跳到内容

跳到目录

培养自制

培养自制

“圣灵​嘅​果实​有……自制。”——加拉太书​5:22,23

唱诗​83,52​

1,2. (甲)缺乏​自制​会​有​乜嘢​后果?(乙)对​今日​嘅​人​嚟​讲,点解​讨论​自制​好​恰当?

自制​系​一​种​上帝​喜悦​嘅​特质。(加拉太书​5:22,23)耶和华​可以​完美​噉​运用​佢​嘅​自制力,而​唔​完美​嘅​人​要​保持​自制​就​需要​经历​一​番​挣扎。今日​人类​面对​好多​难题,归​根​到底​系​由于​缺乏​自制。无论​喺​学业​抑或​工作​方面,缺乏​自制​都​可能​会​造成​做​事​拖​拉、冇​效率,仲​可能​会​导致​出​口​伤​人、醉酒、使用​暴力、离婚、欠​落​不必​要​嘅​债、沾染​恶习、入​狱、感情​受​创、患​上​性​病、意外​怀孕​等等。(诗篇​34:11-14

2 好​明显,人​缺乏​自制​就​会​为​自己​同​其他​人​带​嚟​好多​麻烦。今日,缺乏​自制​嘅​问题​变​得​越来越​严重。喺​20​世纪​40​年代​就​已经​有​人​对​自律​进行​研究,但系​近年​嘅​研究​显示,人​喺​保持​自律​方面​做​得​越来越​差。学习​圣经​嘅​人​唔​会​对​呢个​趋势​感到​意外,因为​圣经​早就​预告,我哋​身​处​喺“最后​嘅​日子”嘅​一​个​证据​就系,人​会​变​得“漫​无​自制”。(提摩太后书​3:1-3

3. 点解​基督徒​应该​培养​自制?

 3 点解​你​应该​培养​自制?我哋​嚟​睇​吓​两​个​重要​嘅​原因。第​一,好多​人​都​留意​到,能够​表现​自制​嘅​人​通常​可以​避免​严重​嘅​难题。佢哋​更​容易​保持​情绪​稳定​同​建立​良好​嘅​人际​关系,而且​唔​会​好似​做​事​冲动​嘅​人​噉,轻易​发​嬲​或者​容易​忧虑​抑郁。第​二,控制​错误​欲望​同​抵抗​诱惑,系​得​蒙​上帝​悦纳​嘅​基本​条件。亚当​夏娃​嘅​例子​就​证实​咗​呢​一​点。(创世记​3:6)佢哋​嘅​好多​后代​亦​都​因为​冇​表现​呢​种​重要​嘅​特质,而​落​得​可悲​嘅​下​场。

4. 乜嘢​可以​鼓励​嗰啲​努力​表现​自制​嘅​人?

4 唔​完美​嘅​人​唔​能够​十全十美​噉​表现​自制。耶和华​清楚​知道​佢​嘅​仆人​要​保持​自制​一啲​都​唔​容易,佢​亦​都​好想​帮助​佢哋​抵抗​犯罪​嘅​倾向。(列王纪上​8:46-50)有啲​人​好想​事奉​上帝,但​喺​生活​上​某​啲​方面​唔​容易​表现​自制。作为​仁爱​嘅​朋友,耶和华​亲切​噉​鼓励​同​扶持​呢啲​人。等​我哋​嚟​考虑​吓​耶和华​嘅​完美​榜样。然后​睇​吓,我哋​从​圣经​入面​关于​自制​嘅​一啲​例子​可以​学​到​乜嘢。我哋​都​会​温习​一啲​可以​帮助​我哋​强化​自制力​嘅​实用​建议。

耶和华​树​立​榜样

5,6. 耶和华​喺​自制​方面​树立​咗​乜嘢​榜样?

5 耶和华​做​乜嘢​都​系​十全十美​嘅,佢​可以​完美​噉​表现​自制​呢​种​特质。(申命记​32:4)虽然​我哋​唔​完美,但​只要​我哋​沉思​耶和华​点样​表现​自制,就​会​更​明白​自制​系​一​种​点样​嘅​特质,亦​都​会​更​好​噉​效法​佢​嘅​榜样。耶和华​有​边啲​表现​自制​嘅​例子​特别​值得​我哋​留意?

6 我哋​可以​谂​吓,面对​撒但​狂妄​无​耻​嘅​背叛,耶和华​点样​表现​自制。呢个​挑战​系​不​容​忽视​嘅。面对​魔鬼​嘅​挑战,忠于​上帝​嘅​灵体​无​疑​会​感到​震惊、大​发​义愤,同埋​憎恨​撒但。你​一​谂​到​撒但​所​引起​嘅​苦难,可能​都​会​有​同样​嘅​感受。但系,耶和华​并​冇​冲动​行事。佢​考虑​周​全,处理​得​恰​到​好处。佢​冇​轻易​发​嬲,而系​公正​处理​撒但​嘅​反叛。(出埃及记​34:6;约伯记​2:2-6)点解​耶和华​愿意​花​时间​嚟​解决​问题​呢?原因​系​佢​唔​希望​任何​人​遭受​毁灭,“只​愿​人人​最终​都​悔改”。(彼得后书​3:9

7. 我哋​从​耶和华​树立​嘅​榜样​学​到​乜嘢?

7 从​耶和华​表现​嘅​自制,我哋​学​到​讲话​同​做​事​都​要​小心​谨慎,唔​应该​行事​鲁莽。面对​重大​问题​嘅​时候,为咗​作出​明智​嘅​抉择,要​俾​自己​足够​嘅​时间​考虑​清楚。祷告​求​耶和华​帮助​我哋​喺​讲话​做​事​方面​有​智慧。(诗篇​141:3)如果​我哋​发​嬲,就​好​容易​有​过​激​嘅​行为。好多​人​都​曾经​对​自己​轻率​鲁莽​嘅​言行​深​感​后悔。(箴言​14:29;15:28;19:2

上帝​子民​嘅​榜样​同​鉴戒

8. (甲)我哋​可以​喺​边度​揾​到​嗰啲​表现​自制​嘅​榜样?(乙)波提乏​嘅​妻子​引诱​约瑟​嗰阵,乜嘢​推​使​约瑟​即刻​避开​引诱?(请​睇​吓​课文​开头​嘅​图片)

8 从​乜嘢​圣经​例子​可以​睇​出​表现 自制​系​有​价值​嘅?你​肯定​记得​几​个​喺​考验​下​仲系​保持​自制​嘅​圣经​人物。其中​一​个​系​雅各​嘅​仔​约瑟。佢​系​法老​嘅​侍卫​长​波提乏​嘅​管家,其间​佢​一直​保持​自制。波提乏​嘅​妻子​睇​中​约瑟“身​材挺秀,容貌俊美”,就​试​图​勾​引​佢。乜嘢​使​约瑟​面对​多​次​引诱​依然​冇​屈服​呢?佢​肯定​用​咗​唔少​时间​沉思,如果​自己​放​松​警惕​会​有​乜嘢​后果。情况​危急​嘅​时候,佢​即刻​逃​离​现场,避开​引诱。佢​话:“我​点​可以​做​出​咁​大​嘅​恶事,得​罪​上帝​呢?”(创世记​39:6,9请​读​箴言​1:10

9. 你​可以​点样​装备​自己​抵抗​引诱?

9 我哋​从​约瑟​嘅​榜样​学​到​乜嘢?其中​一​点​系,要​远​离​任何​会​令​我哋​违反​上帝​律法​嘅​引诱。有啲​弟兄​姊妹​未​成为​见证人​之前​曾经​有​过​食​烟、吸毒、暴​饮​暴​食、性​滥交​等​行为。就算​受​咗​浸,佢哋​喺​呢啲​方面​有时​仲系​会​受​到​引诱。所以,当​你​受​到​引诱​想​违反​上帝​嘅​律法​嗰阵,你​可以​沉思​一下,如果​自己​缺乏​自制,顺​住​错误​嘅​欲望​行事,会​有​乜嘢​可悲​嘅​后果。你​都​可以​事​先​谂​吓,喺​乜嘢​情况​下​容易​受​到​诱惑,而​你​可以​点样​避开。(诗篇​26:4,5;箴言​22:3)如果​你​真​系​面对​噉样​嘅​考验,就​要​祈求​耶和华​赐​智慧​同​自制力​使​你​抵抗​得​住。

10,11. (甲)好多​年轻人​喺​学校​面对​乜嘢​考验?(乙)乜嘢​可以​帮助​年轻​嘅​基督徒​抵抗​压力,拒绝​做​唔​正当​嘅​事?

10 好多​年轻​基督徒​所​面对​嘅​考验​同​约瑟​嘅​类似。请​睇​吓​金美​嘅​例子。佢​大多数​同学​经常​同​人​发生​性关系,周​末​过​后​佢哋​都​会​夸耀​自己​嘅​经验。金美​冇​参与​呢啲​话题。金美​承认,同​其他​人​嘅​标准​唔​一样,有时​会​令​佢​觉得“孤独​同埋​受​人​冷​落”。啲​同学​仲​因为​佢​唔​拍拖​就​笑​佢​傻。其实,金美​冇​噉​做​先至​系​有​智慧。因为​佢​清楚​知道,性行为​对​好多​年轻人​嚟​讲​系​一​个​好​大​嘅​诱惑。(提摩太后书​2:22)佢​嘅​同学​经常​问​佢​仲​系咪​处女。呢个​使​佢​有​机会​向​同学​解释,点解​佢​唔​会​同​人​随便​发生​性关系。好多​年轻​嘅​基督徒​都​决心​抵抗​压力,保持​道德​洁净。我哋​都​会​同​耶和华​一样,为​佢哋​感到​自豪!

11 圣经​提​到​有啲​人​因为​缺乏​自制​而​犯​下​淫乱,成为​我哋​嘅​鉴戒。圣经​亦​都​话​俾​我哋​知,佢哋​冇​保持​自制​会​有​乜嘢​可悲​嘅​后果。任何​面对​同​金美​类似​情况​嘅​人,都​应该​沉思​吓​箴言​第​7​章​嗰个​无​知​少年​嘅​事​例。亦​都​请​谂​吓,暗嫩​所​做​嘅​事​带​嚟​乜嘢​悲​惨​后果。(撒母耳记下​13:1,2,10-15,28-32)喺​家庭​崇拜​嘅​时候,父母​可以​同​仔女​讨论​呢啲​圣经​记载,帮助​佢哋​明白​喺​男女​关系​方面​要​培养​自制​同​明智​行事。

12. (甲)约瑟​喺​佢​嘅​兄弟​面前​点样​控制​自己​嘅​情绪?(乙)喺​乜嘢​情况​下,我哋​需要​控制​自己​嘅​情感?

12 喺​另​一​个​场合,约瑟​喺​自制​方面​再次​树立​咗​好​榜样。当​约瑟​嘅​兄弟​嚟​埃及​向​佢​买​粮食​嘅​时候,佢​为咗​了解 佢哋​内心​真正​嘅​谂法,就​冇​透露​自己​嘅​身份。喺​情绪​特别​激动​嗰阵,约瑟​就​匿​埋​一边,偷​偷​噉​喊。(创世记​43:30,31;45:1)如果​一​个​基督徒​同工​或者​家人​对​你​唔​好,你​都​可以​效法​约瑟​表现​自制,避免​冲动​行事。(箴言​16:32;17:27)如果​你​嘅​家人​被​开除,你​要​控制​自己​嘅​情感,避免​同​佢哋​有​不必​要​嘅​来往。虽然​噉样​做​好​唔​容易,但​如果​我哋​意识​到​噉样​就系​服从​耶和华​嘅​吩咐​同埋​效法​佢​嘅​榜样,就​可以​帮助​我哋​保持​自制。

13. 我哋​从​大卫​王​嘅​例子​学​到​乜嘢?

13 大卫​王​嘅​例子​好​值得​我哋​留意。虽然​大卫​有​好​大​嘅​势力,但系​当​扫罗​同​示每​激​嬲​佢​嘅​时候,佢​可以​控制​到​自己​嘅​怒气。(撒母耳记上​26:9-11;撒母耳记下​16:5-10)噉​唔​系​话,大卫​一直​都​可以​保持​自制。佢​曾经​同​拔示巴​通奸,亦​都​一​时​冲动​想​报复​贪心​嘅​拿八。(撒母耳记上​25:10-13;撒母耳记下​11:2-4)我哋​可以​从​大卫​身上​学​到​宝贵​嘅​一​课。首先,喺​上帝​子民​当中​做​监督​嘅​特别​要​表现​自制,避免​滥​用​职权。其​次,任何​人​都​唔​应该​过度​自信,觉得​自己​可以​抵抗​得到​诱惑。(哥林多前书​10:12

采取​实际​行动

14. 路易吉​有​乜嘢​经历?点解​我哋​喺​噉​嘅​情况​下​保持​自制​好​重要?

14 你​可以​做​啲​乜嘢​嚟​培养​自制​呢?请​睇​吓​一​个​真实​嘅​例子。一​个​司机​开​车​撞​到​路易吉​部​车。呢个​司机​唔单止​冇​认​错,仲​出​言​侮辱​路易吉,想​撩​交​打。路易吉​马上​祷告,求​耶和华​帮助​佢​保持​冷静,亦​都​尝试​令​对方​平静​落嚟,不过​对方​冇​改变​态度。于是,路易吉​将​对方​嘅​保险​资料​抄​低​之后​就​离开,但​对方​仲系​不​停​噉​闹​佢。一​个​星期​之后,路易吉​续访​一​个​女子,发现​佢​丈夫​就系​嗰个​闹​佢​嘅​司机!呢个​男子​觉得​好​尴尬,为​自己​嘅​无​礼​向​路易吉​道歉。跟住,佢​又​主动​联系​保险​公司,帮​路易吉​尽​快​得到​赔偿。呢个​男子​仲​加入​太太​嘅​圣经​讨论,佢​好​欣赏​所​讨论​嘅​内容。谂​翻​转​头,路易吉​睇​出​意外​发生​之后​保持​冷​静​有​几​咁​重要,如果​当时​佢​同​对方​嘈​起嚟,结果​就​会​完全​唔同。(请​读​哥林多后书​6:3,4

保持​冷​静​抑或​冲动​行事​可以​直接​或​间接​噉​影响​到​我哋​嘅​传道​工作(请​睇​第​14​段)

15,16. 研读​圣经​可以​点样​帮助​你​同​家人​培养​自制?

15 认真、勤奋​研读​圣经​可以​帮助​基督徒​培养​自制。耶和华​吩咐​约书亚​话:“呢​部​律法​书​唔​应该​离开​你​嘅​口,你​要​日​夜​低​声​细​读,使​你​谨慎​遵行​书​上​所​写​嘅​一切​话。噉样,你​嘅​道路​就​一定​亨通,你​一定​能够​明智​行事。”(约书亚记​1:8)研读​圣经​可以​点样​帮助​你​培养​自制​呢?

16 呢​篇​课文​列​出​嘅​圣经​例子​清楚​表明,我哋​采取​嘅​行动​会​带​嚟​乜嘢​益处​或​后果。耶和华​叫​人​写​低​呢啲​事​系​有​目的​嘅。(罗马书​15:4)我哋​阅读、沉思、查考​呢啲​圣经​例子​就系​明智​嘅 做法!我哋​需要​谂​吓​自己​同​家人​可以​点样​实践​从中​所​学​到​嘅​嘢,亦​都​要​恳​求​耶和华​帮助​你​实践​佢​嘅​话语。如果​你​留意​到​自己​喺​某​啲​方面​缺乏​自制,就​要​承认​自己​嘅​弱​点,向​耶和华​祷告,喺​呢啲​方面​努力​改​善。(雅各书​1:5)你​仲​可以​喺​圣经​书刊​入面​揾​到​相关​嘅​资料​嚟​帮助​自己。

17. 喺​边啲​方面,父母​可以​帮助​仔女​培养​自制?

17 你​可以​点样​帮助​仔女​培养​自制?好多​父母​都​明白,年轻人​唔​系​自然​就​会​有​自制​呢​种​特质​嘅。同​帮助​仔女​培养​其他​特质​一样,父母​需要​以身作则。(以弗所书​6:4)如果​你​见到​仔女​喺​某​方面​好​难​保持​自制,首先​要​问​吓​自己​喺​呢​方面​有​冇​立​下​榜样。千祈​唔​好​低估​你​经常​传道、参加​聚会、举行​家庭​崇拜​所​带​嚟​嘅​积极​影响。如果​仔女​嘅​要求​唔​合理,父母​就​应该​拒绝。耶和华​为​亚当​同​夏娃​定​落​一啲​限制,教导​佢哋​对​佢​嘅​权柄​要​有​适当​嘅​尊重。同样,父母​嘅​管教​同​榜样​系​为咗​教导​仔女​学识​自制。乐意​服从​耶和华,并​且​尊重​佢​所​定​嘅​标准,系​父母​最​应该​帮助​仔女​培养​嘅​态度。(请​读​箴言​1:5,7,8

18. 点解​你​可以​相信​良好​嘅​交往​会​为​你​带​嚟​福分?

18 无论​你​系咪​为​人​父母,喺​交往​方面​你​都​应该​明智​噉​作出​选择。要​揾​嗰啲​鼓励​你​追求​有​价值​嘅​目标,提醒​你​避开​危险​嘅​人​做​朋友。(箴言​13:20)同​有​属灵​思想​嘅​人​交往​会​对​你​产生​积极​嘅​影响,亦​都​会​推动​你​效法​佢哋,喺​生活​上​表现​自制。同样,你​嘅​好​品格​肯定​都​会​鼓励​到​你​嘅​朋友。我哋​努力​培养​并​表现​自制,就​可以​得到​上帝​嘅​悦纳,每​日​同​所​爱​嘅​亲友​享有​快乐​嘅​时光。