Virginiaeʼ juntúul u testigo Jéeoba, tiʼ letiʼeʼ tsaʼay junpʼéel kʼojaʼanil ku kʼaabaʼtik síndrome del enclaustramiento. Le kʼojaʼanilaʼ ku beetik maʼ u páajtal u péek máak, u tʼaan mix u janal. Chéen ku páajtal u paakat máak, u yuʼubik baʼax ku yaʼalaʼal, u pʼilik yéetel u mutsʼik u yich bey xan u wéej péeksik u pool. Virginiaeʼ jach toj u yóol kaʼachi yéetel jach sáakʼóol meyaj. Chéen baʼaleʼ tu añoil 1997, chéen ka tu yuʼubaj u sen káajal u kʼiʼinam u pool, ka túun bisaʼab hospital tumen u yíicham. Tu áakʼabileʼ pʼáat en comail, kaʼapʼéel semanaʼob pʼáat beyoʼ. Le ka aajeʼ tu yilaj tiaʼan hospitaleʼ yéetel maʼ tu páajtal u péek tsʼoʼoleʼ conectartaʼan tiʼ junpʼéel máquina áantik u chʼaʼ u yiikʼ. Mix baʼal kaʼach ku kʼaʼajaltiʼ.

 Virginiaeʼ ku tsikbaltik baʼax úuchtiʼ: «Jujunpʼíitil úuchik in kaʼa kʼaʼajsik máaxeniʼ. Sen orarnajen tiʼ Jéeoba tumen maʼ taak in kíimiliʼ mix in pʼatik in chan hijo yaan nueve años tiʼoʼ. Utiaʼal maʼ u jach lúubul in wóoleʼ joʼopʼ in kʼaʼajsik yaʼab tekstoʼob yaan teʼ Bibliaoʼ.

 «Le ka pʼáat maʼ jach grave yanikeneʼ bisaʼaben tiʼ jejeláas hospitaloʼob yéetel tiʼ junpʼéel centro de rehabilitación, ka máan seis meseseʼ bisaʼaben tin wotoch. Chéen baʼaleʼ láayliʼ maʼ tu páajtal in péeksik in wíinklileʼ yéetel kʼaʼabéetten u yáantaj u maasil. Jach lúub in wóol tumen maʼ tu páajtal in meyajtik Jéeoba jeʼex kaʼacheʼ mix in wáantik u maasil. Mix in chan hijo ku páajtal in kanáantik.

 «Káaj in xokik u experiencia uláakʼ sukuʼunoʼob kʼojaʼanoʼob xan, jach jatsʼuts tin wilil bix u tsʼaamil u yóoloʼob u meyajtoʼob Jéeoba. Káaj in tuklik bix jeʼel u páajtal in meyajtik Jéeoba jeʼex u beetkoʼoboʼ. Kaʼacheʼ minaʼanten tiempo utiaʼal in xokik le Bibliaoʼ, in predicar yéetel in orar, pero beoraeʼ jeʼel u páajtal in beetik bul kʼiineʼ. Utiaʼal maʼ in jach tristetale’ tin tsʼáaj in wóol in meyajt Jéeoba.

 «Utiaʼal u yojéeltaʼal baʼax in kʼáat in waʼaleʼ yanchaj u conseguirtaʼal junpʼéel computadora ku meyaj tiʼ le máaxoʼob maʼ tu páajtal u péekoʼoboʼ. Kex kin wuʼuyik kin kaʼanaleʼ yéetel u yáantaj le tecnologíaoʼ ku páajtal in xokik le Bibliaoʼ, in túuxtik carta wa correo electrónico tiʼ le máakoʼoboʼ, bey in predicaroʼ. Tsʼoʼoleʼ le máax kanáantkenoʼ ku meyajtiʼ junpʼéel tabla tuʼux yaan u letrailoʼob le abecedario utiaʼal u yojéeltik baʼax in kʼáat in waʼaltiʼoʼ. Letiʼeʼ a jujunpʼéelil u bin u yeʼesikten le letraʼob utiaʼal u formar le tʼaanoʼoboʼ. Kéen confundirnak le máax eʼesikten le letraʼoboʼ kin maas pʼilik in wich, pero kéen eʼesaʼakten le unajoʼ kin mutsʼik in wich. Puro bey k-beetik utiaʼal k-formartik le tʼaanoʼob taak in waʼalikoʼ. Le kiikoʼob suuk u taaloʼob u kanáantenoʼoboʼ séeb u naʼatkoʼob baʼax taak in waʼalik. Yaan horaeʼ hasta chistoso in wilik bix u confundiroʼob.

 «Uts tin wich in táakpajal tiʼ le baʼaxoʼob ku beetik le múuchʼuliloʼ. Mantatsʼ kin wantal teʼ reuniónoʼoboʼ, teʼ kʼiinoʼobaʼ ku beetaʼal tiʼ videoconferencia. Wa taak in comentareʼ kin tsʼíibtik le baʼax taak in waʼalikoʼ yéetel ku xoʼokol tumen wa máax kéen beetaʼak le kʼáatchiʼoʼ. Tsʼoʼoleʼ kin conectarkinba yéetel in grupo utiaʼal in chaʼantik le programa ku jóoʼsaʼal cada mes ich JW Broadcasting. a

 «Tsʼoʼok 23 años kʼojaʼanchajken. Yaan horaeʼ ku lúubul in wóol, pero in orar tiʼ Jéeoba, in máansik tiempo yéetel le sukuʼunoʼoboʼ bey xan in beetik uláakʼ baʼaloʼob utiaʼal in maas meyajtik Jéeobaoʼ jach ku yáantken. Lelaʼ ku beetik u kaʼa kiʼimaktal in wóol. Yéetel u yáantaj le sukuʼunoʼoboʼ tsʼoʼok maas tiʼ seis años káajak in beetik in precursora auxiliaril. Kin tsʼáaik in wóol in meyajt Jéeoba tumen in kʼáat in tsʼáa junpʼéel maʼalob ejemplo tiʼ in hijo Alessandro. Letiʼeʼ tsʼoʼok u beel yéetel táan u beetik u ancianoil. Tsʼoʼoleʼ letiʼ yéetel u yataneʼ precursor regularoʼob.

 «Mantatsʼ táan in tuukul tiʼ le baʼaxoʼob kun páajtal in beetik teʼ Paraísooʼ. Yáax baʼax ken in beeteʼ in tʼaan yoʼolal Jéeoba. Taak xan in jóokʼol xíimbal naatsʼ tiʼ junpʼéel chan río utiaʼal in chaʼantik bukaʼaj jatsʼutsil le baʼaxoʼob u beetmaj Jéeobaoʼ. Ichil le 20 años tsʼoʼok u máanoʼ chéen yéetel junpʼéel tubo ku tsʼaʼabal in woʼoch, le oʼolaleʼ jach kin tsʼíiboltik u kʼuchul u kʼiinil in tʼokik junpʼéel manzana yéetel in wáaʼkʼuxtik. Tsʼoʼoleʼ jeʼex tuláakal italianaeʼ in kʼáat in preparart yéetel in jaant junpʼéel kiʼikiʼ pizza.

 «Le jatsʼuts ‹esperanza yaantoʼon utiaʼal k-salvartaʼaloʼ› jach ku yáantken utiaʼal maʼ u lúubul in wóol (1 Tesalonicenses 5:8). Bejlaʼeʼ yaʼab baʼaxoʼob maʼ tu páajtal in beetik, pero in wojel maʼ tun xáantaleʼ yaan in beetik le baʼaxoʼob kin tsʼíiboltikoʼ. Jach ku kiʼimaktal in wóol kéen in máans tin tuukul tiaʼanen teʼ túumben luʼumoʼ. Le oʼolal jach kin tsʼíiboltik ‹le kuxtal jach tu jaajil kuxtaloʼ›, lelaʼ letiʼe ken u tsʼáatoʼon Jéeoba yáanal u Reinooʼ» (1 Timoteo 6:19; Mateo 6:9, 10).