¿Kʼeban wa u buul máak?

PAX ICH

Baʼax ku yaʼalik le Bibliaoʼ

Le Bibliaoʼ maʼatech u tsolik yaʼab baʼaloʼob yoʼolal le buuloʼ. Chéen baʼaleʼ ku taasik principioʼob ku yáantkoʼon k-naʼateʼ le buuloʼ junpʼéel kʼeban tu táan Dios (Efesios 5:17). a

Le buuloʼ junpʼéel baʼal jach u pʼekmaj Jéeoba tumen ku beetik u píitmáan u tsʼíiboltik máak junpʼéel wa baʼax (1 Corintios 6:9, 10; Efesios 5:3, 5). Le máax ku buuloʼ ku tsʼíiboltik ka perdernak le máax yéetel ku báaxaloʼ utiaʼal ka pʼáataktiʼ le taakʼinoʼ. Pero le Bibliaoʼ ku yaʼalikeʼ kʼaas u tsʼíiboltik máak baʼax maʼ u tiaʼaliʼ (Éxodo 20:17; Romanos 7:7; 13:9, 10).
Kex maʼ tu yoʼolal yaʼab taakʼin ku buul máakeʼ, jujunpʼíitil jeʼel u káajal u maas yaabiltik le taakʼinoʼ (1 Timoteo 6:9, 10).
U suukileʼ le máaxoʼob ku buuloʼoboʼ ku confiaroʼob tiʼ u suerteʼob. Chéen baʼaleʼ lelaʼ maʼ maʼalobiʼ tumen tu táan Dioseʼ u confiar máak tiʼ le suerteoʼ bey ka adorartaʼak imagenoʼobeʼ (Isaías 65:11).
Le Bibliaoʼ ku yaʼalikeʼ tu lugar u buul máak utiaʼal u séeb yantaltiʼ taakʼineʼ maas maʼalob ka u tsʼáa u yóol meyaj (Eclesiastés 2:24; Efesios 4:28). Le máaxoʼob ku beetkoʼob baʼax ku yaʼalik le Bibliaoʼ ku meyajoʼob «utiaʼal u náajaltikoʼob baʼal u jaantoʼob» (2 Tesalonicenses 3:10, 12).
Le buuloʼ ku beetik u yuʼubikuba máak maas maʼalob tiʼ u maasil, pero leloʼ ku bin tu contra le baʼax ku yaʼalik le Bibliaoʼ (Gálatas 5:26).

a Le buuloʼ wa u báaxal máak yoʼolal taakʼin wa yoʼolal uláakʼ baʼaxeʼ chéen juntéen ku chʼaʼchiʼitaʼal teʼ Bibliaoʼ. Letiʼe ka buulnaj le soldadoʼob utiaʼal u yilkoʼob tiʼ máax kun pʼáatal u nookʼ Jesúsoʼ (Mateo 27:35; Juan 19:23, 24).