跳到內容

跳到副菜單

跳到目錄

上帝嘅王國統治嘞!

 第​2​章

上帝嘅王國喺天上誕生咗

上帝嘅王國喺天上誕生咗

本​章​概要

上帝​嘅​子民​點樣​做​好​準備,迎接​上帝​王國​嘅​誕生

1,2. (甲)世界​歷史​上​發生​咗​乜嘢​前所未有​嘅​重大​事件?(乙)人​睇​唔​到​呢​件​大事​發生,點解​係​好​平常​嘅​呢?

你​有​冇​諗​過,生活​喺​歷史​上​一​個​重大​嘅​轉折​時期​係​點​嘅​呢?唔​少​人​都​曾經​諗​過。就算​你​真​係​生活​喺​噉樣​嘅​時期,又​有​冇​機會​親眼​睇​到,嗰啲​促成​世界​改變​嘅​重大​事件​呢?可能​未必。歷史​記載​咗​好多​改朝換代、政權​更替​嘅​内容,但係​促成​呢啲​改變​嘅​事件,往往​都​係​喺​幕後​策劃​嘅。換言之,歷史​上​好多​事​都​發生​喺​宮廷、密室、政府​機關​等等​呢啲​唔​係​一般​人​可以​隨便​出入​嘅​地方,呢啲​事​好多​人​都​唔​知道,但係​就​會​影響​到​千萬​人​嘅​生活。

2 噉​世界​歷史​上​發生​咗​一​件​前所未有​嘅​重大​事件,你​又​知​唔​知​呢?呢​件​大事​係​人​睇​唔​到​嘅,不過​就​會​影響​到​千萬​人​嘅​生活。係​乜嘢​大事​呢?就​係​上帝​嘅​王國​喺​天上​誕生​咗。呢個​王國​係​上帝​喺​好​耐​之前​就​應許​嘅​彌賽亞​政府,好​快​就​會​將​撒但​世界​嘅​整​個​制度​徹底​毁滅。(請​讀​但以理書​2:34,35,44,45既然​人​睇​唔​到​上帝​王國​嘅​誕生,噉​係咪​話,耶和華​唔​想​俾​人​知道​呢​件​事​呢?定​係​佢​喺​事​前​已經​幫助​佢​嘅​忠貞​子民​做​好​準備,迎接​上帝​王國​嘅​誕生​呢?等​我哋​嚟​睇​下。

“我​要​打發​我​嘅​使者​為​我​預備​道路”

3-5. (甲)馬拉基書​3:1​提​到​嗰​位​宣告​約​嘅​使者​係​邊個?(乙)宣告​約​嘅​使者​嚟​視察​聖殿​之前,有​乜嘢​事​發生?

3 耶和華​喺​古代​就​定意​佢​嘅​子民​做​好​準備,迎接​彌賽亞​王國​嘅​誕生。點解​噉​講?請​睇​下​馬拉基書​3:1​嘅​預言:“我​要​打發​我​嘅​使者​為​我​預備​道路。然後​你哋​所​揾​嘅​主​會​突然​來​到​佢​嘅​聖殿;你哋​渴望​睇見​嘅​使者​會​來​宣告​我​嘅​約。”

4 喺​現代,至高​主宰​耶和華​幾時​嚟​視察​喺​屬靈​聖殿​地上​院子​裏面​敬奉​佢​嘅​人​呢?馬拉基​嘅​預言​指​出,耶和華​會 同​嗰個“宣告[​佢​]嘅​約”嘅​使者​一齊​嚟。呢​位​宣告​約​嘅​使者​係​邊個​呢?就​係​上帝​應許​嘅​彌賽亞​君王​耶穌​基督。(路加福音​1:68-73)佢​登基​作​王​之後,就​嚟​視察​同埋​熬煉​上帝​喺​地上​嘅​子民。(彼得前書​4:17

5 馬拉基書​3:1​一​開始​提​到“預備​道路”嘅​使者​又​係​邊個​呢?喺​彌賽亞​君王​臨在​之前,呢​位​使者​所​預表​嘅​人​早​就​已經​出現​咗。1914​年​之前​幾十​年,有​冇​人​喺​彌賽亞​君王​面前“預備​道路”呢?

6. 馬拉基​預告​會​有​一​位“預備​道路”嘅​使者​先​嚟​幫​上帝​嘅​子民​做​好​準備,應付​前頭​要​發生​嘅​事。呢​位​使者​指​嘅​係​邊啲​人?

6 呢​本​書​講述​耶和華​嘅​子民​振奮​人心​嘅​現代​歷史。我哋​回顧​呢​段​歷史,就​可以​揾​到​以​上​問題​嘅​答案。19​世紀​嘅​下半​世紀,有名無實​嘅​基督徒​為數​衆多。但​有​一​小群​人​忠於​上帝,佢哋​所​做​嘅​事​表明​自己​係​惟一​嘅​一​群​真​基督徒。呢​群​人​後嚟​叫​做​聖經研究者,當中​帶頭​嘅​係​查爾斯·羅素​同​佢​嘅​同工。呢啲​帶頭​嘅​弟兄​就​好似​馬拉基​預告“預備​道路”嘅​使者,為​上帝​嘅​子民​提供​屬靈​嘅​指引,幫助​佢哋​做​好​準備,應付​前頭​要​發生​嘅​事。下文​會​講​下,馬拉基​預告“預備​道路”嘅​使者​喺​四​方面​幫助​上帝​嘅​子民​準備​妥當。

按​真理​崇拜​上帝

7,8. (甲)喺​19​世紀,邊啲​人​開始​揭露​靈魂不死​嘅​教義​係​錯誤​嘅​呢?(乙)羅素​同​佢​嘅​同工​仲​揭露​咗​邊啲​錯誤​嘅​道理?

7 聖經研究者​努力​研讀​聖經,禱告​求​上帝​指引;佢哋​辨明​聖經​嘅​真理,得​出​一致​嘅​結論,就​記錄​落嚟,然後​出版。千百​年​嚟,一般​教會​一直​處於​屬靈​嘅​黑暗​當中,佢哋​嘅​主張​大部分​都​源自​異教。一​個​典型​嘅​例子​就​係​靈魂不死​嘅​教義。到​咗​19​世紀,經過​仔細​查考,幾​個​誠心​研究​聖經​嘅​人​睇​出​靈魂不死​嘅​教義​冇​聖經​根據。亨利·格魯、喬治·斯特森​同埋​喬治·斯托爾斯​都​寫​咗​好多​文章,亦​都​發表​過​一啲​演講,大膽​揭露​靈魂不死​嘅​教義​係​撒但​所​講​嘅​大話! *佢哋​嘅​研究​對​羅素​同​佢​嘅​同工​産生​咗​深遠​嘅​影響。

8 呢​一​小群​聖經研究者​發現,同​靈魂不死​有關​嘅​其他​教義,例如​話​好人​上​天堂,壞人​落​地獄;上帝​用​地獄永火​嚟​折磨​壞人​嘅​呢啲​講法,唔單止​好​難​理解,而且​係​錯誤​嘅。羅素​同​佢​嘅​同工​通過​文章、傳單、書本、小册子​同埋​喺​報章​上面​發表​嘅​傳道​演講,大膽​噉​揭穿​呢啲​謊言。

9. 關於​三位一體​嘅​教義,《錫安​嘅​守望台》點樣​講?

9 聖經研究者​仲​指​出,一般​教會​所​推崇​嘅​三位一體​教義,唔​係​以​聖經​為​依據​嘅。1887​年,英語版《錫安​嘅​守望台》 話:“聖經​清楚​表明,耶和華​同​我哋​嘅​主​耶穌​唔​係​同​一​個​個體,佢哋​各自​存在。聖經​亦​都​明確​噉​指​出​耶和華​同​耶穌​係​乜嘢​關係。”文章​接住​講:“三一神論(意思​係​一​神​共有​三位、三位​共​為​一​神)竟然​備受​推崇,而且​廣為​大衆​接納,真​係​不可思議。呢​一切​表明​乜嘢​呢?表明​教會​瞓​得​好​淰,連​自己​俾​仇敵​用​錯誤​主張,好似​鎖鏈​噉​鎖住,都​完全​唔​知道。”

10. 點解《守望台》話​1914​年​係​個​重要​嘅​年份?

10 通過​雜誌​嘅​全​名《錫安​嘅​守望台​與​基督​臨在​嘅​先聲》可以​睇​出,呢​本​雜誌​着重​講​有關​基督​臨在​嘅​預言。編寫​文章​嘅​忠心​受膏基督徒​睇​出,但以理​預告​嘅“七期” *,係​同​上帝​將​會​喺​咩​時候,實現​佢​對​彌賽亞​王國​所​定​嘅​旨意​有關​嘅。喺​19​世紀​70​年代,佢哋​早就​已經​指​出“七期”會​喺​1914​年​結束。(但以理書​4:25;路加福音​21:24)嗰時,我哋​嘅​弟兄​雖然​未​完全​明白​呢個​重要​年份​嘅​意義,但​依然​將​自己​所​知道​嘅​聖經​真理​廣傳​開去,對​後嚟​嘅​人​影響​深遠。

11,12. (甲)羅素​弟兄​對​聖經​真理​有​清晰​嘅​了解,佢​將​功勞​歸俾​邊個?(乙)1914​年​之前​幾十​年,羅素​弟兄​同​佢​嘅​同工​所​成就​嘅​事​有​幾​重要?

 11 羅素​同​呢啲​忠心​嘅​同工​一齊​鑽研​聖經,發現​咗​上面​提​到​嘅​重要​真理,而且​對​呢啲​真理​有​清晰​嘅​了解,但係​佢哋​從來​都​冇​將​功勞​歸俾​自己。羅素​將​功勞​歸俾​嗰啲​喺​佢​之前​尋求​真理​嘅​人。最​重要​嘅​係,佢​將​功勞​歸俾​耶和華​上帝,因為​上帝​知道​應該​喺​乜嘢​時候,將​佢​子民​需要​認識​嘅​真理​教導​佢哋。羅素​同​佢​嘅​同工​努力​將​真理​同​謬誤​區分​開來,顯然​得到​耶和華​嘅​賜​福。隨​住​時間​過去,佢哋​同​一般​教會​嘅​差異​越​嚟​越​明顯。

羅素​弟兄​同​佢​嘅​同工​捍衛​聖經​真理

12 1914​年​之前​嘅​幾十​年,呢啲​忠心​嘅​男子​一直​努力​捍衛​真理,佢哋​所​成就​嘅​事,真​係​令​人​欽佩。回顧​以往,英語版《守望台​與​基督​臨在​嘅​先聲》1917​年​11​月​1​日​刊​話:“好多​人​因為​相信​地獄永火​同埋​其他​錯誤​嘅​道理,覺得​好​驚,而家​佢哋​已經​擺脱​咗​恐懼​嘞。……四十​幾​年​前,真理​好似​潮水​噉​不斷​上漲,越​漲​越​高,直到​彌漫​全​地。反對者​企圖​阻止​真理​傳遍​大地,就​好似​用​掃把​將​湧​過嚟​嘅​海浪​掃翻​落​大海​噉,簡直​就​係​白費​心機!”

13,14. (甲)馬拉基​預告“預備​道路”嘅​使者​點樣​為​彌賽亞​王國​嘅​君王​預備​道路?(乙)從​呢啲​生活​喺​百幾​年​之前​嘅​弟兄​身上,我哋​學​到​乜嘢​呢?

13 請​諗​一​下:喺​上帝​嘅​子民​當中,有啲​人​連​耶穌​同​佢​天父​耶和華​嘅​身份​都​分​唔​清;有啲​人​以​為​不​死​嘅​生命​係​所有​人​自然​就​會​得到​嘅,而​唔​係​上帝​賜​俾​少數​受膏基督徒​嘅​寶貴​禮物;有啲​人​相信​上帝​用​地獄永火​嚟​折磨​人,落​入​地獄​嘅​人​永遠​都​得​唔​到​解脱。如果​上帝​嘅​子民​繼續​俾​呢啲​錯誤​嘅​道理​蒙蔽,到​咗​基督​開始​臨在​嗰時​又​點​可以​做​好​準備​呢?當然​冇​可能。馬拉基​預告“預備​道路”嘅​使者​的確​為​彌賽亞​君王​預備​咗​道路,呢​一​點​係​毫無​疑問​嘅。

14 噉​我哋​呢?從​呢啲​生活​喺​百幾​年​之前​嘅​弟兄​身上,我哋​學​到​乜嘢​呢?就​好似​佢哋​噉,我哋​要​喜愛​閲讀​聖經,努力​鑽研​上帝​嘅​話語。(約翰福音​17:3)呢個​世界​注重​物質​享受,喺​屬靈​方面​越​來​越​貧乏,但​願​我哋​唔​會​受​世界​嘅​影響,對​靈糧​嘅​熱愛​有增無減!(請​讀​提摩太前書​4:15

“我​嘅​子民!你哋​要​從​嗰​個​城​出嚟”

15. 聖經研究者​慢慢​睇​出​乜嘢​呢?(另​見​腳注)

15 聖經研究者​教導​話,真基督徒​必須​脱離​所有​同​世界​友好​嘅​教會。1879​年,英語版《守望台》提​到​嘅“巴比倫​教會”,指​嘅​係​乜嘢​呢?係​歷代​教宗,定​係​羅馬​天​主​教會?幾​百​年​嚟,基督新教​嘅​唔​同​教​派​一直​認為,聖經​預言​提​到​嘅 “巴比倫”係​天主教會。但係,聖經研究者​慢慢​睇​出,現代​嘅“巴比倫”包括​所有​鼓吹​錯誤​道理​嘅​教會。點解​噉​講​呢?因為​呢啲​教會​都​用​上文​提​到​嘅​謊言​作​為​教義。 *一​段​時間​之後,上帝​組織​嘅​出版物​越​嚟​越​明確​噉​指​出,“巴比倫​教會”裏面​誠心正意​嘅​人​應該​點樣​做。

16,17. (甲)《千禧年​黎明》第​3​卷​同《守望台》提​出​乜嘢​勸告,促請​人​同​錯誤​嘅​宗教​斷絶​關係?(乙)點解​呢個​勸告​初時​唔​係​咁​有效?(見​腳注)

16 就​以​1891​年​出版​嘅《千禧年​黎明》(英語)第​3​卷​作​為​例子,呢​本​書​提​到​上帝​會​捨棄​現代​嘅“巴比倫”,話:“呢個​複雜​混亂​嘅​宗教​制度​會​全部​被​捨棄。”跟住​仲​話,“凡​係​唔​認同‘巴比倫’嘅​錯誤​主張​同​宗教​習俗​嘅,而家​就​要​離開​佢”。

17 當時,有啲​人​嘅​名​仲係​留​喺​教會​嘅​名册​上面,佢哋​為​自己​辯解​話:“我​完全​認同​真理,亦​都​冇​點​去​教堂​嘞。”英語版《守望台》1900​年​1​月​刊​提​出​勸告:“呢​種‘一​腳​踏​兩​船’嘅​做法​係咪​啱​嘅​呢?上帝​所​要求​嘅​服從​係咪​只​係​噉​呢?……上帝​會​唔​會​接受​同​鍾意​噉​嘅​行為​呢?當然​唔​會。試​諗下,一​個​人​加入​某​個​教會,就​等於​公開​同​嗰​個​教會​訂立​咗​一​個​約。佢​應該​遵守​呢個​約​嘅​全部​規定,直到​佢……公開​噉​聲明​自己​退出​教會​為止。”隨​住​時間​嘅​過去,呢個​勸告​嘅​措辭​越​嚟​越​强烈。 *耶和華​嘅​僕人​一​定​要​同​錯誤​嘅​宗教​斷絶​一切​關係。

18. 點解​人​一定​要​從“大巴比倫”裏面​出嚟?

18 請​諗下,如果​當時​冇​人​經常​發出​警告,促請​人​離開“大巴比倫”,又​點會​有​一​群​受膏​嘅​基督徒​喺​地上​做​好​準備,為​啱啱​登基​嘅​君王​基督​效勞​呢?基督徒​一​定​要​擺脱“大巴比倫”嘅​枷鎖,先至​可以​按​靈​同​真理​崇拜​耶和華。(約翰福音​4:24,17:17)同樣,今日​我哋​有​冇​決心​唔​俾​錯誤​嘅​宗教​玷污​自己​呢?願​我哋​嚟​時刻​服從​上帝​嘅​命令:“我​嘅​子民!你哋​要​從​嗰​個​城​出嚟!”(請​讀​啟示錄​18:4

聚集​起嚟​崇拜​耶和華

19,20. 《守望台》點樣​鼓勵​上帝​嘅​子民​聚集​起嚟​崇拜​耶和華?

19 聖經研究者​教導​話,真基督徒​一​有​機會​就​應該​聚集​起嚟​崇拜​耶和華。真​基督徒​唔單止​要​脱離​錯誤​嘅​宗教,仲​要​用​正確​嘅​方式​嚟​崇拜​上帝。《守望台》從​一​開始​就​鼓勵​讀者​聚集​起嚟​崇拜​耶和華。例如,喺​英語版《守望台》1880​年​7​月​刊,羅素​弟兄​提​到​佢​嘅​一​次​巡迴​演講,佢​話​自己​參加​過​嘅​聚會​非常​鼓舞​人心。佢​鼓勵​讀者​將​自己​參加​聚會​嘅​經歷​寫​喺​卡片​上面​寄俾《守望台》,其中​一啲​經歷​會​登​出嚟。 點解​噉​做​呢?“我哋​想​知道……主​點樣​祝福​你哋,亦​都​想​知道​你哋​有​冇​繼續​同​信仰​一致​嘅​人​聚集​起嚟。”

1909​年,喺​丹麥​嘅​哥本哈根,查爾斯·羅素​同​早期​嘅​一​群​聖經研究者​合照

20 1882​年,英語版《守望台》刊登​咗​一​篇​叫《齊聚一堂》嘅​文章。呢​篇​文章​强調​基督徒​要​聚集​喺​一齊,“互相​交流,彼此​鼓勵​同​强化”。文章​話:“有​冇​學識​或者​才能​並​唔​重要,重要​嘅​係​出席​聚會。每​個​人​要​帶​自己​嘅​聖經、紙​同​筆,如果​有​參考書,例如《聖經​詞語​索引》,亦​都​可以​帶埋​嚟。首先​揀​一​個​課題;跟住​禱告​求​上帝​賜​聖靈​指引​我哋​明白​探討​嘅​資料;然後​閲讀、思考、對比​經文。噉樣,你哋​就​一定​可以​明白​真理。”

21. 關於​聚會​同​牧養​工作,我哋​可以​點樣​效法​美國​賓夕法尼亞州​阿勒格尼市​嘅​會衆?

21 聖經研究者​嘅​總部​辦事處​設​喺​美國​賓夕法尼亞州​嘅​阿勒格尼市,喺​嗰度​工作​嘅​弟兄​聽從​聖經​嘅​吩咐​聚集​起嚟,係​我哋​學習​嘅​好​榜樣。(請​讀​希伯來書​10:24,25一​位​年長​嘅​弟兄​查爾斯·卡彭,細個​嗰陣​參加​過​呢啲​聚會。好多 年​之後,佢​回憶​話:“我​仲​記得​當時​大會堂​嘅​牆​上面​寫​住​一​節​經文,‘只​有​一​位​係​你哋​嘅​老師,就​係​基督;你哋​彼此​係​兄弟’。呢​節​經文​經常​喺​我​嘅​腦海​裏面​迴響——耶和華​嘅​子民​當中​確實​冇​教士​同​平信徒​嘅​分别。”(馬太福音​23:8)卡彭​弟兄​又​話,聚會​嘅​内容​發人深省,弟兄​姊妹​深​受​鼓勵,羅素​弟兄​仲​付出​好​大​嘅​努力​去​牧養​會衆​嘅​每​個​成員。

22. (甲)聖經​鼓勵​基督徒​舉行​聚會,忠心​嘅​基督徒​有​乜嘢​反應?(乙)我哋​從​佢哋​身上​學​到​乜嘢?

22 忠心​嘅​基督徒​效法​總部​嘅​弟兄,聽從​指引​聚集​起嚟。喺​美國​嘅​俄亥俄州、密歇根州​同​其他​州,會衆​陸續​成立。後嚟,喺​成​個​北美洲​以至​其他​國家​都​成立​咗​會衆。試​諗下:當時​忠心​嘅​基督徒​如果​冇​受​到​教導,聽從​聖經​嘅​吩咐​聚集​起嚟​崇拜​耶和華,真​係​可以​為​基督​嘅​臨在​做​好​準備​咩?當然​唔​可以。噉​我哋​呢?我哋​亦​都​應該​下​定​決心,唔​錯過​聚會,盡​己​所​能​同​弟兄​姊妹​一齊​崇拜​耶和華,喺​屬靈​方面​互相​鼓勵。

熱心​傳道

23. 《守望台》點樣​清楚​指​出,所有​受膏基督徒​都​一定​要​傳講​聖經​嘅​真理?

23 聖經研究者​教導​話,所有​受膏基督徒​都​必須​傳講​聖經​真理。1885​年,英語版《守望台》話:“每​個​受膏基督徒​都​應該​謹記,自己​受膏​係​要​向​人​傳道(以賽亞書​61:1),亦​即 係​蒙召​去​傳講​好消息。”1888​年,英語版《守望台》勸勉​話:“我哋​嘅​使命​非常​清楚……如果​我哋​忽視​自己​嘅​使命,揾​藉口​推託,就​係​懶惰​嘅​僕人,表明​自己​唔​配受​上帝​膏立。”

24,25. (甲)羅素​同​佢​嘅​親密​同工​唔單止​鼓勵​人​傳道,佢哋​仲​點樣​做​呢?(乙)汽車​仲​未​普及​嘅​時候,派書者​點樣​向​人​傳道​呢?

24 羅素​弟兄​同​佢​嘅​親密​同工​唔單止​鼓勵​人​傳道,仲​開始​印製《聖經研究者​傳單》(英語),後嚟​叫​做《舊​神學​季刊》。《守望台》嘅​讀者​收到​傳單​之後,免費​向​公衆​分發。

我哋​應該​認真​噉​諗​諗:“傳道​工作​係​唔​係​我​生活​嘅​重心​呢?”

25 喺​嗰個​年代,投身​全時​服務​嘅​人​稱​為​派書者。上文​提過​嘅​查爾斯·卡彭​就​係​其中​一​位。佢​回憶​當年​話:“我​嘅​傳道​地區​喺​賓夕法尼亞州。為咗​接觸​地區​裏面​嘅​每​户​人家,我​照住​美國​地質調查局​印製​嘅​地圖,就​可以​行​匀​縣市​嘅​每​一​條​路。我​會​用​三​日​時間​喺​鄉間​傳道,請​人​預訂《聖經​嘅​研討》(英語)呢​套​書。之後,我​會​請​一​架​馬車​將​書​送​過​去。我​經常​喺​農夫​嘅​屋企​過​夜。嗰時​汽車​仲​未​普及。”

一​個​派書者。請​留意​車身​上面​嘅“歷代​圖表”

26. (甲)點解​上帝​嘅​子民​一定​要​傳道​先​可以​為​基督​嘅​統治​做​好​準備?(乙)我哋​應該​要​認真​諗下​乜嘢​問題?

26 要​向​人​傳道,早期​嘅​聖經研究者​一定​要​有​熱心​同​勇氣​先至​得。如果​當時​嘅​真​基督徒​冇​受​到​教導,明白​傳道​工作​非常​重要,又​點​可以​為​基督​嘅​統治​做​好​準備​呢?事實​上,傳道​工作​就​係​基督​臨在​嘅​一​個​重要​特徵。(馬太福音​24:14)傳道​工作​可以​拯救​生命,上帝​嘅​子民​要​做​好​準備,就​一​定​要​以​呢​件​工作​為​生活​嘅​重心。今日,我哋​應該​認真​噉​諗下:“傳道​工作​係​唔​係​我​生活​嘅​重心​呢?我​願唔願意​作出​犧牲,全力​參與​呢​件​工作​呢?”

上帝​嘅​王國​誕生​嘞!

27,28. (甲)使徒​約翰 喺​異象​裏面​睇​到​乜嘢?(乙)上帝​嘅​王國​誕生​之後,撒但​同​邪靈​有​點樣​嘅​反應?

27 1914--意義​重大​嘅​一​年​終於​到​嘞。呢​一​章​開頭​提​到,嗰​一​年​喺​天上​發生​嘅​大事,世上​嘅​人​根本​睇​唔​到。不過​上帝​就​通過​異象,俾​使徒​約翰​睇​到​喺​天上​發生​嘅​事,呢啲​事​有​象徵​嘅​意義。約翰​睇​到“天上​出現​一​個​又​大​又​神秘​嘅​景象”。呢個​異象​裏面​嘅“女人”懷孕,“生​一​個​仔”。呢個“女人”就​係​上帝​天上​嘅​組織,由​靈體​構成。異象​裏面​嘅​呢個“仔”將​要“用​鐵杖​統治​萬國”。不過,呢個​仔​一​出世,就“被​提​到​上帝​嘅​寶座​上”。天上​有​大​聲音​話:“現今​就​係​上帝​拯救​嘅​時刻!上帝​已​彰顯​佢​嘅​權能!佢​所​立​嘅​基督​亦​顯示​佢​嘅​權威!”(啟示錄​12:1,5,10

 28 毫無​疑問,約翰​喺​異象​當中​睇​到​彌賽亞​王國​嘅​誕生。呢個​的確​係​一​件​輝煌​嘅​大事,但係​撒但​同​邪靈​好​唔​開心。佢哋​同​米迦勒(基督)所​率領​嘅​忠心​天使​爭戰。結果​點樣​呢?聖經​話:“大龍​就​係​嗰​條​古蛇,叫​做​魔鬼​又​叫​撒但,係​迷惑​全​人類​嘅。佢​被[扔]落​地;佢​嘅​使者​亦​跟住​被[扔]落去。”(啟示錄​12:7,9

1914​年,聖經研究者​開始​認​出​基督​預告​嘅​徵象,知道​佢​已經​喺​天上​臨在

29,30. (甲)彌賽亞​王國​誕生​之後,地上​嘅​情況​有​乜嘢​改變?(乙)天上​嘅​情況​又​有​乜嘢​改變?

29 喺​1914​年​之前​幾十​年,聖經研究者​早就​指​出,從​嗰​一​年​開始,世界​嘅​局勢​會​變​得​動盪不安。不過,佢哋​從來​都​冇​諗​過​自己​嘅​推測​會​咁​準確。正如​約翰​嘅​異象​顯示,撒但​會​變本加厲​危害​人類​社會:“地​同​海​有​禍​咯。因為​魔鬼​已經​滿​懷​忿恨​落去​你哋​處,因為​佢​知​自己​來日​無多。”(啟示錄​12:12)1914​年,第一次世界大戰​爆發,基督​臨在​執掌​王權​嘅​徵象​開始​喺​全球​應驗。呢個​制度​亦​都​到​咗“末期”。(提摩太後書​3:1

30 不過,天上​就​充滿​喜樂,因為​撒但​同​邪靈​以後​都​冇​辦法​再​返翻​天上。約翰​記述:“所以,諸​天​同​住​喺​其中​嘅,你哋​都​應該​快樂!”(啟示錄​12:12)天上​潔淨​之後,上帝​喺​地上​嘅​子民​會​點樣​呢?彌賽亞​王國​嘅​君王​耶穌​又​會​採取​乜嘢​行動​呢?呢​一​章​開頭​提​到,宣告​約​嘅“使者”基督​會​做​嘅​第​一​件​事,就​係​熬煉​上帝​喺​地上​嘅​僕人。點樣​熬煉​呢?

考驗​時期

31. (甲)關於​上帝​子民​所​受​嘅​熬煉,馬拉基​預告​咗​乜嘢?(乙)呢個​預言​幾時​開始​應驗?(另​見​腳注)

31 上帝​嘅​子民​要​經受​嘅​熬煉​絶對​唔​容易​忍受。馬拉基​預告:“佢​來​嘅​日子,誰​受​得​呢?佢​出現​時,誰​企立​得​住​呢?因為​佢​似​鹼性​好​强​嘅​肥皂,似​煉​金屬​嘅​火”。(馬拉基書​3:2)馬拉基​講​得​好​啱!從​1914​年​開始,上帝​喺​地上​嘅​子民​接二連三​噉​遇​到​好​大​嘅​考驗​同​困難。第一次世界大戰​期間,聖經研究者​當中​有啲​遭受​到​殘酷​嘅​迫害,有啲​仲​俾​人​韞​咗​入​監。 *

32. 1916​年​之後,上帝​嘅​組織​内部​發生​咗​乜嘢​衝突?

32 上帝​嘅​組織​内部​亦​都​發生​咗​衝突。1916​年,羅素​弟兄​去世,嗰時​佢​只​有​64​歲。上帝​嘅​子民​當中,好多​人​接受​唔​到​呢個​事實。有啲​人​將​過​多​嘅​注意力​集中​喺​一​個​模範​人物​身上,幾乎​到​咗​崇拜​佢​嘅​地步。但係,羅素​弟兄​從來​都​唔​希望​其他​人​崇拜​佢。唔​少​人​以為,羅素​去世​之後,上帝​就​唔​會​再​啟示​人​明白​真理​嘞。有啲​人​甚至​心​生​怨恨,唔​肯 跟隨​上帝​嘅​組織​一齊​前進。呢​種​唔​合作​嘅​態度​引起​分裂,導致​叛道。

33. 上帝​子民​所​期望​嘅​事​冇​實現​到,佢哋​有​乜嘢​反應​呢?

33 聖經研究者​面對​嘅​另​一​個​考驗​係,佢哋​所​期望​嘅​事​冇​實現。雖然《守望台》確切​指​出​外邦人​時期​會​喺​1914​年​結束,不過​啲​弟兄​就​唔​清楚​嗰​一​年​到底​會​有​乜嘢​事​發生。(路加福音​21:24)佢哋​以​為,基督​會​喺​1914​年​接​佢​嘅​受膏“新娘”去​天上,同​佢​一齊​作​王。佢哋​嘅​期望​落空​咗。1917​年​年底,《守望台》指​出,歷時​四十​年​嘅​收割​時期​會​喺​1918​年​嘅​春季​結束。不過,傳道​工作​並​冇​停​落嚟。1918​年​春季​過​咗​之後,傳道​工作​繼續​擴展。《守望台》話,收割​時期​確實​結束​咗,接​落嚟,會​係​拾取​遺落​嘅​莊稼​嘅​時期,屬靈​嘅​工作​會​繼續​落去。雖然​係​噉,好多​人​仲係​大失所望,唔​再​事奉​耶和華。

34. (甲)1918​年,上帝​嘅​子民​面對​邊啲​極大​嘅​考驗?(乙)點解​啲​教士​以​為​上帝​嘅​子民​已經“死”咗?

34 1918​年,上帝​嘅​子民​要​面對​一​個​極大​嘅​考驗。接替​羅素​帶領​上帝​子民​嘅​盧述福,同埋​另外​七​個​擔任​重要​職責​嘅​弟兄,俾​當局​拘捕。佢哋​受​到​唔​公平​嘅​審訊,被​判​長期​徒刑,韞​喺​美國​佐治亞州​亞特蘭大市​嘅​聯邦​監獄​裏面。有​一​段​時間,上帝​子民​嘅​工作​似乎​完全​停止​咗。啲​教士​高興​到​不得了,心​諗:“帶頭​嘅”已經​俾​人​捉​咗,布魯克林​嘅​總部​又​關門,傳道​工作​喺​美洲​同​歐洲​到處​受​到​攻擊,嗰啲​乞人憎​嘅​聖經研究者​已經“死”咗,威脅​解除​嘞。(啟示錄​11:3,7-10)呢啲​教士​真​係​大錯特錯!

復興​時期

35. (甲)耶穌​點解​容許​門徒​經受​磨難?(乙)耶穌​點樣​幫助​佢哋?

35 敵視​真理​嘅​人​根本​唔​知道,耶穌​之​所以​容許​門徒​經受​磨難,係​因為​耶和華​要“好似​提煉​銀​嘅​人”噉樣​熬煉​佢哋。(馬拉基書​3:3)耶和華​同​耶穌​深​信,忠心​嘅​人​一​定​經​得​起​火​一樣​嘅​考驗​而​得到​煉淨,可以​更​好​噉​為​君王​效勞。事實​表明,從​1919​年​初期​開始,上帝​嘅​靈​所​成​就​嘅​一切,係​敵人​點​都​諗​唔​到​嘅。忠於​上帝​嘅​人​竟然“企​起身”,好似​翻生​一樣!(啟示錄​11:11)嗰時,基督​委任​咗​一​小群​受膏​男子——“可靠​及​機智​嘅​僕人[英語《聖經​新世界​譯本》作‘忠信​睿智​嘅​奴隸’]”,由​佢哋​負責​帶領​上帝​嘅​子民,喺​適當​嘅​時候​分發​靈糧。噉樣,末世​徵象​嘅​一​個​重要​特徵​就​應驗​咗​嘞。(馬太福音​24:45-47

36. 有​乜嘢​表明​上帝​嘅​子民​喺​靈性​上​好似​翻生​一樣?

 36 1919​年​3​月​26​日,盧述福​弟兄​同​幾​個​同工​獲得​釋放,佢哋​一​離開​監獄, 好​快​就​安排​喺​同​一​年​嘅​9​月​舉行​大會。佢哋​仲​計劃​出版​第​二​本​雜誌,叫​做《黃金時代》(英語)。呢​本​雜誌​係​為咗​傳道​而​設計​嘅,會​同《守望台》一齊​分發。 * 喺​同​一​年,上帝​嘅​組織​亦​都​出版​咗《通報》(英語),就​係​今日​嘅《傳道​與​生活​聚會​手册》。呢​份​刊物​從​第​一​期​開始​就​强調​要​多​啲​向​人​傳道。的確,自從​1919​年​以​來,上帝​嘅​組織​越​嚟​越​重視​逐户​傳道​工作,鼓勵​弟兄​姊妹​親自​去​宣揚​上帝​嘅​王國。

37. 1919​年​之後,有啲​人​做​咗​咩​事​表明​佢哋​叛離​上帝​嘅​組織?

37 基督​繼續​通過​傳道​工作​熬煉​佢​嘅​僕人。對​高傲​自大​嘅​人​嚟​講,傳道​係​卑微​嘅​工作,有​失​身份。唔​肯​去​傳道​嘅​人​最後​就​離開​忠心​嘅​弟兄​姊妹,大家​各​行​各​路。1919​年​之後,一啲​叛離​上帝​組織​嘅​人​心​懷​怨恨,不惜​誹謗​同埋​中傷​耶和華​嘅​忠僕,甚至​同​反對者​聯手​迫害​佢哋。

38. 基督​嘅​門徒​可以​跨過​難關,獲得​勝利,表明​咗​乜嘢​呢?

 38 基督​嘅​門徒​雖然​遭受​攻擊,但​繼續​喺​靈性​上​進步,人數​越​嚟​越​多。佢哋​跨​過​嘅​每​一​個​難關,獲得​嘅​每​一​次​勝利,都​係​確鑿​嘅​證據,表明​上帝​嘅​王國​真​係​喺​度​統治​緊。如果​唔​係​上帝​通過​佢​嘅​仔​同​彌賽亞​王國,大力​支持​佢​地上​嘅​僕人,而且​賜​福​俾​佢哋,淨係​靠​呢​一​小群​唔​完美​嘅​人,又​點​可以​一​次​又​一​次​噉​戰勝​撒但​同​呢個​邪惡​嘅​制度​呢?(請​讀​以賽亞書​54:17

盧述福​弟兄​從​監獄​出嚟​之後​唔​到​半​年,就​喺​大會​上​發表​咗​一​個​激動​人心​嘅​演講

39,40. (甲)呢​本​書​有​乜嘢​特色?(乙)研讀​呢​本​書​對​你​有​乜嘢​益處?

39 喺​接​落嚟​嘅​篇​章​裏面,我哋​會​睇​下​上帝​嘅​王國​喺​天上​建立​之後​嘅​一百​年​期間,喺​地上​成就​咗​啲​乜嘢。呢​本​書​嘅​每​一​篇​會​講​下​上帝​嘅​王國​喺​某​方面​已經​成就​或者​將​要​成就​嘅​事。每​一​章​都​有​個​温習欄,俾​大家​可以​諗​一​諗,上帝​嘅​王國​對​自己​嚟​講​有​幾​真實。好​快,上帝​嘅​王國​就​會​嚟​到,將​惡人​惡事​鏟除,使​地球​成為​樂園。最後​兩​章​會​講​下​到時​有啲​乜嘢​事​會​發生。噉​研讀​呢​本​書​對​你​有​乜嘢​益處​呢?

40 撒但​千方百計​要​削弱​你​嘅​信心。但係,耶和華​要​加强​你​對​上帝​王國​嘅​信心。你​有​信心,就​可以​抵擋​得​住​撒但​嘅​攻擊,亦​都​可以​堅定不移。(以弗所書​6:16)所以,我哋​鼓勵​你​用​心​研讀​呢​本​書,時​不時​問​下​自己:“對​我​嚟​講,上帝​嘅​王國​係​唔​係​真實​嘅​呢?”終​有​一​日,所有​活着​嘅​人​都​會​睇​到​上帝​嘅​王國​統治​天下。如果​你​相信​上帝​嘅​王國​係​真實​嘅,就​會​忠心耿耿、竭盡​全力​為​呢個​王國​服務。你​對​王國​嘅​信心​越​大,就​越​有​機會​得​享​王國​嘅​福分。

^ 7段 關於​格魯、斯特森​同埋​斯托爾斯​嘅​見解,詳見《耶和華見證人——上帝​王國​的​宣揚者》(普通話​版本)45-46​頁。

^ 10段 有啲​聖經​譯本​翻譯​為“七​年”,但​喺​聖經​原文​裏面,呢度​其實​係​指“七​段​時期”或者“七​個​時期”。當​預言​應驗​喺​尼布甲尼撒​王​身上​嘅​時候,“七期”係​指​實際​嘅​七​年。

^ 15段 聖經研究者​睇​出,一​定​要​脱離​所有​同​世界​友好​嘅​宗教​組織。不過​有​好多​年,佢哋​繼續​將​嗰啲​仲​未​脱離​教會,而​又​聲稱​獻​咗​身​俾​上帝、對​贖價​有​信心​嘅​人​當​成​基督徒​弟兄。

^ 17段 聖經研究者​早就​勸​人​脱離​教會。當時​呢個​勸告​唔​係​咁​有效,一​個​原因​係​佢哋​以​為​勸告​只​係​適用​於​基督​嘅“小群”門徒,亦​即​係​14萬4000​人。呢​本​書第​5​章會​講​下,喺​1935​年​之前,聖經研究者​以​為,啟示錄​7:9,10​提​到​嘅“大群人”包括​埋​一般​教會​嘅​信徒,佢哋​嘅​數目​多​到​難​以​計算;呢“大群人”喺​現行​制度​嘅​終結​時期​擁護​基督,所以​得​蒙​獎賞,喺​天上​居​次要​地位。

^ 31段 英語版《黃金時代》(現稱《警醒​!》)1920​年​9​月​刊​係​一​期​特刊,内容​講​到​第一次世界大戰​期間,聖經研究者​喺​英國、德國、美國​同​加拿大​慘遭​迫害,而且​舉​咗​好多​實例。有啲​聖經研究者​受​到​嘅​迫害​非常​殘酷,令​人​震驚。喺​呢​場​大戰​之前​嘅​幾十​年,聖經研究者​好​少​受​到​噉樣​嘅​對待。

^ 36段 有​好多​年​嘅​時間,《守望台》主要​向​屬於“小群”嘅​成員​提供​靈糧。