Baʼax ku yaʼalik le Bibliaoʼ

 Utiaʼal k-ojéeltik baʼax kʼiin kéen xuʼulsaʼak le yóokʼol kaaboʼ unaj k-naʼatik bix u meyaj le tʼaan «yóokʼol kaab» teʼ Bibliaoʼ. Le tʼaan kósmos yaan ich griegooʼ ku traducirtaʼal «yóokʼol kaab», lelaʼ u kʼáat u yaʼal junmúuchʼ máakoʼob yéetel maases ku meyaj utiaʼal u yúuchul tʼaan tiʼ le máaxoʼob maʼatech u beetkoʼob baʼax uts tu tʼaan Diosoʼ (Juan 15:18, 19; 2 Pedro 2:5). Yaan kʼiineʼ le tʼaan kósmosoʼ ku meyaj utiaʼal u yaʼalaʼal bix kuxlik le máakoʼoboʼ (1 Corintios 7:31; 1 Juan 2:15, 16). a

¿Baʼax u kʼáat u yaʼal u xuʼulsaʼal tiʼ le yóokʼol kaaboʼ?

 Yaʼab bibliaʼobeʼ le kéen tʼaanakoʼob tiʼ u xuul yóokʼol kaabeʼ ku traducirkoʼob beyaʼ: «u xuul le baʼaloʼobaʼ» wa «u xuul le kʼiinoʼobaʼ» (Mateo 24:3; Reina-Valera, 1977). Jeʼex k-ilkoʼ maʼ táan u tʼaan tiʼ u xuʼulsaʼal le Luʼum tuʼux kajaʼanoʼonaʼ mix tiʼ tuláakal u máakiloʼobiʼ, baʼaxeʼ táan u tʼaan tiʼ u xuul le baʼaxoʼob u beetmaj wíinik teʼ yóokʼol kaabaʼ (1 Juan 2:​17).

 Le Bibliaoʼ ku yaʼalikeʼ «yaan u xuʼulsaʼal tiʼ le kʼasaʼan máakoʼoboʼ», beyoʼ le máaxoʼob utsoʼoboʼ yaan u kuxtaloʼob utiaʼal mantatsʼ way Luʼumeʼ (Salmo 37:​9-​11). Yaan u xuʼulsaʼaloʼob tu yáamil le kʼiinoʼob ku yaʼalik le Biblia yaan «u sen muʼyaj máak[oʼ]» tak ken kʼuchuk le baʼateʼel ku kʼaabaʼtik Armagedónoʼ (Mateo 24:21, 22; Apocalipsis 16:14, 16).

¿Baʼax kʼiin kéen xuʼulsaʼak le yóokʼol kaaboʼ?

 Jesúseʼ tu yaʼalaj: «U kʼiinil yéetel u yoraileʼ mix máak u yojel, mix le ángeloʼob yanoʼob teʼ kaʼanoʼ, mix le Paaloʼ, chéen le Taataoʼ» (Mateo 24:36, 42). Tsʼoʼoleʼ tu yaʼaleʼ le kʼiinaʼ «yaan xan u kʼuchul tiʼ junpʼéel hora maʼ táan [u páaʼtaʼaliʼ]» (Mateo 24:44).

 Kex maʼ tu páajtal k-ojéeltik baʼax kʼiin yéetel baʼax hora kun úuchul lelaʼ, Jesúseʼ tu yaʼalaj jujunpʼéel baʼaloʼob «kun eʼesik» jach taʼaytak u xuʼulsaʼal tiʼ le yóokʼol kʼaabaʼ (Mateo 24:​3, 7-​14). Tiʼ le kʼiinoʼob jeʼelaʼ ku yaʼalaʼaltiʼ «u tsʼook kʼiinoʼob» (Daniel 12:4; 2 Timoteo 3:​1-5).

¿Yaan wa u xuʼulsaʼal tuláakal baʼal?

 Maʼ. Le Luʼum tuʼux kajaʼanoʼonaʼ maʼ kun xuʼulsbil, le Bibliaoʼ ku yaʼalikeʼ «mix bikʼin u péeksaʼal tuʼux yaan» (Salmo 104:5). Tsʼoʼoleʼ ku yaʼalik xaneʼ «le máaxoʼob ku beetkoʼob baʼax maʼaloboʼ yaan u pʼáatloʼob way luʼumeʼ, way kun kajtaloʼob utiaʼal mantatsʼeʼ» (Salmo 37:29). Dioseʼ yaan u béeykuntik baʼax u tukultmaj desde tu káajbal:

•   Yaan u sutik paraísoil le Luʼumaʼ (Isaías 35:1; Lucas 23:43).

•   Mix máak kun sajaktal (Miqueas 4:4).

•   Yaan u yantal maʼalob meyaj tiʼ tuláakal máak (Isaías 65:21-​23).

•   Mix máak kun kʼojaʼantal mix kun chʼíijil (Job 33:25; Isaías 33:24).