跳到内容

跳到目录

教导圣经真理

教导圣经真理

“耶和华​啊……你​话语​嘅​要旨​系​真理”——诗篇​119:159,160

唱诗​29,53​

1,2. (甲)耶稣​一生​中​最​重要​嘅​工作​系​乜嘢?点解?(乙)我哋​想​更​好​噉​成为“上帝​嘅​同工”就​必须​点样​做?

耶稣​基督​既​系​一​个​木匠,亦​都​系​上帝​嘅​仆人。(马可福音​6:3;罗马书​15:8)佢​喺​呢​两​方面​都​做​得​好​完美。作为​一​个​木匠,佢​识得​使用​各​种​工具,将​原木​整​成​木制品。作为​王国​真理​嘅​导师,佢​精通​上帝​嘅​话语,而且​喺​教导​方面​好​有​技巧。所以,即使​系​平民​百姓,都​可以​明白​佢​所​教​嘅​圣经​真理。(马太福音​7:28;路加福音​24:32,45)耶稣​喺​30​岁​嘅​时候,放​低​佢​木匠​嘅​工具,因为​佢​知道​做​上帝​嘅​仆人​更加​重要。佢​话,上帝​派​佢​嚟​地上​嘅​一​个​原因​就系​要​佢​宣扬​王国​嘅​好消息。(马太福音​20:28;路加福音​3:23;4:43)耶稣​将​传道​工作​视​为生​活​嘅​重心,亦​都​希望​其他​人​同​佢​一齐​执行​呢​项​工作。(马太福音​9:35-38

2 我哋​可能​唔​系​木匠,不过​我哋​都​系​好消息​嘅​传道员。圣经​将​传道员​称​为“上帝​嘅​同工”,所以​传道​系​同​上帝​有关​嘅​一​项​非常​重要​嘅​工作。(哥林多前书​3:9;哥林多后书​6:4)我哋​承认,耶和华“话语​嘅​要旨​系​真理”。(诗篇​119:159,160)因为​呢个​原因,我哋​喺​传道​嘅​时候​好想“正确​噉​运用 真理​嘅​话语”。(请​读​提摩太后书​2:15所以,我哋​继续​努力​提高​运用​圣经​嘅​技巧。圣经​就系​我哋​用​嚟​教导​人​关于​耶和华、耶稣​同埋​王国​真理​嘅​最​主要​嘅​工具。为咗​帮助​我哋​更​好​噉​执行​传道​工作,耶和华​嘅​组织​仲​为​我哋​设计​咗​一啲​有​用​嘅​工具,并​放​喺​我哋​嘅​教导​工具箱​入面。我哋​应该​学识​点样​善用​呢啲​工具。

3. 做​传道​工作​嗰时,我哋​嘅​焦点​应该​系​乜嘢?喺​呢​方面,使徒行传​13:48​点样​帮助​我哋?

3 可能​你​会​谂,点解​要​叫做“教导​工具箱”而​唔​系“传道​工具箱”。“传道”意味​住​宣扬​一​个​信息,而“教导”就​主要​系​帮助​人​明白​信息​嘅​内容,推动​人​将​自己​学​到​嘅​实践​出嚟。只要​可以​继续​传道,我哋​嘅​焦点​就​应该​系​建立​圣经​课程​同埋​教导​人​圣经​真理。呢个​意味​住,我哋​要​热切​寻找​所有“秉性​适宜​得​永生​嘅​人”,同埋​帮助​佢哋​成为​基督徒。(请​读​使徒行传​13:44-48

4. 我哋​点​知道​边个​系“秉性​适宜​得​永生​嘅​人”?我哋​点样​可以​揾​到​佢哋?

4 我哋​点样​知道​一​个​人​系咪“秉性​适宜​得​永生”呢?喺​1​世纪,揾​到​呢啲​人​嘅​唯一​方法​就系​向​人​作​见证。所以,我哋​都​要​按照​耶稣​嘅​吩咐​去​做,“无论​入​边​一​座​城、边​一​个​村,都​要​揾​出​边个​系​配​得​嘅​人”。(马太福音​10:11)我哋​唔​期望​嗰啲​虚伪、傲慢​或者​对​属灵​嘅​事​唔​感​兴趣​嘅​人​会​对​好消息​有​好​嘅​反应。我哋​想​揾​嘅,系​嗰啲​诚实、谦卑​同埋​渴求​真理​嘅​人。我哋​可以​将​呢​项​工作,比​作​木匠​努力​去​揾​好​嘅​木材​嚟​制作​家具、门、轭​或者​其他​物品。佢​一旦​揾​到​合适​嘅​木材,就​会​带​住​工具箱,运用​佢​嘅​技术​将​原木​整​成​各​样​物件。我哋​努力​帮助​诚心正意​嘅​人​成为​门徒​嗰时,都​必须​噉样​做。(马太福音​28:19,20

5. 关于​教导​工具箱,我哋​需要​知道​乜嘢?请​举例。(请​睇​吓​课文​开头​嘅​图片)

5 工具箱​入面​嘅​每​件​工具​都​有​特别​嘅​用途。请​谂​吓,耶稣​作为​木匠,会​有啲​乜嘢​工具​呢? *佢​嘅​工具箱​当中,可能​有啲​工具​系​用​嚟​量度​同​定位​嘅;有啲​就​用​嚟​切割​木材​或者​喺​木料​上​钻​窿、刨​削、雕​凿;仲​有​一啲​可以​用​嚟​测量​零件​嘅​水平​同​垂直​度​或者​固定​零件。同样,我哋​嘅​教导​工具箱​入面​嘅​每​一​种​工具​都​有​特别​嘅​用途。而家​等​我哋​嚟​了解​吓​点样​使用​呢啲​有​用​嘅​工具。

用​嚟​介绍​我哋​嘅​工具

6,7. (甲)你​曾经​点样​使用​网站​名片?(乙)会众​聚会​邀请单​起​到​乜嘢​作用?

6 网站​名片。呢啲​细小​而​有效​嘅​工具​可以​用​嚟​向​人​介绍​我哋​自己​同埋​引导​人​上​我哋​嘅​网站。人​上​过​我哋​嘅​网站​就​会​对​我哋​有​更​多​认识,仲​有​可能​会​申请​圣经​课程。已经​有​超过​40​万人​通过​jw.org​网站​提交​咗​圣经​课程​嘅​申请,而​申请人​数​每​日​就​有​数​以​百​计​之​多!你​可以​随身​带​一啲​网站​名片,喺​日常​活动​中​把握​机会​向​人​作​见证。

7 会众​聚会​邀请单。邀请单​所​写​嘅​话​表明,耶和华见证人​诚意​邀请​其他​人 一齐​学习​圣经​真理。可以​通过​乜嘢​方式​呢?就系​我哋​嘅​聚会​或者​圣经​课程。呢​份​邀请单​唔​单​止​表明​我哋​嘅​身份,亦​都​向​嗰啲“自觉​有​属灵​需要​嘅​人”提​出​学习​嘅​邀请。(马太福音​5:3)当然,无论​对方​愿唔愿意​接受​一​个​圣经​课程,我哋​都​会​欢迎​佢哋​嚟​参加​聚会。佢哋​参加​呢啲​安排​就​可以​睇​出,自己​得到​嘅​系​真正​嘅​圣经​教育。

8. 点解​我哋​应该​努力​邀请​人​至少​一​次​参加​我哋​嘅​聚会?请​举例。

8 我哋​要​继续​邀请​人参​加​我哋​嘅​聚会。点解​噉样​做​好​重要?佢哋​只要​嚟​一​次​就​有​机会​睇​出,我哋​嘅​聚会​有​丰富​嘅​属灵​供应,同​大巴比伦​嘅​情况​完全​唔同。(以赛亚书​65:13)美国​嘅​一​对​夫妇​雷伊​同​琳达,好多​年​前​就​留意​到​呢​一点。佢哋​相信​上帝,觉得​自己​有​属灵​嘅​需要,于是​打算​去​教堂。不过,佢哋​嘅​城市​入面​有​好多​唔同​派别​嘅​教会,去​边个​先至​啱​呢?佢哋​打算​去​匀​城市​入面​嘅​所有​教堂,加入​符合​以下​两​个​条件​嘅​教会:第​一,佢哋​喺​呢个​教会​可以​有​所​得益;第​二,教会​成员​嘅​衣着​要​同​自称​事奉​上帝​嘅​人​相称。几​年​之后,佢哋​已经​去​过​晒​市​入面​嘅​每​一​个​教会,但​结果​令​佢哋​好​失望,因为​佢哋​乜嘢​都​学​唔​到,而且​教会​成员​嘅​衣着​都​好​唔​端庄。佢哋​去​完​列表​上​嘅​最后​一​个​教会​之后,琳达​返去​做​自己​嘅​工作,雷伊​就​返​屋企。喺​路​上,雷伊​经过​一​个​王国聚会所,佢​谂:“点解​唔​入去​了解​吓​呢?”结果,呢​次​系​佢​所有​经历​当中​最好​嘅​一​次!王国聚会所​入面​嘅​所有​人​都​好友​善、好​热情,而且​衣着​端庄。雷伊​坐​喺​前排,好​欣赏​佢​所​学​到​嘅!情形​就​好似​使徒​保罗​所​提​到​嘅​一​个​人​噉。呢个​人​第​一​次​嚟​到​基督徒​嘅​聚会,然后​话:“上帝​真系​喺​你哋​当中。”(哥林多前书​14:23-25)从此​以后,雷伊​每​个​星期日​都​参加​聚会,后来​又​参加​每​个​周​中​聚会。琳达​亦​都​开始​参加。虽然​佢哋​已经​七十​几​岁,不过​都​接受​咗​圣经​课程,后来​仲​受浸。

打开​话题​嘅​工具

9,10. (甲)点解​话​传单​好容易​使用?(乙)请​解释​点样​使用《上帝​嘅​王国​系​乜嘢​呢?》呢​份​传单。

9 传单。我哋​有​8​份​好好​用​嘅​传单​用​嚟​同​人​打开​话题。自从​2013​年​开始​发行​以来,呢啲​传单​已经​印刷​咗​差唔多​5​亿​份。呢啲​传单​都​系​用​同一​种​格式​设计​嘅,只要​你​学识​使用​其中​一​份,就​会​识得​使用​其他​嘅。你​可以​点样​运用​传单​同​人​打开​话题​呢?

10 我哋​用《上帝​嘅​王国​系乜嘢呢?》呢份​传单​作为​例子。你​可以​请​人​睇吓​传单​正面​嘅​问题,跟​住​问​对方:“你​有冇​谂​过​上帝​嘅​王国​系​乜嘢呢?你​觉得​呢​个​王国​系……?”然后,睇吓佢​会​选择​三​个​答案​当中​嘅​边​一​个。唔使​讲​出​佢嘅​选择​啱唔啱,打开​传单​入面​嘅“圣经​话”,同​对方​分享​精选​嘅​经文​但以理书​2:44​同​以赛亚书​9:6。如果​可以​嘅​话,继续​同​对方​讨论。最后,指​出“试​谂​吓”标题​下面​嘅​问题:“上帝​王国​统治​嗰阵,人​会​过​点样​嘅​生活​呢?”噉样​就​已经​为 你​同​对方​嘅​下​一​次​交谈​建立​咗​基础。再次​见面​嗰阵,你​就​可以​同​对方​讨论《嚟自​上帝​嘅​好消息》第​7​课。呢​本​册子​都​系​我哋​开始​圣经​课程​嘅​其中​一​个​工具。

激发​兴趣​嘅​工具

11. 我哋​嘅​杂志​系​为咗​乜嘢​目的​而​设计​嘅?关于​呢啲​杂志,我哋​应该​知道​乜嘢?

11 杂志。《守望台》同《警醒!》系​世界​上​印刷量​同​语言​数量​最​多​嘅​期刊!由于​世界​各​地​嘅​人​都​有​机会​阅读​呢啲​杂志,所以​杂志​嘅​封面​主题​系​经过​精心​设计​嘅,目的​系​引起​所有​人​嘅​兴趣。我哋​可以​善用​呢啲​工具,激发​人​认真​谂​吓​生活​中​一啲​真正​重要​嘅​问题。不过,我哋​首先​要​知道​呢啲​杂志​系​为​边啲​人​设计​嘅。

12. (甲)《警醒!》系​为​边啲​人​出版​嘅?出版​主旨​系​乜嘢?(乙)你​最近​运用​呢个​工具​取得​乜嘢​成果?

12 《警醒!》系​为​嗰啲​唔​系​咁​熟识​圣经​或者​冇​圣经​知识​嘅​人​而​设计​嘅。呢啲​人​可能​对​基督​嘅​教导​一无所知,亦​都​可能​唔​相信​宗教,唔​清楚​圣经​有​乜嘢​实用​嘅​价值。《警醒!》嘅​一​个​主要​目标​系,帮助​读者​相信​上帝​的确​存在。(罗马书​1:20;希伯来书​11:6)另​一​个​目标​系​帮助​读者​建立​信心,相信​圣经“真真正正​系​上帝​嘅​话语”。(帖撒罗尼迦前书 2:13)2018​年​嘅​三​期《警醒!》嘅​封面​主题​分别​系“踏​上​幸福​之​路”、“12​个​秘诀​让​你​拥有​幸福​的​家”同埋“如何​面对​丧亲​之​痛”。

13. (甲)《守望台》公众版​主要​为​边啲​人​设计?(乙)你​最近​运用​呢个​工具​取得​乜嘢​成果?

13 《守望台》公众版​主要​系​向​嗰啲​尊重​上帝​同​佢​话语​嘅​人​解释​圣经​真理。呢啲​人​可能​已经​有​一啲​圣经​知识,不过​仲​未​确切​认识​圣经​嘅​教导。(罗马书​10:2;提摩太前书​2:3,4)2018​年​嘅​三​期《守望台》公众版​嘅​封面​主题​分别​系“圣经​过时​了​吗?”、“你​的​未来​会​怎样?”同埋“上帝​真​的​关心​你​吗?”。

推动​人​嘅​工具

14. (甲)我哋​可以​点样​使用​教导​工具箱​入面​嘅​四​个​影片?(乙)你​最近​同​人​分享​呢啲​影片​取得​乜嘢​成果?

14 影片。喺​耶稣​嘅​日子,木匠​只系​使用​手​动工​具。不过,今日​嘅​木工​就​有​电动​工具,例如​锯、钻、打磨机、打钉机​等等。除咗​印刷​出版物​之外,我哋​而家​亦​都​向​人​播放​好多​精美​嘅​影片。其中​四​个​放​喺​我哋​嘅​传道​工具​当中​嘅​影片​系:点解​要​学习​圣经?》、《你​可以​点样​学习​圣经?》、《王国聚会所​嘅​聚会​系​点样​嘅?同埋耶和华见证人​系​点样​嘅​人​呢?》。呢啲​影片​长度​少​于​2​分钟,适合​用​于​初次​交谈。其他​时间​长​啲​嘅​影片​可以​向​续访​同埋​时间​比较​多​嘅​人​播放。呢啲​实用​嘅​工具​可以​推动​人​学习​圣经​同埋​参加​聚会。

15. 一啲​人​用​自己​嘅​母语​睇完​我哋​嘅​影片​之后​有​乜嘢​反应?请​举例。

15 举​个​例,有​个​从​密克罗尼西亚​搬​嚟​嘅​女人,佢​嘅​母语​系​雅浦语。我哋​嘅​一​个​姊妹​俾​佢​睇​雅浦语​嘅《点解​要​学习​圣经?》呢个​短片。当​影片​开始​播放​嗰时,呢个​女人​话:“呢个​就系​我​嘅​母语。真系​难以置信!我​听​得​出​影片​入面​嘅 口音​系​嚟自​我​嘅​岛​嗰边​嘅。佢​讲​嘅​系​我​嘅​语言!”之后,佢​话​会​上​jw.org​网站​睇​佢​语言​嘅​所有​书刊​同​影片。(参考​使徒行传​2:8,11)请​睇​吓​另​一​个​经验。一​个​喺​美国​嘅​姊妹​将​一​个​影片​嘅​链接​发​俾​佢​侄​仔。呢个​影片​系​用​佢​侄​仔​嘅​母语​播放​嘅。佢​侄​仔​睇完​影片​之后,发​邮件​同​佢​讲:“我​对​邪恶​力量​控制​世界​嗰​部分​好​有​兴趣。而家,我​已经​申请​咗​一​个​圣经​课程。”佢​侄​仔​生活​喺​一​个​我哋​嘅​工作​受​到​限制​嘅​国家!

教导​真理​嘅​工具

16. 请​解释​每​本​册子​嘅​用途: (甲)《嚟​听​上帝​嘅​话​得享​永生》 (乙)《嚟自​上帝​嘅​好消息》(丙)《谁​在​遵行​上帝​的​旨意》

16 册子。有啲​人​阅读​能力​有限,又​或者​组织​冇​出版​佢哋​语言​嘅​书刊。你​可以​点样​教导​佢哋​认识​圣经​真理​呢?我哋​有​一​个​专门​为​呢啲​人​设计​嘅​工具,就系嚟​听​上帝​嘅​话​得享​永生册子。 *另外,如果​想​开始​圣经​课程,我哋​亦​都​有​一​个​非常​好​嘅​工具,就系嚟自​上帝​嘅​好消息册子。你​可以​俾​人​睇​吓​册子​背面​列​出​嘅​14​个​问题,问​吓​佢​对​边个​话题​最​有​兴趣,跟住​就​可以​开始​学习​同​嗰个​话题​有关​嘅​课文。你​有​冇​喺​续访​嘅​时候​用​过​呢个​方法?我哋​嘅​工具箱​入面​嘅​第​三​本​册子​系谁​在​遵行​上帝​的​旨意。呢​本​册子​嘅​设计​目的​系,帮助​学生​认识​上帝​嘅​组织。如果​想​了解​每​次​讨论​圣经​嗰时​可以​点样​使用​呢​本​册子,可以​参考2017​年​3​月​嘅《传道​与​生活​聚会​手册》

17. (甲)用​嚟​教导​圣经​学生​嘅​两​本​书​分别​有​乜嘢​作用?(乙)一​个​人​就算​已经​受浸​都​应该​点样​做?点解?

17 书籍。你​用​册子​开始​一​个​圣经​课程​之后,亦​都​可以​随时​转用圣经​点​讲?呢​本​书。呢个​工具​可以​帮助​人​更加​了解​圣经​嘅​基本​真理。学​完​呢​本​书​之后,如果​学生​喺​属灵​上​不断​进步,就​可以​继续​用常​在​上帝​的​爱​里书​嚟​学习。呢个​工具​可以​帮助​学生​知道​点样​喺​生活​上​应用​圣经​嘅​原则。请​记住,一​个​人​就算​已经​受浸,都​应该​学​完​呢​两​本​书。噉样​做,佢哋​喺​真理​嘅​根基​就​会​更加​稳固。(请​读​歌罗西书​2:6,7

18. (甲)提摩太前书​4:16​鼓励​我哋​喺​教导​人​圣经​真理​嗰时​点样​做?点解?(乙)我哋​使用​教导​工具箱​嗰时​应该​有​乜嘢​目标?

18 作为​耶和华见证人,我哋​有​义务​传讲“好消息​嘅​真理”,噉样​可以​帮助​人​得到​永生。(歌罗西书​1:5请​读​提摩太前书​4:16)我哋​有​一​个​教导​工具箱,入面​装​满​我哋​所​需要​嘅​工具。(请​睇​附栏“ 教导​工具箱”)愿​我哋​尽​可能​善用​呢啲​工具。我哋​可以​自己​决定​几时​同埋​用​边个​工具​嚟​向​感​兴趣​嘅​人​传道。不过​请​记住,我哋​嘅​目的​唔​系​只系​分发​刊物。我哋​唔​应该​将​刊物​留​俾​嗰啲​对​好消息​冇​兴趣​嘅​人。我哋​嘅​目标​系​帮助​嗰啲​诚心正意、谦卑​同埋​有​属灵​需要​嘅​人,即​系“秉性​适宜​得​永生​嘅​人”,成为​基督​嘅​门徒。(使徒行传​13:48;马太福音 28:19,20

^ 5段 请​睇《守望台》2010​年​8​月​1​日​刊​嘅“木匠”以及​附栏“木匠​的​工具箱”。

^ 16段 如果​一​个​人​识​嘅​字​唔​多,你​可以​用《嚟​听​上帝​嘅​话》嚟​同​佢​讨论。呢​本​册子​大多数​系​图片。