Tu Najil Asamblea tiʼ u kaajil Benineʼ (Nigeria), 823 j-Jaajkunajoʼob tu muchʼubaʼob sábado 1 tiʼ marzo tiʼ 2014, utiaʼal u kʼiinbeskoʼob junpʼéel baʼal taasik kiʼimak óolal tiʼob. Desde 1999 ka káaj u meyajil u líiʼsaʼal Najiloʼob Reino teʼ luʼumoʼob tuʼux yaan óotsililoʼ, teʼ Nigeriaoʼ tsʼoʼok u beetaʼal 3,000.

Teʼ kʼiinoʼ kʼaʼajsaʼab tuláakal baʼax tsʼoʼok u beetaʼal Nigeria desde tu jaʼabiloʼob 1920 utiaʼal u yantal tuʼux u muchʼkuba adorar u j-jaajkunajoʼob Jéeoba. Ka káajeʼ ku alquilartaʼal localoʼob wa ku majáantaʼal u yotoch wa máax. Tak tuʼux ojéelaʼaneʼ le yáax local meyajnaj chéen utiaʼal muchʼtáambaloʼobeʼ letiʼe naj beetaʼab 1935 tu kaajil Ilesaoʼ. Tu yáamil 1938 yéetel 1990, tiʼ cada junpʼéel múuchʼulileʼ anchaj uláakʼ doscientos múuchʼuliloʼobiʼ: le 14 yaan kaʼachoʼ tu chukaj 2,681. Yaʼabeʼ istikyaj u kaxtikoʼob tuʼux u muchʼtaloʼob. Tiʼ jujunpʼéel Najiloʼob Reinoeʼ ku yantal tak seis múuchʼuliloʼobiʼ. Yaan tuʼuxeʼ como jach chichan le najoʼ yaan máaxoʼob ku pʼáatloʼob waʼatal táankab; utiaʼal u yuʼubikoʼobeʼ kʼaʼabéet u chʼeeneboʼob teʼ ventanaʼoboʼ. Baʼaleʼ uláakʼ múuchʼuliloʼobeʼ láayliʼ ku muchʼkubaʼob tu yotoch wa máax wa tiʼ escuelaʼobeʼ.

Tu jaʼabil 1990, u sucursal u j-jaajkunajoʼob Jéeobaeʼ joʼopʼ u chʼaʼik le taakʼin ku siʼibil utiaʼal u beetaʼal u Najiloʼob Reino utiaʼal u tsʼáaik majáantbil tiʼ le múuchʼuliloʼoboʼ. Tu jaʼabil 1997, le Comités Regionales tiʼ Construccionoʼ tsʼokaʼaniliʼ u yáantkoʼob 105 múuchʼuliloʼob utiaʼal u yutskíintikoʼob wa u beetkoʼob u Najiloʼob Reino. Tu jaʼabil 1997 tak 1999 beetaʼab 13 Najiloʼob Reino. U suukileʼ ich 7 wa 15 días ku tsʼoʼoksaʼal junpʼéeliʼ.

Kex teʼ kʼiinoʼob séeb u beetaʼal u Najiloʼob Reinooʼ láayliʼ kʼaʼabéet u beetaʼal u maasileʼ, tumen táan u yaʼabtal le j-Jaajkunajoʼob teʼ Nigeriaoʼ. Tu mesil abril tiʼ 1998, le sucursaloʼ tu yaʼaleʼ kʼaʼabéet u beetaʼal 1,114 Najiloʼob Reino teʼ luʼumoʼ.

Teʼ kʼiinbesaj beetaʼab Beninoʼ, Don Trost, máax yaan ichil le Comité tiʼ Sucursal teʼ Nigeriaoʼ, tu yaʼalaj: «Jach yaʼab meyaj kʼaʼabéet u beetaʼal, le oʼolal t-tuklaj: ‹¿Bix túun ken k-beetil?›». Tu jaʼabil 1999, t-ojéeltaj bixi: le Grupoʼob utiaʼal u Beetaʼal u Najiloʼob Reinooʼ káaj u yáantkoʼob le múuchʼuliloʼob yaan Nigeriaoʼ. Ichil cada grupoeʼ ku múul meyaj seis wa ocho j-Jaajkunajoʼobiʼ. Como maʼ talam u beetkoʼob le najoʼoboʼ u promedioil le bukaʼaj tu beetoʼob ichil le u tsʼook catorce añosaʼ 17 u pʼéelel cada mes.

Ka tsʼoʼok u felicitartikoʼob yoʼolal le meyaj tu beetoʼoboʼ, Don Trosteʼ tu yaʼaleʼ láayliʼ yaʼab meyaj ku bineltikeʼ. Tu jaʼabil 2013 maas tiʼ 8,000 máakoʼob tu beetubaʼob j-Jaajkunajil tu luʼumil Nigeria. Don Trosteʼ tu yaʼalaj xan: «Utiaʼal u chúukpajal le Najiloʼob Reino kun kʼaʼabéettaloʼ unaj u beetaʼal 100 u pʼéelel cada año». Tu jaʼabil 2013, le bukaʼaj j-Jaajkunajoʼob yanoʼob Nigeriaoʼ náak 351,000 u túulal yéetel anchaj maas tiʼ 5,700 múuchʼuliloʼob.