Baʼax ku yaʼalik le Bibliaoʼ

 Le Bibliaoʼ maʼ tu yaʼalik ka rezarnakoʼon tiʼ le santoʼoboʼ. Chéen tiʼ Dios unaj k-orar yéetel unaj k-beetik tu kʼaabaʼ Jesús. Le Bibliaoʼ ku yaʼalik: «Teʼexeʼ payalchiʼineneʼex beyaʼ: ‹K-Yuum yanech teʼ kaʼanoʼ, kiliʼichkúunsaʼak a kʼaabaʼ›» (Mateo 6:9, Quiliʼich Biblia ich Maya). Jesúseʼ maʼ tu yaʼalaj wa unaj k-orar tiʼ juntúul santoiʼ, tiʼ juntúul ángel mix tiʼ uláakʼ wa máax.

 Jesúseʼ tu yaʼalaj xan: «Teen le bejoʼ, teen le jaajoʼ yéetel teen le kuxtaloʼ. Chéen tin woʼolaleʼ ku páajtal u taal máak tiʼ le Taataoʼ» (Juan 14:6, QB). Chéen Jesús jeʼel u páajtal u tʼaan t-favor tu táan Dioseʼ (Hebreos 7:25).

¿Maʼalob wa ka orarnakoʼon tiʼ Dios yéetel tiʼ le santoʼoboʼ?

 Dioseʼ tu yaʼalaj teʼ Diez Mandamientoʼoboʼ: «Maʼ unaj a chintal tu táanoʼobiʼ mix a chaʼik ka oksaʼak ta pool ka a adorartoʼobiʼ, tumen teneʼ Jéeoba a Diosen, in kʼáat ka adorartaʼaken chéen teen» (Éxodo 20:5). Le Quiliʼich Biblia ich Mayaoʼ ku yaʼalikeʼ: «Maʼ a chíin pooltikoʼob, mix a [adorarkoʼob]». Jeʼex k-ilkoʼ Dioseʼ u kʼáat ka adorartaʼak chéen letiʼ. U jaajileʼ le kéen orarnak máakeʼ táan u adorar, le beetik chéen tiʼ Dios unaj k-orar (Isaías 48:11).

 Dioseʼ yaan u yaatal u yóol wa k-orar tiʼ juntúul ángel bey xan wa tiʼ juntúul santo. U libroil Apocalipsiseʼ ku yaʼalikeʼ juntéenjeakeʼ apóstol Juaneʼ tu yóotaj u adorart juntúul ángel. Chéen baʼaleʼ le ángeloʼ tu yaʼalajtiʼ: «Maʼ beetik leloʼ; tumen teneʼ u palitsilen [Dios] jeʼel bix techeʼ yéetel jeʼel bix a sukuʼunoʼob máaxoʼob jeetsʼel yaniloʼob tiʼ u kaʼansajoʼob Jesúsoʼ» (Apocalipsis 19:10, QB).