Haleyeʼ ku yaʼalik: «Junpʼéel baʼax áanten utiaʼal in aktáantik le problemaʼob anchajten teʼ escuelaoʼ letiʼe in tuukul tiʼ u ejemplo le máaxoʼob tsʼoʼok u máanskoʼob le baʼax táan in aktáantikoʼ. Tsʼoʼoleʼ kin wilik in beetik jeʼex letiʼoboʼ. Tin tsʼáaj cuentaeʼ le kéen k-seguert u ejemplo wa máaxeʼ maas séeb jeʼel k-aktáantik le problema táan k-máansikoʼ».

 Wa ka yéeyik tubeel máax ejemplo ken a seguerteʼ maʼ tun jach antaltech problemaʼob yéetel maas séeb ken a logrart a metas.

•  ¿Baʼaxten kʼaʼabéet a yéeyik tubeel?

•  ¿Máax kʼaʼabéet a yéeyik?

•  Baʼax ku yaʼalik uláakʼ paalaloʼob

 ¿Baʼaxten kʼaʼabéet a yéeyik tubeel?

•   Yaan u kaajal a beetik le baʼax ku beetik le máax ka seguertik u ejemplooʼ.

   Le Bibliaoʼ ku yaʼalikeʼ kʼaʼabéet k-seguertik u ejemplo le máaxoʼob ku kuxtaloʼob jeʼex u yaʼalik Diosoʼ. Ku yaʼalik: «Ilawileʼex le baʼaloʼob maʼalobtak ku beetkoʼoboʼ yéetel yanakteʼex junpʼéel fe jeʼex le yaantiʼoboʼ» (Hebreos 13:7).

   Consejo: U ejemplo le máax ken a yéey a seguertoʼ jeʼel u yáantkech a beet baʼax uts wa a beetik baʼax kʼaaseʼ. Le oʼolaleʼ tu lugar a seguertik le máaxoʼob jach kʼaj óolaʼanoʼob wa le a wéet edadoʼobeʼ ilawil a seguertik u ejemplo le máax yaan jatsʼuts modos tiʼoʼ.

   Colineʼ ku yaʼalik: «Jach yaʼab baʼaloʼob tin kanaj tiʼ Adam, juntúul in amigo yaan tin religión. Tak teʼ kʼiinoʼobaʼ yaʼab baʼaloʼob jatsʼutstak ku kʼaʼajalten tu beetaj yéetel tu yaʼalaj. Maʼ xaaneʼ letiʼeʼ mix u yojel wa jach tu yáanten yéetel u ejemploiʼ».

•   Yaan u káajal a tuukul jeʼex u tuukul le máax ka seguertik u ejemplooʼ.

   Le Bibliaoʼ ku yaʼalik: «Maʼ a tuskabaʼex. U biskuba máak yéetel máaxoʼob kʼasaʼanoʼobeʼ ku kʼaskúuntik u maʼalob modos máak» (1 Corintios 15:33).

   Consejo: Le kéen a yéey máax ejemplo ken a seguerteʼ maʼ a chʼíikil chéen tiʼ bix u yilaʼal. Baʼaxeʼ ilawil u jatsʼuts modosoʼob tumen wa ka chʼíikil chéen tiʼ bix u yilaʼaleʼ jeʼel u decepcionarkecheʼ.

   Tamaraeʼ ku yaʼalik: «Wa cada ka compararkaba yéetel le máaxoʼob jach jatsʼuts bix u vestirkubaʼoboʼ jeʼel u beetik a wuʼuyik jach mix baʼalecheʼ. Tsʼoʼoleʼ jeʼel xan u beetik a chʼíikil tuukul chéen tiʼ bix a wilaʼaleʼ».

   Tukult lelaʼ: ¿Baʼax jeʼel u yúuchul wa ka seguertik u ejemplo juntúul famosoeʼ?

•   Le máax ken a yéeyoʼ jeʼel u yáantkech a logrart a metaseʼ wa jeʼel u difícilkúuntiktecheʼ.

   Le Bibliaoʼ ku yaʼalik: «Le máax ku máan yéetel máaxoʼob yaan u naʼatoʼobeʼ yaan u yantal u naʼat» (Proverbios 13:20).

   Consejo: Yéey juntúul máax ku yeʼesik le modos a kʼáat ka yanaktechoʼ. Wa ka yéeyik tubeeleʼ jujunpʼíitil ken a wil bix ken a alcanzartil le metas yaantechoʼ.

   Miriameʼ ku yaʼalik: «Tu lugar a waʼalik: ‹In kʼáat in beetinba maas responsable›. Maas maʼalob ka a waʼale: ‹In kʼáat in beetinba jeʼex Anaeʼ tumen letiʼeʼ responsable, puntual yéetel ku beetik le baʼaxoʼob ku kʼubéentaʼaltiʼoʼ›».

   Maʼ u tuʼubultech lelaʼ: Wa ka yéeyik tubeel máax ken a seguert u ejemploeʼ yaan a beetkaba juntúul utsul máak yéetel yaan u yantaltech le jatsʼuts modos a kʼáat ka yanaktechoʼ.

 ¿Máax ken a yéeye?

 Utiaʼal a wilik máax ken a yéeyeʼ jeʼel u páajtal a beetik lelaʼ:

1.   Yéey junpʼéel jatsʼuts modos a kʼáat a maas eʼese. Tsʼoʼoleʼ tuukulnen tiʼ juntúul máax ku yeʼesik le modos a kʼáat ka yanaktechoʼ.

2.   Tuukulnen tiʼ juntúul máax ku yeʼesik jatsʼuts modos. Tsʼoʼoleʼ tiʼ le jatsʼuts modos ku yeʼesikoʼ yéey junpʼéel a kʼáat ka yanaktechiʼ.

 Le actividad ku taasik le xookaʼ jach jeʼel u yáantkech a yéey máax ejemplo ken a seguerte.

 ¿Bey máax ejemploʼob jeʼel u páajtal a seguerkeʼ?

•  A wéet edadiloʼob. Miriameʼ ku yaʼalik: «In kʼáat in seguert u ejemplo in maas maʼalob amiga. Letiʼeʼ mantatsʼ ku kaxtik u yutsil u maasil. Kex maas chichan tiʼ teneʼ yaʼab jatsʼuts modos ku yeʼesik. Leloʼ ku péeksiken in beet xan beyoʼ».

•  Máaxoʼob maas nojchoʼob tiʼ teech. Maʼ xaaneʼ a papáʼob wa uláakʼ máaxoʼob ku creerkoʼob le baʼax ku creerkoʼ. Annetteeʼ ku yaʼalik: «In kʼáat in seguert u ejemplo in papáʼob letiʼobeʼ yaʼab jatsʼuts modos ku yeʼeskoʼob. U jaajileʼ maʼ perfectoʼobiʼ chéen baʼaleʼ láayliʼ ku xachkubaʼob u meyajtoʼob Dioseʼ. Le kéen yanakten u edadoʼobeʼ in kʼáat in beet jeʼex letiʼobeʼ».

•  Máaxoʼob ku chʼaʼchiʼitaʼaloʼob teʼ Bibliaoʼ. Melindaeʼ ku yaʼalik: «In kʼáat in seguert u ejemplo máaxoʼob ku chʼaʼchiʼitaʼaloʼob teʼ Bibliaoʼ. Jeʼex Timoteo, Rut, Pedro yéetel le chan x-chʼúupal israelitaoʼ. Tiʼ cada juntúuleʼ yaan baʼax jeʼel u páajtal k-kaniktiʼeʼ. Le kéen maas kaanbalnaken tiʼ letiʼobeʼ ku maas taaktal in beetik jeʼex letiʼobeʼ. Jach uts tin tʼaan in xokik le libro Yanaktoʼon le fe anchajtiʼoboʼ bey xan le jaats ku kʼaabaʼtik ‹Buenos ejemplos› ku taasik le libroʼob Lo que los jóvenes preguntan. Respuestas prácticas».

 Consejo: Maʼ a yéeyik chéen juntúul máak. Apóstol Pabloeʼ tu yaʼalaj tiʼ le cristianoʼoboʼ: «Jach pakteʼex le máaxoʼob táan u máanoʼob jeʼel bix tsʼoʼok k-eʼesiktiʼoboʼ» (Filipenses 3:17).

 ¿A wojel wa? Teech xaneʼ jeʼel u páajtal u copiartaʼal a ejemplo tumen u maasileʼ. Le Bibliaoʼ ku yaʼalik: «Eʼes tiʼ le máakoʼob chúukaʼan u yóoloʼob [...] bix unaj u tʼaanoʼob, bix unaj u kuxtaloʼob, bix unaj u yeʼeskoʼob yaabilaj, bix unaj u yeʼeskoʼob fe yéetel bix jeʼel u yantaltiʼob junpʼéel kuxtal limpio tu táan Dioseʼ» (1 Timoteo 4:12).

 Kianaeʼ ku yaʼalik: «Kex ka tuklik yaʼab baʼax unaj a mejorarkeʼ jeʼel u páajtal a wáantik u maasileʼ. Yaan kʼiineʼ sin ke a tsʼáaik cuentaeʼ jeʼel a waʼalik wa baʼax jeʼel u kʼuchul tu puksiʼikʼal wa máaxeʼ».