跳到內容

跳到副菜單

跳到目錄

上帝嘅王國統治嘞!

 第​6​章

傳道嘅人——甘心獻出自己

傳道嘅人——甘心獻出自己

本​章​概要

君王​興​起​一​支​傳道​嘅​大軍

1,2. (甲)耶穌​犧牲​生命​之前​預告​咗​乜嘢?(乙)乜嘢​問題​有待​解答?

政治​領袖​經常​作​出​承諾,但​大部分​都​係​空頭支票。有啲​領袖​好​想​兑現​承諾,但​往往​都​有心無力。令​人​欣慰​嘅​係,彌賽亞​君王​耶穌​基督​講​到​做​到,從來​都​唔​會​食言。

2 耶穌​喺​1914​年​登基​作​王​之後,就​準備​實現​自己​喺​1900​年​前​預告​嘅​事。耶穌​犧牲​生命​之前​冇幾耐,預告​話:“天國​嘅​福音​先​要​傳遍​天下”。(馬太福音​24:14)呢個​預言​係​末世​徵象​嘅​一​部分,預言​嘅​應驗​表明​耶穌​已經​臨在,執掌​王權。但​問題​係:喺​呢​段​最後​嘅​日子,人人​都​自私自利、缺乏​愛心,對​宗教​冇​興趣,噉​君王​耶穌​點樣​興​起​一​支​甘心​捨己​嘅​傳道​大軍​呢?(馬太福音​24:12;提摩太後書​3:1-5)我哋​一定​要​揾​到​呢個​問題​嘅​答案,因為​答案​同​每​個​真基督徒​息息相關。

3. (甲)耶穌​深信​乜嘢?(乙)耶穌​點解​會​有​咁​大​嘅​信心?

3 再​嚟​睇​吓​耶穌​嘅​預言。“要​傳遍”呢​幾​個​字​唔​係​正正​顯示​出​耶穌​嘅​信心​咩?耶穌​深信​喺​最後​嘅​日子,一定​會​有​一​群​人​甘心​為​上帝​嘅​王國​效勞。點解​耶穌​會​有​咁​大​嘅​信心​呢?因為​佢​向​天父​學習。(約翰福音​12:45;14:9)耶穌​降世​為​人​之前​親眼​睇​到,耶和華​信任​崇拜​佢​嘅​人,深信​佢哋​有​甘心​樂意​嘅​精神。等​我哋​嚟​睇​吓​耶和華​點樣​表達​呢​種​信心。

“你​嘅​人民​會​自願​從​軍”

4. (甲)耶和華​請​以色列人​捐助​乜嘢​工程?(乙)以色列人​有​乜嘢​反應?

4 請​回想​一​下​耶和華​吩咐​摩西​建造​聖幕​嗰時,發生​咗​乜嘢​事。聖幕​係​以色列人​崇拜​耶和華​嘅​中心。耶和華​通過​摩西,請​所有​以色列人​捐助​呢​項​工程。摩西​對​以色列 人​講:“你哋​要​向​耶和華​獻​禮物。凡​樂意​嘅​可以​獻……”。結果,民衆​每​日​朝早​都​不斷“帶​禮物​嚟”。送​嚟​嘅​實​在​太​多​嘞,摩西​惟有​叫​佢哋​唔使​繼續​奉獻。(出埃及記​35:5;36:3,6)以色列人​確實​冇​辜負​耶和華​嘅​信任。

5,6. 詩篇​110:1-3​預告,耶和華​同​耶穌​相信​喺​最後​嘅​日子,真心​崇拜​上帝​嘅​人​會​顯​出​點樣​嘅​精神?

5 耶和華​係​唔​係​早就​相信,喺​最後​嘅​日子​崇拜​佢​嘅​人​會​甘心​獻​出​自己​呢?當然​係​啦!耶穌​喺​地上​出生​前​千​幾​年,耶和華​已經​啟示​大衛​寫​低,彌賽亞​開始​統治​嗰時​有​乜嘢​事​發生。(請​讀​詩篇​110:1-3耶穌​一​登基​作​王,就​受​到​仇敵​嘅​反對。不過,佢​有​一​支​擁護​王國​嘅​大軍,心甘情願​為​君王​效勞。連​年輕人​都​樂意​加入​呢​支​隊伍,佢哋​嘅​數目​就​好似​晨曦​中​覆蓋​大地​嘅​甘露​咁​多。 *

甘心​為​上帝​王國​效勞​嘅​人​多​如​甘露(見​第​5​段)

6 耶穌​知道,詩篇​110​篇​嘅​預言​所​講​嘅​就​係​佢​自己。(馬太福音​22:42-45)所以,耶穌​完全​有​理由​相信​自己​作​王​嗰時,一定​會​有​一​群​人​甘心​為​佢​效勞,樂意​將​王國​嘅​好消息​傳遍​世界​各​地。歷史​話​俾​我哋​知​乜嘢​呢?喺​最後​嘅​日子,君王​耶穌​有​冇​興​起​一​支​甘心​捨己​嘅​傳道​大軍​呢?

“宣揚​呢個​信息​係​我​嘅​榮幸,亦​都​係​我​嘅​責任”

7. 耶穌​作​王​之後,點樣​幫助​門徒​做​好​準備,迎接​前頭​嘅​任務?

7 耶穌​作​王​之後​冇幾耐,就​幫助​門徒​做​好​準備,迎接​前頭​重大​嘅​任務。呢​本​書第​2​章講​過,從​1914​年​到​1919​年​初期,耶穌​視察​同埋​潔淨​聖殿。(馬拉基書​3:1-4)1919​年 後期,耶穌​委派​忠信​嘅​奴隸​帶領​佢​嘅​門徒。(馬太福音​24:45)從​嗰時​開始,忠信​嘅​奴隸​就​通過​大會​演講​同埋​出版物​嚟​分發​靈糧,反覆​强調​每​個​基督徒​都​有​責任​親自​去​傳道。

8-10. 大會​點樣​促進​傳道​工作?請​舉​例。(另​見​附欄“ 早期​嘅​大會​促進​傳道​工作”)

8 大會​演講 1919​年​9​月​1-8​日,聖經研究者​喺​美國​俄亥俄州​杉樹角​舉行​大會。呢個​係​第一次世界大戰​之後​嘅​第​一​個​重要​大會,大家​都​好​想​知道​上帝​嘅​組織​有​乜嘢​指示。大會​嘅​第​二​日,盧述福​弟兄​喺​演講​當中​明確​噉​話​俾​聽衆​知:“基督徒​喺​地上​嘅​使命……係​宣揚​主​嘅​王國。”

9 三​日​之後,盧述福​弟兄​發表​咗​一​個​題目​叫​做“向​同工​講​話”嘅​演講,將​大會​推​向​高潮。佢​話:“基督徒​靜​落嚟​嗰時​好​自然​會​諗​一​諗:我​喺​地上​有​乜嘢​使命​呢?答案​應該​係,主​仁慈​噉​派​我​做​大使,勸​世人​同​上帝​和好。宣揚​呢個​信息​係​我​嘅​榮幸,亦​都​係​我​嘅​責任。”後嚟,呢個​演講​以《宣揚​王國》作​為​題目,喺《守望台》刊登​出嚟。

10 喺​呢個​具有​歷史​意義​嘅​演講​當中,盧述福​弟兄​宣布​發行​一​本​新​雜誌《黃金時代》(而家​叫​做《警醒!》),目的​係​要​幫助​人​明白​上帝​嘅​王國​係​人類​惟一​嘅​希望。盧述福​弟兄​問​聽衆:“邊個​願意​分發​呢​本​雜誌?”大會​嘅​一​份​報告​描述​當時​嘅​情景​話:“在場​嘅​6000​人​一齊​企​咗​起身。聽衆​嘅​反應​咁​熱烈,真​係​激動​人​心!” *好​明顯,君王​耶穌​有​一​支​甘心​為​佢​效勞​嘅​大軍,樂意​傳講​佢​嘅​王國。

11,12. 1920​年​有​一​期《守望台》指​出,耶穌​預告​嘅​傳道​工作​會​喺​幾時​執行?

11 出版物 耶穌​預告,“天國​嘅​福音​先​要​傳遍​天下”。通過《守望台》嘅​文章,我哋​越​嚟​越​明白​傳道​工作​嘅​意義​有​幾​重大。請​睇​吓​上​個​世紀​20​年代​初​嘅​一​啲​例子。

12 基督​嘅​大軍​會​傳講​乜嘢​好消息,從​而​應驗​馬太福音​24:14​嘅​預言​呢?幾時​會​傳講​呢個​好消息?英語版《守望台》1920​年​7​月​1​日​刊​嘅​一​篇​文章《王國​嘅​福音》解釋​呢​節​經文​話:“好消息​係​同​舊​制度​嘅​終結​以及​彌賽亞​王國​嘅​建立​有關​嘅。”至於​幾時​傳講,文章​接​落嚟​清晰​噉​指​出:“從​[第​一​次​世界​]大戰​直到‘大患難’,呢個​好消息​一定​要 傳講​出​去。……而家​係​時候​將​呢個​好消息​喺​信奉​基督​嘅​國家​裏面​廣傳​開去。”

13. 1921​年,《守望台》點樣​鼓勵​受膏​基督徒​甘心​獻​出​自己?

13 上帝​嘅​子民​係咪​迫於無奈,先至​做​耶穌​預告​嘅​傳道​工作​呢?唔​係​嘅。英語版《守望台》1921​年​3​月​15​日​刊​嘅​一​篇​文章《要​剛强​壯膽》鼓勵​受膏​基督徒​甘心​獻​出​自己,促請​每​個​人​諗​一​諗:“參與​傳講​好消息​嘅​工作,唔​係​無上​嘅​光榮​咩?唔​係​我​嘅​本分​咩?”文章​跟住​話:“主​嘅​話​喺​耶利米​心​入面‘焚燒,鑽​入[佢]嘅​骨髓’,佢​冇​辦法​唔​講​出嚟。當​你​將​傳道​工作[睇​成​係​殊榮],就​一定​會​好似​耶利米​噉樣,忍​唔​住​要​傳講​上帝​嘅​話語。”(耶利米書​20:9)呢​番​鼓舞​人心​嘅​説話,反映​出​耶和華​同​耶穌​信任​忠心​為​王國​效勞​嘅​人。

14,15. 1922​年《守望台》勸勉​受膏​基督徒​用​乜嘢​方法​向​人​傳道?

14 真​基督徒​應該​點樣​向​人​傳講​王國​嘅​信息​呢?英語版《守望台》1922​年​8​月​15​日​刊,有​一​篇​簡短​有力​嘅​文章​叫​做《服務​至為​重要》,勸勉​受膏基督徒​要“主動​上門​探訪​人,向​佢哋​分發​書刊,指​出​天上​嘅​王國​臨近​嘞”。

15 好​明顯,自從​1919​年​以​來,基督​一直​通過​忠信​睿智​嘅​奴隸​反覆​强調,宣揚​上帝​王國​嘅​好消息​係​基督徒​喺​地上​嘅​職責,亦​都​係​佢哋​嘅​殊榮。噉​早期​嘅​聖經研究者​有​冇​聽從​呢個​勸勉​呢?

“忠心​嘅​人​甘願​獻​出​自己”

16. 對於​所有​基督徒​都​應該​參與​傳道​工作,有啲​被​選​出嚟​嘅​長老​有​乜嘢​反應?

16 上​世紀​二三十​年代,有啲​人​唔​同意​所有​受膏​基督徒​都​應該​參與​傳道​工作。英語版《守望台》1927​年​11​月​1​日​刊​指​出​當時​嘅​情況​話:“教會​[會衆​]裏面​有啲​長老……唔單止​唔​帶頭​傳道,亦​都​唔​肯​鼓勵​弟兄​傳道。……佢哋​仲​藐視​逐家逐户​宣揚​上帝、君王​同​王國​嘅​建議。”文章​明確​噉​指​出:“而家,忠心​嘅​弟兄​要​記​低​而且​避開​呢啲​人,亦​都​要​令​佢哋​知道,佢哋​會​失去​長老​嘅​職分。” *

17,18. (甲)會衆​大部分​人​對​忠信​奴隸​嘅​指示​有​乜嘢​反應?(乙)過去​百幾​年​期間,有​好​幾百萬​人​點樣​做?

17 令​人​高興​嘅​係,會衆​大部分​人​都​聽從​忠信​奴隸​嘅​指示,熱心​傳講​上帝​王國​嘅​信息,而且​以​呢​項​工作​為​榮。英語版《守望台》1926​年​3​月​15​日​刊​有​句​話​噉​講:“忠心​嘅 人​甘願​獻​出​自己,向​人​傳講​上帝​嘅​王國。”佢哋​用​行動​證明​自己​樂意​為​彌賽亞​君王​效勞,應驗​咗​詩篇​110:3​嘅​預言。

18 過去​百幾​年​期間,有​好​幾百萬​人​樂意​獻​出​自己​嚟​宣揚​上帝​嘅​王國。接​落嚟​嘅​幾​章​會​講​吓​佢哋​點樣​傳道——所​用​嘅​方法​同​工具,以及​傳道​工作​有​乜嘢​成果。下文​會​先​講​吓,喺​呢個​以​自我​為​中心​嘅​世界​裏面,點解​仲​有​咁​多​人​自願​傳講​上帝​嘅​王國。不妨​一邊​睇,一邊​問​吓​自己:“點解​我​要​向​人​傳講​好消息​呢?”

“要​先​求​上帝​嘅​國”

19. 點解​我哋​聽從​耶穌​嘅​勸告“要​先​求​上帝​嘅​國”?

19 耶穌​勸​門徒“要​先​求​上帝​嘅​國”。(馬太福音​6:33)點解​我哋​聽從​耶穌​嘅​勸告​呢?主要​係​因為​我哋​睇​出​上帝​王國​嘅​重要性。上帝​要​實現​佢​嘅​旨意,佢​嘅​王國​係​必​不可​少​嘅。前​一​章​已經​講​過,聖靈​逐步​啟示​人​明白​振奮​人心​嘅​王國​真理。我哋​俾​呢啲​寶貴​嘅​真理​深深​打動,自然​就​會​先​追求​王國。

基督徒​揾​到​上帝​王國​嘅​真理,就​好似​一​個​人​揾​到​隱藏​嘅​財寶​噉,開心​到​不得了(見​第​20​段)

20. 寶藏​嘅​比喻​點樣​表明,耶穌​嘅​門徒​會​聽從​勸告,不斷​先​追求​王國?

20 耶穌​知道​門徒​會​聽從​勸告,不斷​先​追求​王國。請​睇睇​一​個​關於​寶藏​嘅​比喻。(請​讀​馬太福音​13:44耶穌​喺​比喻​裏面​提​到,耕田​嘅​人​做​緊​平日​嘅​工作​嗰時,偶然​發現​藏​喺​野地​嘅​財寶,即刻​就​睇​出​佢​好​有​價值。耕田​嘅​人​點​做​呢?“[佢]好​高興​將​自己​所有​嘅​都​變賣,去​買​嗰​塊​田。”我哋​從​呢個​比喻​學​到​乜嘢​呢?我哋​揾​到​上帝​王國​嘅​真理,睇​出​呢啲​真理​非常​寶貴,就​樂意​作出​任何​犧牲,務求​繼續​將​上帝​嘅​王國​放​喺​應​有​嘅​位置——我哋​生活​嘅​首位。 *

21,22. 忠於​上帝​王國​嘅​人​點樣​表明​自己​先​追求​上帝​嘅​王國?請​舉​例​説明。

21 點樣​表明​自己​先​追求​上帝​嘅​王國​呢?忠於​上帝​王國​嘅​人​唔​會​淨係​講​而​唔​去​做。佢哋​會​獻​出​自己​嘅​才幹、財物,甚至​獻​出​一​生​嚟​傳講​上帝​嘅​王國。為咗​參與​全時​服務,唔​少​人​作出​好​大​嘅​犧牲。所有​甘心​樂意​傳道​嘅​人​都​可以​憑​自己​嘅​親身​經歷​作證:凡​係​先​追求​王國​嘅,一定​會​得到​耶和華​嘅​賜​福。等​我哋​嚟​睇​吓​早期​嘅​一​個​例子。

22 上​世紀​20​年代​後期,埃弗里​·​布里斯托​同​妻子​洛文婭​開始​喺​美國​南部​做​派書者(而家​叫​做​先驅)。好多​年​之​ 後,洛文婭​回憶​話:“我​同​埃弗里​一齊​做​先驅​好多​年,度​過​唔少​快樂​嘅​時光。有​好多​次,我哋​冇​錢​加油​或者​買​食物,但係​耶和華​一直​都​通過​某​啲​方式​令​我哋​得到​生活​嘅​必需品。就​噉樣,我哋​一直​做​先驅,從來​都​唔​會​缺衣少食。”洛文婭​記得​佢哋​兩​個​喺​佛羅里達州​彭薩科拉鎮​服務​嗰時,有​一​次​啲​錢​就​快​使​晒,食物​亦​都​就​嚟​食​完。佢哋​返​到​活動​房屋車,發現​有​兩​大​袋​食物,仲​有​張​紙仔,上面​寫​住:“請​接受​彭薩科拉連​嘅​愛。” *回顧​過去​幾十​年​做​先驅​嘅​經歷,洛文婭​話:“耶和華​從來​都​冇​揼低​我哋​唔​理,我哋​信賴​佢,佢​一​定​唔​會​令​我哋​失望。”

23. (甲)你​對​自己​揾​到​嘅​王國​真理​有​乜嘢​感覺?(乙)你​決心​點樣​做​呢?

23 我哋​人人​嘅​情況​都​唔​同,唔​一定​可以​用​同樣​多​嘅​時間​傳道。但係,每​個​人​都​可以​專心一意​宣揚​好消息,將​佢​睇​成​係​殊榮。(歌羅西書​3:23)由於​我哋​珍視​所​揾​到​嘅​寶貴​嘅​王國​真理,好​想​盡心​竭力​為​王國​效勞,所以​無論​要​犧牲​乜嘢,我哋​都​心甘情願,甚至​毫​不​猶豫​噉​做。你​係咪​都​有​噉​嘅​決心​呢?

24. 喺​最後​嘅​日子,上帝​王國​嘅​一​個​偉大​成就​係​乜嘢?

24 過​去​一百​年​間,君王​耶穌​的確​講​到​做​到,馬太福音​24:14​記載​嘅​預言​已經​應驗​咗。點樣​應驗​呢?耶穌​嘅​門徒​棄絶​咗​呢個​世界​以​自我​為​中心​嘅​態度,獻​出​自己​傳講​上帝​嘅​王國,但​唔​係​出於​勉强,而​係​甘心​樂意。佢哋​喺​世界​各​地​所​做​嘅​傳道​工作,係​上帝​王國​喺​呢​段​最後​日子​嘅​一​個​偉大​成就,呢個​清楚​表明​耶穌​已經​臨在,執掌​王權​嘞。

^ 5段 喺​聖經​裏面,甘露​通常​同​豐足、盈溢​有關。(創世記​27:28;米迦書​5:7

^ 10段 《主​嘅​工作​交託​俾​邊個?》(英語)呢​本​小​册子​話:“《黃金時代》用​嚟​喺​逐家逐户​傳道​時​分發。……講​出​上帝​王國​嘅​信息​之後,無論​住户​訂​唔​訂​雜誌,都​可以​俾​對方​一​本《黃金時代》。”之後​有​好多​年,上帝​嘅​組織​鼓勵​弟兄​姊妹​話​俾​住户​知,唔單止​可以​訂《守望台》,仲​可以​訂《黃金時代》。 從​1940​年​2​月​1​日​開始,上帝​嘅​組織​鼓勵​弟兄​姊妹​將​雜誌​一本本​噉​分發​出去,而且​記​低​分發​嘅​數量。

^ 16段 當時,長老​係​由​會衆​成員​投票​選​出嚟​嘅。所以,會衆​可以​唔​選​嗰啲​唔​肯​去​傳道​嘅​弟兄​做​長老。後嚟,會衆​嘅​長老​係​上帝​嘅​組織​根據​聖經​標準​委任​嘅。呢​本​書第​12​章會​講​吓​呢​一​點。

^ 20段 耶穌​喺​另​一​個​比喻​裏面​亦​都​講​明​咗​同樣​嘅​道理。比喻​講​到​一​個​商人​尋找​貴重​嘅​珍珠,一​揾​到​就​即刻​賣​晒​所有​嘢,買​咗​嗰​粒​珍珠。(馬太福音​13:45,46)呢​兩​個​比喻​話​俾​我哋​知,人​可能​會​通過​唔​同​嘅​途徑​認識​王國​嘅​真理。有啲​係​偶然​遇​到​嘅,有啲​係​刻意​去​揾​嘅。不過,無論​點樣​揾​到​真理,我哋​都​願意​作出​犧牲,將​上帝​嘅​王國​放​喺​生活​嘅​首位。

^ 22段 嗰個​年代,會衆​叫​做“連”。