U testigoʼob Jéeobaeʼ ku muchʼkubaʼob kaʼatéen ichil junpʼéel semana. Le tuʼux ku binoʼobaʼ ku yaʼalaʼaltiʼob Naj tuʼux ku muchʼkuba u Testigoʼob Jéeoba. ¿Baʼax ku beetaʼal teʼ muchʼtáambaloʼoboʼ? ¿Baʼax utsil jeʼel u taasiktech wa ka xiʼikecheʼ?

•  ¿Baʼax ku beetaʼal teʼ muchʼtáambaloʼoboʼ?

•  ¿Baʼax utsil jeʼel u taasiktech wa ka xiʼikecheʼ?

•  Baʼax ku yaʼalik uláakʼ paalaloʼob

 ¿Baʼax ku beetaʼal teʼ muchʼtáambaloʼoboʼ?

 Teʼ muchʼtáambaloʼob ku beetik u testigoʼob Jéeobaoʼ ku kaʼansaʼal bix jeʼel u yáantik máak le baʼax ku yaʼalik le Bibliaoʼ, yéetel jeʼel xan u yáantkech utiaʼal:

•   A kanik u jaajil yoʼolal Dios.

•   A naʼatik baʼaxten jach yaan muʼyajil.

•   U yantaltech jatsʼuts modos.

•   U yantaltech maʼalob amigoʼob.

 ¿A wojel wa? U testigoʼob Jéeobaeʼ suuk u muchʼkubaʼob utiaʼal u kaanbaloʼob tiʼ Dios yéetel tiʼ baʼaxoʼob ken u beet u Reino (Mateo 6:9, 10; 24:14; Lucas 4:43).

 ¿Baʼax utsil jeʼel u taasiktech wa ka xiʼikecheʼ?

 Le baʼaxoʼob ku kaʼansaʼaloʼ jach jeʼel u yáantkecheʼ. Tuláakal le baʼaxoʼob ku kaʼansaʼal teʼ muchʼtáambaloʼoboʼ chʼaʼabaʼan tiʼ le Bibliaoʼ le oʼolaleʼ jach yaan u yáantkech utiaʼal u yantal a naʼat (Proverbios 4:5). Leloʼ u kʼáat u yaʼaleʼ le baʼax ken a kan tiʼ le Bibliaoʼ yaan u yáantkech utiaʼal a chʼaʼtukult tubeel baʼax ken a beeteʼ. Tsʼoʼoleʼ yaan xan a wojéeltik u núukil le kʼáatchiʼobaʼ:

•   ¿Baʼax oʼolal kuxaʼanoʼon?

•   ¿Dios wa beetik u muʼyaj máak?

•   ¿Yaan wa baʼax ku pʼáatal kuxaʼanil tiʼ máak kéen kíimik?

 Leloʼobaʼ chéen jujunpʼéel tiʼ le discursoʼob ku máansaʼal teʼ muchʼtáambal ku beetaʼal tu jóokʼbal semanaoʼ:

•   ¿Baʼaxten unaj k-chaʼik u nuʼuktikoʼon le Bibliaoʼ?

•   ¿Máax jeʼel u yáantkoʼon kéen lúubuk k-óoleʼ?

•   ¿Baʼax táan u beetik u Reino Dios t-oʼolal?

 Brendaeʼ ku yaʼalik: «Juntúul tiʼ in wéet xookoʼobeʼ taal muchʼtáambal. Kulaj t-éeteleʼ ka t-múul ilaj le baʼax táan u xakʼaltaʼaloʼ. Ka tsʼoʼok le muchʼtáambaloʼ tu yaʼalajten jatsʼuts tu yilil bix u núukaʼal le kʼáatchiʼob ku beetaʼaloʼ. Tu yaʼalajten xaneʼ teʼ tuʼux ku bin letiʼoʼ minaʼan tuláakal le baʼaxoʼob ku meyaj tiʼ toʼonoʼ».

 ¿A wojel wa? Teʼ naj tuʼux ku muchʼkuba u testigoʼob Jéeobaoʼ gratis u yokol máakiʼ yéetel maʼ tu máan kʼáatbil taakʼiniʼ.

 Le máakoʼob ken a kʼaj óolt teʼeloʼ jach yaan u líiʼskoʼob a wóol. Le Bibliaoʼ ku yaʼalikeʼ junpʼéel baʼax óolal ku muchʼkuba le máaxoʼob tsaypachtik Cristooʼ utiaʼal u paklan líiʼsik u yóoloʼob (Hebreos 10:24, 25). Bejlaʼeʼ óoliʼ tuláakal máakeʼ chéen ku tuukul tu yoʼolal, baʼaleʼ a kʼaj óoltik máakoʼob u yaabiltmoʼob Dios yéetel maʼ chéen ku tuukuloʼob tu yoʼolaloʼobeʼ jach yaan u beetik u líikʼil a wóol.

 Elisaeʼ ku yaʼalik: «Yaan kʼiineʼ lubaʼan in wóol yéetel jach kaʼanaʼan in wuʼuyikinba, baʼaleʼ in tsikbal yéetel le máaxoʼob ku binoʼob muchʼtáambaloʼ jach ku beetik u líikʼil in wóol. Jach kiʼimak in wóol kéen suunaken tin wotoch».

 ¿A wojel wa? Tiʼ tuláakal yóokʼol kaabeʼ yaan maas tiʼ 12,000 múuchʼuliloʼob tiʼ u testigoʼob Jéeoba yéetel maas tiʼ 60,000 najoʼob tuʼux ku muchʼkubaʼob. Cada añoeʼ ku beetaʼal óoliʼ 1,500 najoʼob tuʼux ku muchʼkuba u testigoʼob Jéeoba tumen táan u bin u maas yaʼabtal le máaxoʼob ku binoʼob muchʼtáambaloʼ. a