跳到内容

跳到目录

“要听从管教,增长智慧”

“要听从管教,增长智慧”

“我​儿​啊,……要​听从​管教,增长​智慧”——箴言​8:32,33

唱诗​56,89​

1.我哋​可以​点样​得到​智慧?智慧​点样​帮助​我哋?

耶和华​系​智慧​嘅​源头,佢​慷慨​噉​赐​智慧​俾​人。雅各书​1:5​话:“上帝​慷慨​赐​百​物​俾​所有​人,而且​唔​责​难​人,所以​你哋​边个​缺乏​智慧,就​应该​不断​祈求​上帝”。接受​上帝​嘅​管教,就系​我哋​得到​上帝​智慧​嘅​一​个​方法。上帝​嘅​智慧​可以​保护​我哋,使​我哋​喺​道德​同​属灵​上​免​受​伤害。(箴言​2:10-12)噉样​嘅​话,我哋​就“可以​常​在​上帝​嘅​爱​里……指​望​得​享​永生”。(犹大书​21

2.我哋​可以​点样​对​上帝​嘅​管教​培养​感激​之​心?

2 因为​受​唔​完美​嘅​身心、成长​背景​同​其他​因素​影响,我哋​有时​好​难​接受​或者​以​正确​嘅​观点​看待​管教。不过,当​我哋​体验​到​上帝​嘅​管教​所​带​嚟​嘅​益处,就​会​明白​上帝​有​几​咁​爱​我哋。箴言​3:11,12​话:“我​儿​啊,耶和华​嘅​管教​你​唔​好​拒绝,……因为​耶和华​责备​佢​所​爱​嘅​人”。冇错,我哋​可以​确信​耶和华​所​做​嘅​都​系​为咗​我哋​嘅​益处​着想。(请​读​希伯来书​12:5-11因为​上帝​好​了解​我哋,佢​嘅​管教​总​系​适当​嘅,而且​正​系​我哋​需要​嘅。呢​篇​课文​会​分析​四方​面​嘅 管教:(1)自​律,(2)父母​嘅​管教,(3)会众​嘅​管教,(4)比​管教​更​令​人​痛苦​嘅​事。

自​律​就系​有​智慧

3.父母​点样​帮助​儿女​培养​自​律?请​举例。

3 自​律​或者​自我​约束​嘅​意思​包括,为咗​改善​自己​嘅​行为​同​思想​而​加​以​克制​自己。我哋​唔​系​天​生​就​识得​自我​约束,而系​需要​学习​嘅。试​谂​吓,一​个​小朋友​啱啱​开始​学​踩​单​车​嘅​时候,父母​会​喺​旁边​扶​住。不过,小朋友​慢慢​识得​点样​保持​平衡​之后,父母​就​会​试​吓​放​手。等​到​小朋友​已经​学识​点样​踩,父母​就​会​完全​放​手。同样,父母“照​耶和华​嘅​意思”不断​耐心​噉​训练​同​管教​儿女,就系​帮助​儿女​培养​自​律​同​智慧。(以弗所书​6:4

4,5.(甲)点解​自​律​系“新​品格”嘅​一​个​重要​部分?(乙)点解​我哋​就算“跌​倒​七​次”都​唔​应该​放弃?

4 同样​嘅​原则​都​适用​于​嗰啲​想​亲近​耶和华​嘅​成年人。一​个​新​近​受浸​嘅​基督徒​可能​喺​某​程度​上​能够​表现​自​律,但系​佢​灵性​仲​未​成熟。佢​开始​穿​上“新​品格”,努力​效法​基督,就​会​变​得​更加​成熟。(以弗所书​4:23,24)自​律​系“新​品格”嘅​一​个​重要​部分,可以​帮助​我哋​学识“摒弃​唔​敬虔​嘅​心​同​世俗​嘅​欲望,喺​现行​嘅​制度​本​住​健全​嘅​思想、正义、敬虔​而​活”。(提多书​2:12

5 我哋​所有​人​都​有​犯罪​嘅​倾​向。(传道书​7:20)如果​我哋​做​错事,噉​系咪​话​我哋​自​律​能力​不足​或者​根本​唔​能够​自​律​呢?唔​一定。箴言​24:16​话:“义人​跌​倒​七​次,都​必​起嚟”。乜嘢​可以​帮助​我哋​重新​企​起嚟?唔​系​靠​个​人​嘅​意志​力,而系​倚靠​上帝​嘅​圣灵。(请​读​腓立比书​4:13圣灵​嘅​果实​包括​自制​呢​种​同​自​律​相似​嘅​特质。

6.喺​研读​圣经​方面,我哋​可以​点样​做​得​更​好?(请​睇​吓​课文​开头​嘅​图片)

6 恳切​祷告、研读​圣经​同埋​沉思​亦​都​可以​帮助​我哋​培养​自​律。但系,如果​你​觉得​学习​圣经​唔​容易,或者​唔​钟意​研读​圣经,可以​点​做​呢?唔​好​灰心。只要​你​愿意​接受​耶和华​嘅​帮助,佢​就​会​帮​你​对​佢​嘅​话语“养​成​切望​之​心”。(彼得前书​2:2)首先,要​向​耶和华​祷告,恳​求​佢​帮助​你​表现​自​律,学习​佢​嘅​话语。然后,要​采取​同​祷告​一致​嘅​行动。可能​一​开始​嗰时,每​次​嘅​研读​时间​唔​需要​好​长。慢慢,研读​对​你​嚟​讲​就​唔​再​系​一​件​咁​难​嘅​事,而且​你​仲​可以​乐​在​其中!你​会​发现,安静​噉​沉思​耶和华​嘅​宝贵​思想​其实​系​一​种​享受。(提摩太前书​4:15

7.自​律​点样​帮助​我哋​达成​属灵​目标?

7 自​律​可以​帮助​我哋​达成​属灵​目标。一​个​弟兄​发觉​自己​喺​属灵​方面​冇​以前​咁​热心,于是​定​立​做​正规​先驱​嘅​目标。佢​点样​表现​自​律,并​从中​得益?佢​研读​同​先驱​有关​嘅​文章,而且​为​自己​嘅​目标​祷告。噉样​做​强化​咗​佢​嘅​灵性,使​佢​更加​渴望​做​先驱。情况​允许 嘅​时候,佢​就​报​名​做​辅助​先驱。结果​点样​呢?佢​冇​俾​任何​事​妨碍​自己,始终​将​目光​集中​喺​自己​嘅​属灵​目标​之​上。过​咗​一​段​时间,佢​终于​成为​一​个​正规​先驱。

照​耶和华​嘅​意思​管教​儿女

儿女​唔​系​一​出世​就​识得​分辨​是非​对​错;佢哋​需要​受​到​训练(请​睇​第​8​段)

8-10.乜嘢​帮助​基督徒​父母​教导​儿女​事奉​耶和华?请​举例。

8 基督徒​父母​有​一​个​宝贵​嘅​殊荣,就系“照​耶和华​嘅​意思​管教”儿女,将​佢哋​抚​养​成人。(以弗所书​6:4)喺​今日​嘅​世界,呢个​的确​唔​容易。(提摩太后书​3:1-5)当然,儿女​唔​系​一​出世​就​识得​分辨​是非​对​错。所以,父母​都​需要​教导​同​管教​儿女,训练​佢哋​嘅​良心。(罗马书​2:14,15)一​位​圣经​学者​解释,译​作“管教”嘅​希腊语词​嘅​意思​亦​都​包括“培育​儿女”,即​系​帮助​儿女​成为​有​责任​感​嘅​人。

9 如果​父母​怀​住​爱心​管教​儿女,儿女​就​会​有​安全感。佢哋​会​明白,自由​唔​等于​完全​冇​限制,自己​所​做​嘅​事​会​带​嚟​唔同​嘅​结果。所以,基督徒​父母​运用​耶和华​嘅​智慧​嚟​养育​儿女​非常​重要。唔同​文化​背景​嘅​人​会​用​唔同​嘅​方法​嚟​教导​儿女,或者​佢哋​嘅​教导​方式​会​随​住​时代​而​改变。不过,如果​父母​听从​上帝​嘅​智慧,就​唔​需要​只系​靠​自己​嘅​聪明​或者​经验。

10 我哋​可以​学习​挪亚​嘅​榜样。耶和华​吩咐​挪亚​建造​方舟​嗰阵,挪亚​根本​唔​可能​倚靠​自己​嘅​经验,因为​佢​从来​都​冇​建造​过​方舟。佢​必须​倚​赖​耶和华,“照住”耶和华​嘅​指引​去​做。(创世记​6:22)结果​点样?方舟​使​挪亚​全​家​得救!挪亚​系​一​个​成功​嘅​家主,因为​佢​信赖​耶和华​嘅​智慧。佢​将​三​个​仔​教​得​好好,又​为​佢哋​立​下​好​榜样。喺​嗰个​充满​邪恶​嘅​时代,噉样​做​真系​一啲​都​唔​容易。(创世记​6:5

11.父母​嘅​榜样​喺​训练​儿女​方面​有​几​重要?

11 作为​父母,你​可以​点样“照住”做​呢?就系​要​听从​耶和华。你​按照​上帝​嘅​话语​同​组织​嘅​指引​去​做,就系​请​耶和华​帮助​你​教导​儿女。噉样,好​可能​儿女​日​后​会​感激​你。一​个​弟兄​话:“我​非常​感谢​父母​用​耶和华​嘅​方式​嚟​教导​我。佢哋​尽​己​所​能​打动​我​嘅​心。我​喺​属灵​上​嘅​进步,大部分​都​有赖​于 佢哋​嘅​努力。”虽然​父母​尽力​教导​儿女,有啲​儿女​仲系​可能​会​离开​耶和华。不过,只要​父母​尽​咗​自己​最​大​嘅​努力,就​可以​良心​无​愧。佢哋​可以​期待,儿女​有朝一日​会​返嚟​耶和华​身边。

12,13.(甲)如果​儿女​被​开除,基督徒​父母​可以​点样​表明​佢哋​服从​上帝?(乙)一​个​家庭​点样​因为​服从​耶和华​而​得益?

12 儿女​被​开除​对​某​啲​父母​嚟​讲​系​好​大​嘅​考验。一​个​姊妹​嘅​女​被​会众​开除​之后​离开​咗​屋企。呢个​姊妹​承认:“为咗​可以​同​自己​嘅​女​同埋​孙​女​喺​埋​一齐,我​就​尝试​喺​组织​出版物​入面​揾​漏洞。”不过,佢​先生​仁慈​噉​帮助​佢​睇​出,佢哋​已经​唔​需要​为​自己​嘅​女​负责,只​需要​继续​忠于​耶和华。

13 后来,佢哋​嘅​女​重新​被​接纳​为​会众​成员。姊妹​话:“而家​个​女​几乎​日日​都​打​电话​或者​发​信息​俾​我!而且,佢​深深​尊重​我​同​先生,因为​佢​知道​我哋​服从​上帝。我哋​一​家人​嘅​关系​非常​亲密。”如果​你​嘅​儿女​被​会众​开除,你​会​唔​会“全心​信赖​耶和华”,而​唔​系“依​靠​自己​嘅​聪明”?(箴言​3:5,6)要​记住,耶和华​嘅​管教​反映​出​佢​无​与​伦​比​嘅​智慧​同​爱心。千祈​唔​好​忘记,耶和华​为​我哋​所有​人,包括​你​嘅​儿女,牺牲​咗​佢​嘅​爱子。上帝​唔​希望​任何​一​个​人​遭受​毁灭。(请​读​彼得后书​3:9所以,基督徒​父母,你哋​要​继续​信赖​耶和华​嘅​管教​同​指引。即使​服从​会​带​嚟​痛苦,都​要​听从​上帝​嘅​管教,唔​好​背道而驰。

喺​会众

14.耶和华​通过“忠信​睿智​嘅​管家”所​提供​嘅​教导,点样​使​我哋​得益?

14 耶和华​承诺​会​照顾、保护、同​教导​基督徒​会众。佢​通过​多​种​方式​噉样​做。例如,佢​委派​佢​嘅​爱子​照顾​会众,而​耶稣​又​委派“忠信​睿智​嘅​管家”为​我哋​提供​适时​嘅​属灵​食物。(路加福音​12:42)呢啲​属灵​食物​以​唔同​嘅​形式​使​我哋​得到​有​价值​嘅​教导​同​管教。有​冇​一​个​演讲​或者​一​篇​文章,帮助​你​改变​咗​自己​嘅​思想​同​行为?你​会​为​自己​所​作​嘅​调整​感到​开心,因为​你​正​接受​紧​耶和华​嘅​塑造​同​管教。(箴言​2:1-5

15,16.(甲)我哋​喺​会众​可以​点样​通过“作为​恩赐”嘅​长老​得益?(乙)我哋​可以​点样​使​长老​工作​得​更加​喜乐?

15 基督​亦​都​赐​下“作为​恩赐”嘅​长老​嚟​照顾​会众。佢哋​会​仁爱​噉​牧养​上帝​嘅​羊群。(以弗所书​4:8,11-13)我哋​可以​点样​从​呢啲​宝贵​恩赐​得益?我哋​可以​效法​长老​嘅​信心​同​榜样,而且​留意​佢哋​基​于​圣经​嘅​劝告。(请​读​希伯来书​13:7,17请​谨记,长老​好​爱​我哋,希望​我哋​喺​属灵​上​不断​成长。如果​长老​留意​到​我哋​错过​聚会,或者​唔​再​热心​传道,佢哋​一定​会​尽快​嚟​帮助​我哋。佢哋​会​用​心​听​我哋​讲,然后​仁爱​噉​鼓励​我哋,根据​圣经​向​我哋​提​出​明智​嘅​劝告。你​有​冇​将​呢啲​帮助​视​为​耶和华​向​你​表达​嘅​爱?

16 长老​要​俾​我哋​劝告​并​唔​容易。你​觉得,要​向​企图​隐瞒​自己​严重​过犯 嘅​大卫​王​提​出​劝告,先知​拿​单​会​有​乜嘢​感觉?(撒母耳记下​12:1-14)彼得​系​十二​使徒​之​一,佢​曾经​公​然​装​假,唔同​非​犹太裔​嘅​信徒​一齐​食饭。你​觉得​使徒​保罗​要​纠正​彼得​嗰阵,又​有​乜嘢​感觉​呢?(加拉太书​2:11-14)所以,你​可以​点样​减轻​会众​长老​嘅​担​子?要​谦卑,使​人​容易​亲近​你,亦​都​要​怀​有​感激​之​心。要​将​长老​嘅​帮助​睇​成​系​上帝​对​你​嘅​爱。噉样​唔单止​可以​造益​你,亦​都​会​使​长老​工作​得​更加​喜乐。

17.一​个​姊妹​点样​得到​会众​长老​仁爱​嘅​帮助?

17 一​位​姊妹​因为​以往​嘅​经历​觉得​自己​好​难​爱​耶和华,变​得​好​抑郁。佢​话:“我​知道​自己​需要​同​长老​倾​吓。佢哋​冇​责备​或者​批评​我,反而​鼓励​同​强化​我。每​次​聚会​结束​之后,无论​长老​几​忙​都​好,至少​会​有​一​位​过嚟​关心​我。过去​嘅​经历​令​我​觉得​自己​唔​配​得到​上帝​嘅​爱,不过​耶和华​一​次​又​一​次​通过​会众​同​长老​向​我​表明​佢​嘅​爱。我​祈求​耶和华​帮助​我​永远​留​喺​佢​身边。”

比​管教​更​令​人​痛苦​嘅​事

18,19.有​乜嘢​事​比​管教​更​令​人​痛苦?请​举例。

18 你​可能​觉得​受​管教​系​一​件​痛苦​嘅​事,不过​拒绝​上帝​嘅​管教​会​令​自己​更​痛苦。(希伯来书​12:11)请​睇​吓​该隐​同​西底家​王​嘅​例子。耶和华​见到​该隐​憎恨​亚伯,甚至​想​杀​死​佢,就​劝告​该隐​话:“你​点解​发嬲?点解​咁​沮丧​呢?你​如果​去​行善,唔​系​可以​受​显扬​咩?但系​你​如果​唔​去​行善,罪​就​埋​伏​喺​门口,要​趁​机​捉​住​你。你​能够​制伏​罪​咩?”(创世记​4:6,7)该隐​冇​接受​耶和华​嘅​管教,杀​死​咗​弟弟,结果​余​生​都​要​承担​恶​果。(创世记​4:11,12)如果​该隐​听从​耶和华,就​唔​会​经历​咁​大​嘅​痛苦。

19 西底家​系​一​个​软弱​邪恶​嘅​君王。佢​统治​期间,耶路撒冷​嘅​人民​陷​于​水​深​火​热​之​中。先知​耶利米​多​次​告诫​西底家​要​离弃​恶​行,但系​西底家​拒绝​呢啲​管教,最终​悲​剧​收​场。(耶利米书​52:8-11)耶和华​一定​唔​希望​我哋​承受​呢啲​不必​要​嘅​痛苦!(请​读​以赛亚书​48:17,18

20.接受​同​拒绝​上帝​管教​嘅​人​分别​有​点样​嘅​未来?

20 今日,世上​好多​人​都​嘲笑​甚至​无视​上帝​嘅​管教。不过​好​快,呢啲​拒绝​耶和华​管教​嘅​人​就​会​承受​更​痛苦​嘅​后果。(箴言​1:24-31)所以,我哋“要​听从​管教,增长​智慧”。正如​箴言​4:13​所​讲,“要​持守​管教,不可​放松,谨守​不​忘,因为​呢个​就系​你​嘅​生命”。