Baʼax ku yaʼalik le Bibliaoʼ

 Le tʼaan u kaʼa síijil máakoʼ ku tsʼáaik naʼatbil u biskuba Dios yéetel juntúul máak (Juan 3:3, 7). Dioseʼ ku kʼamik bey u paalaloʼob le máaxoʼob ku kaʼa síijloʼoboʼ yéetel ku kʼuchul u beetubaʼob parte tiʼ u familia (Romanos 8:15, 16; Gálatas 4:5; 1 Juan 3:1). Ku yúuchul jeʼex kéen adoptartaʼak juntúul chan paaleʼ, le kéen tsʼoʼokok u adoptartaʼaleʼ ku pʼaatal parte tiʼ le familiaoʼ (2 Corintios 6:18).

¿Baʼaxten ku kʼaʼabéettal u kaʼa síijil máak?

 Jesúseʼ tu yaʼalaj: «Wa maʼ tu síijil máak tu kaʼatéeneʼ maʼ tu páajtal u yilik u Reino Dios» (Juan 3:3). Le tekstoaʼ táan u tʼaan tiʼ le oportunidad ku yantal tiʼ wa máax utiaʼal u beetkuba reyil yéetel Cristo tiʼ u Reino Diosoʼ. Le Bibliaoʼ le kéen u yaʼal «u síijil máak tu kaʼatéeneʼ» chéen táan u yaʼalik ku yantal u oportunidadil u kʼamik máak junpʼéel herencia «líiʼsaʼan teʼ kaʼanoʼ» (1 Pedro 1:3, 4). Le oʼolal Dioseʼ ku prometertik tiʼ le máaxoʼob ku síijloʼob tu kaʼatéenoʼ yaan u kʼuchul u beetubaʼob reyil yéetel yaan u gobernaroʼob yéetel Jesús teʼ kaʼanoʼ (2 Timoteo 2:12; 2 Corintios 1:21, 22).

¿Bix túun le u síijil máak tu kaʼatéenoʼ?

 Jesúseʼ tu yaʼaleʼ: «Utiaʼal u síijil máakeʼ kʼaʼabéet u yokjaʼ yéetel jaʼ bey xan u tsʼaʼabal espíritu santo tiʼ» (Juan 3:5). Le baʼax tu yaʼalaj Jesús teʼ tekstoaʼ ku tsʼáaik naʼatbil kʼaʼabéet u yokjaʼ máak yéetel jaʼ, kéen tsʼoʼokkeʼ yéetel espíritu santo (Hechos 1:5; 2:1-4).

 Jesúseʼ letiʼ le máax yáax kaʼa síijoʼ. Le kaʼa tsʼoʼok u yokjaʼ teʼ río Jordánoʼ, yéeyaʼab wa tsʼaʼab u yokjaʼ yéetel espíritu santo. Bey túunoʼ Jesúseʼ kaʼa síij bey u hijo Dioseʼ yéetel anchajtiʼ u esperanzail u kaʼa bin teʼ kaʼanoʼ (Marcos 1:9-11). Lelaʼ béeychaj chéen úuchik u kaʼa kuxkíintaʼal tumen Dios bey juntúul espíritueʼ (Hechos 13:33).

 Uláakʼ máakoʼob xaneʼ ku kaʼa síijloʼob le kéen tsʼaʼabak u yokjaʼob yéetel jaʼ antes tiʼ u kʼamkoʼob le espíritu santooʼ (Hechos 2:38, 41). a Le kéen u kʼamoʼob le espíritu santooʼ ku yantaltiʼob u esperanzail u binoʼob teʼ kaʼan le kéen kaʼa kuxkíintaʼakoʼob tumen Diosoʼ (1 Corintios 15:42-49).

Baʼaloʼob maʼ jaajtak ku creertaʼal yoʼolal u kaʼa síijil máakoʼ

 Baʼax ku creertaʼal: Cada máak kun yéeyik wa yaan u kaʼa síijil.

 U jaajil: Tuláakloʼon jeʼel u páajtal k-amigotik Dioseʼ yéetel k-salvartikba (1 Timoteo 2:3, 4; Santiago 4:8). Chéen baʼaleʼ maʼ tuláakal máak jeʼel u páajtal u kaʼa síijileʼ jach chéen le máaxoʼob ku yéeyaʼaloʼob tumen Dios yéetel espíritu santooʼ. Le Bibliaoʼ ku yaʼalikeʼ u kaʼa síijil máakeʼ «maʼ tu yúuchul tumen bey u tsʼíiboltik máakoʼ mix tumen jach u tsʼaamaj u yóoliʼ, baʼaxeʼ ku yúuchul tumen bey u kʼáat Diosoʼ» (Romanos 9:16). Le tʼaan «u síijil máak tu kaʼatéeneʼ» jeʼel xan u páajtal u yaʼalaʼal ku síijil desde teʼ kaʼanoʼ, lelaʼ u kʼáat u yaʼaleʼ chéen Dios yéeyikoʼob (Juan 3:3).