音​24:45;約翰福音​10:15-16) 公衆版​係​特别​為​嗰啲​仲​未​認識​真理,但​尊重​上帝​同​聖經​嘅​人​寫​嘅。(使徒行傳​13:16) 而《警醒!》嘅​寫作​對象​就​係​唔​熟悉​聖經​同​耶和華​上帝​嘅​人。(使徒行傳​17:22,23

13. 你​認為​我哋​出版​嘅​雜誌​有​乜嘢​出衆​嘅​地方?(討論​附表“ 出版物​發行量​嘅​世界​紀錄”)

 13 喺​2014​年​年初,上帝​嘅​組織​每​個​月​出版​4400幾萬​本《警醒!》,大約​4600萬​本《守望台》。 《警醒!》用​100​種​語言​出版,《守望台》就​用​200幾​種​語言​出版。《警醒!》同《守望台》無論​係​發行量,定​係​語言​版本​數量,喺​全球​都​係​數一數二​嘅。雖然​成績​咁​出衆,但​我哋​唔​會​覺得​意外,因為​呢啲​雜誌​所​講​嘅​信息,耶穌​已經​預告​咗​會​傳遍​普​天下。(馬太福音​24:14

14. 我哋​熱心​推廣​乜嘢?點解​噉樣​做?

14 聖經 1896​年,羅素​弟兄​同​佢​嘅​同工​將“聖經”兩​個​字​加入​佢哋​用​嚟​出版​書刊​嘅​法人​名稱​當中,將​法人​名稱​改為​守望台​聖經​書社。呢個​改變​真​係​好​啱,因為​聖經​一直​係​我哋​用​嚟​傳講​王國​好消息​嘅​主要​工具。(路加福音​24:27)上帝​嘅​僕人​行事​同​佢哋​嘅​法人​名稱​一致,熱心​推廣​聖經​教育,努力​分發​聖經,而且​鼓勵​人​閲讀​上帝​嘅​話語。例如,1926​年,我哋​用​自己​嘅​印刷機​印​咗《雙語​對照​强調​譯本》,就​係​由​本杰明​·​威爾遜​翻譯​嘅《希臘語​經卷》。 1942​年,我哋​開始​印刷《英王​欽定本》聖經​全​書,而且​分發​咗​大約​70萬​本。 兩​年​之後,我哋​開始​印刷《美國​標準​譯本》,上帝​嘅​名​耶和華​喺​呢個​譯本​裏面​出現​咗​6823​次。到​1950​年,我哋​已經​分發​咗​超過​25萬​本。

15,16. (甲)《聖經​新世界​譯本》有​邊啲​方面​係​你​鍾意​嘅?(討論​附欄“ 加​快​聖經​翻譯​工作”)(乙)你​想​耶和華​嘅​話語​打動​自己​嘅​心,可以​點樣​做​呢?

15 1950​年,《希臘語​經卷​新世界​譯本》(英語)面世。1961​年,《聖經​新世界​譯本》(英語)全​書​合成​一​本​發行。喺《希伯來語​經卷》部分,凡​係​出現​上帝​嘅​名​耶和華​嘅​地方,呢個​譯本​都​譯​咗​出嚟。至於《希臘語​經卷》部分,上帝​嘅​聖名​亦​都​喺​呢個​譯本​裏面​出現​咗​237​次。《新世界​譯本》經過​幾​次​修訂,最近​一​次​喺​2013​年,修訂​嘅​目的​係​要​確保​内容​準確,好​讀​易明。到​2013​年​為止,《新世界​譯本》全​書​或​部分​經卷​已經​譯​成​121​種​語言,發行量​超過​2億100萬​本。

16 有啲​人​讀​咗​自己​母語​翻譯​嘅《新世界​譯本》之後,有​咩​感受​呢?一​個​講​尼泊爾語​嘅​男子​話:“我哋​以往​使用​嘅​尼泊爾語​聖經​係​用​古典​語言​翻譯​嘅,好多​人​都​睇​唔​明。《新世界​譯本》用​嘅​係​日常​用語,易明​好多。” 中非共和國​嘅​一​個​女子​啱啱​開始​讀​桑戈語​嘅《新世界​譯本》,就​感動​到​喊​出嚟,佢​話:“呢個​真​係​打動​我​内心​嘅​語言​啊!”我哋​日日​都​讀​聖經,就​能够​好似​呢個​女子​噉,使​耶和華​嘅​話語​打動​我哋​嘅​心。(詩篇​1:2;馬太福音​22:36,37

 感激​君王​提供​嘅​工具​同​培訓

17. (甲)你​點樣​做​就​表明​自己​感激​耶穌​提供​嘅​工具​同​培訓?(乙)噉樣​做​會​帶​嚟​乜嘢​福分?

17 君王​耶穌​提供​咗​好多​工具​同​培訓,你​有​冇​珍惜​呢?你​有​冇​撥​出​時間​嚟​讀​上帝​組織​出版​嘅​書刊​呢?有​冇​用​呢啲​書刊​去​幫助​其他​人?如果​有​嘅​話,你​就​同​奧珀兒​·​貝特萊爾​有​一樣​嘅​感受。貝特萊爾​姊妹​喺​1914​年​10​月​4​日​受浸,佢​回憶​話:“咁​多​年​嚟,我​同​先生[​愛德華​]用​過​留聲機​同​見證卡​傳道。後嚟,我哋​逐家逐户​向​人​傳道,分發​書刊、册子​同​雜誌。我哋​亦​都​參加​過​唔​同​嘅​傳道​運動​同​宣傳​大會​演講​嘅​遊行,分發​過​大會​決議​傳單。我哋​仲​受​到​培訓​返​去​探訪​對​聖經​感​興趣​嘅​人,喺​對方​屋企​討論​聖經。我哋​嘅​一生​都​過​得​好​充實​好​開心。”耶穌​保證,佢​嘅​子民​將​會​努力​撒種​同​收割,一齊​歡欣​快樂。好似​奧珀兒​一樣,今日​幾百萬​傳道員​都​能够​作證,耶穌​嘅​話​一​句​都​冇​落空。(請​讀​約翰福音​4:35,36

18. 我哋​有​榮幸​做​咩​呢?

18 喺​好多​仲​未​信​從​君王​耶穌​嘅​人​睇嚟,上帝​嘅​子民​就​好似“冇​受​過​乜嘢​教育​嘅​平常​人”。(使徒行傳​4:13)試​諗​吓,君王​已經​使​呢啲​普通​人​喺​出版​方面​得到​輝煌​嘅​成績。佢哋​出版​嘅​書刊,有啲​係​歷史​上​翻譯​成​最​多​種​語言​同埋​發行量​最​大​嘅。更​重要​嘅​係,耶穌​教導​同​鼓勵​我哋​用​呢啲​工具,將​好消息​傳​到​萬國​萬族。我哋​可以​同​基督​一齊​撒播​真理​嘅​種子,從​事​收割​工作,將​佢​嘅​門徒​聚集​起嚟,呢個​係​幾​咁​大​嘅​榮幸​啊!

^ 2段 過​去​短短​十​年​間,耶和華​嘅​子民​就​印製​咗​200幾億​本​聖經​書刊。 另外,全​世界​有​超過​27億​人​能够​上​我哋​嘅​官方​網站​jw.org​瀏覽。

^ 9段 傳道員​用​嚟​教​人​認識​聖經​真理​嘅​書刊​仲​有:《上帝​嘅​豎琴》(英語,1921​年​出版);《以​上帝​為​真實》(1953​年​出版);《你​能够​永遠​生活​在​地上​的​樂園​裏》(1983​年​出版);《帶​來​永生​的​知識》(1995​年​出版)。

^ 12段《守望台》2013​年​7​月​15​日​刊​23​頁​13​段。關於“僕人[​僕役​]”係​邊個,文章​修正​咗​以往​嘅​理解。