跳到内容

跳到目录

 第​14​章

一心拥护上帝嘅政府

一心拥护上帝嘅政府

本​章​概要

上帝​嘅​子民​忠于​王国,决心​唔​属于​世界

1,2. (甲)从​古​到​今,乜嘢​圣经​原则​一直​指引​住​耶稣​嘅​门徒?(乙)敌人​想​迫​我哋​点​做?(丙)佢哋​有​冇​成功​呢?请​解释。

耶稣​企​喺​管​治​犹太人​嘅​最​高​审判​官​彼拉多​面前,讲​出​一​个​原则,呢个​原则​一直​指引​住​真正​跟从​佢​嘅​人。耶稣​话:“我​嘅​王国​唔​属于​呢个​世界。如果​我​嘅​王国​属于​呢个​世界,我​嘅​臣​下​就​要​战斗,等​我​唔​致​于​被​交俾​犹太人。但系,我​嘅​王国​实在​唔​系​源​于​呢个​世界​嘅。”(约翰福音​18:36)后来,彼拉多​处​决​咗​耶稣。不过,反对者​嘅​胜利​系​好​短暂​嘅,因为​耶稣​冇几耐​就​复活​咗。强大​嘅​罗马​帝国​企图​消灭​基督​嘅​门徒,不过,都​系​白费​心机​嘅,因为​基督徒​已经​将​王国​嘅​信息​传遍​当时​嘅​天下。(歌罗西书​1:23

2 上帝​嘅​王国​喺​1914​年​建立​之后,历史​上​一啲​最​有​势力​嘅​军事​强国​妄​图​消灭​上帝​嘅​子民,但系​冇​一​个​成功。好多​政府​同​政治​党派​试​图​迫​我哋​支持​佢哋,但系​我哋​冇​屈服​而​分裂。今日,上帝​嘅​子民​几乎​遍布​世界​唔同​嘅​国家。不过,我哋​依然​团结​合​一,组​成​咗​一​个​名副其实​嘅​国际​弟兄​团体,喺​政治​方面​严守​中立。我哋​嘅​团结​有力​噉​表明,上帝​嘅​王国​正​喺​度​统治​紧,亦​都​证明​君王​耶稣​基督​一直​指引​我哋,不断​熬炼​同埋​保护​我哋。等​我哋​怀​住“唔​属于​世界”嘅​决心,一齐​睇​吓​耶稣​喺​现代​点样​指引、熬炼​同​保护​我哋,同时​回顾​一下,耶稣​帮​我哋​得到​嘅​一啲​振奋​人心​嘅​胜​诉。(约翰福音​17:14

眼前​重大​嘅​争论

3,4. (甲)上帝​嘅​王国​诞生​之后​发生​咗​咩​事?(乙)对于​中立​嘅​问题,上帝​嘅​子民​系咪​一​向​都​有​清晰​嘅​了解​呢?请​解释。

3 上帝​嘅​王国​诞生​之后,天上​跟住​就​爆发​咗​一​场​战争,撒但​被​掟​到​地上。(请​读​启示录​12:7-10,12地上​亦 都​爆发​咗​战争,呢​场​战争​考验​到​上帝​嘅​子民​保持​中立​嘅​决心,但系​佢哋​下​定​决心​要​跟从​耶稣​嘅​榜样​唔​属于​世界。不过​最初,佢哋​唔​系​好​清楚​应该​点样​做,先至​系​唔​属于​世界。

4 例如,1904​年​出版​嘅​第​六​卷《千禧年​黎明》 *鼓励​基督徒​避免​参战,但系​如果​一​个​基督徒​被​征召​入​伍,就​应该​尽力​申请​做​一啲​非战斗​性​嘅​工作。如果​佢​申请​唔​成功,俾​人​派​去​打仗,都​唔​可以​杀人。英国​嘅​赫伯特·西尼尔​喺​1905​年​受浸,佢​讲​起​嗰时​嘅​情况​话:“当时​啲​弟兄​唔​系​好​清楚,一​个​基督徒​当​兵,净系​做​非战斗​性​嘅​工作,究竟​啱​唔啱​呢?”

5. 关于​当​兵​嘅​问题,《守望台》1915​年​9​月​1​日​刊(英语)点样​解释?

5 关于​基督徒​当​兵,《守望台》1915​年​9​月​1​日​刊(英语)进一步​解释​咗​呢个​问题。就《圣经​嘅​研讨》提​出​嘅​建议,呢​期《守望台》指​出:“基督徒​当​兵,就算​净系​做​非战斗​性​嘅​工作,噉​唔​算​妥协​咩?呢​一​点​值得​探讨。”但系,如果​基督徒​唔​着​军装,唔​服​兵​役,就​会​被​枪​毙,佢​应该​点​做​呢?文章​话:“我哋​可以​选择​向​人​表明​自己​忠于​和平​嘅​君王​耶稣,拒绝​违反​佢​嘅​命令,亦​都​可以​选择​效​忠​世上​嘅​君主,支持​佢哋,等​人​以为​我哋​离​弃​咗​天上​君王​嘅​教​诲。其实​两​者​嘅​结果​都​可能​系​死​于​枪​下。噉​我哋​宁​愿​选择​前​者,选择​为​忠于​天上​嘅​君王​而​死。”虽然​呢​番​话​讲​得​好​有力,但​文章​最后​嘅​结论​系:“我哋​只系​提​出​建议,而​唔​系​夹硬​要​人​噉样​做。”

6. 你​从​赫伯特·西尼尔​嘅​例子​学​到​乜嘢?

6 有啲​弟兄​了解​到​应该​采取​咩​立场,佢哋​决定​点​都​唔​服​兵​役。前面​提过​嘅​赫伯特·西尼尔​话:“我​认为,将​弹药​喺​船​上​搬​落嚟[非战斗​性​嘅​工作]同​上​子弹​冇​咩​分别。”(路加福音​16:10)赫伯特​因为​良心​拒绝​服​兵​役,结果​要​坐​监。佢​同​另外​四​个​弟兄​一齐​韫​咗​喺​英国​嘅​里士满​监狱,嗰度​一共​有​16​个​依​良心​拒服​兵​役​嘅​人,包括​其他​教​派​嘅​信徒。呢啲​人​后来​被​称​为“里士满​十​六​杰”。赫伯特​同​其他​拒绝​服​兵​役​嘅​人​俾​人​秘密​送​到​法国​前线,喺​嗰度​被​判​枪​决。当​佢哋​排​成​一​排​准备​牺牲​嗰阵,行​刑队​冇​开​枪,军​方​仲​下令​将​佢哋​嘅​刑罚​减​为​10​年​有​期​徒刑。

“我​睇​出,上帝​嘅​子民​应该​要​同​所有​人​和平​共​处,即使​战争​期间​都​唔​例外。”——西​蒙·克拉克(见​第​7​段)

7. 二​战​爆发​嗰时,上帝​嘅​子民​已经​清楚​了解​到​乜嘢​呢?

 7 第二次世界大战​爆发​嗰时,耶和华​嘅​子民​已经​清楚​保持​中立​意味​住​乜嘢,同埋​效法​耶稣​嘅​榜样​就​应该​点样​做。(马太福音​26:51-53;约翰福音​17:14-16;彼得前书​2:21)例如,1939​年​11​月​1​日​刊​嘅《守望台》(英语)刊登​咗​一​篇​重要​嘅​文章,题​为《中立》。文章​指​出:“今日,同​耶和华​立约​嘅​子民​必须​遵守​一​项​规定,就系​喺​各​国​嘅​战争​当中​严守​中立。”西蒙·克拉克​后来​喺​纽约​布鲁克林​总部​服务,佢​提​到​呢​篇​文章​话:“我​睇​出,上帝​嘅​子民​应该​要​同​所有​人​和平​共​处,即使​战争​期间​都​唔​例外。”呢​篇​文章​真​系​好​合时,帮助​上帝​嘅​子民​做​好​准备,面对​前所未有​嘅​攻击​嗰阵,都​能够​忠于​上帝​嘅​王国。

反对​嘅“河​水”涌​埋​嚟

8,9. 使徒​约翰​嘅​预言​点样​应验?

8 使徒​约翰​预告,上帝​嘅​王国​喺​1914​年​诞生​之后,大龙​魔鬼​撒但​会​从​口​里​吐​出​水​嚟,好似​洪水​咁​猛, 企图​消灭​所有​拥护​上帝​王国​嘅​人。 *(请​读​启示录​12:9,15约翰​嘅​预言​点样​应验​呢?由​上​世纪​20​年代​开始,反对​好似​浪潮​噉​向​上帝​嘅​子民​涌​埋​嚟。第二次世界大战​期间,克拉克​弟兄​同​好多​北美洲​嘅​弟兄​一样,因为​忠于​上帝​嘅​王国​而​坐​监。喺​战争​期间,因为​信仰​拒绝​参战​俾​人​韫​喺​美国​联邦​监狱​嘅​人​当中,有​超过​三​分​之​二​系​耶和华见证人。

9 无论​上帝​王国​嘅​子民​住​喺​边个​国家,魔鬼​同埋​佢​啲​爪牙​都​谂​尽​办法​迫​佢哋​舍弃​忠义。无论​喺​非洲、欧洲​定​系​美国,都​有​弟兄​被​告​上​法庭,或者​俾​人​带​到​去​假​释​裁决​委员会。由于​坚决​保持​中立,佢哋​俾​人​捉​去​坐​监、俾​人​打,或者​虐待​到​残废。喺​德国,上帝​嘅​子民​唔​肯​嗌“救​星​希特勒​万​岁”,亦​都​拒绝​参战,所以​面对​极大​嘅​压力。喺​纳​粹​时代,估计​有​6000​个​耶和华见证人​俾​人​韫​喺​集中​营,超过​1600​个​德裔​同​非德裔​嘅​耶和华见证人​被​虐待​致​死。即使​系​噉,魔鬼​绝对​冇​可能​对​上帝​嘅​子民​造成​永久​嘅​伤害。(马可福音​8:34,35

“地”将“河​水”吞​咗

10. (甲)“地”象征​乜嘢?(乙)“地”点样​帮助​上帝​嘅​子民?

10 使徒​约翰​嘅​预言​透露,“地”会​帮助​上帝​嘅​子民,将​反对​嘅“河​水”吞​咗。“地”象征​世上​比较​明白​事​理​又​有​权势​嘅​人​或者​团体。预言​点样​应验​呢?二​战​结束​之后​嘅​几十​年​期间,好多​时“地”会​采取​行动,保护​忠于​弥赛亚​王国​嘅​人。(请​读​启示录​12:16例如,有啲​好​有​影响​力​嘅​法院​维护​咗​耶和华见证人​嘅​权利,容许​佢哋​唔​服​兵​役,同埋​唔​参加​国家​主​义​有关​嘅​活动。关于​拒绝​服​兵​役,等​我哋​嚟​睇​吓​耶和华​点样​帮助​佢​嘅​子民,喺​法律​上​得到​嘅​一啲​重大​胜利。(诗篇​68:20

11,12. (甲)西库雷拉​弟兄​同​斯利门诺斯​弟兄,要​面对​乜嘢​考验?(乙)结果​点样?

11 美国 安东尼·西库雷拉​有​5​个​兄弟​姐妹,父母​系​耶和华见证人。佢​15​岁​受浸,21​岁​嗰阵​向​征​兵​局​登记​自己​系​神​职​人员。两​年​之后,即​系​1950​年,佢​申请​将​登记​嘅​身份​改为​依​良心​拒服​兵​役​嘅​人。虽然​美国​联邦​调查局​嘅​报告​入面​冇​任何​负​面​嘅​资料,但系​司法​部​唔​接受​佢​重新 登记​嘅​身份。经过​一连串​诉讼​之后,美国​最​高​法院​受​理​咗​西库雷拉​弟兄​嘅​案​件,而且​推​翻​下​级​法院​嘅​裁决,判​西库雷拉​弟兄​胜​诉。呢​项​裁决​成​咗​先例,使​美国​其他​公民​可以​依​良心​拒服​兵​役。

12 希腊 1983​年,雅科沃斯·斯利门诺斯​因为​拒绝​着​军装,被​判​违抗​命令​而​坐​监。佢​获​释​后,申请​会计​师​证​嘅​时候​俾​人​拒绝,理由​系​佢​有​案底。佢​向​希腊​法院​申诉,但系​一直​败诉,于是​佢​上​诉​到​欧洲​人权​法院。2000​年,由​17​位​法官​组​成​嘅​欧洲​人权​法院​大​法庭​裁​定​雅科沃斯​胜​诉,呢​单​案​成​咗​反歧​视​案​嘅​先例。之前,希腊​有​超过​3500​个​弟兄​因为​保持​中立​而​坐​过​监,留​有​案底。裁决​作出​之后,希腊​通过​一​条​法令,撤销​咗​对​呢啲​弟兄​嘅​刑​事​起​诉。另外,裁决​作出​前​几​年​已经​通过​一​条​法令,就系​批准​所有​希腊​公民​可以​选择​做​社会​服务​代替​服​兵​役。后来​希腊​修改​宪法,使​呢​条​法令​再次​得到​确​立。

“我​行​入去​法庭​之前,向​耶和华​热切​噉​祷告,即刻​就​感受​到​佢​所​赐​嘅​平静。”——伊瓦伊洛·斯蒂芬诺(见​第​13​段)

13,14. 你​从​斯蒂芬诺​同​巴亚特扬​嘅​案​件​学​到​乜嘢?

13 保加利亚 1994​年,19​岁​嘅​伊瓦伊洛·斯蒂芬诺​被​征召​入​伍。佢​拒绝​参军,亦​拒绝​从事​军队​入面​嘅​非战斗​性​工作,结果​被​判​入​狱​18​个​月。佢​向​法院​上​诉,理由​系​自己​有​权​依​良心​拒服​兵​役。结果,欧洲​人权​法院​受​理​咗​呢​单​案。2001​年,欧洲​人权​法院​开​庭​之前,保​加​利亚​政府​向​伊瓦伊洛·斯蒂芬诺​提​出​和​解。政府​撤销​对​伊瓦伊洛·斯蒂芬诺​嘅​指控,仲​容许​所有​保加利亚​公民,选择​做​社会​服务​代替​服​兵​役。 *

14 亚美尼亚 2001​年,瓦汉·巴亚特扬​到​咗​服​兵​役​嘅​法​定​年龄。[4]佢​依​良心​拒服​兵​役,结果​被​判​入​狱​两​年​半。佢​向​亚美尼亚法院​上​诉,但系​次​次​都​失败。2002​年​9​月,佢​开始​喺​监狱​服刑,不过​10​个​半​月​之后​就​获​释。喺​服刑​期间,佢​向​欧洲​人权​法院​上​诉,法院​受​理​咗​呢​单​案。但系,喺​2009​年​10​月​27​日,法院​判​佢​败诉。睇嚟​呢​项​裁决​对​国​内​面对​同样​情况​嘅​弟兄,系​一​个​沉重​嘅​打击。不过,欧洲​人权​法院​大​法庭​重​审​呢​单​案。2011​年​7​月​7​日,大​法庭​判​瓦汉·巴亚特扬​胜​诉。呢​次​系​欧洲​人权 法院​首次​承认,基​于​宗教​理由​依​良心​拒服​兵​役​嘅​人​享有​思想、良心​同​宗教​嘅​自由,呢​种​权利​应该​受​到​保障。呢​项​裁决​唔单止​维护​咗​耶和华见证人​嘅​权利,亦​都​维护​咗​欧洲​委员会​成员​国​数​以​亿万​计​人民​嘅​人权。 *

喺​欧洲​人权​法院​嘅​有​利裁决​之下,亚美尼亚​嘅​弟兄​从​监狱​获得​释放

同​国家​主​义​有关​嘅​仪式

15. 点解​耶和华​嘅​子民​唔​参加​任何​同​国家​主​义​有关​嘅​仪式​呢?

15 耶和华​嘅​子民​忠于​弥赛亚​王国,所以​拒绝​服​兵​役,亦​都​会​用​尊重​嘅​态度​向​人​表明,我哋​唔​参加​任何​同​国家​主​义​有关​嘅​仪式。二​战​爆发​之后,国家​主​义​嘅​浪潮​席卷​全球。好多​国家​都​要求​人民​宣​誓、唱​国​歌、向​国​旗​敬​礼,表示​效​忠祖​国。无论​如何,我哋​都​要​专一​爱​戴​耶和华。(出埃及记​20:4,5)结果,迫害​好似​洪水​噉​向​我哋 涌​埋​嚟。但系,耶和华​再次​用“地”将​一啲​反对​嘅“河​水”吞​咗。请​睇​吓​耶和华​通过​耶稣​帮助​我哋​喺​法律​上​得到​嘅​几​场​重大​胜利。(诗篇​3:8

16,17. (甲)莉莲​同​威廉​面对​乜嘢​难题?(乙)你​从​佢哋​嘅​例子​学​到​乜嘢?

16 美国 1940​年,关于​迈纳斯维尔​学​区​诉​戈比蒂斯案,美国​最​高​法院​作出​裁决,以​8​票​对​1​票​判​耶和华见证人​败诉。12​岁​嘅​莉莲·戈比塔斯 *同​10​岁​嘅​弟弟​威廉​为咗​忠于​耶和华​上帝,唔​肯​向​国​旗​敬​礼​或者​宣​誓​效​忠祖​国,结果​俾​学校​开除。呢​单​案​件​上​诉​到​美国​最​高​法院,法院​认​定​学校​嘅​做法​符合​宪法,有​助​于“国家​统​一”。呢​项​裁决​引​发​一​场​迫害​嘅​大​风暴。耶和华见证人​儿童​接二连三​噉​俾​学校​开除,好多​耶和华见证人​都​俾​老板​炒​咗,有啲​仲​俾​暴​民​袭击。《国家​之​荣》(英语)一​书​指​出:“由​1941​年​到​1943​年,耶和华见证人​喺​美国​受​到​嘅​迫害,系​20​世纪​以来​最​猛烈​嘅​宗教​迫害。”

17 上帝​嘅​仇敌​得到​嘅​胜利​只系​好​短暂​嘅。1943​年,最​高​法院​受​理​咗​另​一​单​同​戈比蒂斯案​类似​嘅​案​件,就系​西弗吉尼亚​州​教育局​诉​巴尼特案。呢​次​最​高​法院​判​耶和华见证人​胜​诉。喺​美国​嘅​历史​上,最​高​法院​首次​喺​咁​短​时间​内​改变​态度。呢​项​裁决​作出​之后,美国​公开​迫害​耶和华见证人​嘅​行为​明显​减少。而且​美国​所有​公民​嘅​人权,都​进一步​得到​保障。

18,19. (甲)点解​巴勃罗·巴罗斯​能够​紧守​忠义​呢?(乙)事奉​耶和华​嘅​人​可以​点样​效法​佢​嘅​榜样?

18 阿根廷 1976​年,8​岁​嘅​巴勃罗·巴罗斯​同​7​岁​嘅​胡戈·巴罗斯​唔​肯​参加​升​旗​仪式,俾​学校​开除。开除​之前,女​校​长​大力​噉​推​巴勃罗,又​打​佢​个​头,仲​罚​巴勃罗​同埋​胡戈​放​学​之后​留​堂​一​个​钟,想​迫​佢哋​两​兄弟​参加​升​旗​仪式。巴勃罗​谂​翻​起​嗰​次​经历,话:“如果​唔​系​耶和华​帮​我,喺​咁​大​压力​下,我​根本​冇​可能​紧守​忠义。”

19 喺​法庭​上,法官​支持​校​方​开除​巴勃罗​同​胡戈。案​件​上​诉​到​阿根廷​最​高​法院。1979​年,最​高​法院​推​翻​下​级​法院​嘅​裁决,指​出:“根据​宪法,人民​有​学习​权(第​14​条),国家​有​责任​向​人民​提供​小​学​程度​嘅​教育(第​5​条)。校​方​施行​嘅​惩罚[开除​学​籍]同​宪法​有​抵触。”呢​次​胜​诉​令​大约​1000​个​耶和华见证人​儿童​受​益。学校​唔​再​开除 耶和华见证人​儿童,有啲​就​恢复​学​籍,好似​巴勃罗​同​胡戈​噉,可以​返翻​学校。

好多​年轻​嘅​耶和华见证人​喺​考验​之下​保持​忠贞

20,21. 罗埃尔​同​爱米莉​嘅​案​件​点样​强化​你​嘅​信心?

20 菲律宾 1990​年,9​岁​嘅​罗埃尔·恩布拉伦格 *同​10​岁​嘅​姐姐​爱米莉,仲​有​超过​65​个​耶和华见证人​儿童,因为​唔​肯​向​国​旗​敬​礼​而​俾​学校​开除。佢哋​嘅​爸爸​莱昂纳多​尝试​同​校​方​解释,不过​冇​用。情况​越来越​差,于是​莱昂纳多​向​最​高​法院​上​诉。但系,莱昂纳多​冇​钱​请​律师,成​家人​就​向​耶和华​热切​祷告,寻求​佢​嘅​指引。喺​嗰​段​日子,两​个​细路​一直​俾​人​嘲​笑。莱昂纳多​冇​咩​法律​知识,所以​佢​觉得​系​冇​可能​打​赢​呢​场​官司​嘅。

21 后来,事情​有​转机,费利诺·加纳尔​愿意​代表​呢​家人​出​庭,佢​曾经​喺​国​内​数一数二​嘅​律师​事务​所​做​律 师。接​呢​单​案​件​嗰时,加​纳​尔​已经​成为​耶和华见证人,亦​都​冇​喺​以前​间​律师​事务​所​度​做。最​高​法院​嘅​法官​一致​裁​定​耶和华见证人​胜​诉,宣布​学校​下​达​嘅​退​学​令​无​效。再​一​次,嗰啲​试​图​迫​上帝​子民​舍弃​忠义​嘅​人​又​失败​喇。

因​中立​而​团结

22,23. (甲)点解​我哋​能够​打​赢​咁​多​场​重要​嘅​官司​呢?(乙)我哋​嘅​国际​弟兄​团体​可以​团结​和谐,证明​咗​乜嘢?

22 点解​耶和华​嘅​子民​能够​赢​到​咁​多​场​重要​嘅​官司​呢?我哋​一​嚟​冇​政治​嘅​影响​力,二​嚟​又​要​面对​势力​强大​嘅​反对者​发​动​嘅​猛烈​攻击,不过​喺​一​个​又​一​个​国家,一​个​又​一​个​法庭,都​有​正义​感​嘅​法官​挺​身​保护​我哋,佢哋​作出​嘅​裁决​成为​宪法​嘅​先例。毫无​疑问,基督​一直​做​我哋​嘅​后盾,帮助​我哋​获得​胜利。(请​读​启示录​6:2点解​我哋​要​打​呢啲​官司​呢?我哋​唔​系​为咗​司法​改​革,而系​为咗​可以​唔​受​阻碍,继续​为​君王​耶稣​基督​服务。(使徒行传​4:29

23 政治​斗争​搞​到​成​个​世界​都​四分五裂,根​深​蒂固​嘅​仇恨​扭曲​咗​成​个​人类​社会。但系,君王​耶稣​基督​一直​赐​福​俾​我哋,帮助​我哋​严守​中立。虽然​撒但​千方百计​要​分裂​我哋,使​我哋​屈服,但系​就​一​败​涂​地。上帝​嘅​王国​已经​将​几百万​爱好​和平​嘅​人​召集​起嚟,佢哋​都“唔​再​学习​战​事”。世上​竟然​有​一​个​咁​团结​和谐​嘅​国际​弟兄​团体,真​系​一​个​奇迹,呢个​确实​证明​上帝​嘅​王国​统治​嘞!(以赛亚书​2:4

^ 4段 呢​卷​又​称​为《新​嘅​受造物》。《千禧年​黎明》后来​称​为《圣经​嘅​研讨》。

^ 8段 关于​呢个​预言,详见《启示录​伟大​的​高潮​近​了!》第​27​章​184-186​页

^ 13段 根据​和​解​协议,保加利亚​政府​一定​要​容许​所有​依​良心​拒服​兵​役​嘅​人,喺​民​事​管理​部​门​服​替代​役。

^ 14段 《守望台》2012​年​11​月​1​日​刊​29-31​页详细​报道​咗​呢​件​事。

^ 16段 亚美尼亚​政府​喺​20​年​期间,囚禁​咗​超过​450​个​年轻​嘅​耶和华见证人。2013​年​11​月,最后​一​批​被​囚禁​嘅​见证人​获得​释放。

^ 20段 庭​审​记录​里面,当事人​嘅​姓氏​写​错​咗。

庭​审​记录​里面,当事人​嘅​姓氏​俾​人​写成“埃布拉伦格”。