Xeen tiʼ baʼax ku taasik

U testigoʼob Jéeoba

Yéey u idiomail maaya

Tsʼaʼab kʼaj óoltbil jw.org tuláakal tuʼux

Tsʼaʼab kʼaj óoltbil jw.org tuláakal tuʼux

Tu mesil agosto tiʼ 2014, u j-jaajkunajoʼob Jéeoba tiʼ tuláakal yóokʼol kaabeʼ tu tʼoxoʼob junpʼéel tratado ku tʼaan yoʼolal le kúuchil jw.org. Yoʼolal le baʼax tu beetoʼoboʼ yaʼabchaj 20% le máaxoʼob ookoʼob jw.org. Teʼ mesoʼ óoliʼ 65 millones máakoʼob ookoʼobiʼ. Tiʼ tuláakal yóokʼol kaab xaneʼ 10,000 máakoʼob kʼáat teʼ jw.org ka kaʼansaʼakoʼob yéetel le Bibliaoʼ. ¡U 67% maas yaʼab ke tu mesil julio tiʼ 2014! Le noj kʼaʼaytaj beetaʼaboʼ jach tu yáantaj máakoʼob tiʼ tuláakal yóokʼol kaab.

Máaxoʼob kaxtik u núukil le kʼáatchiʼob maas kʼaʼanaʼantakoʼ

Juntúul j-Jaajkunaj kajaʼan Canadaeʼ tu saludartaj Madeline, juntúul koʼolel tu yilaj teʼ elevadoroʼ, ka tu yeʼesajtiʼ le tratado ¿Tuʼux jeʼel a kaxtik u núukil le kʼáatchiʼob maas taak a wojéeltikoʼ? Madelineʼ tu yaʼaleʼ junpʼéel áakʼab anteseʼ orarnaj tiʼ Dios desde tu balcón utiaʼal u kʼáatiktiʼ ka u yáant u kaxt u núukil jujunpʼéel kʼáatchiʼob jeʼex le ku chíikpajal teʼ tratadooʼ. Tsʼoʼoleʼ kex tʼaanaj tiʼ teléfono tiʼ jejeláas iglesiaʼob utiaʼal u kʼáatik ka kaʼansaʼak yéetel le Bibliaoʼ, mix tuʼux aʼalaʼabtiʼ wa jeʼel u yáantaʼaleʼ. Ka túun káaj u xook yéetel u j-jaajkunajoʼob Jéeoba.

Máaxoʼob maʼ jach u kʼaj óoloʼob le Bibliaoʼ

Teʼ Filipinasoʼ, Rowenaeʼ tʼaanaj yéetel juntúul chino waʼalakbal maan tiʼ junpʼéel restaurant. Rowenaeʼ tu tichʼaj le tratado tiʼoʼ ka tu tsolajtiʼeʼ u j-jaajkunajoʼob Jéeobaeʼ taak u yáantkoʼob tuláakal máak kaanbal tiʼ le Bibliaoʼ.

Le máakoʼ tu yaʼaleʼ mix juntéen u yilmaj le Bibliaoʼ. Le ka tsikbalnajoʼoboʼ taakchaj u bin tiʼ junpʼéel asamblea tiʼ u j-jaajkunajoʼob Jéeoba. Ka tsʼoʼokeʼ tu yaʼaleʼ taak u yojéeltik u maasil yoʼolal le Bibliaoʼ yéetel yaan u yéemsik le Biblia teʼ jw.org.

Le kóokoʼoboʼ

Guillermo, juntúul kóok kajaʼan Españaeʼ, tu nuptáantaj Jorge, juntúul u yéet xook kaʼachi yéetel kóok xan. Jorgeeʼ tu tsikbaltajtiʼ maʼ úuch kíimik u maamaiʼ yéetel yaʼab baʼaxoʼob taak u yojéeltik yoʼolal le kuxtaloʼ. Guillermoeʼ tu tsʼáaj le tratado tiʼoʼ ka tu tsolaj bix jeʼel u kaxtaʼal le videoʼob tsʼaʼan ich señas teʼ jw.org, tuʼux ku tsoʼolol le baʼaxoʼob taak u yojéeltikoʼ. Guillermoeʼ tu invitartaj xan utiaʼal u bin teʼ muchʼtáambal ku beetaʼal teʼ Najil Reinooʼ. Jorgeeʼ biniʼ, yéetel desde leloʼ maʼ u pʼax mix junpʼéel muchʼtáambaliʼ, kex náach kajaʼan, 60 kilómetros tiʼ u Najil Reino.

Máaxoʼob náach kajaʼanoʼob

Kex chan yaʼab u xuupileʼ, kaʼatúul j-Jaajkunajoʼob yéetel u yatanoʼobeʼ seis horas viajarnajoʼob tiʼ junpʼéel chan barco tu luʼumil Groenlandia utiaʼal u kʼuchloʼob tuʼux kajaʼan 280 máakoʼob. Ka kʼuchoʼobeʼ kʼaʼaytajnajoʼob, tu tʼoxoʼob tratadoʼob yéetel tu yeʼesoʼob tiʼ le máakoʼob junpʼéel video tiʼ jw.org ich groenlandés. Káaj xan u tsʼáaikoʼob xook tiʼ juntúul máak yéetel u yatan. Bejlaʼeʼ kaʼatéen cada semana ku xookoʼob tiʼ teléfono.

Maʼ chéen teʼ xaman úuch baʼaloʼob beyaʼ. Teʼ Nicaraguaoʼ le j-Jaajkunajoʼoboʼ tu kaxtoʼob u formail u kʼuchloʼob yiknal le máakoʼob tʼanik mayangna kajaʼanoʼob tu kʼáaxiloʼob le Caribeoʼ. Yáaxeʼ viajarnajoʼob 20 horas ichil junpʼéel autobús takchalankil u bin, tsʼoʼoleʼ jach táaj kʼaas le bejoʼ. Ka tsʼoʼokeʼ xíimbalnajoʼob 11 horas, yaan tuʼuxeʼ tak ich luukʼ, hasta ka kʼuchoʼob teʼ mejen kaajoʼoboʼ. Teʼeloʼ tu tʼoxoʼob tratadoʼob yéetel tu yeʼesoʼob videoʼob ich mayangna. Le máakoʼoboʼ hasta jaajap u chiʼob táan u chaʼantikoʼob.

Tu nukuch kʼáaxiloʼob Brasil xaneʼ, Estelaeʼ tu tichʼaj le tratado tiʼ juntúul máak chéen máan tu beetaj teʼ chan kaajoʼ. Le máakoʼ tu chʼaʼaj le tratadooʼ pero chéen tu tsʼeʼpaktaj, ka tu jupaj tu bolsa. Le táan u bin tu yotochoʼ, kʼaschaj u chan barcoeʼ ka pʼáat chúumuk tiʼ le ríooʼ. Mientras u páaʼtik máax áantikeʼ, le máakoʼ tu xokaj le tratadooʼ. Yéetel u celulareʼ ook Internet teʼ jw.org, tu xokaj jejeláas temaʼob, ka tu yéemsaj xan jujunpʼéel videoʼob. Ka máan wa jaypʼéel kʼiineʼ tu kʼaj óoltaj u yíicham Estelaeʼ ka tu yaʼalaj ka u tsʼáa u diosboʼotikil Estela yoʼolal le tratadooʼ. «Le baʼaxoʼob tin xokoʼ tu yáanten in tranquilizarkinba le ka pʼáaten teʼ ríooʼ —​tu yaʼalaj le máakoʼ​—. In paalaleʼ jach utschaj tu yichoʼob u videoiloʼob Caleb. Yaan u seguer in wokol teʼ jw.org.»