跳到内容

跳到目录

 第​2​章

上帝嘅王国喺天上诞生咗

上帝嘅王国喺天上诞生咗

本​章​概要

上帝​嘅​子民​点样​做​好​准备,迎接​上帝​王国​嘅​诞生

1,2. (甲)世界​历史​上​发生​咗​乜嘢​前所未有​嘅​重大​事件?(乙)人​睇​唔​到​呢​件​大事​发生,点解​系​好​平常​嘅​呢?

你​有​冇​谂​过,生活​喺​历史​上​一​个​重大​嘅​转折​时期​系​点​嘅​呢?唔少​人​都​曾经​谂​过。就算​你​真系​生活​喺​噉样​嘅​时期,又​有​冇​机会​亲眼​睇​到,嗰啲​促成​世界​改变​嘅​重大​事件​呢?可能​未必。历史​记载​咗​好多​改朝换代、政权​更替​嘅​内容,但系​促成​呢啲​改变​嘅​事件,往往​都​系​喺​幕后​策划​嘅。换言之,历史​上​好多​事​都​发生​喺​宫廷、密室、政府​机关​等等​呢啲​唔系​一般​人​可以​随便​出入​嘅​地方,呢啲​事​好多​人​都​唔​知道,但系​就​会​影响​到​千万​人​嘅​生活。

2 噉​世界​历史​上​发生​咗​一​件​前所未有​嘅​重大​事件,你​又​知​唔​知​呢?呢​件​大事​系​人​睇​唔​到​嘅,不过​就​会​影响​到​千万​人​嘅​生活。系​乜嘢​大事​呢?就​系​上帝​嘅​王国​喺​天上​诞生​咗。呢个​王国​系​上帝​喺​好​耐​之前​就​应许​嘅​弥赛亚​政府,好​快​就​会​将​撒但​世界​嘅​整​个​制度​彻底​毁灭。(请​读​但以理书​2:34,35,44,45既然​人​睇​唔​到​上帝​王国​嘅​诞生,噉​系咪​话,耶和华​唔​想​俾​人​知道​呢​件​事​呢?定​系​佢​喺​事​前​已经​帮助​佢​嘅​忠贞​子民​做​好​准备,迎接​上帝​王国​嘅​诞生​呢?等​我哋​嚟​睇​下。

“我​要​打发​我​嘅​使者​为​我​预备​道路”

3-5. (甲)马拉基书​3:1​提到​嗰​位​宣告​约​嘅​使者​系​边个?(乙)宣告​约​嘅​使者​嚟​视察​圣殿​之前,有​乜嘢​事​发生?

3 耶和华​喺​古代​就​定意​佢​嘅​子民​做​好​准备,迎接​弥赛亚​王国​嘅​诞生。点解​噉​讲?请​睇​下​马拉基书​3:1​嘅​预言:“我​要​打发​我​嘅​使者​为​我​预备​道路。然后​你哋​所​揾​嘅​主​会​突然​来​到​佢​嘅​圣殿;你哋​渴望​睇见​嘅​使者​会​来​宣告​我​嘅​约。”

4 喺​现代,至高​主宰​耶和华​几时​嚟​视察​喺​属灵​圣殿​地上​院子​里面​敬奉​佢​嘅​人​呢?马拉基​嘅​预言​指​出,耶和华​会 同​嗰个“宣告[​佢​]嘅​约”嘅​使者​一齐​嚟。呢​位​宣告​约​嘅​使者​系​边个​呢?就​系​上帝​应许​嘅​弥赛亚​君王​耶稣​基督。(路加福音​1:68-73)佢​登基​作​王​之后,就​嚟​视察​同埋​熬炼​上帝​喺​地上​嘅​子民。(彼得前书​4:17

5 马拉基书​3:1​一​开始​提到“预备​道路”嘅​使者​又​系​边个​呢?喺​弥赛亚​君王​临在​之前,呢​位​使者​所​预表​嘅​人​早​就​已经​出现​咗。1914​年​之前​几十​年,有​冇​人​喺​弥赛亚​君王​面前“预备​道路”呢?

6. 马拉基​预告​会​有​一​位“预备​道路”嘅​使者​先​嚟​帮​上帝​嘅​子民​做​好​准备,应付​前头​要​发生​嘅​事。呢​位​使者​指​嘅​系​边啲​人?

6 呢​本​书​讲述​耶和华​嘅​子民​振奋​人心​嘅​现代​历史。我哋​回顾​呢​段​历史,就​可以​揾​到​以​上​问题​嘅​答案。19​世纪​嘅​下半​世纪,有名无实​嘅​基督徒​为数​众多。但​有​一​小群​人​忠于​上帝,佢哋​所​做​嘅​事​表明​自己​系​惟一​嘅​一​群​真​基督徒。呢​群​人​后嚟​叫​做​圣经研究者,当中​带头​嘅​系​查尔斯·罗素​同​佢​嘅​同工。呢啲​带头​嘅​弟兄​就​好似​马拉基​预告“预备​道路”嘅​使者,为​上帝​嘅​子民​提供​属灵​嘅​指引,帮助​佢哋​做​好​准备,应付​前头​要​发生​嘅​事。下文​会​讲​下,马拉基​预告“预备​道路”嘅​使者​喺​四​方面​帮助​上帝​嘅​子民​准备​妥当。

按​真理​崇拜​上帝

7,8. (甲)喺​19​世纪,边啲​人​开始​揭露​灵魂不死​嘅​教义​系​错误​嘅​呢?(乙)罗素​同​佢​嘅​同工​仲​揭露​咗​边啲​错误​嘅​道理?

7 圣经研究者​努力​研读​圣经,祷告​求​上帝​指引;佢哋​辨明​圣经​嘅​真理,得​出​一致​嘅​结论,就​记录​落嚟,然后​出版。千百​年​嚟,一般​教会​一直​处于​属灵​嘅​黑暗​当中,佢哋​嘅​主张​大部分​都​源自​异教。一​个​典型​嘅​例子​就​系​灵魂不死​嘅​教义。到​咗​19​世纪,经过​仔细​查考,几​个​诚心​研究​圣经​嘅​人​睇出​灵魂不死​嘅​教义​冇​圣经​根据。亨利·格鲁、乔治·斯特森​同埋​乔治·斯托尔斯​都​写​咗​好多​文章,亦​都​发表​过​一啲​演讲,大胆​揭露​灵魂不死​嘅​教义​系​撒但​所​讲​嘅​大话! *佢哋​嘅​研究​对​罗素​同​佢​嘅​同工​产生​咗​深远​嘅​影响。

8 呢​一​小群​圣经研究者​发现,同​灵魂不死​有关​嘅​其他​教义,例如​话​好人​上​天堂,坏人​落​地狱;上帝​用​地狱永火​嚟​折磨​坏人​嘅​呢啲​讲法,唔单止​好​难​理解,而且​系​错误​嘅。罗素​同​佢​嘅​同工​通过​文章、传单、书本、小册子​同埋​喺​报章​上面​发表​嘅​传道​演讲,大胆​噉​揭穿​呢啲​谎言。

9. 关于​三位一体​嘅​教义,《锡安​嘅​守望台》点样​讲?

9 圣经研究者​仲​指​出,一般​教会​所​推崇​嘅​三位一体​教义,唔系​以​圣经​为​依据​嘅。1887​年,英语版《锡安​嘅​守望台》 话:“圣经​清楚​表明,耶和华​同​我哋​嘅​主​耶稣​唔系​同​一​个​个体,佢哋​各自​存在。圣经​亦​都​明确​噉​指​出​耶和华​同​耶稣​系​乜嘢​关系。”文章​接住​讲:“三一神论(意思​系​一​神​共有​三位、三位​共​为​一​神)竟然​备受​推崇,而且​广为​大众​接纳,真系​不可思议。呢​一切​表明​乜嘢​呢?表明​教会​瞓​得​好​淰,连​自己​俾​仇敌​用​错误​主张,好似​锁链​噉​锁住,都​完全​唔​知道。”

10. 点解《守望台》话​1914​年​系​个​重要​嘅​年份?

10 通过​杂志​嘅​全​名《锡安​嘅​守望台​与​基督​临在​嘅​先声》可以​睇出,呢​本​杂志​着重​讲​有关​基督​临在​嘅​预言。编写​文章​嘅​忠心​受膏基督徒​睇出,但以理​预告​嘅“七期” *,系​同​上帝​将​会​喺​咩​时候,实现​佢​对​弥赛亚​王国​所​定​嘅​旨意​有关​嘅。喺​19​世纪​70​年代,佢哋​早就​已经​指​出“七期”会​喺​1914​年​结束。(但以理书​4:25;路加福音​21:24)嗰时,我哋​嘅​弟兄​虽然​未​完全​明白​呢个​重要​年份​嘅​意义,但​依然​将​自己​所​知道​嘅​圣经​真理​广传​开去,对​后嚟​嘅​人​影响​深远。

11,12. (甲)罗素​弟兄​对​圣经​真理​有​清晰​嘅​了解,佢​将​功劳​归俾​边个?(乙)1914​年​之前​几十​年,罗素​弟兄​同​佢​嘅​同工​所​成就​嘅​事​有​几​重要?

 11 罗素​同​呢啲​忠心​嘅​同工​一齐​钻研​圣经,发现​咗​上面​提到​嘅​重要​真理,而且​对​呢啲​真理​有​清晰​嘅​了解,但系​佢哋​从来​都​冇​将​功劳​归俾​自己。罗素​将​功劳​归俾​嗰啲​喺​佢​之前​寻求​真理​嘅​人。最​重要​嘅​系,佢​将​功劳​归俾​耶和华​上帝,因为​上帝​知道​应该​喺​乜嘢​时候,将​佢​子民​需要​认识​嘅​真理​教导​佢哋。罗素​同​佢​嘅​同工​努力​将​真理​同​谬误​区分​开来,显然​得到​耶和华​嘅​赐​福。随住​时间​过去,佢哋​同​一般​教会​嘅​差异​越​嚟​越​明显。

罗素​弟兄​同​佢​嘅​同工​捍卫​圣经​真理

12 1914​年​之前​嘅​几十​年,呢啲​忠心​嘅​男子​一直​努力​捍卫​真理,佢哋​所​成就​嘅​事,真系​令​人​钦佩。回顾​以往,英语版《守望台​与​基督​临在​嘅​先声》1917​年​11​月​1​日​刊​话:“好多​人​因为​相信​地狱永火​同埋​其他​错误​嘅​道理,觉得​好​惊,而家​佢哋​已经​摆脱​咗​恐惧​嘞。......四十​几​年​前,真理​好似​潮水​噉​不断​上涨,越​涨​越​高,直到​弥漫​全​地。反对者​企图​阻止​真理​传遍​大地,就​好似​用​扫把​将​涌​过嚟​嘅​海浪​扫翻​落​大海​噉,简直​就​系​白费​心机!”

13,14. (甲)马拉基​预告“预备​道路”嘅​使者​点样​为​弥赛亚​王国​嘅​君王​预备​道路?(乙)从​呢啲​生活​喺​百几​年​之前​嘅​弟兄​身上,我哋​学​到​乜嘢​呢?

13 请​谂​一​下:喺​上帝​嘅​子民​当中,有啲​人​连​耶稣​同​佢​天父​耶和华​嘅​身份​都​分​唔​清;有啲​人​以​为​不​死​嘅​生命​系​所有​人​自然​就​会​得到​嘅,而​唔系​上帝​赐​俾​少数​受膏基督徒​嘅​宝贵​礼物;有啲​人​相信​上帝​用​地狱永火​嚟​折磨​人,落​入​地狱​嘅​人​永远​都​得​唔​到​解脱。如果​上帝​嘅​子民​继续​俾​呢啲​错误​嘅​道理​蒙蔽,到​咗​基督​开始​临在​嗰时​又​点​可以​做​好​准备​呢?当然​冇​可能。马拉基​预告“预备​道路”嘅​使者​的确​为​弥赛亚​君王​预备​咗​道路,呢​一​点​系​毫无​疑问​嘅。

14 噉​我哋​呢?从​呢啲​生活​喺​百几​年​之前​嘅​弟兄​身上,我哋​学​到​乜嘢​呢?就​好似​佢哋​噉,我哋​要​喜爱​阅读​圣经,努力​钻研​上帝​嘅​话语。(约翰福音​17:3)呢个​世界​注重​物质​享受,喺​属灵​方面​越​来​越​贫乏,但​愿​我哋​唔​会​受​世界​嘅​影响,对​灵粮​嘅​热爱​有增无减!(请​读​提摩太前书​4:15

“我​嘅​子民!你哋​要​从​嗰​个​城​出嚟”

15. 圣经研究者​慢慢​睇出​乜嘢​呢?(另​见​脚注)

15 圣经研究者​教导​话,真​基督徒​必须​脱离​所有​同​世界​友好​嘅​教会。1879​年,英语版《守望台》提到​嘅“巴比伦​教会”,指​嘅​系​乜嘢​呢?系​历代​教宗,定​系​罗马​天​主​教会?几​百​年​嚟,基督新教​嘅​唔​同​教​派​一直​认为,圣经​预言​提到​嘅 “巴比伦”系​天主教会。但系,圣经研究者​慢慢​睇出,现代​嘅“巴比伦”包括​所有​鼓吹​错误​道理​嘅​教会。点解​噉​讲​呢?因为​呢啲​教会​都​用​上文​提到​嘅​谎言​作​为​教义。 *一​段​时间​之后,上帝​组织​嘅​出版物​越​嚟​越​明确​噉​指​出,“巴比伦​教会”里面​诚心正意​嘅​人​应该​点样​做。

16,17. (甲)《千禧年​黎明》第​3​卷​同《守望台》提出​乜嘢​劝告,促请​人​同​错误​嘅​宗教​断绝​关系?(乙)点解​呢个​劝告​初时​唔系​咁​有效?(见​脚注)

16 就​以​1891​年​出版​嘅《千禧年​黎明》(英语)第​3​卷​作​为​例子,呢​本​书​提到​上帝​会​舍弃​现代​嘅“巴比伦”,话:“呢个​复杂​混乱​嘅​宗教​制度​会​全部​被​舍弃。”跟住​仲​话,“凡​系​唔​认同‘巴比伦’嘅​错误​主张​同​宗教​习俗​嘅,而家​就​要​离开​佢”。

17 当时,有啲​人​嘅​名​仲系​留​喺​教会​嘅​名册​上面,佢哋​为​自己​辩解​话:“我​完全​认同​真理,亦​都​冇​点​去​教堂​嘞。”英语版《守望台》1900​年​1​月​刊​提出​劝告:“呢​种‘一​脚​踏​两​船’嘅​做法​系咪​啱​嘅​呢?上帝​所​要求​嘅​服从​系咪​只​系​噉​呢?......上帝​会​唔​会​接受​同​钟意​噉​嘅​行为​呢?当然​唔​会。试​谂下,一​个​人​加入​某​个​教会,就​等于​公开​同​嗰​个​教会​订立​咗​一​个​约。佢​应该​遵守​呢个​约​嘅​全部​规定,直到​佢......公开​噉​声明​自己​退出​教会​为止。”随住​时间​嘅​过去,呢个​劝告​嘅​措辞​越​嚟​越​强烈。 *耶和华​嘅​仆人​一​定​要​同​错误​嘅​宗教​断绝​一切​关系。

18. 点解​人​一定​要​从“大巴比伦”里面​出嚟?

18 请​谂下,如果​当时​冇​人​经常​发出​警告,促请​人​离开“大巴比伦”,又​点会​有​一​群​受膏​嘅​基督徒​喺​地上​做​好​准备,为​啱啱​登基​嘅​君王​基督​效劳​呢?基督徒​一​定​要​摆脱“大巴比伦”嘅​枷锁,先至​可以​按​灵​同​真理​崇拜​耶和华。(约翰福音​4:24,17:17)同样,今日​我哋​有冇​决心​唔​俾​错误​嘅​宗教​玷污​自己​呢?愿​我哋​嚟​时刻​服从​上帝​嘅​命令:“我​嘅​子民!你哋​要​从​嗰​个​城​出嚟!”(请​读​启示录​18:4

聚集​起嚟​崇拜​耶和华

19,20. 《守望台》点样​鼓励​上帝​嘅​子民​聚集​起嚟​崇拜​耶和华?

19 圣经研究者​教导​话,真​基督徒​一​有​机会​就​应该​聚集​起嚟​崇拜​耶和华。真​基督徒​唔单止​要​脱离​错误​嘅​宗教,仲​要​用​正确​嘅​方式​嚟​崇拜​上帝。《守望台》从​一​开始​就​鼓励​读者​聚集​起嚟​崇拜​耶和华。例如,喺​英语版《守望台》1880​年​7​月​刊,罗素​弟兄​提到​佢​嘅​一​次​巡回​演讲,佢​话​自己​参加​过​嘅​聚会​非常​鼓舞​人心。佢​鼓励​读者​将​自己​参加​聚会​嘅​经历​写​喺​卡片​上面​寄俾《守望台》,其中​一啲​经历​会​登​出嚟。 点解​噉​做​呢?“我哋​想​知道......主​点样​祝福​你哋,亦​都​想​知道​你哋​有​冇​继续​同​信仰​一致​嘅​人​聚集​起嚟。”

1909​年,喺​丹麦​嘅​哥本哈根,查尔斯·罗素​同​早期​嘅​一​群​圣经研究者​合照

20 1882​年,英语版《守望台》刊登​咗​一​篇​叫《齐聚一堂》嘅​文章。呢​篇​文章​强调​基督徒​要​聚集​喺​一齐,“互相​交流,彼此​鼓励​同​强化”。文章​话:“有​冇​学识​或者​才能​并​唔​重要,重要​嘅​系​出席​聚会。每​个​人​要​带​自己​嘅​圣经、纸​同​笔,如果​有​参考书,例如《圣经​词语​索引》,亦​都​可以​带埋​嚟。首先​拣​一​个​课题;跟住​祷告​求​上帝​赐​圣灵​指引​我哋​明白​探讨​嘅​资料;然后​阅读、思考、对比​经文。噉样,你哋​就​一定​可以​明白​真理。”

21. 关于​聚会​同​牧养​工作,我哋​可以​点样​效法​美国​宾夕法尼亚州​阿勒格尼市​嘅​会众?

21 圣经研究者​嘅​总部​办事处​设​喺​美国​宾夕法尼亚州​嘅​阿勒格尼市,喺​嗰度​工作​嘅​弟兄​听从​圣经​嘅​吩咐​聚集​起嚟,系​我哋​学习​嘅​好​榜样。(请​读​希伯来书​10:24,25一​位​年长​嘅​弟兄​查尔斯·卡彭,细个​嗰阵​参加​过​呢啲​聚会。好多 年​之后,佢​回忆​话:“我​仲​记得​当时​大会堂​嘅​墙​上面​写​住​一​节​经文,‘只有​一​位​系​你哋​嘅​老师,就​系​基督;你哋​彼此​系​兄弟’。呢​节​经文​经常​喺​我​嘅​脑海​里面​回响——耶和华​嘅​子民​当中​确实​冇​教士​同​平信徒​嘅​分别。”(马太福音​23:8)卡彭​弟兄​又​话,聚会​嘅​内容​发人深省,弟兄姊妹​深​受​鼓励,罗素​弟兄​仲​付出​好​大​嘅​努力​去​牧养​会众​嘅​每​个​成员。

22. (甲)圣经​鼓励​基督徒​举行​聚会,忠心​嘅​基督徒​有​乜嘢​反应?(乙)我哋​从​佢哋​身上​学​到​乜嘢?

22 忠心​嘅​基督徒​效法​总部​嘅​弟兄,听从​指引​聚集​起嚟。喺​美国​嘅​俄亥俄州、密歇根州​同​其他​州,会众​陆续​成立。后嚟,喺​成​个​北美洲​以至​其他​国家​都​成立​咗​会众。试​谂下:当时​忠心​嘅​基督徒​如果​冇​受​到​教导,听从​圣经​嘅​吩咐​聚集​起嚟​崇拜​耶和华,真系​可以​为​基督​嘅​临在​做​好​准备​咩?当然​唔​可以。噉​我哋​呢?我哋​亦​都​应该​下​定​决心,唔​错过​聚会,尽​己​所​能​同​弟兄姊妹​一齐​崇拜​耶和华,喺​属灵​方面​互相​鼓励。

热心​传道

23. 《守望台》点样​清楚​指​出,所有​受膏基督徒​都​一定​要​传讲​圣经​嘅​真理?

23 圣经研究者​教导​话,所有​受膏基督徒​都​必须​传讲​圣经​真理。1885​年,英语版《守望台》话:“每​个​受膏基督徒​都​应该​谨记,自己​受膏​系​要​向​人​传道(以赛亚书​61:1),亦​即 系​蒙召​去​传讲​好消息。”1888​年,英语版《守望台》劝勉​话:“我哋​嘅​使命​非常​清楚......如果​我哋​忽视​自己​嘅​使命,揾​借口​推托,就​系​懒惰​嘅​仆人,表明​自己​唔​配受​上帝​膏立。”

24,25. (甲)罗素​同​佢​嘅​亲密​同工​唔单止​鼓励​人​传道,佢哋​仲​点样​做​呢?(乙)汽车​仲​未​普及​嘅​时候,派书者​点样​向​人​传道​呢?

24 罗素​弟兄​同​佢​嘅​亲密​同工​唔单止​鼓励​人​传道,仲​开始​印制《圣经研究者​传单》(英语),后嚟​叫​做《旧​神学​季刊》。《守望台》嘅​读者​收到​传单​之后,免费​向​公众​分发。

我哋​应该​认真​噉​谂​谂:“传道​工作​系​唔系​我​生活​嘅​重心​呢?”

25 喺​嗰个​年代,投身​全时​服务​嘅​人​称为​派书者。上文​提过​嘅​查尔斯·卡彭​就​系​其中​一​位。佢​回忆​当年​话:“我​嘅​传道​地区​喺​宾夕法尼亚州。为咗​接触​地区​里面​嘅​每​户​人家,我​照住​美国​地质调查局​印制​嘅​地图,就​可以​行​匀​县市​嘅​每​一​条​路。我​会​用​三​日​时间​喺​乡间​传道,请​人​预订《圣经​嘅​研讨》(英语)呢​套​书。之后,我​会​请​一​架​马车​将​书​送​过​去。我​经常​喺​农夫​嘅​屋企​过​夜。嗰时​汽车​仲​未​普及。”

一​个​派书者。请​留意​车身​上面​嘅“历代​图表”

26. (甲)点解​上帝​嘅​子民​一定​要​传道​先​可以​为​基督​嘅​统治​做​好​准备?(乙)我哋​应该​要​认真​谂下​乜嘢​问题?

26 要​向​人​传道,早期​嘅​圣经研究者​一定​要​有​热心​同​勇气​先至​得。如果​当时​嘅​真​基督徒​冇​受​到​教导,明白​传道​工作​非常​重要,又​点​可以​为​基督​嘅​统治​做​好​准备​呢?事实​上,传道​工作​就​系​基督​临在​嘅​一​个​重要​特征。(马太福音​24:14)传道​工作​可以​拯救​生命,上帝​嘅​子民​要​做​好​准备,就​一​定​要​以​呢​件​工作​为​生活​嘅​重心。今日,我哋​应该​认真​噉​谂下:“传道​工作​系​唔​系​我​生活​嘅​重心​呢?我​愿唔愿意​作出​牺牲,全力​参与​呢​件​工作​呢?”

上帝​嘅​王国​诞生​嘞!

27,28. (甲)使徒​约翰 喺​异象​里面​睇​到​乜嘢?(乙)上帝​嘅​王国​诞生​之后,撒但​同​邪灵​有​点样​嘅​反应?

27 1914--意义​重大​嘅​一​年​终于​到​嘞。呢​一​章​开头​提到,嗰​一​年​喺​天上​发生​嘅​大事,世上​嘅​人​根本​睇​唔​到。不过​上帝​就​通过​异象,俾​使徒​约翰​睇​到​喺​天上​发生​嘅​事,呢啲​事​有​象征​嘅​意义。约翰​睇​到“天上​出现​一​个​又​大​又​神秘​嘅​景象”。呢个​异象​里面​嘅“女人”怀孕,“生​一​个​仔”。呢个“女人”就​系​上帝​天上​嘅​组织,由​灵体​构成。异象​里面​嘅​呢个“仔”将​要“用​铁杖​统治​万国”。不过,呢个​仔​一​出世,就“被​提到​上帝​嘅​宝座​上”。天上​有​大​声音​话:“现今​就​系​上帝​拯救​嘅​时刻!上帝​已​彰显​佢​嘅​权能!佢​所​立​嘅​基督​亦​显示​佢​嘅​权威!”(启示录​12:1,5,10

 28 毫无​疑问,约翰​喺​异象​当中​睇​到​弥赛亚​王国​嘅​诞生。呢个​的确​系​一​件​辉煌​嘅​大事,但系​撒但​同​邪灵​好​唔​开心。佢哋​同​米迦勒(基督)所​率领​嘅​忠心​天使​争战。结果​点样​呢?圣经​话:“大龙​就​系​嗰​条​古蛇,叫​做​魔鬼​又​叫​撒但,系​迷惑​全​人类​嘅。佢​被[扔]落​地;佢​嘅​使者​亦​跟住​被[扔]落去。”(启示录​12:7,9

1914​年,圣经研究者​开始​认出​基督​预告​嘅​征象,知道​佢​已经​喺​天上​临在

29,30. (甲)弥赛亚​王国​诞生​之后,地上​嘅​情况​有​乜嘢​改变?(乙)天上​嘅​情况​又​有​乜嘢​改变?

29 喺​1914​年​之前​几十​年,圣经研究者​早就​指​出,从​嗰​一​年​开始,世界​嘅​局势​会​变​得​动荡不安。不过,佢哋​从来​都​冇​谂​过​自己​嘅​推测会​咁​准确。正如​约翰​嘅​异象​显示,撒但​会​变本加厉​危害​人类​社会:“地​同​海​有​祸​咯。因为​魔鬼​已经​满​怀​忿恨​落去​你哋​处,因为​佢​知​自己​来日​无多。”(启示录​12:12)1914​年,第一次世界大战​爆发,基督​临在​执掌​王权​嘅​征象​开始​喺​全球​应验。呢个​制度​亦​都​到​咗“末期”。(提摩太后书​3:1

30 不过,天上​就​充满​喜乐,因为​撒但​同​邪灵​以后​都​冇​办法​再​返翻​天上。约翰​记述:“所以,诸​天​同​住​喺​其中​嘅,你哋​都​应该​快乐!”(启示录​12:12)天上​洁净​之后,上帝​喺​地上​嘅​子民​会​点样​呢?弥赛亚​王国​嘅​君王​耶稣​又​会​采取​乜嘢​行动​呢?呢​一​章​开头​提到,宣告​约​嘅“使者”基督​会​做​嘅​第​一​件​事,就​系​熬炼​上帝​喺​地上​嘅​仆人。点样​熬炼​呢?

考验​时期

31. (甲)关于​上帝​子民​所​受​嘅​熬炼,马拉基​预告​咗​乜嘢?(乙)呢个​预言​几时​开始​应验?(另​见​脚注)

31 上帝​嘅​子民​要​经受​嘅​熬炼​绝对​唔​容易​忍受。马拉基​预告:“佢​来​嘅​日子,谁​受​得​呢?佢​出现​时,谁​企立​得​住​呢?因为​佢​似​碱性​好​强​嘅​肥皂,似​炼​金属​嘅​火”。(马拉基书​3:2)马拉基​讲​得​好​啱!从​1914​年​开始,上帝​喺​地上​嘅​子民​接二连三​噉​遇到​好​大​嘅​考验​同​困难。第一次世界大战​期间,圣经研究者​当中​有啲​遭受​到​残酷​嘅​迫害,有啲​仲​俾​人​韫​咗​入​监。 *

32. 1916​年​之后,上帝​嘅​组织​内部​发生​咗​乜嘢​冲突?

32 上帝​嘅​组织​内部​亦​都​发生​咗​冲突。1916​年,罗素​弟兄​去世,嗰时​佢​只有​64​岁。上帝​嘅​子民​当中,好多​人​接受​唔​到​呢个​事实。有啲​人​将​过​多​嘅​注意力​集中​喺​一​个​模范​人物​身上,几乎​到​咗​崇拜​佢​嘅​地步。但系,罗素​弟兄​从来​都​唔​希望​其他​人​崇拜​佢。唔少​人​以为,罗素​去世​之后,上帝​就​唔​会​再​启示​人​明白​真理​嘞。有啲​人​甚至​心​生​怨恨,唔​肯 跟随​上帝​嘅​组织​一齐​前进。呢​种​唔​合作​嘅​态度​引起​分裂,导致​叛道。

33. 上帝​子民​所​期望​嘅​事​冇​实现​到,佢哋​有​乜嘢​反应​呢?

33 圣经研究者​面对​嘅​另​一​个​考验​系,佢哋​所​期望​嘅​事​冇​实现。虽然《守望台》确切​指​出​外邦人​时期​会​喺​1914​年​结束,不过​啲​弟兄​就​唔​清楚​嗰​一​年​到底​会​有​乜嘢​事​发生。(路加福音​21:24)佢哋​以​为,基督​会​喺​1914​年​接​佢​嘅​受膏“新娘”去​天上,同​佢​一齐​作​王。佢哋​嘅​期望​落空​咗。1917​年​年底,《守望台》指​出,历时​四十​年​嘅​收割​时期​会​喺​1918​年​嘅​春季​结束。不过,传道​工作​并​冇​停​落嚟。1918​年​春季​过​咗​之后,传道​工作​继续​扩展。《守望台》话,收割​时期​确实​结束​咗,接​落嚟,会​系​拾取​遗落​嘅​庄稼​嘅​时期,属灵​嘅​工作​会​继续​落去。虽然​系​噉,好多​人​仲系​大失所望,唔​再​事奉​耶和华。

34. (甲)1918​年,上帝​嘅​子民​面对​边啲​极大​嘅​考验?(乙)点解​啲​教士​以​为​上帝​嘅​子民​已经“死”咗?

34 1918​年,上帝​嘅​子民​要​面对​一​个​极大​嘅​考验。接替​罗素​带领​上帝​子民​嘅​卢述福,同埋​另外​七​个​担任​重要​职责​嘅​弟兄,俾​当局​拘捕。佢哋​受​到​唔​公平​嘅​审讯,被​判​长期​徒刑,韫​喺​美国​佐治亚州​亚特兰大市​嘅​联邦​监狱​里面。有​一​段​时间,上帝​子民​嘅​工作​似乎​完全​停止​咗。啲​教士​高兴​到​不得了,心​谂:“带头​嘅”已经​俾​人​捉​咗,布鲁克林​嘅​总部​又​关门,传道​工作​喺​美洲​同​欧洲​到处​受​到​攻击,嗰啲​乞人憎​嘅​圣经研究者​已经“死”咗,威胁​解除​嘞。(启示录​11:3,7-10)呢啲​教士​真系​大错特错!

复兴​时期

35. (甲)耶稣​点解​容许​门徒​经受​磨难?(乙)耶稣​点样​帮助​佢哋?

35 敌视​真理​嘅​人​根本​唔​知道,耶稣​之所以​容许​门徒​经受​磨难,系​因为​耶和华​要“好似​提炼​银​嘅​人”噉样​熬炼​佢哋。(马拉基书​3:3)耶和华​同​耶稣​深​信,忠心​嘅​人​一​定​经得起​火​一样​嘅​考验​而​得到​炼净,可以​更好​噉​为​君王​效劳。事实​表明,从​1919​年​初期​开始,上帝​嘅​灵​所​成​就​嘅​一切,系​敌人​点​都​谂​唔​到​嘅。忠于​上帝​嘅​人​竟然“企​起身”,好似​翻生​一样!(启示录​11:11)嗰时,基督​委任​咗​一​小群​受膏​男子——“可靠​及​机智​嘅​仆人[英语《圣经​新世界​译本》作‘忠信​睿智​嘅​奴隶’]”,由​佢哋​负责​带领​上帝​嘅​子民,喺​适当​嘅​时候​分发​灵粮。噉样,末世​征象​嘅​一​个​重要​特征​就​应验​咗​嘞。(马太福音​24:45-47

36. 有​乜嘢​表明​上帝​嘅​子民​喺​灵性​上​好似​翻生​一样?

 36 1919​年​3​月​26​日,卢述福​弟兄​同​几​个​同工​获得​释放,佢哋​一​离开​监狱, 好快​就​安排​喺​同​一​年​嘅​9​月​举行​大会。佢哋​仲​计划​出版​第​二​本​杂志,叫​做《黄金时代》(英语)。呢​本​杂志​系​为咗​传道​而​设计​嘅,会​同《守望台》一齐​分发。 * 喺​同​一​年,上帝​嘅​组织​亦​都​出版​咗《通报》(英语),就​系​今日​嘅《传道​与​生活​聚会​手册》。呢​份​刊物​从​第​一​期​开始​就​强调​要​多​啲​向​人​传道。的确,自从​1919​年​以​来,上帝​嘅​组织​越​嚟​越​重视​逐户​传道​工作,鼓励​弟兄姊妹​亲自​去​宣扬​上帝​嘅​王国。

37. 1919​年​之后,有啲​人​做​咗​咩​事​表明​佢哋​叛离​上帝​嘅​组织?

37 基督​继续​通过​传道​工作​熬炼​佢​嘅​仆人。对​高傲自大​嘅​人​嚟​讲,传道​系​卑微​嘅​工作,有​失​身份。唔​肯​去​传道​嘅​人​最后​就​离开​忠心​嘅​弟兄姊妹,大家​各​行​各​路。1919​年​之后,一啲​叛离​上帝​组织​嘅​人​心​怀​怨恨,不惜​诽谤​同埋​中伤​耶和华​嘅​忠仆,甚至​同​反对者​联手​迫害​佢哋。

38. 基督​嘅​门徒​可以​跨过​难关,获得​胜利,表明​咗​乜嘢​呢?

 38 基督​嘅​门徒​虽然​遭受​攻击,但​继续​喺​灵性​上​进步,人数​越​嚟​越​多。佢哋​跨​过​嘅​每​一​个​难关,获得​嘅​每​一​次​胜利,都​系​确凿​嘅​证据,表明​上帝​嘅​王国​真系​喺​度​统治​紧。如果​唔系​上帝​通过​佢​嘅​仔​同​弥赛亚​王国,大力​支持​佢​地上​嘅​仆人,而且​赐​福​俾​佢哋,净系​靠​呢​一​小群​唔​完美​嘅​人,又​点​可以​一​次​又​一​次​噉​战胜​撒但​同​呢个​邪恶​嘅​制度​呢?(请​读​以赛亚书​54:17

卢述福​弟兄​从​监狱​出嚟​之后​唔​到​半​年,就​喺​大会​上​发表​咗​一​个​激动​人心​嘅​演讲

39,40. (甲)呢​本​书​有​乜嘢​特色?(乙)研读​呢​本​书​对​你​有​乜嘢​益处?

39 喺​接​落嚟​嘅​篇​章​里面,我哋​会​睇​下​上帝​嘅​王国​喺​天上​建立​之后​嘅​一百​年​期间,喺​地上​成就​咗​啲​乜嘢。呢​本​书​嘅​每​一​篇​会​讲​下​上帝​嘅​王国​喺​某​方面​已经​成就​或者​将​要​成就​嘅​事。每​一​章​都​有​个​温习栏,俾​大家​可以​谂​一​谂,上帝​嘅​王国​对​自己​嚟​讲​有​几​真实。好快,上帝​嘅​王国​就​会​嚟​到,将​恶人​恶事​铲除,使​地球​成为​乐园。最后​两​章​会​讲​下​到时​有啲​乜嘢​事​会​发生。噉​研读​呢​本​书​对​你​有​乜嘢​益处​呢?

40 撒但​千方百计​要​削弱​你​嘅​信心。但系,耶和华​要​加强​你​对​上帝​王国​嘅​信心。你​有​信心,就​可以​抵挡​得​住​撒但​嘅​攻击,亦​都​可以​坚定不移。(以弗所书​6:16)所以,我哋​鼓励​你​用​心​研读​呢​本​书,时​不时​问​下​自己:“对​我​嚟​讲,上帝​嘅​王国​系​唔​系​真实​嘅​呢?”终​有​一​日,所有​活着​嘅​人​都​会​睇​到​上帝​嘅​王国​统治​天下。如果​你​相信​上帝​嘅​王国​系​真实​嘅,就​会​忠心耿耿、竭尽​全力​为​呢个​王国​服务。你​对​王国​嘅​信心​越​大,就​越​有​机会​得​享​王国​嘅​福分。

^ 7段 关于​格鲁、斯特森​同埋​斯托尔斯​嘅​见解,详见《耶和华见证人——上帝​王国​的​宣扬者》(普通话​版本)45-46​页。

^ 10段 有啲​圣经​译本​翻译​为“七​年”,但​喺​圣经​原文​里面,呢​度​其实​系​指“七​段​时期”或者“七​个​时期”。当​预言​应验​喺​尼布甲尼撒​王​身上​嘅​时候,“七期”系​指​实际​嘅​七​年。

^ 15段 圣经研究者​睇出,一​定​要​脱离​所有​同​世界​友好​嘅​宗教​组织。不过​有​好多​年,佢哋​继续​将​嗰啲​仲​未​脱离​教会,而​又​声称​献​咗​身​俾​上帝、对​赎价​有​信心​嘅​人​当​成​基督徒​弟兄。

^ 17段 圣经研究者​早就​劝​人​脱离​教会。当时​呢个​劝告​唔系​咁​有效,一​个​原因​系​佢哋​以​为​劝告​只​系​适用​于​基督​嘅“小群”门徒,亦​即系​14万4000​人。呢​本​书第​5​章会​讲​下,喺​1935​年​之前,圣经研究者​以​为,启示录​7:9,10​提到​嘅“大群人”包括​埋​一般​教会​嘅​信徒,佢哋​嘅​数目​多​到​难​以​计算;呢“大群人”喺​现行​制度​嘅​终结​时期​拥护​基督,所以​得​蒙​奖赏,喺​天上​居​次要​地位。

^ 31段 英语版《黄金时代》(现称《警醒​!》)1920​年​9​月​刊​系​一​期​特刊,内容​讲​到​第一次世界大战​期间,圣经研究者​喺​英国、德国、美国​同​加拿大​惨遭​迫害,而且​举​咗​好多​实例。有啲​圣经研究者​受​到​嘅​迫害​非常​残酷,令​人​震惊。喺​呢​场​大战​之前​嘅​几十​年,圣经研究者​好​少​受​到​噉样​嘅​对待。

^ 36段 有​好多​年​嘅​时间,《守望台》主要​向​属于“小群”嘅​成员​提供​灵粮。